News

POST TYPE

EDITORIAL

မြန်မာတို့အတွက် အရေးကြီးသည့် စိတ်ဓာတ်ဖွံ့ဖြိုးရေး (Daily, Vol-7/No-28)
14-May-2019
မြန်မာ့နိုင်ငံရေးအကြောင်း၊ ဖွံ့ဖြိုးရေးအကြောင်း၊ ဒီမိုကရေစီအကြောင်း ပြောဆိုဆွေးနွေးကြသူများအကြား ယေဘုယျ တူညီသည့် မှတ်ချက်တစ်ခုရှိပါသည်။ ရုပ်ဝတ္ထုပိုင်းဆိုင်ရာ ဖွံ့ဖြိုးတိုးတက်များကို ဓနအင်အားဖြင့် အချိန်ကာလတိုအတွင်း တည်ဆောက်ရယူနိုင်သော်လည်း စိတ်ပိုင်းဆိုင်ရာ ဖွံ့ဖြိုးမှု နိမ့်ကျနေမှုကို တည်ဆောက်ယူရန် အချိန်ကြာမြင့်လိမ့်မည်ဟူသည့် မှတ်ချက်ပင်ဖြစ်ပါသည်။

စိတ်ပိုင်းဆိုင်ရာ ဖွံ့ဖြိုးမှုနိမ့်ကျသည်ဟုဆိုရာတွင် အကျင့်စာရိတ္တ၊ ကိုယ်ကျင့်တရား စသည်တို့အပေါ် တန်ဖိုးထားမှု လျော့နည်းလာခြင်း၊ ပြည်သူ့နီတိ ကဲ့သို့သော အဆုံးအမမျိုးကို အလေးမထားခြင်း၊ တာဝန်သိစိတ် လျော့နည်းခြင်းစသည်တို့ကို ဆိုလိုပေသည်။ စာဖတ်သူများ မကြာခဏဆိုသလို ကြားဖူးကြမည့် အဆိုပါမှတ်ချက်သည် ရုတ်တရက်ဆိုလျှင် မိမိဘက်က ဘာတစ်ခုမျှ မပြုလုပ်နိုင်၊ နိုင်ငံတော် အစိုးရဘက်ကလည်း ဘာမှမစွမ်းနိုင်သည့်သဘောကိုဆောင်နေပြီး အရေးမကြီးသလို ဖြစ်နေပါလိမ့်မည်။ သို့သော် အလေးအနက် စဉ်းစားကြည့်မည်ဆိုလျှင် ကြက်သီးထစရာ ကောင်းလောက်အောင်ကို အရေးကြီးလှသည့်ကိစ္စပင်ဖြစ်ပေသည်။

အကြောင်းမှာ စိတ်ပိုင်းဆိုင်ရာ ဖွံ့ဖြိုးမှု၊ အဆင့်အတန်းမြင့်မားမှု မရှိသူများ၊ အထူးများပြားသည့် လူ့အဖွဲ့အစည်းဖြင့် ခေတ်မီဖွံ့ဖြိုးတိုးတက်သည့် ဒီမိုကရေစီ နိုင်ငံတော်သစ် ဟူသည်မှာ စိတ်ကူးယဉ်သက်သက်သဘောမျိုးသာ ဖြစ်နေနိုင်သောကြောင့်ပင်။ ထို့ပြင် ဗုဒ္ဓဘာသာဝင် အများစုနေထိုင်ရာ၊ တစ်နည်းအားဖြင့် မြတ်ဗုဒ္ဓ၏ အဆုံးအမကို လက်ခံသူများနေထိုင်ရာ နိုင်ငံဖြစ်ပါလျက် စိတ်ပိုင်းဆိုင်ရာ ဖွံ့ဖြိုးမှု နိမ့်ကျသည်ဟု ဆိုရခြင်းမှာလည်း စဉ်းစားကြည့်လျှင် လွန်စွာ ရှက်စရာကောင်းလှပေသည်။ မြတ်ဗုဒ္ဓ၏ အဆုံးအမကို လက်ခံသော်လည်း လိုက်လံကျင့်းသုံးသူ နည်းပါးလွန်းသည်ဟုပင် ဆိုရပေမည်။

ယနေ့ခေတ်အခါတွင် ဖွံ့ဖြိုးပြီး အနောက်နိုင်ငံများတွင် ဗုဒ္ဓအဆုံးအမများကို ပညာရပ်ပိုင်းဆိုင်ရာ ရှုထောင့်မှ စနစ်တကျ လေ့လာပြီး စိတ်ပိုင်းဆိုင်ရာ ဖွံ့ဖြိုးမှုအတွက် အထောက်အပံ့ဖြစ်မည့် အချက်များကို အလေးအနက်ထား ဆွေးနွေးပြီး လက်ခံကျင့်သုံးရန် ကြိုးပမ်းသူများကို တွေ့မြင်လာရပါသည်။

မကြာသေးခင်က ကမ္ဘာကျော် Twitter လူမှုကွန်ရက်ကို တည်ထောင်သူ ဂျက်ဒေါ်ဆေးသည်ပင် မြန်မာနိုင်ငံအလယ်ပိုင်း မန္တလေးမြို့ဘက်သို့ လူမသိ၊ သူမသိ လာရောက်ပြီး စိတ်ပိုင်းဆိုင်ရာ ဖွံ့ဖြိုးရေးအတွက် ကမ္မဋ္ဌာန်းတရားကို အလေးအနက်ထား အားထုတ်သွားပေသည်။ ဤနိုင်ငံတွင် စိတ်ပိုင်းဆိုင်ရာ ဖွံ့ဖြိုးတိုးတက်ရေးအတွက်  ရေခံမြေခံကောင်းများ သေချာပေါက် ရှိနေသည့်အချက်ကို မြန်မာနိုင်ငံသားတို့အနေနှင့် အထူးပင် ဂရုတစိုက်ရှိသင့်လှပေသည်။

ပို၍ဆိုရလျှင် သည်ဘက်ခေတ်တွင် စိတ်ကြွရူးသွပ်ဆေးများ အပါအဝင် အရက်နှင့် ဘီယာကဲ့သို့သော စိတ်ကိုပြောင်းလဲသွားအောင် လုပ်နိုင်ပြီး မူးယစ်မေ့လျော့စေသည့် အရာများအပေါ် အမှီသဟဲပြုသူများ များပြားလာခြင်းသည် စိတ်ပိုင်းဆိုင်ရာ ဖွံ့ဖြိုးမှုနိမ့်ကျလာခြင်း၊ တစ်နည်းအားဖြင့် စိတ်ဖွံ့ဖြိုးမှုကို စည်းစနစ်တကျ တည်ဆောက်ပေးနိုင်သည့် သင်ကြားမှုများနှင့် အလှမ်းဝေးလာခြင်းကြောင့်ပင်ဖြစ်ပေသည်။


မည်သို့ပင်ဖြစ်စေ မြန်မာအများစု ပြောလေ့ရှိသည့်အတိုင်း ရုပ်ပိုင်းဆိုင်ရာ ဖွံ့ဖြိုးမှုဟူသည် ငွေကြေးနှင့် ရင်းနှီးမြှုပ်နှံမှုကောင်းများရှိလျှင် တစ်ခဏတာအတွင်း ဖန်တီးနိုင်ပြီး စိတ်ဓာတ်ပိုင်းဆိုင်ရာ ဖွံ့ဖြိုးရေးကို အလွယ်တကူ ဆောင်ကြဉ်းရန် မလွယ်ဟူသည့် အယူအဆမှာ ယေဘုယျမှန်သော်လည်း ဘာသာရေးခေါင်းဆောင်များနှင့် အဖွဲ့အစည်းများ အပါအဝင် စစ်မှန်သည့်စိတ်ပိုင်းဆိုင်ရာ ဖွံ့ဖြိုးမှုကို အမှန်တကယ် တွေ့လိုမြင်လိုသူများက စိတ်ပိုင်းဆိုင်ရာ ဖွံ့ဖြိုးမည့်နည်းလမ်းများကို စနစ်တကျ လေ့ကျင့်သင်ကြားပေးနိုင်မည်ဆိုပါက စိတ်ဓာတ်ရင့်ကျက်သည့် လူ့အဖွဲ့အစည်းတစ်ခုကို အချိန်တိုအတွင်း တည်ဆောက်နိုင်မည်ဖြစ်သည်ဟု ယုံကြည်ကြောင်း ဖော်ပြလိုက်ရပါသည်။

အယ်ဒီတာ (၁၃- ၅ -၂၀၁၉)