News

POST TYPE

EDITORIAL

စီးပွားရေး တက်သလား၊ ကျသလား ဘာလုပ်ကြမလဲ (Daily, Vol-7/No-25)
09-May-2019
မျက်မှောက် မြန်မာ့စီးပွားရေး ကျဆင်းနေသလောဟူသည့်မေးခွန်းကို ပုဂ္ဂလိက လုပ်ငန်းရှင် အများစုက ကျနေသည်ဟု ဖြေဆိုကြမည်ဖြစ်သော်လည်း အစိုးရတာဝန် ရှိသူများကမူ မကျသည့်အပြင် တက်နေပါသည်ဟု ပြောနေကြခြင်းမှာ လတ်တလော ရင်ဆိုင်နေရသည့် အခြေအနေဖြစ်သည်။

စီးပွားရေးကျနေသည်ဟု ပြောနေကြသူအများစုမှာ ပြည်တွင်းတွင် လုပ်ငန်း ထူထောင် လုပ်ကိုင်နေကြသူအများစုဖြစ်ပြီး စီးပွားရေးတက်နေသည်ဟု ဆိုသူများမှာ နိုင်ငံလုံးချီ စီးပွားရေးတစ်ခုလုံးကို စာရင်းဇယားဖြင့်ကြည့်၍ ပြောဆိုနေကြသည့် စီးပွားရေးနှင့် နှီးနွှယ်သော အစိုးရတာဝန်ရှိသူများဖြစ်ကြသည်။

လက်ရှိအစိုးရ၏ စီးပွားရေးဆိုင်ရာမူဝါဒ မပြတ်သားခြင်း၊ အချိန်မဆိုင်း လုပ်သင့်လုပ်ထိုက်သည်များကို နှောင့်နှေးကြန့်ကြာ အချိန်ဆွဲခြင်း၊ စီးပွားရေးဆိုင်ရာ အရေးကြီး ရာထူးနေရာများကို လူတစ်စု၏ အဆိုပြုထောက်ခံမှုဖြင့်သာ ခေါက်ရိုး ကျိုးပုံစံ ခန့်ထားတာဝန်ပေးခြင်း၊ ငွေကြေးမူဝါဒ၊ ဘဏ္ဍာရေးမူဝါဒ၊ ဘဏ်လုပ်ငန်း ဆိုင်ရာ မူဝါဒများ အံချော်နေခြင်း တစ်နည်းအားဖြင့် ရောဂါနှင့် ကုထုံးအပ်စပ်မှုမရှိ ခြင်းတို့ကြောင့် စီးပွားကျနေသည်ဟု အပ်ကျမပ်ကျ မပြောနိုင်သော်ငြား နိုင်ငံလုံး ဆိုင်ရာ စီးပွားရေး တန့်ရပ်၊ တုံ့ဆိုင်းနေသည်မှာမူ ထင်ရှားသောအချက်ဖြစ်သည်။

အချို့ကမူ မက်ခရိုစီးပွားရေး ခေါ် နိုင်ငံခြုံလွှမ်းစီးပွားရေးက တက်နေသည့် သဘောဟု ရှုမြင်ကြပြီး နိုင်ငံသားအများစု၏ အကြီးစား၊ အလတ်စား၊ အသေးစား စီးပွားရေးလုပ်ငန်းများ ကျဆင်းနေသည်ဟု ပြောနိုင်ကြောင်း သုံးသပ်ကြသည်။ ထို့ကြောင့် လက်ရှိ မြန်မာ့စီးပွားရေးသည် ကျလည်းကျ၊ တန့်လည်းတန့်၊ တက်လည်း တက်နေသည်ဟု ကြားချပြောရမလို ဖြစ်နေပေသည်။

ဤနေရာတွင် စီးပွားရေးကျခြင်း၊ တက်ခြင်းဟူသော အမြင်နှစ်မျိုးကွဲပြားနေခြင်းနှင့်ပတ်သက်၍ နိုင်ငံရေးအခြေပြု ဆန်းစစ်သုံးသပ်သူအချို့က အမြင်နှစ်မျိုးဖြင့် ရှုမြင်မှတ်ချက်ပေးကြသည်။ ပထမတစ်မျိုးမှာ အစိုးရကို ထောက်ခံသောအမြင်ဖြစ်ပြီး နောက်တစ်မျိုးမှာ အစိုးရကို ဆန့်ကျင်သောအမြင်ဟု ယေဘုယျပြောနိုင်သည်။

အစိုးရကို ထောက်ခံသည်ဖြစ်စေ၊ အစိုးရက ပညာရှင်အစစ်အမှန်များကို သူ့နေရာနှင့်သူ အသုံးမချ၍ဖြစ်စေ၊ တီးမှမြည်သော ခေါင်းလောင်းများနှင့်တူသော ပညာရှင်များကို ဘုန်းတော်ကြောင့် သူ့အလိုလို မြည်လာစေလိုသူ အစိုးရခေါင်းဆောင်အချို့၏ ပဒေသရာဇ်စရိုက်မကင်းသော မာန်မာနကို မကြိုက်နှစ်သက်၍ဖြစ်စေ၊ မိမိကဲ့သို့ပညာရှင်ကို မသုံးရကောင်းလားဟူသော မခံချင်စိတ်ကြောင့်ဖြစ်စေ စီးပွားရေး ကျဆင်းကြောင်း မမျှတသည့် ကိန်းဂဏန်းများဖြင့်နှိုင်းယှဉ်ကာ နှိမ်နှိမ်ချချ ပစ်ပစ်ခါခါ ပြောဆိုသုံးသပ်နေကြခြင်းမှာလည်း မျှတမှုမရှိပေ။

ထို့အပြင် အရာရာ ချစ်သည့်မျက်စိ၊ ကြည်ညိုသည့် စိတ်နှလုံးဖြင့် အစိုးရ လုပ်သမျှ နည်းမျိုးစုံ၊ သီအိုရီမျိုးစုံဖြင့်မှန်ကြောင်း၊ ထောက်ခံကြောင်း၊ သင့်မြတ်လျော်ကန်ကြောင်း ရှေ့နေလိုက်ပြီး နိုင်ငံ၏ ပကတိအခြေအနေနှင့် များစွာကင်းကွာနေခြင်းမှာလည်း မသင့်တော်လှပေ။

ဖြစ်သင့်သည်မှာ နိုင်ငံ့စီးပွားအခြေအနေကို မက်ခရို၊ မိုက်ခရို ရှုထောင့် အသီးသီးမှ စနစ်တကျ ကောက်ခံပြုစုထားသော မှန်မှန်ကန်ကန် ကိန်းဂဏန်း၊ စာရင်းဇယားများကို အခြေပြု၍ အဖြစ်မှန်ကို ရဲရဲရင်ဆိုင်ကာ လက်တွေ့ကျကျ ဖြစ်နိုင်ခြေရှိသော ရေတို၊ ရေရှည်နည်းလမ်းများဖြင့် အချိန်မီကုစားရေးပင်ဖြစ်သည်။

အထူးသဖြင့် နိုင်ငံတကာ ဖိအားများ၊ ပြည်တွင်းရှိ အာဏာစွဲလမ်းမှုရောဂါ စွဲကပ်နေသူများ၏ အောက်လမ်းနည်းဆန်ဆန် လုပ်ကြံ၊ ချောက်တွန်းမှုများဖြင့် ရင်ဆိုင်နေရသောကြောင့် စိုးရိမ်ရေမှတ်ရောက်နေသော နယ်ပယ်အသီးသီးကို အထက်ဆိုခဲ့ပါ အစွန်းရောက်သော အမြင်နှစ်မျိုးဖြင့် ချဉ်းကပ်၊ ဝေဖန်၊ ချေပ၊ ဖိနှိပ်၊ မြှောက်ပင့်နေကြခြင်းကို ရပ်တန့်ကာ စုပေါင်းအားဖြင့် ညီညွတ်စွာ ကူညီကယ်မကြပါမည့်အကြောင်း အလေးအနက် တိုက်တွန်းအပ်ပေသည်။

အယ်ဒီတာ (၁၀-၅-၂၀၁၉)

(၅-၈-၂၀၁၇ နေ့ထုတ် The Voice Daily သတင်းစာတွင်ဖော်ပြခဲ့ပြီးသော အယ်ဒီတာ့အာဘော်ကို ပြန်လည်ဖော်ပြခြင်းဖြစ်ပါသည်။)