News

POST TYPE

EDITORIAL

သူတို့အမှုက ယူစရာသင်ခန်းစာ (Daily, Vol-7/No-23)
07-May-2019
နိုင်ငံတော်လျှို့ဝှက်ချက် အက်ဥပဒေချိုးဖောက်မှုဖြင့် ထောင်ဒဏ်ရ ပြစ်ဒဏ်ချမှတ်ခံခဲ့ရသော ရိုက်တာသတင်းထောက် ကိုဝလုံးနှင့် ကိုကျော်စိုးဦးတို့ မေလ ၇ ရက်နေ့တွင် နိုင်ငံတော်သမ္မတ၏ လွတ်ငြိမ်းချမ်းသာခွင့်နှင့်အတူ လွတ်မြောက်လာသည့်သတင်းမှာ သတင်းမီဒီယာ လောကတစ်ခုတည်းအတွက် သာမက ဒီမိုကရေစီစံနှုန်းများ ပြည့်ဝသည့် နိုင်ငံသစ် ထူထောင်ရေးအတွက်ပါ သတင်းကောင်းတစ်ရပ်ဖြစ်ပေသည်။

ရိုက်တာသတင်းထောက်နှစ်ဦးမှာ ထောင်ခြောက်ဆင်၍ ဖမ်းဆီးခံရခြင်းဖြစ်သည်ဟု တရားရုံးတော်တွင် ထွက်ဆိုခဲ့ခြင်းကြောင့် သက်သေရဲအရာရှိ ဒုတိယရဲမှူး မိုးရန်နိုင် ကိုယ်တိုင် အရေးယူခံရသည်အထိ ဖြစ်ခဲ့ရသော အဆိုပါအမှုသည် မြန်မာနိုင်ငံ၏ မီဒီယာလွတ်လွပ်ခွင့်အတွက် အရေးပါသည့် စမ်းသပ်ချက်ကြီးတစ်ရပ်လည်းဖြစ်ပေသည်။
 
၎င်းတို့အမှုကိုပြန်ကြည့်မည်ဆိုလျှင် စတင်ဖမ်းဆီးခံရချိန်၊ အမှုစစ်ဆေးနေချိန်နှင့် စီရင်ချက်ချမှတ်ချိန် စသည့်လုပ်ငန်းအဆင့်ဆင့်တွင် အငြင်းပွားစရာများနှင့် သံသယဖြစ်စရာ များစွာ ပေါ်ပေါက်ခဲ့ရရုံမျှမက နိုင်ငံအတွက် အရေးကြီးသည့် မဏ္ဍိုင်ကြီး သုံးရပ်အပေါ်တွင်လည်း ဂယက်ရိုက်စရာ၊ ဝေဖန်စရာများဖြစ်ပေါ်စေခဲ့ပါသည်။

မည်သို့ပင်ဆိုစေ ရခိုင်အရေးကိစ္စကြောင့် နဂိုကတည်းက နိုင်ငံတကာ၏ ဖိအားပေးမှုသာမက ပြည်တွင်းမှ အမျိုးသားရေးအင်အားစု၏ ပြောဆိုဝေဖန်မှုများနှင့် ရင်ဆိုင်နေခဲ့ရသော NLD အစိုးရလက်ထက် သတင်းလွတ်လပ်ခွင့် ကျဆင်းသွားပြီလောဟူ၍ မေးခွန်းထုတ်ရမလို ဖြစ်စေခဲ့သည့် ယင်းအမှုမှာ နိုင်ငံတော်သမ္မတ၏ လွတ်ငြိမ်းချမ်းသာခွင့်နှင့်အတူ အဆုံးသတ်သွားပြီဖြစ်သော်လည်း သင်ခန်းစာယူစရာများစွာ ကျန်ရစ်ခဲ့ပေသည်။

ယင်းအမှုနှင့်ပတ်သက်၍ NLD အစိုးရ၊ တပ်မတော်၊ ရဲတပ်ဖွဲ့နှင့် တရားစီရင်ရေး အာဏာပိုင်တို့အပါအဝင် သတင်းမီဒီယာသမားများအနေနှင့် သင်ခန်းစာယူစရာ များစွာရှိစေခဲ့ပါသည်။

ထို့ပြင် လိုက်နာအတုယူဖွယ် ကိစ္စတစ်ခုအဖြစ်ဆိုရလျှင် ဒုတိယရဲမှူး မိုးရန်နိုင်ပင်ဖြစ်ပေသည်။ အမှန်တရားဘက်က ကြံ့ကြံ့ခံရပ်တည်လိုစိတ်ရှိရုံသာမက အများမိုးခါရေ သောက်သော်လည်း အများနည်းတူ မသောက်ဘဲ ပြုပြင်ပြောင်းလဲလိုသည့် စိတ်ဓာတ်ရှိသော ရဲစစ်စစ်ဖြစ်ကြောင်း သက်သေပြသွားသည့် ဦးမိုးရန်နိုင်၏ ရဲဝံ့သည့် လုပ်ဆောင်ချက်ကို ပြည်သူလူထုက အမြဲအမှတ်ရနေမည်သာဖြစ်သည်။

အရေးအကြီးဆုံးကိစ္စမှာ ဒီမိုကရေစီ အစိုးရတို့ဟူသည် အခြားအာဏာရှင် အစိုးရများနှင့်မတူ ပြည်သူလူထု၏ အသက်သွေးချွေးများနှင့် ဘဝများစွာကို အရင်းပြု၍ တိုက်ပွဲဝင်ရာမှ ပြည်သူ့ဆန္ဒဖြင့် တက်လာသော အစိုးရဖြစ်ပေရာ ဒီမိုကရေစီစနစ်အတွက် အသက်တမျှ အရေးကြီးသော သတင်းလွတ်လပ်ခွင့် အပါအဝင် အခြားစံချိန်စံနှုန်းများကို အခြားအင်စတီကျူးရှင်များထက် ပို၍အလေးထားပြရမည့်အကြောင်း အကြံပြုလိုရင်းဖြစ်ပေသည်။ 

အယ်ဒီတာ (၇-၅-၂၀၁၉)