News

POST TYPE

EDITORIAL

မီးလာသည့် နိုင်ငံဖြစ်ရေး (Daily, Vol-7/No-22)
06-May-2019
ယနေ့ နိုင်ငံတွင် အထူးသဖြင့် မြန်မာပြည်သူတွေ ကြုံတွေ့နေရသည့် အခက်အခဲများအနက် လျှပ်စစ်မီးကိစ္စမှာ နေ့တဓူဝ လူမှုဘဝများမှအစ နိုင်ငံ့စီးပွားရေး ဖွံ့ဖြိုးတိုးတက်ရေးကိစ္စအထိ ဂယက်ရိုက်ခတ်မှုရှိသည်မှာ အထူးသံသယဖြစ်ဖွယ်မရှိပေ။

ခေတ်အဆက်ဆက် နိုင်ငံတော်တွင် လုံးလုံးလျားလျား တာဝန်ရှိသည်ဟု သတ်မှတ်ခဲ့ကြသည့် အဆိုပါ လျှပ်စစ်မီး ပြဿနာကိုကြည့်လျှင် လျှပ်စစ်ဓာတ်အား ထုတ်လုပ်ဖြန့်ဝေရေးနှင့်ပတ်သက်၍ ရေရှည် အသုံးတည့်သည့် စီမံခန့်ခွဲမှုမရှိခဲ့ခြင်း၊ ဖြန့်ဝေရာတွင် အခြားနိုင်ငံများကဲ့သို့ နည်းပညာကောင်းများနှင့် အဆင့်မြင့် ကိရိယာပစ္စည်းများ အသုံးမပြုနိုင်ခြင်း၊ လျှပ်စစ်ဓာတ်အား ဖြန့်ဖြူးရေးအတွက် အခြေခံ အဆောက်အဦကောင်းများ နည်းပါးခြင်း၊ ကျေးလက်ဒေသ ဖွံ့ဖြိုးမှုနိမ့်ကျပြီး အလုပ်အကိုင် အခွင့်အလမ်း ရှားပါးခြင်းကြောင့် ရန်ကုန်နှင့် မန္တလေးကဲ့သို့ မြို့ကြီးပြကြီးများသို့ ပြောင်းရွှေ့အခြေချမှု အဆမတန် မြင့်တက်နေခြင်း စသည်တို့မှစတင်ကာ မုန့်လုံးစက္ကူကပ်သည့် အနေအထားထဲသို့ ရောက်နေသည်ကို တွေ့ရပေမည်။

စွမ်းအင်ချွေတာသုံးစွဲရေးဟု ဆိုလိုက်သည်နှင့် လျှပ်စစ်မီးပင် မှန်မှန်ရအောင် ပေးနိုင်ပါ၏လောဟု အလွယ်တကူစောဒက တက်လေ့ရှိကြသည်မှာ မှန်သော်လည်း ချွေတာသုံးစွဲသည့် အလေ့အထ မြင့်တက်လာလေ မီးပြတ်တောက်မှုလည်း လျော့ကျလာနိုင်သည် ဟူသောအချက်ကိုလည်း သတိပြုကြရပေမည်။ ကျန်းမာရေးစကားအရဆိုပါက လူတစ်ဦးအနေနှင့် အားကစားဘက်တွင် အချိန်ပေးကာ ရင်းနှီးမြှုပ်နှံလိုက်ပါက ကူးစက်ရောဂါမဟုတ်ဘဲ ကြိုတင်ကာကွယ်၍ ရနိုင်သောရောဂါများကို ကာကွယ်ပြီးသားဖြစ်သွားကာ နာမကျန်းဖြစ်မှုနှုန်း လျော့ကျသွားသကဲ့သို့ပင်။

လျှပ်စစ်နှင့်ပတ်သက်၍ နိုင်ငံတော်ဘက်က အရှုံးခံပေးနေရပါသည်ဟု ဆိုသော်လည်း ယင်းမှာ မြို့ကြီးပြကြီး နေရာတွေအတွက်သာဖြစ်ပြီး အချို့နေရာဒေသများတွင်မူ မီးပုံမှန်ရရေးဟူသည် စိတ်ကူးမဆိုထားသည့် လျှပ်စစ်မီးကြိုးပင် သွယ်တန်းခွင့်မရရှိကြသေးပေရာ အချိုးကျသည့် ဆင်ခြေဟု ဆိုနိုင်မည်မဟုတ်ပေ။ ထို့ပြင် အဂတိလိုက်စားမှုနှင့် အကျင့်ပျက်ခြစားမှုကြောင့် နိုင်ငံတော်ဘက်က ရသင့်ရထိုက်သည့် ဝင်ငွေများ မရရှိသည့်ပြဿနာများကိုလည်း စုံစမ်းဖော်ထုတ်ပြီး ပြတ်ပြတ်သားသား အရေးယူသင့်လှပေသည်။

သေချာသည်မှာ လျှပ်စစ်မီး ပြဿနာတွင် နိုင်ငံတော်ဘက်ရော နိုင်ငံသားတို့ဘက်တွင်ပါ အားနည်းချက်များရှိနေပြီး ယင်းအားနည်းချက်ကို စနစ်တကျပြုပြင်သွားရမည်သာပင်ဖြစ်သည်။သို့မဟုတ်လျှင် တစ်ဖက်နှင့် တစ်ဖက် အပြန်အလှန် အပြစ်တင်ရုံ၊ အပုတ်ချရုံ၊ အခြားနိုင်ငံများ၏ တိုးတက်ဖွံ့ဖြိုးနေမှုများကို မျှော်ငေးရုံဟူသည့် ဘဝကရုန်းထွက်ရန် ခက်ခဲနေမည်သာ ဖြစ်ပေသည်။

ထို့ပြင် လျှပ်စစ်မီးကိစ္စကြောင့် ပြည်ပဈေးကွက်သို့ ထုတ်လုပ်တင်ပို့ရောင်းချသော မိမိနိုင်ငံသားလုပ်ငန်းရှင်များအနေနှင့် ပြိုင်ဘက်နိုင်ငံများမှ ထုတ်ကုန်များနှင့် ယှဉ်ပြိုင်ရာတွင် မည်မျှအတိုင်းအတာအထိ နစ်နာနေရသည်၊ မီးကြောင့် နိုင်ငံသားတစ်ဦးချင်းစီ၏ စွန့်ဦးတီထွင်လိုသော စိတ်ဓာတ်များမှအစ တစ်နိုင်ငံလုံး ဖ့ွံဖြိုးတိုးတက်မှုအထိ မည်သို့ထိခိုက်နေရသည် ဟူသောအချက်ကို အသေအချာ လေ့လာဆန်းစစ်ကာ လျှပ်စစ်မီးပြဿနာကို တစ်မျိုးသားလုံး၏ အရေးကိစ္စ တစ်ခုအဖြစ် ဝိုင်းဝန်းအဖြေရှာကြပါမည့်အကြောင်း ဖော်ပြလိုရင်းဖြစ်ပေသည်။
 
အယ်ဒီတာ (၆-၅-၂၀၁၉)