News

POST TYPE

EDITORIAL

ဒုစရိုက်သမား လူမိုက်များကို သွန်သင်ဆုံးမနိုင်ရေး (Daily, Vol-7/No-21)
06-May-2019
မြန်မာ့လူ့အဖွဲ့အစည်းတွင်း ဖြစ်ပေါ်နေသော မှုခင်းဆိုင်ရာသတင်းများကို ကြည့်လျှင် ဆိုးရွားလွန်းပြီး မနှစ်မြို့ဖွယ်ရာ သတင်းများက တစ်နေ့ထက်တစ်နေ့ ပိုမိုများပြားလာသည်ကို သတိပြုမိပါသည်။ 

ဖခင်ဖြစ်သူက ဇနီးနှင့် ကလေးငယ်ကိုသတ်ဖြတ်သည့် သတင်းမှအစ နှစ်ဦး၊ သုံးဦး၊ လေးဦးပြိုင်တူ သတ်ဖြတ်ခံရသည့်သတင်းများအဆုံး မသတီစရာ သတင်းများက သတင်းစာမျက်နှာများကို နေရာယူလာသည်မှာ စိတ်မချမ်းမြေ့စရာပင် ဖြစ်ပါသည်။ 

ထို့ပြင် ယခုကာလအတွင်းမှာပင် မန္တလေးမြို့တွင် ရဲတင်းနှင့် ဓားကဲ့သို့ လက်နက်များကိုင်ဆောင်ပြီး မိမိနှင့် ရန်ငြိုးရန်စလည်းမရှိ၊ ပြဿနာလည်းမရှိသူ မြင်မြင်သမျှကို လိုက်လံတိုက်ခိုက်သည့် သတင်းမျိုးတွေ့ မြင်လာရခြင်းသည် မြန်မာ့လူ့အဖွဲ့အစည်းကြီး ကြက်သီးထလောက်စရာကောင်းသည့် အန္တရာယ်မျိုးကျရောက်နေပြီလောဟုပင် ဆန်းစစ်စရာဖြစ်လာပေသည်။ 

ဓားလွတ်ကိုင်တိုက်ခိုက်ခြင်း (Knife Wielding Attack) ဟူသည် ယခင်က အနောက်နိုင်ငံနှင့် တရုတ်ပြည်တို့တွင် အယူဝါဒရေးရာအစွန်းရောက်နေသည့် လူမိုက်များက ၎င်းတို့နှင့် အယူဝါဒမတူညီသူများအပေါ် ကျူးလွန်သည့် ဒုစရိုက် အလုပ်တစ်ခုအဖြစ်သာ နားလည်သဘောပေါက်ခဲ့ကြရသော်လည်း မန္တလေးကဲ့သို့သော မြို့ကြီးတွင် အလားတူတိုက်ခိုက်မှုမျိုးတွေ့ မြင်လာရသောအခါ မြန်မာတွေလည်း အစွန်းရောက်ကုန်ပြီလားဟု မေးရမလိုဖြစ်သွားစေပါသည်။ 

ယခင်က မြန်မာ့လူ့အဖွဲ့အစည်းတွင် ဒုစရိုက်မှုတစ်ခုခုပြုလုပ်၍ အကျဉ်းထောင်၌ ပြစ်ဒဏ်ကျခံရသူများသည် ထောင်ကထွက်လာပြီးနောက် မိမိကျင်လည်ရာ ပတ်ဝန်းကျင်သို့ ပြန်လည်ဝင်ရောက်ကြသောအခါ ကျိုးနွံနှိမ်ချစွာဖြင့် ဘဝသစ်တစ်ခုကို ပြန်လည်တည်ဆောက်နေကြောင်း သက်သေထူပြရသည့် ဓလေ့စရိုက်ရှိကြပေသည်။ နာမည်ကျော် သရုပ်ဆောင် (ယခုပရဟိတသမား) ကျော်သူနှင့် စိုးသူတို့ ပါဝင်သရုပ်ဆောင်ထားသည့် “ဒိုး” ဇာတ်ကားကိုကြည့်လျှင် တွေ့မြင်ရပေမည်။ ထောင်ထွက်တို့၏ ချစ်စရာကောင်းသည့် ဓလေ့စရိုက်တစ်ခုဟုပင်ဆို၍ရနိုင်ပေသည်။ 

ယခုခေတ်ကာလတွင် ထောင်မှထွက်လာပါက အရာရှိများ ဘားတင်လိုက် သကဲ့သို့ ထောင်ထွက်ဟူသည့် အနေအထားကို ဂုဏ်ပုဒ်တစ်ခုသဖွယ်၊ ခြိမ်းခြောက်၍ ရသော လက်နက်တစ်ခုသဖွယ် သတ်မှတ်ပြောဆိုနေသော လူမိုက်များ မြန်မာ့လူ့အဖွဲ့အစည်းတွင်း နေထိုင်ကျက်စားလာပြီး ၎င်းတို့ကို လူလိမ္မာများက ကြောက်လန့်နေကြရသည်မှာလည်း စာရိတ္တဆိုင်ရာ သွန်သင်ဆုံးမမှုမှအစ တရားဥပဒေစိုးမိုးမှု အဆုံး အားနည်းချက်တွေ ဗရပွရှိနေသောကြောင့်ပင်ဖြစ်ပေသည်။ 

အုပ်စုနိုင်ငံရေးရှုထောင့်ကကြည့်လျှင် မြန်မာ့လူ့အဖွဲ့အစည်းတွင် ယခင်ကထက် လက်မရွံ့သော၊ လူမဆန်သောမှုခင်းများပေါ်လာခြင်းသည် ဒီမိုကရေစီအစိုးရ လက်ထက် မင်းမဲ့စရိုက်ပိုဆန်သည် (လုံခြုံမှုမရှိ) ဆိုသည့် အနေအထားမျိုးဖြစ်အောင် ဆန့်ကျင်ဘက်အင်အားစုများက ဖန်တီးနေခြင်းဖြစ်သည်ဟု ယူဆစရာရှိသည်။ 

မည်သို့ပင်ယူဆသည်ဖြစ်စေ မြန်မာ့လူ့အဖွဲ့အစည်းတွင်း ဥပဒေချိုးဖောက်သူ၊ ဒုစရိုက်ကျူးလွန်သူ၊ မင်းမဲ့စရိုက်ဆန်စွာ ခိုးဆိုးလုယက် သတ်ဖြတ်သူများသည် နိုင်ငံနှင့် ပြည်သူအားလုံး၏ အန္တရာယ်များပင်ဖြစ်ရာ အပြစ်မဲ့မိဘပြည်သူများ၏ လုံခြုံရေးနှင့် ဒုစရိုက်ကျူးလွန်းသူများ လူမှုဘဝပြန်လည်ထူထောင်ရေးကို စနစ်တကျဖြစ်အောင် အလေးအနက်စဉ်းစားကြရမည်ဖြစ်ကြောင်း မေတ္တာရပ်ခံလိုရင်း ဖြစ်ပေသည်။ 

အယ်ဒီတာ (၅-၅ -၂၀၁၉ ) 




  • VIA