News

POST TYPE

EDITORIAL

စည်ပင်ရွေးကောက်ပွဲဘာလဲ (Daily, Vol-7/No-2)
02-Apr-2019

မကြာသေးခင်က ကျင်းပပြီးစီးသွားခဲ့သော ရန်ကုန်မြို့တော် စည်ပင်သာယာရေး ကော်မတီရွေးကောက်ပွဲတွင် အာဏာရပါတီ ဝင်ရောက်ကြီးစိုးလာခြင်းမှာ လူထုကိုယ်တိုင် ပါဝင်ဆောင်ရွက်ခွင့်ဘောင် ကျဉ်းမြောင်းလာသလောဟု မေးစရာရှိသည်။

မြို့တော်စည်ပင်သာယာရေး ကော်မတီရွေးကောက်ပွဲနှင့် ပတ်သက်သောဥပဒေ၊ စည်းမျဉ်း၊ စည်းကမ်းများ တိကျခိုင်မာစွာ ရေးဆွဲသတ်မှတ်ထားခြင်း မရှိသေးသည်ကိုအကြောင်းပြုကာ ရွေးကောက်ပွဲတွင် နိုင်ငံရေးပါတီ သို့မဟုတ် အာဏာရပါတီက မြို့တော်စည်ပင်၏ လုပ်ပိုင်ခွင့်များက ထိန်းချုပ်ရန် ကြိုးပမ်းလာခြင်းဖြစ်သည်။

ဖွဲ့စည်းပုံအခြေခံဥပဒေအရ စည်ပင်သာယာဥပဒေကဲ့သို့ ဥပဒေမျိုးကို ပြည်နယ်၊ တိုင်းဒေသကြီးများ၏ လုပ်ပိုင်ခွင့်အဖြစ် တရားဝင် ခွင့်ပြုထားပြီးဖြစ်ရာ စည်ပင်သာယာရေး ကော်မတီဆိုင်ရာ ရွေးကောက်ပွဲစည်းမျဉ်း၊ စည်းကမ်းများကို သက်ဆိုင်ရာ တိုင်းဒေသ၊ ပြည်နယ်လွှတ်တော်များက ရေးဆွဲပြဋ္ဌာန်းနိုင်သည်။

ရန်ကုန်မြို့တော် စည်ပင်သာယာရေး ကော်မတီသည် ယခင်အစိုးရလက်ထက်က အရွေးကောက်ခံ လူထုကိုယ်စားလှယ်များကို အငြင်းပွားဖွယ်ဥပဒေ၊ စည်းမျဉ်း၊ စည်းကမ်းသတ်မှတ်ချက်၊ အဓိပ္ပာယ်ဖွင့်ဆိုချက်များဖြင့် ရုတ်ခြည်း တာဝန်ရပ်စဲလိုက်ပြီး နောက်သုံးနှစ်အထိ အစိုးရ တိုက်ရိုက်ခန့်ထားသူများဖြင့် လုပ်ငန်းဆောင်ရွက်နေခဲ့သည်။

ယခု ရွေးကောက်ပွဲ မကျင်းပမီတွင် ရွေးကောက်ပွဲကော်မရှင်ဥက္ကဋ္ဌက နိုင်ငံရေးပါတီခေါင်းစဉ်ဖြင့် ရွေးကောက်ပွဲ ဝင်ပြိုင်ခွင့်မပြုကြောင်း ပြောဆိုပြီးရက်ပိုင်းအကြာ ခွင့်ပြုကြောင်း ပြန်လည် ကြေညာခြင်းမှာ အထင်ရှားဆုံး အငြင်းပွားဖွယ်၊ သံသယဖြစ်ဖွယ် ရွေးကောက်ပွဲ စည်းမျဉ်း၊စည်းကမ်း သတ်မှတ်ချက်ဖြစ်သည်။

ထို့အတူ ရွေးကောက်ပွဲမဲဆွယ်ရာတွင် ဒေါ်အောင်ဆန်းစုကြည်ပုံနှင့် ပါတီအမှတ်တံဆိပ် အသုံးပြုခြင်း၊ ရန်ကုန်တိုင်းဒေသကြီးအစိုးရ ဝန်ကြီးချုပ်ကိုယ်တိုင် ပါတီဝင် ကိုယ်စားလှယ်လောင်းများကိုသာ မဲပေးကြရန် မဲဆွယ်ပေးခြင်း၊ မဲစာရွက်တွင် ပါတီကိုယ်စားပြု ကိုယ်စားလှယ်များသည် အခြားသော တစ်သီးပုဂ္ဂလ ကိုယ်စားလှယ်လောင်းများကဲ့သို့ ဓာတ်ပုံမပါဝင်ဘဲ ပါတီအမှတ်တံဆိပ်ကိုသာ ဖော်ပြထားခြင်းတို့မှာ အများဝေဖန်စရာများ ဖြစ်သွားခဲ့သည်။

မြူနီစီပယ်ခေါ် မြို့တော် စည်ပင်သာယာရေး ကော်မတီသည် ဒီမိုကရေစီ ခေါင်းစဉ်အောက်တွင် မိမိမြို့ရွာကို စည်ပင်သာယာ သန့်ရှင်းလှပစေရန် သက်ဆိုင်ရာ မြို့လူထု ကိုယ်တိုင်ကိုယ်ကျ ပါဝင်ဆောင်ရွက်ခွင့်ပြုထားသော ပြည်သူ့ရေးရာ ဝန်ဆောင်မှုပေးရသော အဖွဲ့အစည်းဖြစ်သည်။

ထို့ကြောင့် ဒီမိုကရေစီစနစ် ကျင့်သုံးသော နိုင်ငံတိုင်း၊ ဒီမိုကရေစီအသွင် ကူးပြောင်းသော နိုင်ငံတိုင်း မြူနီစီပယ် ရွေးကောက်ပွဲများကို ပြည်သူလူထု တိုက်ရိုက် ပါဝင်ဆောင်ရွက်ခွင့်၊ သက်ဆိုင်ရာ မြူနီစီပယ် လုပ်ငန်းနယ်ပယ်အလိုက် ကျွမ်းကျင်တတ်မြောက်သူ အသိ၊အတတ်ပညာရှင်များ ဝင်ရောက်ရွေးချယ်ခံပိုင်ခွင့် တံခါးကျယ်ကျယ် ဖွင့်ပေးထားကြပြီး အာဏာရပါတီ အပါအဝင် မည်သည့်နိုင်ငံရေးပါတီ၏ လောင်းရိပ်ကိုမျှ စွက်ဖက်ကြီးစိုးခွင့် ပေးမထားပေ။

၁၉၆၂ ခုနှစ်နောက်ပိုင်း အာဏာရှင်အစိုးရအဆက်ဆက် ရန်ကုန်မြူနီစီပယ်ကို အစိုးရက တိုက်ရိုက်ခန့်ထား ချုပ်ကိုင်သောစနစ်သို့ ပြောင်းလဲလိုက်ပြီးနောက် လူထုအကျိုး သယ်ပိုးရေး၊ မြို့တော်စည်ပင် သာယာလှပ ဖွံ့ဖြိုးရေးထက် မြို့တော်ဝန်နှင့် ကော်မတီဝင်များ၊ ဌာနမှူးများ ကိုယ်ကျိုးစီးပွား ဖြစ်ထွန်းရေးကိုသာ အဓိက ထားခဲ့ကြောင်း ဝေဖန်ခံခဲ့ရသည်အထိ နာမည်ပျက်သွားခဲ့သည်။

ယနေ့အချိန်အထိ နာမည်ကောင်း မရရှိသေးသော ရန်ကုန်မြို့တော် စည်ပင်သာယာရေး ကော်မတီကို လက်ရှိ အာဏာရပါတီက ဝင်ရောက်ချုပ်ကိုင်ရန် ကြိုးစားခြင်းသည် မြို့လူထုတိုက်ရိုက်ပါဝင်ဆောင်ရွက်ခွင့်ကို ကန့်သတ်တားဆီးရာကိုရောက်သော်ငြား မြို့တော်ဝန် အပါအဝင် ပါတီဝင်များနှင့် တိုက်ရိုက်ခန့်များ၏ စွမ်းဆောင်ရည်အပေါ် မူတည်ကာ မြို့တော်အကျိုး၊ မြို့တော်နေ ပြည်သူများအကျိုး လက်တွေ့ အကောင်အထည် ဖော်ပြခြင်းအားဖြင့် အာဏာရပါတီနှင့် အစိုးရ၏ ဂုဏ်သိက္ခာ မြှင့်တင်ပေးနိုင်မည့် အခွင့်အလမ်း ရှိနိုင်သည်။

သို့မဟုတ်ပါက မူလအတိုင်း မြို့တော်နေ ပြည်သူလူထု၏ အခွန်အခများကို အစိုးရ၏ ဘဏ္ဍာငွေ လိုအပ်ချက် ရှိလာတိုင်း ရှာဖွေဖြည့်ဆည်းပေးနေရဆဲ ဌာနမှူးများ၏ ချုပ်ကိုင်စေစားမှုအောက်တွင်ရှိနေဆဲ၊ အရည်အသွေး စံချိန်စံညွှန်းမမီသော လမ်း၊ တံတား၊ ပလက်ဖောင်း၊ အိမ်ခြေ၊ တိုက်တာများ တည်ဆောက်ပြုပြင်နေဆဲ၊ မြို့ပြအင်္ဂါရပ်နှင့် မညီညွတ်သော စီမံကိန်း၊ ချက်၊လုပ်ငန်းများ တွေ့မြင်နေရဆဲ၊ ခေတ်နောက်ကျနေသော လုပ်နည်းလုပ်ဟန်များကြောင့် မလိုလားအပ်သော အပိုကုန်ကျစရိတ်များ ယိုပေါက်ဟာပေါက်များ ရှိနေဆဲ အခြေအနေများ ဆက်လက်တွေ့မြင်ရမည်။

ထိုအခါ အကျိုးဆက်အနေနှင့် ကုန်ခဲ့သည့် သုံးနှစ်ကာလအတွင်း အာဏာရပါတီနှင့် အစိုးရ၏ စွမ်းဆောင်ရည်အပေါ် ကျေနပ်အားရမှု မရှိသော မဲဆန္ဒရှင် ပြည်သူလူထု၏ စိတ်ပျက်လက်ပျက်ဖြစ်မှု၊ မူလကပင် ကြည်သာမှုမရှိဘဲ အာဏာလက်ပြောင်းပေးခဲ့ရသောကြောင့် အပြစ်ရှာ၊ အဆိုးပြော၊ အမှားစောင့်နေသူများ ထိုးနှက် တိုက်ခိုက်ရန် လမ်းဖွင့်ပေးလိုက်သကဲ့သို့ ဖြစ်သွားနိုင်သည်။

လူငယ်များကို နေရာမပေးလိုခြင်း၊ အငြင်းပွားဖွယ် ကြိုတင်များရှိနေကြောင်း အသံထွက်နေခြင်း၊ အာဏာရပါတီနှင့် အစိုးရကိုထောက်ခံသူအချို့ပင် ပါတီ ခေါင်းစဉ်ဖြင့် စည်ပင်ရွေးကောက်ပွဲ ဝင်ပြိုင်ခြင်းကို သဘောမတူခြင်း၊ ရွေးကောက်ပွဲ စည်းမျဉ်းစည်းကမ်းများကို အာဏာသုံး၍ လိုသလို ပြင်ဆင်ခြင်း စသည့်အချက်များသည် မည်သည့် ပယောဂကြောင့်မျှမဟုတ်ဘဲ ပါတီကိုယ်တိုင် အာဏာကို ဗဟိုမှချုပ်ကိုင်လိုသည့် သဘောထား သို့မဟုတ် အရာရာကို ပြည်သူနှင့် နိုင်ငံတော် တစ်ခုလုံးထက် တစ်ဦးတစ်ယောက်၊ တစ်ဖွဲ့ကို မဏ္ဍိုင်ပြု စဉ်းစားလာခြင်း၏ အကျိုးဆက် ဖြစ်သည့်အတွက် စဉ်းစားဆင်ခြင် သုံးသပ်ကာ အချိန်မီ ပြုပြင်နိုင်စေကြောင်း ပြောလိုရင်းဖြစ်သည်။

အယ်ဒီတာ (၁-၄ -၂၀၁၉)