News

POST TYPE

EDITORIAL

မြောက်ဦးကို ကယ်တင်ပါ (Daily, Vol-6/No-294)
19-Mar-2019
မြန်မာပြည်သူအများစု အသုံးပြုသည့် လူမှုကွန်ရက်ဖြစ်သော Facebook ပေါ်တွင် အချို့သော အကောင့်များက ယမန်နေ့ကစ၍ Save Maruk U ဆိုသည့် စာသားပါဝင်သော Profile Picture များ ပြောင်းလဲအသုံးပြုပြီး ရခိုင်ပြည်နယ်၏ ယဉ်ကျေးမှု အမွေအနှစ် မြောက်မြားစွာရှိသည့် မြောက်ဦးမြို့တွင် ကြုံတွေ့နေရသော တိုက်ပွဲများ အဆုံးသတ်ရေးနှင့် ရခိုင်တိုင်းရင်းသားများ အပါအဝင် မြောက်ဦးမြို့နေ ပြည်သူများ ဘေးအန္တရာယ်ကင်းဝေးစေရေးအတွက် ဆန္ဒသဘောထား ထုတ်ဖော်ပြကြသည်ကို သတိပြုမိပါသည်။

သတင်းများအရ မတ်လ ၁၈ ရက်နေ့က AA လက်နက်ကိုင်အုပ်စုနှင့် တပ်မတော်စစ်ကြောင်းတို့ မြောက်ဦးမြို့၌ဖြစ်သောတိုက်ပွဲမှာ Urban Warfare ခေါ် မြို့ပြဒေသ၌ဖြစ်သော တိုက်ပွဲ(စစ်ပွဲ)ပုံစံမျိုးဖြစ်နေရာ မြောက်ဦးတွင်နေထိုင်ကြသော အပြစ်မဲ့ ပြည်သူများအတွက် လွန်စွာ စိုးရိမ်မကင်းဖြစ်မိကြောင်း ဦးစွာပြောလိုပေသည်။ မြို့ပြတိုက်ပွဲဟူသည် အပြစ်မဲ့ပြည်သူများ မြေဇာပင်ဖြစ်ကာ ထိခိုက်ဒဏ်ရာရ သေဆုံးရသည်အထိ ဖြစ်လေ့ရှိသည်ကို နှစ်ဖက်စလုံးက အထူးသတိပြုသင့်ပေသည်။

မြောက်ဦးဖြစ်ရပ်တွင် မည်သည့်ဘက်က စတင် ပစ်ခတ်သည်ဟူသည့်ကိစ္စမှာ အငြင်းပွားစရာသဖွယ် ဖြစ်နေသော်လည်း တပ်မတော်ဘက်ကရော AA လက်နက်ကိုင်အုပ်စုဘက်ကပါ တိုက်ပွဲများ ထပ်မံ မဖြစ်ပွားစေရေးအတွက် ကြိုးပမ်းကြရန် မေတ္တာရပ်ခံလိုပေသည်။ ထို့ပြင် လက်နက်ကြီးများဖြင့် ပစ်ခတ်မှုများရှိသည်ဆိုသော သတင်းများကြောင့် ကမ္ဘာ့ယဉ်ကျေးမှု အမွေအနှစ် စာရင်းဝင်ထားသည့် ရှေးဟောင်းစေတီပုထိုးများ ထိခိုက်ပျက်စီးကိန်းဆိုက်မည်ကို ပြည်သူများက ရတက်မအေးဖြစ်လျက် ရှိပေသည်။

တပ်မတော်၏ သတင်းထုတ်ပြန်ချက်တွင်မူ AA လက်နက်ကိုင်အုပ်စုသည် ရှေးဟောင်းပုထိုးစေတီများနှင့် လူနေအဆောက်အအုံများကို အကာအကွယ်ယူ၍ တိုက်ခိုက်နေခြင်းဖြစ်သည်ဟု ထုတ်ဖော်ထားသည်ကို တွေ့ရပေသည်။ ယင်းသတင်း မှန်သည်ဖြစ်စေ မှားသည်ဖြစ်စေ ယဉ်ကျေးမှု အမွေအနှစ်များနှင့် အပြစ်မဲ့ဒေသခံပြည်သူများ ထိခိုက်ပျက်စီးအောင် ဦးတည်ချက်ရှိစွာ လုပ်ဆောင်သူ မည်သည့်အဖွဲ့အစည်းကိုမဆို ပြည်သူအားလုံး၏ ပြင်းထန်သော ရှုတ်ချမှုနှင့် မလွဲမသွေရင်ဆိုင်ရမည်သာပင်ဖြစ်သည်။

ယင်းမြောက်ဦးတိုက်ပွဲ ဖြစ်ပွားပြီးနောက်တစ်ရက်တွင် စစ်တွေခရိုင်တရားရုံးက ရခိုင်မျိုးချစ်ခေါင်းဆောင်တစ်ဦးဖြစ်သူ ဒေါက်တာအေးမောင်ကို နိုင်ငံတော် သစ္စာဖောက်ဖျက် ပုန်ကန်မှု၊ နိုင်ငံတော် အကြည်အညို ပျက်စေမှုတို့ဖြင့် ထောင်ဒဏ် နှစ် ၂၂ ချမှတ်လိုက်သည့် သတင်းထွက်ပေါ်လာပေသည်။ ဒေါက်တာအေးမောင်ကိစ္စကြောင့် ရခိုင်ဝံဿနု အင်အားစုများအကြား အစွန်းရောက်သည့် သဘောတရားများ ပိုမိုကြီးထွားလာပြီး ပုန်ကန်တော်လှန်သည့် လမ်းစဉ်နောက်လိုက်ရန် သွေးထိုးလှုံ့ဆော်မှုများရှိလာနိုင်သည်ကို နိုင်ငံတော် အစိုးရခေါင်းဆောင်များအနေနှင့် အထူးသတိချပ်သင့်ပေသည်။

ထို့ပြင် လက်ရှိ ရခိုင်ပြည်နယ်တွင် ဖြစ်နေသော အဖြစ်အပျက်များနှင့် အရေးကိစ္စ အားလုံးသည် နိုင်ငံရေးအမြတ်ထုတ်ရန် လွန်စွာလွယ်ကူပြီး အချိန်မရွေး ပေါက်ကွဲနိုင်သည့် အနေအထားသို့ ရောက်ရှိနေပြီဆိုသော အချက်ကိုလည်း သတိထားရမည်ဖြစ်သည်။ သို့အတွက်ကြောင့် ယခုအချိန်သည် စိတ်ခံစားချက်၊ အတွေးအမြင်နှင့် ခံယူချက်တွေချည်းသက်သက်ဖြင့် ပြဿနာပြေလည်အောင် ကြိုးပမ်းနေခြင်းထက် သက်ဆိုင်ရာ အင်အားစုများအကြား လက်တွေ့ကျသည့် နည်းလမ်းများဖြင့် ပူးပေါင်းဆောင်ရွက်နိုင်ပါမှ မြောက်ဦးသာမက ရခိုင်ပြည်ကိုပါ ကယ်တင်နိုင်မည်ဖြစ်ကြောင်း ဖော်ပြလိုရင်းဖြစ်ပေသည်။

အယ်ဒီတာ (၁၉-၃-၂၀၁၉)