News

POST TYPE

EDITORIAL

Restrain ဆိုတာကို နားလည်သဘောပေါက်စေလို (Daily, Vol-6/No-286)
10-Mar-2019
နိုင်ငံတကာတွင် ဖြစ်ပေါ်နေသော နယ်နိမိတ်ဆိုင်ရာ တင်းမာမှုများ၊ စစ်မက်ဖြစ်ပွားစေနိုင်သည့် ပြဿနာများ အပါအဝင် ပဋိပက္ခ အသီးသီးတို့ကို ပြေလည်အောင် ဝိုင်းဝန်းကြိုးပမ်းကြရာ၌  Restrain ဟူသည့် စကားလုံးကို သက်ဆိုင်ရာ နိုင်ငံရေး၊ လူမျိုးရေးနှင့် ဘာသာရေး ခေါင်းဆောင်များက အထူးတလည် သုံးစွဲလေ့ရှိကြပါသည်။ လွန်ခဲ့သည့် တစ်နှစ်ကျော်ခန့်က မြောက်ကိုရီးယား နျူကလီးယား ပြဿနာနှင့် ကိုရီးယားကျွန်းဆွယ်ဒေသ တင်းမာမှုကြီးတွင် အမှိုက်ကစ ပြဿဒ်မီးလောင်သည်အထိ မဖြစ်စေလိုသောကြောင့် သက်ဆိုင်သူများအနေနှင့် ပြဿာဖြစ်စေမည့် အပြုအမူ အပြောအဆိုများကို မပြုလုပ်ဘဲ Restrain လုပ်ကြရန် ကမ္ဘာ့ခေါင်းဆောင်များက ဝိုင်းဝန်းတိုက်တွန်းခဲ့ကြသည်ကို မှတ်မိပါသေးသည်။

Restrain ဟူသော ဝေါဟာရအတွက် အဘိဓာန် အဓိပ္ပာယ်ဖွင့်ချက်တွင် “Prevent (Someone or Something) from doing something; keep under control or within limits” ဟု ဆိုထားပေသည်။ လူတစ်ဦးတစ်ယောက်၊ လူစုတစ်စု သို့မဟုတ် အရာတစ်ခုအနေနှင့် တစ်စုံတစ်ခုလုပ်၍မရနိုင်အောင် ကာကွယ်ဟန့်တားပေးခြင်း၊ ထိန်းထိန်းသိမ်းသိမ်းဖြစ်အောင် ပြုမူနေထိုင်ခြင်း၊ ယင်းသို့ နေထိုင်စေခြင်းဟု ယေဘုယျဆိုနိုင်ပေသည်။ ပြဿနာတစ်ခု၊ ပဋိပက္ခတစ်ခုအတွင်း ရောက်နေသည့် အခြေအနေအရဆိုပါက ပြဿနာ မဖြစ်အောင် ထိန်းထိန်းသိမ်းသိမ်း နေကြရမည်ဟု ဆိုလိုရင်းဖြစ်သည်။

ကမ္ဘာပေါ်တွင်ဖြစ်ပေါ်ခဲ့သော လူမျိုးရေးနှင့် ဘာသာရေး ပဋိပက္ခများ သာမက ယင်းနှင့်ဆက်နွှယ်သည့် စစ်မက်ကြီးများကို ကြည့်မည်ဆိုလျှင်လည်း တစ်ဖက်နှင့်တစ်ဖက် Restrain မလုပ်နိုင်ခဲ့သလို သက်ဆိုင်ရာ လူမျိုးရေးနှင့် ဘာသာရေး ခေါင်းဆောင်များက နောက်လိုက်များကို Restrain လုပ်နိုင်အောင် ဟောပြောဆုံးမနိုင်ခြင်း မရှိခဲ့သောကြောင့်သာ လူ့အသက်ပေါင်း များစွာ ဆုံးရှုံးခဲ့ကြရပြီး ဒုက္ခမျိုးစုံနှင့် ရင်ဆိုင်ခဲ့ကြရခြင်း ဖြစ်ပေသည်။

သို့သော် Restrain ဟူသည် ပြဿနာ သို့မဟုတ် ပဋိပက္ခ မဖြစ်ပေါ်အောင် အောင့်အည်းထိန်းချုပ်သည့် သဘောကိုဆိုလိုပြီး ဘာဖြစ်ဖြစ် ခေါင်းငုံ့ခံမည်ဟူသော သဘောမျိုး မဟုတ်သည်ကို ဒီမိုကရေစီ ထွန်းကားရန် ကြိုးပမ်းလိုသော လူ့အဖွဲ့အစည်းအနေနှင့် အထူး သတိပြုရမည်ဖြစ်သည်။ ဖြစ်ပြီးသော ပြဿနာမျိုး ထပ်မဖြစ်လာစေရန်၊ ဖြစ်နေသော ပြဿနာ ပိုမိုမကြီးထွားစေရန်နှင့် ဖြစ်လာနိုင်ခြေရှိသော ပြဿနာများ မဖြစ်ရန် သက်ဆိုင်သူများက ထိန်းထိန်းသိမ်းသိမ်း နေကြရမည့်သဘောကိုသာ ဆိုလိုပေသည်။ မြန်မာ့စကားပုံများထဲတွင် “ကြမ်းကျွံက နုတ်ရသော်လည်း နှုတ်ကျွံက နုတ်၍မရ”ဆိုသည်မှာ တစ်ဖက်နှင့်တစ်ဖက် ပြောမှားဆိုမှားဖြစ်မည်ကို အထူးသတိချပ်စေလိုသည့် အဖိုးတန် အဆုံးအမတစ်ရပ်ဟု ဆိုရပေမည်။

လူမှုကွန်ရက် အသုံးပြုသည့် ခေတ်ထဲတွင်မူ တစ်ဦးနှင့်တစ်ဦး အပျော်အပြက် နောက်ပြောင်သည့် ကွန်းမန့်များမှသည် မတူညီသော အခြားလူ့အသိုင်းအဝိုင်းတစ်ခု၊ ယဉ်ကျေးမှုတစ်ခုကို တမင်တကာ စော်ကားပုတ်ခတ်သည့် သဘောမျိုး သက်ရောက်သွားနိုင်ပေရာ လူမှုကွန်ရက် အသုံးပြုသူ တစ်ဦးချင်းစီ ကိုယ်တိုင်ကိုယ်က ကွန်းမန့်မရေးမီနှင့် ရေးနေစဉ်မှာ ဖြစ်လာနိုင်သည့် အကျိုးဆက်ကို ဆင်ခြင်နိုင်ပါမှ ပြဿနာများ မကြီးထွားအောင် ထိန်းသိမ်းနိုင်မည်ဖြစ်ပေသည်။

ယနေ့ မြန်မာနိုင်ငံ၏ ဒီမိုကရေစီ ဖော်ဆောင်ရေး၊ အမျိုးသား ပြန်လည် သင့်မြတ်ရေးနှင့် ပြည်တွင်း ငြိမ်းချမ်းရေးကိစ္စတို့မှာ ပြဿနာနှင့် စိန်ခေါ်မှုမြောက်မြားစွာက ဝိုင်းရံလျက်ရှိနေပေရာ တိုင်းရင်းသား ပြည်သူများ အချင်းချင်းအကြား၊ နိုင်ငံရေးပါတီကြီးများအကြား၊ နိုင်ငံတည်ဆောက်ရေးအတွက် အရေးပါသည့် အင်အားစုများအကြား သစ်စိမ်းချိုးချိုး သကဲ့သို့သော အပြုအမူနှင့် အပြောအဆိုများကို အထူးသတိပြုကာ Restrain လုပ်ကြပါမည့်အကြောင်း မေတ္တာရပ်ခံလိုရင်း ဖြစ်ပေသည်။

အယ်ဒီတာ (၁၀-၃-၂၀၁၉)