News

POST TYPE

EDITORIAL

ကလေးတွေကိုချစ်လျှင် ကလေးစာပေကိုပစ်မထားသင့်ပါ (Daily, Vol-6/No-282)
06-Mar-2019
မြန်မာနိုင်ငံဖွံ့ ဖြိုးရေး၊ တစ်နည်းအားဖြင့် မြန်မာ့လူ့အဖွဲ့အစည်းတွင် အသိဉာဏ် မြင့်မားသူနိုင်ငံသားဦးရေ တိုးတက်များပြားလာရေးအတွက် စာဖတ်နာသူ သို့မဟုတ် စာအုပ်စာပေတွင်မွေ့လျော်သူများ မွေးထုတ်နိုင်ရေးသည်လည်း ပညာရေးကဏ္ဍအဆင့်မြှင့်တင်ရေးနှင့်အတူ အရေးကြီးကြောင်း အခွင့်အခါသင့်တိုင်းဤခေါင်းကြီးပိုင်းတွင် အကြံပြုဖော်ပြခဲ့သည်ကို စာဖတ်သူများမှတ်မိပါလိမ့်မည်။ အကြောင်းမှာ နိုင်ငံတစ်နိုင်ငံတွင် စာအုပ်စာပေများအပေါ် မွေ့လျော်သူများ နည်းပါးလာမည်ဆိုပါက တိုင်းပြည်ဖွံ့ဖြိုးရေးတစ်ခုတည်း သက်သက်သာမက အမျိုးသားလုံခြုံရေး ကိစ္စထိပါ ဂယက်ရိုက်ခတ်နိုင်သည့် အခြေအနေရှိသောကြောင့် စာအုပ်စာပေ (Facebook မဟုတ်ပါ) တွင် မွေ့လျော်သူနိုင်ငံသားများ တိုးပွားရန် သက်ဆိုင်သူများက ဝိုင်းဝန်းကြရမည့်အကြောင်း အကြံပြုခဲ့ခြင်းပင်ဖြစ်သည်။ 

တိကျသော စစ်တမ်းများကောက်ယူထားခြင်းမရှိသည့်တိုင် မြန်မာနိုင်ငံတွင် စာအုပ်စာပေတွင်မွေ့လျော်သူများထက် လူမှုကွန်ရက်များပေါ်တွင် အချိန်များစွာ ကုန်ဆုံးလေ့ရှိပြီး စာအုပ်နှင့်မျက်နှာ ခွာမရဖြစ်ရမည့်အစား မိုဘိုင်းလ်ဖုန်းစကရင်နှင့် မျက်နှာခွာမရသူဦးရေ များပြားလာသည်ကို တစ်နေ့တခြားတွေ့မြင်လာရသည်မှာ စိတ်မကောင်းစရာပင်ဖြစ်ပါသည်။ လူမှုကွန်ရက်များက အသိဉာဏ်ဗဟုသုတ လုံးဝမပေးစွမ်းနိုင်ဟု ဆိုလိုခြင်းမဟုတ်သော်လည်း တာဝန်ယူမှုမရှိသည့်ပို့စ်များ၊ ပုဂ္ဂိုလ်ရေးတိုက်ခိုက်သည့် အတင်းအဖျင်းများ၊ အပျော်သာမက အပျက်သဘောထိပါ သက်ရောက်စေနိုင်သော လူပြိန်းကြိုက်ပို့စ်များကို စိတ်ဝင်စားသူများပြားနေသည်ကို တွေ့ရပေရာ အသိဉာဏ်ဗဟုသုတကောင်းရရှိရေးဟူသည့် လာရင်းကိစ္စမှာ ကွယ်ပျောက်ရစမြဲဟုသာ ဆိုချင်ပေသည်။ ဆိုလိုသည်မှာ လူမှုကွန်ရက်ဟူသည် သတင်းအချက်အလက် စီးဆင်းမှုမြန်ဆန်ရေးအတွက် လွန်စွာအကျိုးသက်ရောက်မှု ရှိသည်မှာ ၁၀၀ ရာခိုင်နှုန်း မှန်သော်လည်း စာအုပ်စာပေလောက် လူ့ဦးနှောက်၏ ဆင်ခြင်စဉ်းစားတွေးခေါ်မှုပိုင်းကို အားပေးအားမြှောက်ပြုနိုင်ခြင်းမရှိဟူသော သဘောပင်ဖြစ်ပေသည်။ 

သို့အတွက်ကြောင့် စာအုပ်စာပေ၌ မွေ့လျော်သူဦးရေတိုးပွားလာရေးအတွက် ကလေးစာပေကိစ္စက စတင်ရတော့မည်ဟု ဆိုချင်ပါသည်။ အကြောင်းမှာ မြန်မာနိုင်ငံ၌ အသက် ၅၀ နှင့်အထက် မျိုးဆက်အတော်များများနှင့် အသက် ၃၀ မှ ၄၅ ဝန်းကျင်မျိုးဆက် အနည်းငယ်သာ စာအုပ်စာပေတွင် မွေ့လျော်လေ့ရှိပြီး အသက် ၁၈ မှ ၃၀ ကြားမျိုးဆက်မှာ စာအုပ်စာပေတွင် မမွေ့လျော်သလောက်ရှိသည်ဟု ယူဆမိ၍ဖြစ်သည်။ (ဤကိန်းဂဏန်းမှာ Hypotheisis မျှသာဖြစ်သည်) ယင်းသို့ ဖြစ်နေရခြင်းကိုကြည့်မည်ဆိုလျှင် ကလေးစာပေဖွံ့ဖြိုးမှုမှာ နှစ် ၃၀ ခန့်ကာလအတွင်း ဆိုးဆိုးရွားရွား ကျဆင်းခဲ့ခြင်းကြောင့် ဖြစ်ပေသည်။ ယနေ့ကလေးစာပေ ဈေးကွက်ကို ကြည့်မည်ဆိုလျှင် စာအုပ်ဆိုင်များပေါ်၌ နေရာအနည်းငယ်သာရရှိ ထားသည်ကိုတွေ့ရသည်။ ကလေးမိဘအများစုမှာလည်း ကလေးစာအုပ်ဟူသည် မိမိတို့ရင်သွေးငယ်များအတွက် ဝယ်ပေးသင့်သည့် အရာဟူသည်ကို သိရှိမှုနည်းပါးလာရာ ကလေးစာပေဈေးကွက်မှာ အသက်ဆက်ရန်ပင်ခက်ခဲလာသလိုဖြစ်ခဲ့ရပေသည်။ စာသင်ကျောင်းများကို ကြည့်မည်ဆိုပြန်လျှင်လည်း ကလေးများပျော်မွေ့စေနိုင်မည့် အဝန်းအဝိုင်းမျိုး မဖြစ်ရုံမျှမက အခါအားလျော်စွာ သော့ခတ်ထားကြသည်က များပါသည်။ ဆိုခဲ့ပါ အနေအထားမျိုးနှင့် အသက်မနည်းဆက်နေရသည့် ဈေးကွက်ကြောင့် မြန်မာ့ကလေးစာအုပ်များမှာ နိုင်ငံတကာမှ ကလေးစာအုပ်များ၏ အရည်အသွေးကို မည်သို့မျှမယှဉ်နိုင်ဖြစ်နေရခြင်းပင်။ 

သို့သော် လက်ရှိအစိုးရတာဝန်ယူလာပြီးနောက်ပိုင်း ကလေးစာပေဖွံ့ဖြိုးရေးအတွက် ကလေးစာအုပ်ပွဲတော်များ ပြုလုပ်ပေးပြီး စာအုပ်၌ မွေ့လျော်သူမျိုးဆက်သစ်လေးများ ပေါ်ထွန်းရေးအတွက် ကြိုးပမ်းလာသည်ကို တွေ့ရသည်မှာ အားတက် စရာဟုပင်ဆိုရပေမည်။ သို့သော် ပညာရေးနှင့် စာပေနယ်ပယ်မှ သက်ဆိုင်သူများသာမက ကလေးမိဘအားလုံးက ဝိုင်းဝန်းဖေးမမှသာ ခရီးပေါက်မည်ဖြစ်ပေသည်။ 

မိဘများအနေနှင့်လည်း သားသမီးနှင့်မိဘအကြား နှောင်ဖွဲ့မှုကို ပိုမိုခိုင်မြဲစေသလို မိမိရင်သွေးငယ်များအတွက် စိတ်ကူးယဉ်ကမ္ဘာ သို့မဟုတ် စိတ်လှုပ်ရှားစရာ စွန့်စားခန်းများ၏ နှစ်သက်စရာခံစားချက်များရရှိစေရန် ကလေးစာပေကသာ ဆောင်ကြဉ်းပေးနိုင်မည်ကိုသတိပြုသင့်ပေသည်။ ကလေးငယ်များ စာအုပ်စာပေအပေါ် မွေ့လျော်တတ်လာစေရုံမျှမက တွေးခေါ်မြော်မြင်မှုစွမ်းရည်နှင့် စိတ်ကူးဉာဏ်ထက်မြက် ကွန့်မြူးလာစေသလို စကားလုံးဝေါဟာရ ကြွယ်ဝလာစေရေး၊ မြန်မာစာသာမက အင်္ဂလိပ်စာ (နိုင်ငံတကာဘာသာစကား) ဝါကျအထားအသို ကျွမ်းကျင်လာစေရေး စသည်တို့အတွက် ကလေးများစာဖတ်ချင်စိတ်ဖြစ်လာအောင် ဖန်တီးပေးရမည့် အထူးတာဝန်ရှိပေသည်။ 

အရေးအကြီးဆုံးမှာ အနာဂတ်ကာလတွင် မိမိယဉ်ကျေးမှုသာမက တစ်ပါးသူယဉ်ကျေးမှုအကြောင်း၊ သဘာဝပတ်ဝန်းကျင်အကြောင်း၊ မြန်မာနှင့် ကမ္ဘာ့သမိုင်းကြောင်း စသည်တို့ကို ကောင်းစွာသိရှိနားလည်သော မျိုးဆက်သစ်များပေါ်ပေါက်လာရေးအတွက် ကလေးစာပေကို ပုခက်တွင်းအခြေအနေမှ နိုင်ငံတကာတွင်ပါ လူစဉ်မီသည့် အခြေအနေသို့ရောက်အောင် ဖေးမကူညီကြရမည့်အကြောင်း ဖော်ပြလိုရင်းဖြစ်ပေသည်။ 

အယ်ဒီတာ (၅-၃-၂၀၁၉ )



  • VIA