News

POST TYPE

EDITORIAL

စိတ်ကူးနှင့်လက်တွေ့ (Daily, Vol-6/No-281)
04-Mar-2019
များစွာသော လူတို့သည် စိတ်ကူးနှင့် လက်တွေ့ ထပ်တူမကျနိုင်မှန်း သိပင်သိငြား စိတ်ကူးထားသည်များကို အများသိစေရန် ထုတ်ဖော်ကြေညာခြင်းဖြင့် အများ၏ထောက်ခံအားပေးမှု သို့မဟုတ် အသိအမှတ်ပြု ချီးကျူးမှုကိုယူတတ်သည့် သဘာဝရှိတတ်သည်။

စိတ်ကူးနှင့်လက်တွေ့ကို တစ်နည်းအားဖြင့် ဖြစ်ချင်သောဆန္ဒနှင့် မြေပြင် ပကတိ အခြေအနေဟုထပ်မံ၍ အနက်ဖွင့်နိုင်သည်။ ဖြစ်ချင်သောဆန္ဒ (ဝါ) စိတ်ကူးတို့မည်သည် ရည်မှန်းချက်၊ မျှော်မှန်းချက် သို့မဟုတ် အိပ်မက်နှင့် အလားသဏ္ဌာန်တူပြီး လက်တွေ့အခြေအနေမှာမူ ခါးသီးသော အမှန်တရားနှင့်နီးစပ်သည်။ 
ဖြစ်ချင်သော ဆန္ဒစိတ်ကူးတို့သည် စိတ်ကူးစံနှုန်းများကို အခြေခံထားတတ်ပြီး များသောအားဖြင့် နိုင်ငံရေးအရ ဖြစ်သင့်၊ ဖြစ်ထိုက်သော ကိစ္စရပ်များ ဖြစ်နေသောကြောင့် အများပြည်သူ၏ ထောက်ခံအားပေးမှု၊ သဘောတူ လက်ခံမှု တစ်နည်းအားဖြင့် လက်ခုပ်သံများများရတတ်သည်။

သို့သော် ရင်ဆိုင်နေရသော ပြဿနာများကို ဖြေရှင်းရာတွင်မူ လက်တွေ့ မြေပြင်တွင်ဖြစ်ပေါ်နေသော ပကတိ အရှိတရားများကိုအခြေခံ၍ ဖြေရှင်းမည့် နည်းလမ်းကို စဉ်းစားကြရသည်ဖြစ်ရာ ရလာသော နည်းလမ်းတို့သည် အခါခပ်သိမ်း အများအကြိုက်နှင့် မညီတတ်ပေ။

ယေဘုယျအားဖြင့် ဘက်နှစ်ဖက်ရှိတတ်သော လူ့အဖွဲ့အစည်းတစ်ခုတွင် နှစ်ဖက်အမြင် ကွဲပြားသော ဘုံပြဿနာတစ်ရပ်ကိုဖြေရှင်းရန် ကြိုးစားကြည့်သည့်အခါ မိမိသန်ရာ အထိုင်ရှုထောင့်မှ အစွဲသန်သန် ချဉ်းကပ်နေကြပါက ပြဿနာဖြေရှင်းသည့်ဘက်သို့ မရောက်ဘဲ ပဋိပက္ခ အသွင်ဆောင်သွားတတ်သည်။

တစ်မျိုးသားလုံး၊ လူ့အဖွဲ့အစည်း တစ်ရပ်လုံးနှင့်ဆိုင်သော ပြဿနာမျိုးဆိုလျှင်မူ နှစ်ဖက်အကြား အပေးအယူ၊ အလျှော့အတင်းများဖြင့် အပြန်အလှန် ညှိနှိုင်း အဖြေရှာကြရသည်။ နိုင်ငံသား အားလုံးအကျိုး၊ လူ့အဖွဲ့အစည်း အကျိုးနှင့် ယှဉ်လာပါက မိမိတို့တစ်လျှောက်လုံး ကိုင်စွဲလာသော အမြင်အစွဲများ၊ စည်းကမ်းသတ်မှတ်ချက်များ လျှော့ပေး၊ ပြောင်းပေးရသည်များလည်း ရှိတတ်သည်။

အခြားတစ်ဖက်တွင်လည်း ထောက်ခံအားပေးသူ အသီးသီးက တစ်ဖက်တည်းကိုသာ အလွန်အကျွံ အပြစ်တင်ခြင်း၊ တစ်ဖက်သတ် ဂုဏ်ဖော်၊ အမွှမ်းတင် ကာကွယ်လွန်းခြင်းများရှိလာပါက အပြန်အလှန် နားလည်မှုလွဲ၊ အမြင်တိမ်းစောင်းကာ အောက်ထစ်ဆုံးရသင့်သော ဘုံသဘောတူညီမှုမျိုးပင် မရနိုင်ဘဲ ရန်ဘက်အသွင် ဆောင်သွားတတ်သည်။

ဤနေရာတွင် ရုပ်ပိုင်းဆိုင်ရာ လက်ရုံးစွမ်းရည်နှင့် စိတ်ပိုင်းဆိုင်ရာ နှလုံး စွမ်းရည်တို့၏ ကွာခြားမှု၊ အချိုးညီညီ သုံးစွဲနိုင်မှု၊ အချိန်အခါ၊ နေရာ၊ ဒေသအလိုက် ဆီလျော်အပ်စပ်စွာ အသုံးချနိုင်မှုက အရေးပါလာသည်။

စိတ်ပိုင်းဆိုင်ရာ အင်အားကြီးသူနှင့် အင်အားသေးသူတို့အကြား ကွာခြားချက်မှာ သဘောထားကြီး ရင့်ကျက်မှု ရေချိန် အနိမ့်အမြင့်ဖြစ်သည်။ စိတ်ခွန်အားကြီးသူ သို့မဟုတ် စိတ်ဓာတ်အင်အားကောင်းသူတို့တွင် မိမိကိုယ်ကို ယုံကြည်မှုရှိပြီး မိမိထက် အင်အားသေးသူ၊ အင်အားတန်းတူရှိသူ မည်သူ့အပေါ်မဆို သူ့အတိုင်းအတာနှင့်အတူ လေးလေးစားစား အသိအမှတ်ပြု ဆက်ဆံတတ်သည်။

စိတ်ပိုင်းဆိုင်ရာ ချို့တဲ့သူ၊ စိတ်ဓာတ်အင်အားနည်းသူတို့မှာမူ အားငယ်စိတ်၊ မလုံခြုံစိတ်၊ ကြောက်စိတ်များ ရှိနေခြင်းကြောင့် မိမိ၏ရုပ်ပိုင်းဆိုင်ရာ အတုအယောင်အင်အားများအပေါ် များစွာ အမှီသဟဲပြုလေ့ရှိသည်။ ရုပ်ပိုင်းဆိုင်ရာ အင်အားများကို ကိုင်စွဲကာ မိမိထက် စိတ်ဓာတ်ခွန်အားမြင့်မားသူများအား မိမိလက်ရုံးအားကို မဏ္ဍိုင်ပြု၍ ၎င်းတို့ကို မိမိမကြောက်ကြောင်း ပြလေ့ရှိသည်။

ယနေ့ကဲ့သို့ ပညာခေတ်ကြီးတွင် လက်နက် အရေအတွက်သည် လည်းကောင်း၊ လူသူ၊ တပ်ဖွဲ့၊ အသင်းဝင် အင်အားသည်လည်းကောင်း အဓိက မကျတော့ဘဲ အသိပညာ၊ အတတ်ပညာ၊ ဉာဏ်စွမ်းဉာဏ်ရည်၊ တီထွင်ဖန်တီးမှု၊ ထိုးထွင်းသိမြင်မှု၊ တွေးခေါ်ချင့်ချိန် စဉ်းစားဆင်ခြင်နိုင်မှု၊ ဆွဲဆောင်စည်းရုံးနိုင်စွမ်း စသည့် နှလုံးရည်များက အခရာကျလာသည်။

လက်ရုံးအားနှင့် စိတ်ကူးစံနှုန်းများ၊ ဖြစ်ချင်သော ဆန္ဒများကိုသာ အဓိကထားသူ များနေသမျှ သို့မဟုတ် ထိုဘက်နှစ်ဖက်အကြား အပြန်အလှန် ညှိနှိုင်းစေ့စပ်မှု၊ အပေးအယူ၊ အလျှော့အတင်း ဆွေးနွေးမှုမရှိဘဲ မိမိတို့အထိုင် အသီးသီးကိုသာ အခိုင်အမာ ရပ်ခံနေသမျှ ပြဿနာ ဖြေရှင်းနိုင်မည့်နည်းလမ်း ရှာတွေ့မည်မဟုတ်ပေ။

ယနေ့ ဖွဲ့စည်းပုံအခြေခံဥပဒေ ပြင်ဆင်ရေးသည် တစ်မျိုးသားလုံး၏ ဘုံပြဿနာတစ်ရပ်ဟုဆိုပါက ယင်းကို ဖြစ်ချင်၊ ရချင်၊ လိုချင်သော စိတ်ကူးစံနှုန်းဖြင့် ချဉ်းကပ်ဖြေရှင်းမည်လော၊ ပကတိ အရှိတရားကိုအခြေခံကာ လက်တွေ့ကျပြီး ဖြစ်နိုင်ခြေရှိသည့်နည်းလမ်းဖြင့် ချဉ်းကပ် အဖြေရှာမည်လော စဉ်းစားကြည့်စေလိုရင်းဖြစ်သည်။

အယ်ဒီတာ(၄-၃-၂၀၁၉)