POST TYPE

EDITORIAL

နိုင်ငံ့အရေး၊ ပါတီအရေး၊ တို့အရေးနှင့် သူတို့အရေး (Daily, Vol-6/No-257)
05-Feb-2019

မြန်မာ့ဒီမိုကရေစီအသွင်ကူးပြောင်းရေးအတွက် အရေးပါသည့် လုပ်ငန်းစဉ်တစ်ခုဖြစ်သော အခြေခံဥပဒေ ပြင်ဆင်ရေးကိစ္စမှာ ယခုအခါ အာဏာရပါတီ ဖြစ်သော အမျိုးသားဒီမိုကရေစီအဖွဲ့ချုပ်(NLD)သာမက အခြားနိုင်ငံရေးပါတီများ အပြင် ပြည်သူတစ်ရပ်လုံး၏ စောင့်ကြည့်ခြင်းခံနေရပြီဖြစ်ပေသည်။ ပြီးခဲ့သည့် သီတင်းပတ်အတွင်း ခြေဥပြင်ဆင်ရေးအတွက် ပူးတွဲကော်မတီတစ်ခုဖွဲ့စည်း ထူထောင်ရေးအဆိုကို NLD မှ လွှတ်တော်ကိုယ်စားလှယ်တစ်ဦးက စတင်တင်သွင်းရာမှ လွှတ်တော်ကိုယ်စားလှယ်များအကြား လှုပ်လှုပ်ရှားရှားဖြစ်ကုန်ရုံတင်မကဘဲ နောက်ဆုံးတွင် တပ်မတော်ကာကွယ်ရေးဦးစီးချုပ်ကိုယ်တိုင်က ယင်းကိစ္စကို သဘောတူညီထားပြီးဖြစ်သည်ဟုဆိုကာ တပ်မတော်အနေနှင့် ယင်းကိစ္စအပေါ် မီးနီပြနေမည်မဟုတ်ဟူသောသဘောမျိုး ထုတ်ဖော်အသိပေးလိုက်သည်အထိဖြစ် သွားခဲ့ပေသည်။ 

လတ်တလော ကောက်ချက်ဆွဲကြည့်မည်ဆိုလျှင် ခြေဥပြင်ဆင်ရေးအတွက် ကန့်ကွက်သူမရှိ၊ လက်ခံသူချည်းသာရှိသည်ဟုဆိုရမည်ဖြစ်ပြီး ပြင်ဆင်ရေးအတွက် ပူးတွဲကော်မတီဖွဲ့မည့် လုပ်ငန်းစဉ်ကိစ္စ၊ ပြင်ဆင်မည့်အကြောင်းအရာကိစ္စတို့နှင့် ပတ်သက်၍ အကြီးအကျယ်စကားပြောကြရမည်ဖြစ်သည်။ နိုင်ငံရေးလေ့လာ ဆန်းစစ်သူအချို့က ဒေါ်အောင်ဆန်းစုကြည် ဦးဆောင်သည့် ဒီမိုကရေစီအစိုးရသည် မြစ်ဆုံစီမံကိန်းဘက်သို့ရောက်နေသည့် လူထု၏အာရုံကို အခြေခံဥပဒေဘက်သို့လွှဲပြောင်းပေးရန် ကြိုးစားမည့်သဘောမျိုးရှိနေသည်ဟု သုံးသပ်ကြပြီး အချို့ကမူ ၂၀၂၀ ရွေးကောက်ပွဲနီးလာသည်နှင့်အမျှ အခြေခံဥပဒေပြင်ဆင်ရေးသည် NLD ပါတီအတွက် အရေးတကြီးဖြစ်လာသည်ဟု သုံးသပ်ကြသည်ကို တွေ့ရပေသည်။

မည်သို့ပင်ဆိုစေ ဖွဲ့စည်းပုံအခြေခံဥပဒေပြင်ဆင်ရေးလုပ်ငန်းများကို ဆောင်ရွက်နိုင်ရေးအတွက် ဖွဲ့စည်းပုံအခြေခံ ဥပဒေပြင်ဆင်ရေး ပူးပေါင်းကော်မတီတစ်ရပ်ကို သင့်လျော်သည့် ပြည်ထောင်စုလွှတ်တော်ကိုယ်စားလှယ်များနှင့် ဖွဲ့စည်းရန် ပြည်ထောင်စုလွှတ်တော်သို့ တိုက်တွန်းကြောင်း အရေးကြီးအဆိုကို လွှတ်တော်ကိုယ်စားလှယ် ၃၆ ဦးက စတင်ဆွေးနွေးချိန်မှစ၍ ဘက်မတူ၊ အုပ်စုမတူသည့် ပါတီအသီးသီးမှ ကိုယ်စားလှယ်များအားလုံးအနေနှင့် တိုင်းပြည်နှင့် ပြည်သူတို့အတွက် စစ်မှန်သော အပြောင်းအလဲကောင်းများကို ဆောင်ကြဉ်းပေးနိုင်မည့် ပြုပြင်မှုများကိုလုပ်ဆောင်ပေးရန် ဦးစွာမေတ္တာရပ်ခံလိုပေသည်။ 

ထိုသို့ဆောင်ရွက်ရာ၌ “ငါ့ပါတီ၊ ငါ့ခေါင်းဆောင်၊ ငါ့အဖွဲ့အစည်း” ဟူ၍ ပါတီ၊ အဖွဲ့အစည်းနှင့် လူပုဂ္ဂိုလ်ရေးကိုရှေ့တန်းမတင်ဘဲနိုင်ငံနှင့် နိုင်ငံသားများ အနာဂတ်အတွက် အဖြစ်သင့်ဆုံးကိစ္စကို ပူးပေါင်းအဖြေရှာနိုင်မည်ဆိုပါက အတိုင်းထက် အလွန်ဖြစ်ပေမည်။ အကြောင်းမှာ တိုင်းပြည်ကောင်းစားရေးအတွက် ဥပဒေပြု လုပ်ငန်းများလုပ်ဆောင်ရာ၌ ပါတီအရောင်အသွေးနှင့် ပုဂ္ဂိုလ်ရေးအားပြုသည့် နိုင်ငံရေးများ၊ အာဃာတတရားများ လွှမ်းမိုးနေလွန်းပါက လိုရာခရီးမပေါက်နိုင်သော ကြောင့်ဖြစ်ပေသည်။ ဆိုလိုသည်မှာ အခြေခံဥပဒေပြင်ဆင်ရေးနှင့် ငြိမ်းချမ်းရေးဖော်ဆောင်မှုအပါအဝင် နိုင်ငံအတွက် အမှန်တကယ်အရေးကြီးသော အခြားအရေးကိစ္စကြီးများကို အကောင်အထည်ဖော်ရာ၌ ယင်းအရေးကိစ္စတို့သည် မိမိတို့ပါတီ သို့မဟုတ် အဖွဲ့အစည်းတစ်ခုတည်းနှင့်သက်ဆိုင်သောအရာမျိုးမဟုတ်ဘဲ မိမိနှင့် ဆန့်ကျင်ဘက်ဖြစ်သော အင်အားစုများ၏ အရေးကိစ္စမျိုးဖြစ်အောင် ဖန်တီးပြီး ၎င်းတို့ကို လိမ္မာပါးနပ်စွာ စည်းရုံးနိုင်လေ အောင်မြင်မှုရရှိလေဖြစ်မည်ဆိုသော အချက်ကို ဖော်ပြလိုရင်းဖြစ်ပေသည်။

အယ်ဒီတာ (၄ - ၂ - ၂၀၁၉)