News

POST TYPE

EDITORIAL

အများသုံးအိမ်သာ ဋီကာ (Daily Vol-6/No-246)
23-Jan-2019
နေပြည်တော်၊ မန္တလေးနှင့် နာမည်ကျော်မင်းကွန်းခေါင်းလောင်းကြီးရှိရာ မင်းကွန်းမြို့တို့တွင်ရှိသော အများသုံး သန့်စင်ခန်းအချို့ အရှေ့တောင်အာရှနိုင်ငံများအဖွဲ့ (အာဆီယံ) က ချီးမြှင့်ပေးအပ်သော ASEAN Public Award ဆုရရှိသွားကြောင်း ဟိုတယ်။ခရီးဝန်ကြီးဌာနက သတင်းထုတ်ပြန်လာပါသည်။ အများသုံးအိမ်သာများ သန့်ရှင်းစင်ကြယ်မှုနှင့် ပတ်သက်၍ နှစ်ပေါင်းများစွာ စိတ်တိုင်းကျနိုင်စရာ အခြေအနေရှိ၊ မရှိကို ရှင်းပြနေစရာပင်မလိုသော မြန်မာ့လူ့ အဖွဲ့အစည်းတွင်း ယခုလိုအများသုံးအိမ်သာအချို့ အာဆီယံဆုအထိပင် ဆွတ်ခူးသွားနိုင်ခဲ့သည်ဟူသောသတင်းမှာ ဝမ်းသာစရာသတင်းထက်ပင် ပိုသည်ဟု ဆိုချင်ပေသည်။ တစ်ဆက်တည်းမှာပင် ပြည်တွင်း၊ ပြည်ပခရီးသွားများ အများအပြား ဝင်ရောက်လေ့ရှိသည့် မြို့ကြီးများတွင် အများသုံးအိမ်သာ လောက်လောက်ငင ရှိပြီလောဟူသည်မှာလည်း မေးစရာဖြစ်လာပါသည်။ 

အများသုံးအိမ်သာ၊ သန့်စင်ခန်း၊ ရေအိမ် စသည်ဖြင့် ဒေသအလိုက်အခေါ် အဝေါ်မျိုးစုံဖြစ်နေသည့် အများသုံးအိမ်သာများ သန့်ရှင်းရေးနှင့် အလုံအလောက် ရှိရေးမှာ ခေတ်အဆက်ဆက် မြန်မာ့လူ့အဖွဲ့အစည်းအတွက် အားနည်းချက်တစ်ခု သဖွယ်ဖြစ်ခဲ့ပေသည်။ ယခင်ကျန်းမာရေးဝန်ကြီးဌာနနှင့် မြို့တော်စည်ပင်သာယာရေးအဖွဲ့အစည်း အဆက်ဆက်တွင် တာဝန်ထမ်းဆောင်ခဲ့ကြသူများ၏ အသိပညာပိုင်းဆိုင်ရာ အားနည်းချက်ကြောင့်လော၊ ရန်ပုံငွေအခက်အခဲကြောင့်လော သို့မဟုတ် အလှူရှင်မရှိ၍လော ဆိုသည်ကို အတိအကျမသိခဲ့ကြရသော်လည်း မြန်မာပြည်သူများကောင်းစွာနားလည်လက်ခံခဲ့ကြသည်မှာ ရန်ကုန်၊ မန္တလေးအပါအဝင် မြို့ကြီးပြကြီးအသီးသီးရှိ အများသုံးအိမ်သာဆိုလိုက်သည်နှင့် နှာခေါင်းရှုံ့စရာနေရာများပင် ဖြစ်ခဲ့လေသည်။ 

ယခင်က ရန်ကုန်နှင့် နယ်မြို့များနှိုင်းယှဉ်ပါက နယ်မြို့များ၌ ဘုန်းကြီးကျောင်းများနှင့် စေတီပုထိုးအချို့ရှိ ကုဋီများက အများသုံးအိမ်သာ၏ အခန်းကဏ္ဍကို တစ်နည်းတစ်ဖုံအားဖြင့် ပံ့ပိုးပေးထားသဖြင့် ခရီးသွားများအတွက် အခက်အခဲ သိပ်မရှိလှသော်လည်း ရန်ကုန်လိုမြို့ ကြီးပြကြီးအတွက်မူ လူနှင့် အများသုံးအိမ်သာ အရေအတွက်မှာ အချိုးမကျသောကြောင့် အတော့်ကိုအခက်တွေ့ခဲ့ကြရပေသည်။ နောက်ပိုင်း နိုင်ငံတကာအဆင့်မီရှော့ပင်းစင်တာကြီးအတော်များများပေါ်ပေါက်လာမှသာ ရန်ကုန်တွင် အများသုံးအိမ်သာ အရေအတွက်အတန်ငယ်များလာခြင်း ဖြစ်ပေသည်။ သို့သော်လည်း ရှော့ပင်းစင်တာမဟုတ်သော အခြားနေရာများ၊ အထူးသဖြင့် နိုင်ငံပိုင် (အစိုးရပိုင်) နေရာများမှ အများသုံးအိမ်သာများ၏ သန့်ရှင်းမှုမှာ အဆင့်နိမ့် ကျနေဆဲဖြစ်ပေသည်။ 

တစ်ကိုယ်ရေသန့်ရှင်းရေးနှင့် ပတ်ဝန်းကျင်သန့်ရှင်းရေးတွင် လူတို့၏အညစ်အကြေး စွန့်ထုတ်မှုဟူသည် မဖြစ်မနေ အလေးထားရမည့်ကိစ္စဖြစ်သလို အညစ်အကြေးစွန့် သည့်အပြုအမူ၊ တစ်နည်းအားဖြင့် မည်သို့မည်ပုံ အညစ်အကြေးစွန့်သည် ဟူသော ကိစ္စမှာ လူ့ယဉ်ကျေးမှု၏ စံပေတံတစ်ခုဖြစ်လာပေသည်။ ယခင်က ကျေးလက်ဒေသ နှင့်တောဘက်များတွင် တောထိုင်သည့်အလေ့လောက်သာရှိခဲ့ရာမှ ကုလသမဂ္ဂ အပါအဝင် ပြည်တွင်း၊ ပြည်ပကျန်းမာရေးအာဏာပိုင်များ၏ ဆော်ဩမှုများကြောင့် ယင်လုံအိမ်သာများဆောက်လုပ်ရမည်ဟူသော အသိပညာများရလာကြသည်။ တောရော၊ မြို့ပါ အိမ်သာတည်ဆောက်ရေးသာမက အိမ်သာသန့်ရှင်းရေးကိုပါ အလေးထားတတ်လာကြသည်။ ဖွံ့ဖြိုးပြီးနိုင်ငံကြီးများကိုကြည့်လျှင် အများသုံး အိမ်သာသန့်ရှင်းရေးကိစ္စမဆိုထားနှင့်၊ အများသုံးအိမ်သာ ဒီဇိုင်းဆန်းဆန်းများကိုပင် အပြိုင်အဆိုင် ရေးဆွဲကြ၊ ဆုချီးမြှင့်ကြလုပ်ကြသည်ကိုတွေ့ရသည်။ အိမ်တစ်အိမ် သို့မဟုတ် နိုင်ငံတစ်နိုင်ငံသို့ရောက်လျှင် စိတ်လက်ချမ်းသာစွာ အညစ်အကြေး စွန့်နိုင်သည့်နေရာ (အိမ်သာ) ရှိ၊ မရှိဟူသည်မှာ ဖွံ့ဖြိုးပြီးနိုင်ငံကြီးများမှ နိုင်ငံသားတို့အတွက် စံသတ်မှတ်ချက်တစ်ခုလိုဖြစ်လာသည်။ 

မြန်မာတို့အတွက်မူ ရေအိမ်များသန့်ရှင်းရေးမှာ ရေးကြီးခွင်ကျယ်ပြဿနာ မဟုတ်ခဲ့သော်လည်း နိုင်ငံနှင့် ယဉ်ကျေးမှု ဓလေ့စရိုက်များကူးလူးလာသည့် ခေတ်ထဲတွင်မူ မဖြစ်မနေ ဂရုစိုက်ကြရတော့မည်ဖြစ်သည်။ အိမ်ရှေ့ဧည့်ခန်းဆောင်တွင် အကောင်းစားဇိမ်ခံပစ္စည်းများဖြင့် ဧည့်သည်အား ဧည့်ဝတ်ကျေပွန်အောင် မည်သို့ပင် ပြုစုနိုင်သည်ဖြစ်စေ နောက်ဖေးအိမ်သာ မသန့်ရှင်းပါက မလွဲမသွေ နှာခေါင်းရှုံ့ခံကြရမည်သာဖြစ်ပေသည်။ ဆိုလိုသည်မှာ ခေတ်မီတိုးတက်သော နိုင်ငံတော်သစ်၏ အင်္ဂါရပ်တွင် မိုးပျံတံတားများနှင့် မိုးပျံတိုက်ကြီးများအရေးပါသလို အများသုံးအိမ်သာများသန့်ရှင်းရေးနှင့် စည်းကမ်းရှိရှိ နိုင်ငံကြီးသားပီသစွာ အညစ်အကြေးစွန့်တတ်သူများဖြစ်ရေး ဆိုသည်မှာလည်း အခြေခံကျသည့်အရာများဖြစ်ကြောင်း ဖော်ပြလိုရင်းဖြစ်ပေသည်။

အယ်ဒီတာ ( ၂၂ - ၁ - ၂၀၁၉ )