News

POST TYPE

EDITORIAL

ဂျိန်းဖော့သူ၊ ဂျိန်းဖော့သားတို့နှင့် ပြည်ထောင်စုအိပ်မက် (Daily Vol-6/No-242)
18-Jan-2019
ပြည်တွင်း၊ ပြည်ပမှ ကချင်အမျိုးသားအဖွဲ့အစည်းများသာမက ဘာသာရေးနှင့် ကချင်ရိုးရာယဉ်ကျေးမှု အဖွဲ့အစည်းမှ ခေါင်းဆောင်များအားလုံး တက်ရောက်ခဲ့သည်ဆိုသော ချင်းမိုင်မြို့ ကချင်အမျိုးသားညီလာခံအပြီး ထွက်ပေါ်လာသော ကြေညာချက်ကို တွေ့မြင်ရသည့်အတွက် လွန်စွာအံ့အားသင့်ပြီး ပါးစပ်အဟောင်းသားဖြစ်သွားမိသည်ဟု ဦးစွာပြောလိုပေသည်။ ကချင်ပြည်နယ်တွင်းနှင့် ကချင်ပြည်နယ်အပြင်ဘက်သို့ ရောက်ရှိနေသော ကချင်တိုင်းရင်းသားများအားလုံးကို အမှန်တကယ် ကိုယ်စားပြု၊ မပြုဆိုသည့်အချက်ကို မပြောနိုင်သော်လည်း ယင်းကြေညာချက်အဆိုအရ လွတ်လပ်သော ကချင်နိုင်ငံတော်ထူထောင်ရန် အဆိုပါညီလာခံက ဆုံးဖြတ်လိုက်သည်ဟူ၏။ 

အခြား ကချင်တိုင်းရင်းသားနိုင်ငံရေးပါတီများက ကချင်နိုင်ငံတော်သစ် ကိစ္စအပေါ် မည်သို့အမြင်ရှိသည်ကို မသိနိုင်သော်လည်း ယင်းကြေညာချက်က မြန်မာနိုင်ငံ ပြည်တွင်းစစ်အဆုံးသတ်ရေးနှင့် အမျိုးသားပြန်လည်ရင်ကြားစေ့ရေးကို အကောင်အထည်ဖော်နေသည့် ဒီမိုကရေစီအစိုးရနှင့် ပြည်ထောင်စု မပြိုကွဲရေးကိစ္စကို နံပါတ် ၁ ဦးစားပေးထားသည့် တပ်မတော်ကို တိုက်ရိုက်စိန်ခေါ်လိုက်သည့် သဘောသို့ သက်ရောက်သွားသည်မှာ ရှင်းပါသည်။ ဤခေါင်းကြီးရေးနေချိန်တွင် ကချင်ပြည်နယ်ဒီမိုကရေစီပါတီအပါအဝင် ကချင်နိုင်ငံရေးအသိုင်းအဝိုင်းက လက်သင့်မခံကြောင်း ထုတ်ဖော်ပြောဆိုလာသည်ဟု သိရပေသည်။ မည်သို့ပင်ဆိုစေ ကချင်နိုင်ငံတော်ထူထောင်မည်ဟူသည့် သတင်းကား လူမှုကွန်ရက်သုံးသူများနှင့် မြန်မာ့နိုင်ငံရေး လေ့လာစောင့်ကြည့်သူများအကြား ကွန့်မန့်အမျိုးမျိုးပေး ဝေဖန်စရာ သတင်းကြီးတစ်ပုဒ်ဖြစ်သွားခဲ့ရပေသည်။ 

အဆိုပါသတင်းနှင့်ပတ်သက်၍ မြန်မာ့နိုင်ငံရေး အကဲခတ်အချို့က “ဒါဟာ အပစ်ရပ်ပေးထားတဲ့ တပ်ကို သွားဆွသလိုဖြစ်နေမယ်”ဟု သုံးသပ်ကြပြီး ဒီမိုကရေစီကူးပြောင်းရေးနှင့် တိုင်းပြည်ဖွံ့ဖြိုးရေးကို အားစိုက်နေသူ အချို့ကတော့ ယခုလို တိုင်းရင်းသားအဖွဲ့အစည်းအချို့၏ လက်လွတ်စပယ် ကြေညာချက်မျိုးကြောင့် အမှိုက်ကစ ပြာသာဒ်မီးလောင်ကာ စစ်တပ်အာဏာ ပြန်သိမ်းသည့် အခြေအနေသို့ ပြန်လည်ဆိုက်ရောက်သွားမည်ကို အထူးစိုးရိမ်လျက် ရှိကြပေသည်။ အထူးသဖြင့် ရခိုင်အရေးကိစ္စကြောင့် နိုင်ငံတကာအသိုင်းအဝိုင်းအကြား တိုင်းပြည်မျက်နှာမရဖြစ်နေချိန်၊ AA လက်နက်ကိုင်အုပ်စုက ရခိုင်ပြည်နယ်တွင် သွေးတိုးစမ်းလာချိန်၊ စီးပွားရေးအကျပ်အတည်းများဖြစ်နေချိန်တွင် ယခုလို ကချင်နိုင်ငံတော်ကိစ္စပေါ်ပေါက်လာခြင်းကြောင့် ပြဿနာများ ပိုမိုကြီးထွားရှုပ်ထွေးသွားမည်ကို စိုးရိမ်ခြင်းဖြစ်ဟန်ရှိပေသည်။ 

ဒီမိုကရေစီခေတ်ဟူသည် မည်သူမဆို၊ မည်သည့်အဖွဲ့အစည်းမဆို လွတ်လပ်စွာ ထုတ်ဖော်ပိုင်ခွင့်ရှိရာ ယခုချင်းမိုင်တွင်ပြုလုပ်သည့် အစည်းအဝေးသို့ တက်ရောက်ခဲ့သည်ဆိုသော ပုဂ္ဂိုလ်များ၏ ကချင်နိုင်ငံတော်ကိစ္စကို The Voice အနေနှင့် ဝေဖန်ပြောဆိုရန် ဆန္ဒမရှိပေ။ သို့သော် ဒီမိုကရေစီစနစ်ဖြစ်စေ၊ ကွန်မြူနစ်စနစ်ဖြစ်စေ၊ မည်သည့်နိုင်ငံရေးစနစ်ဖြစ်စေ ဖြစ်သင့်ဖြစ်ထိုက်သည့် စကားကိုဆိုပြီး ဖြစ်သင့်ဖြစ်ထိုက်သည့် အလုပ်ကိုလုပ်ခြင်းသာ အသင့်တော်ဆုံး ဖြစ်လိမ့်မည်ဟု ထင်ပါသည်။ သို့မှသာ မိမိတိုင်းရင်းသား၊ မိမိလူမျိုးတို့၏ အကျိုးကို အမှန်တကယ်လိုလားရာ ရောက်ပေမည်။ ဆိုလိုသည်မှာ ပြည်ထောင်စုဖွား မြန်မာနိုင်ငံသားဟူသည် ဤပြည်ထောင်စုတွင်းရှိကြသော တိုင်းရင်းသားညီအစ်ကို၊ မောင်နှမအားလုံးကိုဆိုလိုပြီး တစ်ဦးနှင့်တစ်ဦး အပြန်အလှန်စောင့်ရှောက်ရမည့်တာဝန်ရှိသလို ပြည်ထောင်စုအကျိုးကို ရှေးရှုသည့်အလုပ်ကိုသာ လုပ်ကြရမည်ဖြစ်ကြောင်း သတိပေးဖော်ပြလိုရင်းဖြစ်ပေသည်။ 

အယ်ဒီတာ (၁၇-၁-၂၀၁၉) 



  • VIA