News

POST TYPE

EDITORIAL

အီလေးဆွဲမနေသင့်တော့သည့် မြစ်ဆုံကိစ္စ (Daily Vol-6/No-239)
15-Jan-2019
ယခင်သမ္မတဦးသိန်းစိန်ဦးဆောင်သည့် အစိုးရလက်ထက်ကစ၍ တည်ဆောက်မှုကို ၇ နှစ်ကျော် ရပ်နားထားခဲ့သည့် မြစ်ဆုံစီမံကိန်းကိစ္စနှင့်ပတ်သက်၍ ယခုရက်ပိုင်းအတွင်း သက်ဆိုင်သူများထံမှ အသံအချို့ထွက်လာသည်ကို သတိပြုမိပေသည်။ ပြီးခဲ့သည့် သီတင်းပတ်အတွင်း ကချင်ပြည်နယ်နေ့အခမ်းအနားတက်ရောက်ရန် ယင်းပြည်နယ်သို့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သွားရောက်ခဲ့စဉ်က ကချင်ဘာသာရေး၊ လူမှုရေးနှင့် အရပ်ဘက်လူ့အဖွဲ့အစည်းများနှင့်တွေ့ဆုံရာတွင် ၎င်းအနေနှင့် မြစ်ဆုံကိစ္စကို အဖြူ၊ အမည်းကွဲအောင် အသိပေးပြောဆိုနိုင်ခဲ့ခြင်းမရှိပေ။ သို့သော် မြန်မာနိုင်ငံအခြေစိုက် တရုတ်ပြည်သူ့သမ္မတနိုင်ငံ သံရုံးက မြစ်ဆုံစီမံကိန်းကို ကချင်ပြည်သူလူထုက ကန့်ကွက်မှုမရှိဟု ကြေညာချက်ထုတ်ပြန်ပြီး မြန်မာနိုင်ငံအနေနှင့် ယင်းစီမံကိန်းကို အချိန်ဆွဲထားမည်ဆိုပါက မြန်မာသို့လာမည့် တရုတ်ရင်းနှီးမြှုပ်နှံမှုများထိခိုက်နိုင်သည်ဟု သတိပေးလိုက်ရာ မြစ်ဆုံပြဿနာမှာ လူထုအကြားတစ်စခန်းပြန်ထလာပေသည်။ 

ဇန်နဝါရီ ၁၄ ရက်နေ့တွင်ထွက်ပေါ်လာသော သတင်းများအရ မြစ်ဆုံကိစ္စကို ကချင်တိုင်းရင်းသားပြည်သူများက ထောက်ခံမှုလုံးဝမရှိဘဲ စီမံကိန်းအပြီးတိုင် ရပ်ဆိုင်းရေးကိုသာ လူထုနှင့်လက်တွဲလုပ်ဆောင်သွားမည်ဟု ကချင်နိုင်ငံရေးပါတီ တစ်ခုက တရားဝင်ထုတ်ဖော်ပြောဆိုထားသည်ကို တွေ့ရပေသည်။ မြစ်ဆုံကိစ္စနှင့် ပတ်သက်၍ လူထုအကြား၊ အထူးသဖြင့် ကချင်တိုင်းရင်းသားများအကြား လတ်တလော မကျေမလည်ဖြစ်စေသည့်ကိစ္စမှာ တရုတ်သံရုံး၏ အဆိုပါထုတ်ပြန်ချက်ကိစ္စပင်ဖြစ်နေသည်။ အဆိုပါသံရုံးထုတ်ပြန်ချက်တွင် ကချင်ပြည်နယ်သို့ ပြီးခဲ့သည့် ၂၀၁၈ ဒီဇင်ဘာလကသွားရောက်လည်ပတ်ခဲ့သော တရုတ်သံအမတ်ကြီး၏ ခရီးစဉ်တွင် မြစ်ဆုံကိစ္စဆန့်ကျင်နေသူများမှာ ပြည်ပရောက်လူပုဂ္ဂိုလ်များနှင့် အဖွဲ့အစည်းများသာဖြစ်သည်ဟု ကချင်နိုင်ငံရေးပါတီနှင့် ဘာသာရေးအဖွဲ့အစည်းများက ၎င်းကို အသိပေးပြောကြားခဲ့သည်ဟု ဖော်ပြထားရာ မြစ်ဆုံဇာတ်လမ်းမှာ ပိုမိုရှုပ်ထွေးသွားရပေသည်။

ဤတွင်အာဏာရ အမျိုးသားဒီမိုကရေစီအဖွဲ့ချုပ်ပါတီ (NLD) က မြစ်ဆုံကိစ္စအတွက် ကချင်ပါတီဘက်ကဆွေးနွေးလိုက ဆွေးနွေးပေးမည်ဟုဆိုပြီး ယင်းကိစ္စတွင် ပြည်သူ့သဘောဆန္ဒအတိုင်း ရပ်တည်သွားမည်ဖြစ်ကြောင်း ကြေညာလိုက်သည်ကို တွေ့ရပေသည်။ ဒေါ်အောင်ဆန်းစုကြည်သည် ကချင်ခရီးစဉ်တွင် မြစ်ဆုံ စီမံကိန်း ရပ်၊ မရပ်ကိစ္စကို ရှင်းရှင်းလင်းလင်းမပြောခဲ့သော်လည်း ယခု NLD ပါတီ၏ ခါတော်မီထုတ်ပြန်ချက်အရဆိုပါက ဒေါ်အောင်ဆန်းစုကြည်၏သဘောထားမှာလည်း ပြည်သူလူထု၏ ဆန္ဒအတိုင်း ရပ်ဆိုင်းရေးသာဖြစ်မည်ဟု ယေဘုယျမှတ်ယူ၍ ရနိုင်ပေသည်။ 

သို့တိုင်အောင် ဘင်္ဂါလီကိစ္စအပါအဝင် ရခိုင်ပဋိပက္ခနှင့်ပတ်သက်၍ ကုလသမဂ္ဂလုံခြုံရေးကောင်စီတွင်သာမက အခြားသံတမန်ဆက်ဆံရေးနယ်ပယ်တွင်ပါ မြန်မာဘက်က မိတ်ဆွေကောင်းတစ်ဦးသဖွယ် ရပ်တည်ပေးခဲ့သော တရုတ်နိုင်ငံ၏ ဆန္ဒကို ဒေါ်အောင်ဆန်းစုကြည် ဦးဆောင်သော ဒီမိုကရေစီအစိုးရအနေနှင့် အကောင်းဆုံးဖြစ်အောင် မည်သို့ရှင်းထုတ်မည်နည်းဟူသည့် မေးခွန်းကိုမူ မည်သူကမျှ အဖြေပေးရဲလိမ့်မည်မထင်မိပေ။ မြန်မာဘုရင်များလက်ထက်ကတည်းက ထိတွေ့ဆက်ဆံခဲ့ရသော တရုတ်၏ သဘောနှင့် မနောကိုကြည့်မည်ဆိုပါက ရှင်းပါသည်။ ဥပမာ- တစ်ကျပ်နှင့်တန်သည့် အရာကိုရောင်းလျှင် တစ်ကျပ်ထက်ပိုရ နိုင်စရာမရှိသည့် သဘောတရားမျိုး အမြဲရှိခဲ့စမြဲသာဖြစ်ပေသည်။ သို့သော် တရုတ်ပြည်ခရီးစဉ်တွင် သမ္မတရှီကျင့်ဖျင်နှင့်တွေ့ဆုံရာ၌ ဒေါ်အောင်ဆန်းစုကြည် ထုတ်ပြောခဲ့ဖူးသလိုပင် “အိမ်နီးချင်းကောင်းဟူသည် ရွေးချယ်၍မရ” ဟူသည့်အမြင်နှင့် စဉ်းစားမည်ဆိုပါက NLD အစိုးရအနေနှင့် မြစ်ဆုံကိစ္စကို အချိန်ဆွဲမနေတော့ဘဲ ခုရှုပ်မှနောင်ရှင်းသဘောဖြင့် အဖြူ၊ အမည်းသဲကွဲအောင် ရဲရဲဝံ့ဝံ့အဖြေထုတ်ပေးခြင်းသည် နှစ်ဦးနှစ်ဖက်ရေရှည်ဆက်ဆံရေးအတွက် အကောင်းဆုံးဖြစ်လိမ့်မည်ဟု ယုံကြည်မိကြောင်း ဖော်ပြလိုရင်းဖြစ်ပေသည်။ 

အယ်ဒီတာ (၁၄-၁-၂၀၁၉ )



  • VIA