News

POST TYPE

EDITORIAL

အာဏာ၊ ကိုယ်ကျိုးစီးပွား၊ ဒုတိယ စစ်အေးကာလနှင့် မြေစာပင် မြန်မာပြည် (Daily, Vol-6/No-233)
08-Jan-2019
နိုင်ငံကြီးအချို့၏ အင်အားချိန်ခွင်လျှာ ညှိကြသည့်အခါ ထိုနိုင်ငံကြီးအချို့အကြားရှိ နိုင်ငံငယ်များ အခက်တွေ့၊ ဒုက္ခကြုံရသည့် သာဓကများ ရှိခဲ့ကြောင်း ကမ္ဘာ့သမိုင်းကို လေ့လာကြည့်လျှင် သိနိုင်သည်။ စစ်အေးကာလအတွင်း အမေရိကန်နှင့် ဆိုဗီယက် ပြည်ထောင်စုအကြား ဩဇာ၊ အာဏာချဲ့ထွင်မှု၊ စစ်အခြေစိုက်စခန်းများ အပြိုင်ထူထောင်မှု၊ ကမ္ဘာ့နိုင်ငံအသီးသီးအား သူ့လူ၊ ငါ့လူ စည်းရုံးဆွဲဆောင်မှုများက အထင်ရှားဆုံး သက်သေဖြစ်သည်။

အမေရိကန်ပြည်ထောင်စုနှင့် တရုတ်နိုင်ငံတို့အကြား ဒုတိယ စစ်အေးကာလကဲ့သို့ ပြန်ဖြစ်လာသော ယနေ့အချိန်တွင် မြန်မာနိုင်ငံသည် ထိုနှစ်နိုင်ငံအကြား ပထဝီနိုင်ငံရေးအရသော်လည်းကောင်း၊ ကျင့်သုံးခံယူထားသော စနစ်၊ ဝါဒများအရသော်လည်းကောင်း မဟာဗျူဟာကျကျ အရေးပါသောနေရာတွင် တည်ရှိသည်။

ယင်းအချက်သည် မြန်မာနိုင်ငံကို အဆိုးဘက်ရော၊ အကောင်းဘက်ပါ နှစ်ဖက်စလုံးသို့ တွန်းပို့နိုင်သော အနေအထားဖြစ်ရာ အုပ်ချုပ်သော အစိုးရများ၏ အရည်အချင်း၊ အမြော်အမြင်၊ စွမ်းဆောင်ရည်၊ ပါးရည်နပ်ရည်ရှိမှုနှင့် ထက်မြက်ထူးချွန်မှု အနိမ့်အမြင့်အပေါ် မူတည်ကာ နိုင်ငံနှင့် နိုင်ငံသားများ အဆိုး၊ အကောင်း ခံစားရနိုင်သည်။

လက်တွေ့အားဖြင့်မူ ၁၉၈၈ခုနှစ် စစ်အာဏာသိမ်းပြီးနောက် ဒုတိယမြောက် အဆိုးရွားဆုံး နိုင်ငံတကာ အသိုင်းအဝိုင်း၏ ဖိအားကြောင့် အကျပ်အတည်းနှင့် ကြုံတွေ့နေရခြင်းသည် အုပ်ချုပ်သော အစိုးရများ၊ အစိုးရ ခေါင်းဆောင်များနှင့် သဘောထား တင်းမာလှသည့် တပ်မတော်၊ တပ်မတော်ခေါင်းဆောင်တို့၏ နိုင်ငံခြားရေးရာမူဝါဒ၊ သံတမန်ဆက်ဆံရေး၊ အထူအပါး နားလည်မှုရေချိန် နိမ့်ကျနေခြင်းကို ထင်းလင်းစွာ ဖော်ပြနေသည့်သဘောဖြစ်သည်။

စင်စစ်အားဖြင့် လက်ရှိ ရခိုင်ပြည်နယ်ပြဿနာသည် ၂၀၁၂ခုနှစ် ဧပြီလ ၁ ရက် ကြားဖြတ်ရွေးကောက်ပွဲအပြီး ဒေါ်အောင်ဆန်းစုကြည်ခေါင်းဆောင်သော NLD ပါတီဝင် လွှတ်တော်ကိုယ်စားလှယ် ၄၃ ဦး ဥပဒေပြုလွှတ်တော် အသီးသီးသို့ ရောက်ရှိသွားပြီးနောက် မကြာမီတွင်ပင် ရခိုင်ပြည်နယ် ကျောက်နီမှော်ရွာတွင် ကနဦး စတင်ခဲ့သည်ဟု ဆိုနိုင်သည်။

ယင်းပြဿနာ မတိုင်မီ ရခိုင်ပြည်နယ်တွင် ကျောက်ဖြူ- ကူမင်း ဓာတ်ငွေ့ ပိုက်လိုင်းနှင့် ကျောက်ဖြူ ရေနက်ဆိပ်ကမ်း စီမံကိန်းများကို ရခိုင်ဒေသခံများက ဆန့်ကျင်လျက်ရှိပြီး ဓာတ်ငွေ့ပိုက်လိုင်း ဖြတ်သန်းဖောက်လုပ်ရာ လယ်မြေများတွင် အငြင်းပွားကန့်ကွက်၊ ဆန္ဒပြမှုများ မကြာခဏဆိုသလို ကြိုးကြား ဖြစ်ပေါ်လျက်ရှိခဲ့သည်။

ထို့အတူ မိမိတို့အပေါ် ဖိနှိပ်အုပ်ချုပ်ခဲ့သော တပ်မတော်အစိုးရကို တစ်လျှောက်လုံး ကူညီပံ့ပိုး၊ လမ်းညွှန်၊ စောင့်ရှောက်လာခဲ့သော တရုတ်အစိုးရအပေါ် အမုန်းဓာတ်ခံရှိသော မြန်မာပြည်သူလူထုသည် မြန်မာပြည်မြေပုံပေါ်တွင် ကန့်လန့်ဖြတ် စွေစောင်းစောင်း ဓားလွယ်ခုတ်ဒဏ်ရာကြီးကဲ့သို့ ဖြစ်နေသည့် မိမိတို့ပိုင် သယံဇာတများကို ပေါပေါချောင်ချောင် ရယူသွားသူများထံမှ ဖြတ်သန်းခပင် တူတူတန်တန် မရရှိသော ကျောက်ဖြူ - ကူမင်း ဓာတ်ငွေ့ ပိုက်လိုင်းကို ဆန့်ကျင်ကန့်ကွက်သံများ ဆူညံစပြုနေသော အချိန်ဖြစ်သည်။ 

ထုံးစံအတိုင်း တရုတ်တို့ထံမှ ရှယ်ယာ သို့မဟုတ် ကော်မရှင်ခံစားခွင့် ရရှိထားသူအချို့က ရခိုင်ဒေသ မြေယာပိုင်ဆိုင်မှုနှင့် အငြင်းပွားဆန္ဒပြမှုများက တရုတ်စီမံကိန်းများကို အမှိုက်ကစ ပြာသာဒ်မီးလောင်ဖြစ်ကာ တစ်နိုင်ငံလုံး တရုတ်ဆန္ဒပြမှုများအထိ ကူးစက်မသွားစေရေး၊ စီမံကိန်းများ ရပ်ဆိုင်း မသွားစေရေးအတွက် ၎င်းတို့၏ ခေါက်ရိုးကျိုး လုပ်နည်းလုပ်ဟန်အတိုင်း ဘာသာရေး၊ လူမျိုးရေး အဓိကရုဏ်း ဖန်တီးကာ ပြည်သူလူထု၏ အမျက်ဒေါသကို နေရာပြောင်း ဦးလှည့်ပေးခဲ့သည်။

ယနေ့ ရခိုင်ဒေသတွင် ဤမျှ ပြဿနာ ကြီးသွားခြင်းသည် ပြည်တွင်းရှိ နိုင်ငံရေး အင်အားစုများအကြား အာဏာ၊ အကျိုးစီးပွား ရောပြွန်းသော အောက်လမ်းနည်းနိုင်ငံရေး လုပ်ကြံခြင်း၊ အချင်းချင်း အစေးမကပ်ခြင်း၊ အရည်အချင်း မပြည့်မီခြင်းတို့အပြင် အမေရိကန် ဦးဆောင်သော အနောက်အုပ်စုနိုင်ငံကြီး အချို့နှင့် တရုတ်နိုင်ငံအကြား နိုင်ငံရေးကစားကြခြင်း သို့မဟုတ် ဒီမိုကရေစီ အသွင်ကူးပြောင်းစ နိုင်ငံတစ်ခု၏ အစ်ကိုကြီးနေရာ သို့မဟုတ် ဒီမိုကရေစီ သုခမိန်နေရာကို အပြိုင်လုကြခြင်း၏ အကျိုးဆက်တစ်ခုဟုလည်း ဆိုနိုင်သည်။

အတိတ်သမိုင်းကြောင်းကာလ အစိုးရအဆက်ဆက် စီမံခန့်ခွဲမှု အမှားအယွင်းများ၊ အကျင့်ပျက် ခြစားမှုများကြောင့် ပေါ်ပေါက်လာသော ပြဿနာ အရပ်ရပ်ကို လျစ်လျူရှုထားခဲ့သည့်အတွက် ဖွံ့ဖြိုးမှု နောက်ကျနေသော ရခိုင်ပြည်နယ်မှ ဒေသခံပြည်သူများ၊ ရွှေ့ပြောင်း အခြေချနေထိုင်သူများ ဒုက္ခပင်လယ်ဝေရသည့်အပြင် နိုင်ငံတကာမှ တစ်ဖက်သတ်ဆန်သော ဖိအားပေး၊ အကျပ်ကိုင်မှုများကြောင့် ခေတ်အဆက်ဆက် အဖိနှိပ်ခံ မြေစာပင် မြန်မာပြည်သူလူထုသာ ဘူးလေးရာ ဖရုံဆင့် ခံစားကြရကြောင်း သိစေလိုရင်းဖြစ်သည်။

အယ်ဒီတာ (၇-၁-၂၀၁၉)

(၂၄-၅-၂၀၁၈ နေ့ထုတ် The Voice Daily သတင်းစာတွင် ဖော်ပြခဲ့ပြီးသော အယ်ဒီတာ့အာဘော်ကို ပြန်လည်ဖော်ပြခြင်း ဖြစ်ပါသည်။)