News

POST TYPE

EDITORIAL

ပြည်သူကို ဗဟိုပြုပါ (Daily, Vol-6/No-230)
03-Jan-2019
ရန်ကုန်မြို့တော်သည် မြန်မာနိုင်ငံ၏စီးပွားရေးအရ ဗဟိုချက်မနေရာတွင် ရှိနေသည့်အပြင် လူဦးရေ အများဆုံး၊ ဖွံ့ဖြိုးမှု အမြင့်မားဆုံး၊ အခွင့်အလမ်း အများဆုံး ဖြစ်သည့်အတွက် ရန်ကုန်ကို စီမံခန့်ခွဲအုပ်ချုပ်ရသော တာဝန်မှာများစွာ လေးနက်ကျယ်ပြောလှသည်။ 

ဗြိတိသျှ ကိုလိုနီအစိုးရလက်ထက်ကပင် ရန်ကုန်မြို့တော်၏ စီမံခန့်ခွဲအုပ်ချုပ်မှုကို ဌာနအသီးသီးအလိုက် စနစ်တကျ ပိုင်းခြားသတ်မှတ်ထားခဲ့ရာ ယနေ့ အစိုးရအဆက်ဆက်အထိတိုင် ထိုစနစ်နှင့် များစွာ ခြားနားမှု မရှိသေးပေ။

အထူးသဖြင့် အုပ်ချုပ်ရေးကို ဒေသဆိုင်ရာ အစိုးရအဖွဲ့ သို့မဟုတ် အထွေထွေ အုပ်ချုပ်ရေး ဦးစီးဌာနက ကိုင်တွယ်ဆောင်ရွက်ပြီး မြို့တော်သန့်ရှင်းသာယာလှပရေးကို မြူနီစီပယ်ခေါ် မြို့တော် စည်ပင်သာယာရေး ကော်မတီက တာဝန်ယူဆောင်ရွက်သည်။ 

ယခင် လမ်းစဉ်ပါတီ အစိုးရလက်ထက်၊ စစ်အစိုးရလက်ထက်နှင့် အရပ်သားတစ်ပိုင်း အစိုးရလက်ထက်အထိ ဗြိတိသျှတို့ ပိုင်းခြား သတ်မှတ်ထားခဲ့သည့် တာဝန်နှင့် လုပ်ပိုင်ခွင့်ပုံစံများနှင့် ကွာခြားမှု သိပ်မရှိလှသော်ငြား လက်ရှိ အစိုးရလက်ထက်တွင်မူ များစွာ ပြောင်းလဲသွားခဲ့သည်။

လက်ရှိ ရန်ကုန်တိုင်းဒေသကြီး အစိုးရအဖွဲ့ သို့မဟုတ် ဝန်ကြီးချုပ်သည် မြို့တော် စည်ပင်သာယာရေး ကော်မတီ၏ လုပ်ငန်းတာဝန်များကိုပါ ဝင်ရောက် စီမံခန့်ခွဲနေသည့်အတွက် မြို့တော်ဝန်၏ အခန်းကဏ္ဍမှာ ဝန်ကြီးချုပ်သွားရာ နေရာ အသီးသီးကို လိုက်ပါပို့ဆောင်ပေးနေရသူ မြို့တော်စည်ပင်တာဝန်ခံ တစ်ဦးအဖြစ်သာ မြင်တွေ့ရသည်။

ရန်ကုန်ဝန်ကြီးချုပ်နှင့် ရန်ကုန်မြို့တော်ဝန်တို့အကြား တာဝန်နှင့် လုပ်ပိုင်ခွင့်ဆိုင်ရာ ပိုင်းခြားသတ်မှတ်မှု မရှိသည့်အတွက် နေ့စဉ်နှင့်အမျှ တာဝန်ရှိမှု မကွဲပြားသည့် လှုပ်ရှားဆောင်ရွက်မှုများစွာ တွေ့မြင်နေရပေသည်။

ရန်ကုန်ဝန်ကြီးချုပ်သည် ဘုရားအပူဇော်ခံ လှည့်လည်ပွဲ၊ စီးပွားရေး ကုမ္ပဏီထုတ်ကုန်၊ ရုံးခန်းသစ်ဖွင့်ပွဲတို့မှအစ ဖိတ်ကြားသော ပွဲတိုင်းနီးပါး တက်ရောက်လျက်ရှိပြီး ပြည်ထောင်စု ဝန်ကြီးဌာနအချို့၏ လုပ်ပိုင်ခွင့်အချို့ကိုပါ ဘောင်ကျော်လုပ်ဆောင်နေကြောင်း ဝေဖန်ပြောဆိုမှုများပင် ရှိလာသည်။

ထိုအခြေအနေကို ထင်ရှားစွာသိရှိလိုပါက မန္တလေးတိုင်းဒေသကြီး အစိုးရအဖွဲ့ဝန်ကြီးချုပ်နှင့် မန္တလေးမြို့တော် စည်ပင်သာယာရေး ကော်မတီတို့အကြား နားလည်မှုရှိရှိ အလုပ်တာဝန် ခွဲခြားလုပ်ကိုင်ခြင်း၊ တာဝန်ယူ၊ တာဝန်ခံခြင်း၊ စီမံခန့်ခွဲခြင်းတို့ကို လေ့လာကြည့်နိုင်သည်။

အထင်ရှားဆုံး သာဓကမှာ ခေတ်အဆက်ဆက် မြို့တော်ဝန်၏ စီမံခန့်ခွဲမှုအောက်တွင်သာ ရှိနေသော နှစ်သစ်ကူး မဟာသြင်္ကန်ပွဲတော်၏ ထိပ်ဆုံး လုပ်ငန်း တာဝန်များမှသည် ဖဲကြိုးဖြတ် ဖွင့်လှစ်ပေးသည့်အဆင့်အထိ ရန်ကုန်ဝန်ကြီးချုပ်ကသာ အစစ အရာရာ တာဝန်ယူသွားခြင်းဖြစ်သည်။ ယင်းအချက်မှာ မန္တလေးမြို့တော်နှင့် သိသာစွာ ကွာခြားသည့် သာဓကလည်းဖြစ်သည်။

မန္တလေးမြို့တော်နှင့် ရန်ကုန်မြို့တော်တို့၏ မဟာသြင်္ကန် စီမံခန့်ခွဲမှု၊ ယင်းစီမံခန့်ခွဲမှု၏ရလဒ် မဟာသြင်္ကန်ပွဲတော် စည်ကားသိုက်မြိုက်မှု၊ ပြည်သူအများစု၏ အားပေးထောက်ခံမှု၊ အခြားသော အုပ်ချုပ်မှုပိုင်းဆိုင်ရာ စီမံခန့်ခွဲမှုများကို နှိုင်းယှဉ်ကြည့်လျှင် ပို၍ ထင်းလင်းစွာ ကွဲပြားသွားမည်ဖြစ်သည်။

စင်စစ်အားဖြင့် ဒေသတစ်ခု မြို့တော်တစ်ရပ်ကို စီမံခန့်ခွဲအုပ်ချုပ်ခြင်းသည် နိုင်ငံရေး ရည်မှန်းချက်တစ်ခုကို အကောင်အထည်ဖော်ခြင်း ဖြစ်သော်လည်း ပြည်သူကို ဗဟိုပြုစဉ်းစားခြင်းမရှိဘဲ မိမိ၏အတ္တကို အရောင်တင်ရုံ၊ မိမိကိုယ်ကို ထင်ပေါ်ကျော်ကြားသူအဖြစ် ပုံဖော်ရန် အဓိက စဉ်းစားနေပါက နိုင်ငံရေးအရပင် အရှုံးကြီးရှုံးနေကြောင်း သိစေလိုရင်းဖြစ်သည်။

အယ်ဒီတာ (၃-၁-၂၀၁၉)

(လက်ရှိဖြစ်ပေါ်နေသော အခြေအနေနှင့် ကိုက်ညီနေသောကြောင့် ၃၀-၄-၂၀၁၈ နေ့ထုတ် The Voice Daily သတင်းစာတွင် ဖော်ပြခဲ့ပြီးသော အယ်ဒီတာ့အာဘော်ကို ပြန်လည်ဖော်ပြခြင်း ဖြစ်ပါသည်။)