News

POST TYPE

EDITORIAL

သဘာဝအလှများကို အချိန်မီ ထိန်းသိမ်းပါ (Daily,Vol-6/No-229)
03-Jan-2019
နှစ်သစ်ကူး အပါအဝင် အားလပ်ရက်များအတွင်း မြန်မာနိုင်ငံတစ်ဝန်းရှိ ဒေသအသီးသီး၊ မြို့၊ ရွာအသီးသီးသို့ ခရီးထွက်ကြသူများကြောင့် သက်ဆိုင်ရာဒေသများတွင် အကျိုး၊ အပြစ် နှစ်မျိုး တင်ကျန်ရစ်ခဲ့သည်ကို တွေ့နိုင်သည်။

ခရီးသွားများဆိုရာတွင် နိုင်ငံခြားသား ကမ္ဘာလှည့်ခရီးသည်နှင့် ပြည်တွင်း ခရီးသွား နှစ်မျိုးအကြား သက်ရောက်မှုမှာလည်း မတူညီတတ်ပေ။ ယေဘုယျအားဖြင့် စည်းကမ်းရှိသော နိုင်ငံကြီးသား ခရီးသွားအများစုဖြစ်သော ကမ္ဘာလှည့်များကြောင့် အနုတ်လက္ခဏာ သက်ရောက်မှု နည်းပါးသော်ငြား စည်းကမ်းကျင့်ဝတ် အားနည်းသော ပြည်တွင်း ခရီးသွားအများစုကြောင့်မူ များစွာ စိုးရိမ်ဖွယ်သက်ရောက်မှုများ ဖြစ်ပေါ်လာနိုင်သည်။

ဒေသတစ်ခုရောက်တိုင်း ခရီးသွားများ ဝယ်ယူ၊ စားသုံးခဲ့ခြင်းကြောင့် သက်ဆိုင်ရာ ဒေသခံများ ဝင်ငွေတိုး၊ အလုပ်အကိုင် အခွင့်အလမ်း ပွင့်လင်း၊ ရုပ်ဝတ္ထုပစ္စည်းများ ဖွံ့ဖြိုးလားခြင်းမှာ ကောင်းသည့် အကျိုးရလဒ်ဖြစ်သည်။ စည်းကမ်းကျင့်ဝတ် စောင့်ထိန်းလိုက်နာမှုအားနည်းသော ခရီးသွားများကြောင့် နေရာအနှံ့အပြားတွင် ပလတ်စတစ်အပါအဝင် အခြားသော အမှိုက်မျိုးစုံ စွန့်ပစ်နေကြခြင်းမှာ ဆိုးရွားသည့် ရလဒ်ဖြစ်သည်။

အထူးသဖြင့် သဘာဝအခြေအနေအတိုင်း အရိုင်းဆန်စွာ လှပနေဆဲ နေရာဒေသများတွင် စည်းကမ်းမဲ့သော နိုင်ငံသားအချို့၏ တာဝန်မဲ့လုပ်ရပ်များကြောင့် စနစ်တကျ ကြီးကြပ်၊ ထိန်းကွပ်ခြင်းမရှိသော စားသောက်ဆိုင်များ၊ ထိုဆိုင်များတွင် ဝယ်ယူ၊ စားသုံး၍ ဆေးကြော၊ စွန့်ပစ်လိုက်သော အမှိုက်သရိုက်၊ စားကြွင်းစားကျန်များက သဘာဝ အခြေအနေများအတိုင်း အရိုင်းဆန်စွာ လှပနေဆဲ နေရာဒေသများတွင် များမကြာသော ကာလတစ်ခုတွင် အရုပ်ဆိုး၊ အကျည်းတန်သွားတော့မည်ဖြစ်သည်။ 

ရန်ကုန်မြို့တော်မှ အားလပ်ရက် အပန်းဖြေခရီးသွားရောက်ကြသူများ၏ မော်တော်ယာဉ်များ ခေတ္တ ရပ်နားကြသည့် ရန်ကုန်အထွက် လမ်းကြေးကောက်ခံဂိတ် တစ်ဖက်တစ်ချက်ရှိနေရာလွတ်များ အပါအဝင် အမြန်လမ်းမကြီးတစ်လျှောက်ရှိ နေရာအချို့ အပန်းဖြေ စားသောက်ဆိုင်တန်းအချို့ကို ကြည့်လျှင်ပင် စည်းကမ်းမဲ့ စွန့်ပစ်သောအမှိုက်သရိုက်များဖြင့် အကြည့်ရဆိုးလှသည်။

ရခိုင်ရိုးမ၊ ပဲခူးရိုးမနှင့် ရှမ်းကုန်ပြင်မြင့်တို့ကိုဖြတ်၍ ဖောက်လုပ်ထားသော တောင်တက်၊ တောင်ဆင်းလမ်းများ၏ ဘေးတစ်ဖက်တစ်ချက်တွင် ခရီးသွားများ စွန့်ပစ်ထားခဲ့သည့် အမှိုက်များ မြင်မကောင်း၊ ရှုမကောင်း ပြန့်ကျဲလျက်ရှိသည်။

ပြည်တွင်း၊ ပြည်ပ ခရီးသွားများ လာရောက်လည်ပတ်မှု အများဆုံး နာမည်ကြီး၊ စေတီ၊ ပုထိုး၊ နေရာ၊ ဒေသများရှိ အများသုံး အိမ်သာများမှာလည်း တာဝန်ရှိသူများ၏ ကျန်းမာရေးအသိနှင့် ကြီးကြပ်ထိန်းသိမ်းမှု အားနည်းချက်ကြောင့် များစွာ ခေတ်နောက်ကျ၊ မသန့်မရှင်း ညစ်ပတ်နံစော်လှသည်။ 

အမှိုက်ပစ်ခြင်းနှင့် သန့်ရှင်းသော အိမ်သာအသုံးပြုမှုကို အလေးအနက် မရှိသည့်အပြင် စည်းမဲ့၊ ကမ်းမဲ့နိုင်လှသည့် အမူအကျင့်၊ ဓလေ့စရိုက်တို့က မိန်းမူးဖွယ်ကောင်းလောက်သည်အထိ အံ့ဘနန်း သာယာလှပသည့် နေရာဒေသများကို အိုးမဲသုတ်သလို့ ဖြစ်နေခြင်းမှာ များစွာ ဝမ်းနည်းဖွယ်ကောင်းလှသည်။ 

ထိုအခြေအနေများကို မိမိတို့နှင့် မဆိုင်သကဲ့သို့ ပေါ့ပေါ့တန်တန် သဘောထားကာ အချိန်မီ ကြီးကြပ်၊ ထိန်းသိမ်း၊ ပြုပြင်၊ အရေးယူဆောင်ရွက်ခြင်းမရှိပါက များမကြာမီ ကာလတစ်ခုအတွင်း သဘာဝပတ်ဝန်းကျင် အလှအပများ ပျက်စီးယိုယွင်းသွားမည့် အန္တရာယ်ကြီးစွာ ရှိနေပေသည်။ 

ထိုအတွက် သက်ဆိုင်ရာ ဒေသအသီးသီးတွင် အုပ်ချုပ်ရေးအပါအဝင် ဟိုတယ်နှင့်ခရီးသွားလာရေး၊ ကျန်းမာရေး၊ ယဉ်ကျေးမှု၊ သစ်တောရေးရာ၊ စည်ပင်သာယာရေး စသည့် ဌာနအသီးသီးတို့ စုပေါင်းဖွဲ့စည်းထားသည့် အာဏာပိုင်အဖွဲ့တစ်ရပ်ဖွဲ့စည်းကာ စုဆုံဆွေးနွေး နည်းလမ်းရှာကာ အချိန်မီ ပြုပြင်ထိန်းသိမ်းကြပါသည့်အကြောင်း တိုက်တွန်း အကြံပြုအပ်ပေသည်။ 

အယ်ဒီတာ (၂-၁-၂၀၁၉)