News

POST TYPE

EDITORIAL

ဘယ်သူမပြု မိမိမှု (Vol-6/No-204)
04-Dec-2018

သက်တမ်း သုံးနှစ်ကျော်လာပြီဖြစ်သော လက်ရှိအစိုးရတွင် အဘက်ဘက်မှ ဖိအားများရှိနေကြောင်း အများနားလည်လက်ခံထားပြီးဖြစ်သည်။ ဖိအားဟု ဆိုရာတွင်လည်း ပြည်တွင်းနှင့် ပြည်ပဟု နှစ်ပိုင်းခွဲပြောရမည်ဖြစ်သည်။ 

အချို့ဖိအားများမှာ ယခင်အစိုးရအဆက်ဆက်က ဆုံးဖြတ်၊ လုပ်ကိုင်လာခဲ့သည်များကို လက်ဆင့်ကမ်းဆက်ခံရခြင်းကြောင့် မလွှဲမရှောင်သာ တာဝန်ယူခြင်း၏ အကျိုးဆက်များဖြစ်သည်။ အချို့ဖိအားများမှာမူ မိမိတို့၏ ချဉ်းကပ်၊ ရှုမြင်၊ သုံးသပ်မှု၊ ဖြေရှင်း၊ စီမံခန့်ခွဲမှု အားနည်းချက်၏ အကျိုးဆက်များဖြစ်သည်။

ပြည်ပဖိအားမှာ အများသိထားကြသည့်အတိုင်း ရခိုင်ပြဿနာကိုမူတည်ကာ အမေရိက၊ ဥရောပနိုင်ငံများစွာတို့က နိုင်ငံရေးအရ ဖိအားပေးနေခြင်းဖြစ်သောကြောင့် များစွာရိုးရှင်းသည်ဟု ဆိုနိုင်သည်။ 

ပြည်တွင်းဖိအားများမှာမူ အာဏာလက်လွှတ်ထားသူများနှင့် ပါဝါအမာကို ကိုယ်စားပြုထားသူအချို့နှင့် ၎င်းတို့၏ ဩဇာခံ ဘာသာရေး၊ လူမျိုးရေး၊ အမျိုးသားရေး အစွန်းရောက်ဆန်ဆန်အင်အားစုအချို့၊ ခေတ်နောက်ကျနေသော ဝါဒစွဲအင်အားစုအချို့ထံမှ ဖိအားများဖြစ်သောကြောင့် အတန်ငယ်ရှုပ်ထွေးသည်ဟု ဆိုနိုင်သည်။

လက်ရှိ ရင်ဆိုင်နေရသော ပြည်ပဖိအားဆိုရာတွင် စင်စစ်အားဖြင့် ပြည်တွင်းဖိအားများကြောင့် ထွက်ပေါ်လာသော နောက်ဆက်တွဲ အကျိုးဆက်ဟုဆိုနိုင်သည်။ အကြောင်းမှာ ၂၀၁၂ ခုနှစ်က ရခိုင်ပြည်နယ်၊ ကျောက်နီမော်ကျေးရွာတွင် ဖြစ်ပေါ်ခဲ့သော ပြဿနာမှအစပြုပြီး နိုင်ငံတစ်ဝန်း ဖြစ်ပေါ်ခဲ့သော ဘာသာရေး၊ လူမျိုးရေးဗန်းတင် အကြမ်းဖက်၊ လူသတ်၊ မီးရှို့မှုများက အစပြုခဲ့ခြင်းကြောင့်ဖြစ်သည်။

ဖိအားများ ရင်ဆိုင်နေရချိန်မျိုးတွင် သက်ဆိုင်ရာ အစိုးရတို့၏ ပြဿနာအရပ်ရပ်အပေါ် ချဉ်းကပ်၊ သုံးသပ်၊ ဖြေရှင်းစီမံခန့်ခွဲမှု ညံ့ဖျင်း၊ လွဲချော်၊ ကောင်းမွန်၊ မှန်ကန်မှုအပေါ်တွင်မူတည်ပြီး ပြဿနာများ ပိုကြီး၊ ပိုဆိုးသွားခြင်း၊ ပိုပြေလည်၊ ငြိမ်းချမ်းသွားခြင်း ရလဒ်များ ဖြစ်ပေါ်လာတတ်သည်။

အထူးသဖြင့် နိုင်ငံတကာက အာရုံစိုက်နေသော ပြဿနာမျိုးဆိုပါက ပို၍ လိမ္မာပါးနပ်ထက်မြက်သည့် ချဉ်းကပ်၊ ဖြေရှင်းစီမံသည့်နည်းလမ်းဖြင့် အသုံးပြုရသည်။ သို့မဟုတ်ပါက မိမိအသုံးပြုဖြေရှင်းသည့် နည်းလမ်းကြောင့် မိမိနှင့် မိမိအဖွဲ့အစည်း၊ နိုင်ငံကို သိက္ခာပိုကျစရာ ဖြစ်သွားတတ်သည်။

ပြီးခဲ့သော ၂၀၁၅ ရွေးကောက်ပွဲအပြီး အကန့်အသတ်အချို့ ရှိလင့်ကစား နိုင်ငံတော်၏ အာဏာနှစ်ရပ်၏ လုပ်ပိုင်ခွင့်အများစုကို ထိန်းချုပ်စေစား ခွင့်ရခဲ့ပြီးနောက် ဖွဲ့စည်းပုံအခြေခံဥပဒေက တရားဝင်ခွင့်ပြုထားသော အခွင့်အာဏာကို လိမ္မာပါးနပ်စွာ အသုံးချနိုင်သည့် အခွင့်အလမ်းများ ရရှိခဲ့သည်။

သို့သော် အချို့ကိစ္စများသည် ယခင်အစိုးရအဆက်ဆက်၏ အမွေဆိုးများ၊ ခေါက်ရိုးကျိုးနေသော အုပ်ချုပ်ရေးယန္တရား၊ တမင်ကန့်လန့်တိုက်နေသူများကြောင့်ချည်းမဟုတ်ဘဲ မူလကပင် ကြိုတင်၍ လေ့လာပြင်ဆင်မှု တစ်နည်းအားဖြင့် အိမ်စာလုပ်မထားခြင်းကြောင့် ပေါ်ပေါက်လာသော အခက်အခဲပြဿနာများ ဖြစ်နေပေသည်။

မည်သို့ပင်ဖြစ်စေ ကြီးကျယ်သော၊ ခက်ခဲသော၊ ထိလွယ်ခိုက်လွယ်ဖြစ်သော ကိစ္စရပ်များကို ချက်ချင်းကိုင်တွင်ဆောင်ရွက်ရန် မလွယ်ကူမှန်း ပြည်သူအများစုနှင့် လေ့လာသုံးသပ်သူများက နားလည်ထားသည်။ ထို့ကြောင့် အနိမ့်ဆုံးအဆင့် လွဲချော်တိမ်းစောင်းနေသော မိမိပါတီဝင်နှင့် အစိုးရအဖွဲ့ဝင် ထိပ်တန်းတာဝန်ရှိသူများကို ဥပဒေ၊ စည်းမျဉ်း၊ စည်းကမ်းနှင့်အညီ စံပြ အရေးယူခြင်း၊ လူစားလဲ ပြခြင်းဖြင့်ပင် လူထု၏ ခိုင်ကျည်မြဲမြံသော ထောက်ခံမှုရရှိရန် သေချာနေပေသည်။

သို့သော် ယနေ့အချိန်အထိ တောက်လျှောက်နီးပါး အလွဲအချော်များစွာ ကျူးလွန်သကဲ့သို့ဖြစ်နေသူ လူယုံ၊ လူရင်းများကို မျက်နှာသာပေးထားသကဲ့သို့ ခွင့်ပြုထားခဲ့သောကြောင့် မိမိအစိုးရအဖွဲ့တစ်ခုလုံးနှင့် ပါတီကိုပါ မိမိတို့ဘာသာ သိက္ခာပြန်ချသကဲ့သို့ဖြစ်နေခြင်းသည် ပြိုင်ဘက်ကို မိမိအပေါ် တိုက်ခိုက်ခွင့် ရစေရန် မိမိက ဖန်တီးပေးလိုက်ခြင်းသာဖြစ်သည်။

ထို့ထက်ပိုပါက ပြီးခဲ့သည့် ရွေးကောက်ပွဲတွင် တစ်ခဲတနက် မဲပေးထောက်ခံပေးခဲ့သော ပြည်သူလူထု၏ လိုအင်ဆန္ဒနှင့် မျှော်လင့်ချက်များကို လျစ်လျူရှုသကဲ့သို့ ဖြစ်သွားကာ အာဏာရှင်များကို အခွင့်အလမ်းပြန်ပေးလိုက်သကဲ့သို့ ဖြစ်သွားလျှင် ဘယ်သူမပြု မိမိမှုသာလျှင်ဖြစ်ကြောင်း သိစေအပ်ပေသည်။

အယ်ဒီတာ (၄.၁၂.၂၀၁၈)

(၂၁-၁၀-၂၀၁၈ နေ့ထုတ် The Voice Daily သတင်းစာတွင် ဖော်ပြခဲ့ပြီးသော အယ်ဒီတာ့အာဘော်ကို ပြန်လည်ဖော်ပြခြင်း ဖြစ်ပါသည်။)