News

POST TYPE

EDITORIAL

အရွေးကောက်ခံ အစိုးရနှင့် ဒီမိုကရေစီ ဆန်ခြင်း၊ မဆန်ခြင်း (Daily, Vol-6/No-198)
27-Nov-2018

ဒီမိုကရေစီ လူ့အဖွဲ့အစည်းတစ်ရပ် ထူထောင်တည်ဆောက်သည့်အခါ အခြေခံ အကျဆုံး ရေခံမြေခံများအနက် လွတ်လပ်၍ အမှီအခိုကင်းသော ပုဂ္ဂလိက သတင်းမီဒီယာများ ရှင်သန်ဖွံ့ဖြိုးရေးမှာ အရေးကြီးသည့် ဒေါက်တိုင်တစ်ခု ဖြစ်သည်။

သို့သော် ဒီမိုကရေစီ အသွင်ကူးပြောင်းရေး လမ်းခုလပ်တွင် ရှိနေဆဲ မြန်မာနိုင်ငံတွင် အစိုးရ အပါအဝင် အာဏာသုံးရပ်က သတင်းမီဒီယာများအပေါ် ထားရှိသည့် သဘောထားမှာ အာဏာရှင်စနစ် ကျင့်သုံးစဉ်ကာလများနှင့် ကွာခြားမှု မရှိလှပေ။ 

သတင်းရယူခွင့် အကန့်အသတ်ရှိနေဆဲ၊ သတင်းလွတ်လပ်ခွင့်ကို အဟန့်အတားပြုနေသော ဥပဒေဆိုးများ ရှိနေဆဲ၊ ယင်းဥပဒေဆိုးများဖြင့် သတင်းသမားများ ဖမ်းဆီး အရေးယူခံနေရဆဲ၊ လွတ်လပ်စွာ ဖော်ထုတ်၊ ပြောဆို၊ ရေးသား၊ ထုတ်လွှင့်၊ ဖြန့်ချိခွင့်ကို သွယ်ဝိုက် သို့မဟုတ် တိုက်ရိုက် ခြိမ်းခြောက်ခံနေရဆဲ အခြေအနေများသည် ယင်းအချက်မှန်ကန်ကြောင်း လက်တွေ့ပြသနေပေသည်။

ယနေ့ ပြည်သူက ရွေးချယ် တင်မြှောက်ထားသည့် အစိုးရဖြစ်နေသည့် တိုင် အစိုးရအာဘော် သတင်းမီဒီယာများရှိနေဆဲဖြစ်ခြင်းသည် တစ်နည်း အားဖြင့်ဆိုရပါက ပုဂ္ဂလိက သတင်းမီဒီယာများအား ယုံကြည်မှုမရှိသည့် သဘောဟု ဆိုနိုင်သည်။ 

သတင်းအတတ်ပညာ ချို့တဲ့လှသည့်အပြင် ကျင့်ဝတ်စောင့်စည်းမှု မရှိ သော နာမည်ခံသတင်းမီဒီယာနှင့် သတင်းသမားများ၊ သတင်းသမား အယောင်ဆောင်များကြောင့် ပုဂ္ဂလိက သတင်းမီဒီယာလောကတစ်ခုလုံးကို အထင်အမြင်လွဲနေခြင်းမှာလည်း မျှတမှုမရှိပေ။ 

နှစ်များစွာ အာဏာရှင်စနစ်အောက် ဖြတ်သန်းလာခဲ့သောကြောင့် သတင်း မီဒီယာလောကသာမကနယ်ပယ်အားလုံးတွင် ယနေ့အချိန်အထိ အားနည်း ချက်များ ရှိနေဆဲဖြစ်သည်။ စစ်အာဏာရှင်တို့၏ ဖိနှိပ်မှုအောက်တွင် နေလာခဲ့ပြီး ယနေ့ အာဏာကုလားထိုင်ပေါ်ရောက်လာသူများပင်လျှင် ပြည်သူလူထု အပေါ် ရင့်သီးသော၊ နားမလည်သော၊ လက်တွေ့နှင့်ကင်းကွာသော သဘော ထားမှတ်ချက်များကိုကြည့်လျှင် သိနိုင်သည်။ 

စင်စစ်အားဖြင့် ပုဂ္ဂလိက သတင်းမီဒီယာများသည် လက်ရှိအစိုးရအပေါ်တွင် ယခင်အရပ်သားတစ်ပိုင်း အစိုးရထက်စာလျှင် ရွေးကောက်ပွဲမတိုင်ခင်ကာလမှ ယနေ့အချိန်တိုင် ဘက်လိုက်သည်ဟု ဆိုရလောက်အောင်ပင် အတိုင်းအတာတစ်ခုအထိ ကူညီပံ့ပိုးပေးခဲ့သည်။ 

သို့သော် ကုန်ခဲ့သည့် ၂ နှစ်ကျော်ကာလအတွင်း အာဏာရပါတီနှင့် အစိုးရတို့၏ သတင်းမီဒီယာများအပေါ် ဆောင်ရွက်တုံ့ပြန်မှုများကိုကြည့်လျှင် ယခင်အစိုးရထက်ပင် အံ့ဩဖွယ် ကောင်းလောက်အောင် သဘောထား တင်းမာနေသည်ကို တွေ့ရသည်။

အနိမ့်ဆုံးအားဖြင့် သတင်းမီဒီယာများအပေါ် ဖိစီးနှိပ်စက်နေသော ဥပဒေဆိုးများ မပြုပြင်၊ မဖယ်ရှားနိုင်လျှင်ပင် မည်သည့်ပြင်ပအကူအညီ၊ အထောက်အပံ့မျှ မယူဘဲ ကိုယ်ပိုင်ချွေးနှဲစာဖြင့် ရပ်တည်ရုန်းကန်နေသော ပုဂ္ဂလိက သတင်းမီဒီယာများအပေါ် အခွန်အကောက်ဆိုင်ရာ စည်းမျဉ်းစည်းကမ်းများ လျှော့ပေါ့ပေးခြင်း၊ နိုင်ငံပိုင် မီဒီယာများ၏ အခန်းကဏ္ဍကို လျှော့ချပေးခြင်း စသည်တို့ကို အောက်ထစ်ဆုံး ဆောင်ရွက်ပေးရန် အပူတပြင်း လိုအပ်နေပေသည်။

သို့မဟုတ်ပါက ဒီမိုကရေစီဆန်သော နည်းနာလုပ်ရပ်များဖြင့် မဲဆန္ဒရှင် ပြည်သူကို လက်တွေ့ သက်သေပြရန် တာဝန်ရှိသည့် လက်ရှိအစိုးရကို အထူးကိုယ်စားပြုနေသော ဒီမိုကရေစီ အသွင်ကူးပြောင်းရေး လုပ်ငန်းစဉ် တစ်ရပ်လုံး အပေါ်ပြည်သူလူထု၏ သတင်းသိပိုင်ခွင့်ကို ဖြည့်ဆည်းပေးနေသော ပုဂ္ဂလိက သတင်းမီဒီယာများက သံသယရှိသွားပါက နိုင်ငံတော်အတွက် အန္တရာယ်ကြီးလှကြောင်း သိစေအပ်ပေသည်။

အယ်ဒီတာ (၂၇-၁၁-၂၀၁၈)
(၁၅-၁-၂၀၁၈ နေ့ထုတ် The Voice Daily သတင်းစာတွင် ဖော်ပြခဲ့သော အယ်ဒီတာ့ အာဘော်ကို ပြန်လည်ဖော်ပြခြင်းဖြစ်ပါသည်။)