News

POST TYPE

EDITORIAL

စက်သုံးဆီဈေးနှုန်း ဘာ့ကြောင့် (Daily, Vol-6/No-152)
05-Oct-2018

ကမ္ဘာ့ရေနံဈေးနှုန်းနှင့် အမေရိကန်ဒေါ်လာငွေလဲနှုန်းများ ကျဆင်းသွားသော်လည်း စက်သုံးဆီဈေးနှုန်းများ အမြင့်တွင်ဆက်ရှိနေခြင်းနှင့် ပတ်သက်၍ မြန်မာနိုင်ငံစက်သုံးဆီ ဖြန့်ဖြူးရောင်းချသူများအသင်း အတွင်းရေးမှူးက အရှုံးခံရောင်းနေကြောင်း ပြောဆိုချက်အပေါ် ဝေဖန်မှုများ အထူးမြင့်တက်သွားခဲ့သည်။

စက်သုံးဆီဈေးပြဿနာသည် လက်ရှိအစိုးရကို စိန်ခေါ်နေသော ပြဿနာများစွာအနက် တိုင်းပြည်ဖွံ့ ဖြိုးရေးအတွက် အခြေခံကျသော ပြဿနာ သို့မဟုတ် ပြည်သူလူထု၏ စိတ်ကို ဖမ်းဆုပ်နိုင်သည့် နိုင်ငံရေးပြဿနာတစ်ရပ်လည်းဖြစ်သည်။

စက်သုံးဆီဆိုသည်မှာ သယ်ယူပို့ဆောင်ရေး၊ ကုန်စည်ထုတ်လုပ်ရေးအပြင် ဝန်ဆောင်မှုလုပ်ငန်းများစွာ၏ အခြေခံအကျဆုံး အထောက်အပံ့ဖြစ်နေရာ နိုင်ငံ့စီးပွားရေးကို ကိုင်လှုပ်နိုင်သော ကိရိယာတစ်ခုဟုလည်း ဆိုနိုင်သည်။

စက်သုံးဆီဈေးနှုန်းများ သင့်တင့်မျှတခြင်း၊ တည်ငြိမ်ခြင်း သို့မဟုတ် ဈေးကြီးမြင့်ခြင်း၊ မတည်မငြိမ်ဖြစ်ခြင်းတို့သည် ထိုအခြေအနေများဖြစ်ပေါ်စေရန် ဖန်တီးစီမံနိုင်သော အစိုးရ သို့မဟုတ် အာဏာရပါတီအပေါ် နိုင်ငံသားတို့၏ အားပေးထောက်ခံခြင်း၊ ဆန့်ကျင်ကန့်ကွက်ခြင်းတို့ကိုလည်း ပံ့ပိုးပေးတတ်သည်။

အာဏာရှင်အစိုးရအဆက်ဆက် ၎င်းတို့ကိုယ်တိုင်နှင့် ၎င်းတို့နှင့် အလွန်းသင့်သူများကိုသာ အခွင့်အလမ်းများပေးပြီး နိုင်ငံ့စီးပွားကို လူတစ်စုကသာ ချုပ်ကိုင်စေစားခဲ့သောကြောင့် မြန်မာနိုင်ငံ၏ လက်ရှိအဆင့်အတန်း မည်သည့်နေရာတွင် ရှိနေသည်ကို ဒီမိုကရေစီနည်းကျ ရွေးချယ်တင်မြှောက်ခံထားရသော အစိုးရများ အထူးသတိပြုသင့်လှသည်။

ယနေ့ စက်သုံးဆီ လက်ကား တင်သွင်းရောင်းချနေခြင်းဖြင့် စီးပွားလမ်း ဖြောင့်ပြီးရင်းဖြောင့်နေကြသူများကို လေ့လာကြည့်လျှင် ခေတ်အဆက်ဆက် စီးပွားရေးအတတ်ပညာကို အသုံးချထားခြင်းမဟုတ်သည့် နည်းလမ်းဖြင့် ပါမစ်၊ လိုင်စင်များကို အခွင့်ထူးခံရယူထားသူများသာ အများစုဖြစ်နေသလော ဆန်းစစ်ကြည့်စရာ ကောင်းလှသည်။

သို့ဆိုလျှင် ယနေ့ စက်သုံးဆီဈေးများ မြင့်တက်နေသောပြဿနာကို အစိုးရ သို့မဟုတ် စွမ်းအင်ဝန်ကြီးဌာနအနေနှင့် မှန်ကန်သော နည်းလမ်းများဖြင့် ချဉ်းကပ်ဖြေရှင်းရန် အချိန်ကျရောက်နေပြီဟု ဆိုနိုင်သည်။ 

အထူးသဖြင့် စက်သုံးဆီဈေးနှုန်းများ မြင့်မားနေချိန်မျိုးတွင် နိုင်ငံတကာ ဝင်ငွေမျိုး၊ နိုင်ငံတကာရှိ အစိုးရများ၏ ကူညီထောက်ပံ့မှုမျိုး မရှိသေးသည့် မြန်မာနိုင်ငံရှိ လုပ်ငန်းများ၊ စားသုံးသူပြည်သူများသည် အရည်အသွေးနိမ့်၊ အခြင်အတွယ်မမှန်၊ ဝန်ဆောင်မှုအားနည်းချက်များစွာဖြင့် ရောင်းချနေသော စက်သုံးဆီကို အခြားပေးဆောင်နေရသည့် အခွန်ငွေအရပ်ရပ် ထည့်သွင်းတွက်ချက်ပါက နိုင်ငံတကာထက် ဈေးပိုပေးဝယ်နေရခြင်းမှာ မျှတမှုမရှိပေ။

ယင်းပြဿနာကို ဖြေရှင်းရန်နည်းလမ်းမှာ ခက်ခဲနက်နဲစွာ စဉ်းစားနေစရာမလိုဘဲ ဒေသတွင်းနိုင်ငံများအပါအဝင် ကမ္ဘာ့နိုင်ငံအများစုတွင် ကျင့်သုံးနေသည့်ပုံစံအတိုင်း နိုင်ငံတကာ စက်သုံးဆီကုမ္ပဏီကြီးများကို ဝင်ရောက်ရောင်းချခွင့် ပေးလိုက်ခြင်းသာဖြစ်သည်။

ထိုသို့ ရောင်းချခွင့်ပေးခြင်းအားဖြင့် စားသုံးသူပြည်သူများ အရည်အသွေး၊ အခြင်အတွယ်၊ ဈေးနှုန်း၊ ဝန်ဆောင်မှုအပိုင်းတွင် နိုင်ငံတကာအဆင့်အတန်းအတိုင်း ရရှိနိုင်သည့်အပြင် နိုင်ငံတော်အတွက် အခွန်ငွေပါ တစ်လုံးတစ်ခဲတည်း၊ အဖိတ်အစင်မရှိ ရရှိနိုင်ကြောင်း သိစေလိုရင်းဖြစ်သည်။

အယ်ဒီတာ ( ၄ - ၁၀ -၂၀၁၈ )