News

POST TYPE

EDITORIAL

တတ်ယောင်ကားများ၏ အန္တရာယ် (Vol-6/No-151)
04-Oct-2018



မြန်မာလူ့အဖွဲ့အစည်းတွင် ပိဋကတ်အိုးကွဲ ဟု ဆိုလိုက်သည်နှင့် အကြောင်းအရာတစ်ခုကို ခြေခြေမြစ်မြစ် အကျိုးအကြောင်းနှင့်တကွ ပိုင်နိုင်စွာ သိရှိနားလည်သူမျိုး မဟုတ်ဘဲ အပေါ်ယံ အသိမျှလောက်ဖြင့် ဟန်တစ်လုံး ပန်တစ်လုံး ကြွားလုံးထုတ်သူ သို့မဟုတ် တတ်ယောင်ကားဟု နားလည်ထားကြသည်။

အခြေအနေ အကြောင်းကြောင်းကြောင့် အရာရာ ဆင်းရဲချို့တဲ့နေသော လူ့အဖွဲ့အစည်းတစ်ရပ် အနေနှင့် ပညာလူ့အဖွဲ့အစည်းသို့ သွားသည့်လမ်းတွင် ထိုသို့သော တတ်ယောင်ကားများက လမ်းလွှဲပို့တတ်သည့် အန္တရာယ် ရှိပေသည်။

တတ်ယောင်ကား ဖြစ်သောကြောင့် ပညာရှိတို့၏ အဆိုအမိန့်နှင့် အဆုံးအမများကို ဟုတ်ယောင်ယောင် အကျိုးအပဲ့ ဒဿနများဖြင့် ရောပြွမ်းပြီး အသိပညာနိမ့်ကျဆဲ လူပရိသတ်ကို အလွဲလမ်းပြနေသည့် သာဓကများလည်း ရှိခဲ့ပြီး ဖြစ်သလို လက်ရှိနှင့် အနာဂတ်ကာလတွင်လည်း ရှိနေဆဲ၊ ရှိနေဦးမည် ဖြစ်သည်။

အထူးအားဖြင့် အာဏာရှင်အမျိုးမျိုး၏ ဖိနှိပ်၊ ရက်စက်မှုများစွာကြောင့် ကြီးစွာစိတ်ဒဏ်သင့်နေသော ပြည်သူအများစုကို တတ်ယောင်ကားများ၏ ဟုတ်နိုးနိုး ဒဿနများ၊ တော်လှန်ရေးဆန်ဆန် ဆောင်ပုဒ်များ၊ ကမ္ဘာပေါ်တွင် ကျဆုံးသွားပြီ ဖြစ်သော ဝါဒမှိုင်းများဖြင့် အရာရာကို အနုတ်လက္ခဏာဖြင့် ရှုမြင်စေရန် နှပ်ကြောင်းပေးနေတတ်သည်။

‘လူသာလာပါ၊ ပြဿနာ ခေါ်မလာပါနှင့်’၊ ‘သူပြုံးနေပြီ၊ အကြွေးယူတော့မည်’၊ ‘သင်ကောင်းလျှင် ကျွန်ုပ်မဆိုးပါ’၊ ‘တူဖြင့်လျှင် နှံ၊ ပေဖြစ်လျှင် ခံ’၊ ‘သင့်မာနကို ကျွန်ုပ်အိမ် ဖိနပ်ချွတ်အောက်တွင် ထားခဲ့ပါ’၊ ‘ကျွန်ယုံတော့ တစ်ဖက်ကန်း၊ သားသမီးယုံတော့ စုံလုံးကန်း’ ဆိုသော ဆောင်ပုဒ်များကို နေအိမ်အတော်များများတွင် ချိတ်ဆွဲထားခြင်းကိုကြည့်လျှင် တတ်ယောင်ကားများ၏ ဩဇာသက်ရောက်မှုကို ခန့်မှန်းကြည့်နိုင်သည်။

လူမှုဗေဒသဘောအရ လူရှိလျှင် ပြဿနာရှိတတ်သည့် သဘောနှင့် ဆန့်ကျင်ခြင်း၊ တစ်ဖက်သားကို အထင်သေးခြင်း၊ အမုန်းကို အမုန်းနှင့် တန်ပြန်လိုခြင်း၊ လက်စားချေလိုခြင်း၊ တစ်ဖက်သားကို နှိမ်ချလိုခြင်း၊ မိမိအသုံးမကျခြင်းကို တစ်ပါးသူအပေါ် အပြစ်ပုံချလိုခြင်း သဘောများကဲနေသော အထက်ဆိုခဲ့ပါ ဆောင်ပုဒ်များ ယနေ့ မြန်မာလူ့အဖွဲ့အစည်းအတွင်း နေရာချဲ့ထွင်လာခြင်းမှာ ကောင်းသည့်လက္ခဏာ မဟုတ်ပေ။

စိတ်ဒဏ်ရာသင့်သူများ သို့မဟုတ် အရာရာတိုင်း မိမိကိုယ်ကိုယ် ဗဟိုပြု စဉ်းစားလေ့ ရှိသူများ၏ ဟဒယနှင့် ကိုက်ညီသောကြောင့် လက်ခံကျင့်သုံးနေကြသည့် ဟုတ်ယောင်ယောင် ထိုဆောင်ပုဒ်တို့သည် ဗုဒ္ဓ၏ အဆုံးအမများနှင့် ချိန်စက်ကြည့်လျှင်ပင် အကျိုးအပဲ့များ ဖြစ်နေကြောင်း သိသာထင်ရှားလှသည်။

ယနေ့ မြန်မာလူ့အဖွဲ့အစည်းတွင် ရင်ဆိုင်နေရသော စိန်ခေါ်မှုများ၊ အခက်အခဲ၊ ပြဿနာရပ်များကိုလည်း ဟုတ်ယောင်ယောင်၊ ဟုတ်နိုးနိုး အကျိုးအပဲ့  ဒဿနများကို အခြေခံထားသည့် တတ်ယောင်ကား နည်းနာများဖြင့် ချဉ်းကပ်ဖြေရှင်းသွားစေနိုင်သည့် အလွဲဖိအားပေးမှုများ ရှိတတ်သည်။

အထူးသဖြင့် မိမိကို ထောက်ခံသူ၊ ဆန့်ကျင်သူ၊ မိမိနှင့် သဘောထားတူသူ၊ မတူသူ၊ အယုတ်၊ အလတ်၊ အမြတ်မရွေး၊ ဘာသာ၊ လူမျိုးမရွေး နိုင်ငံသားအားလုံးကိုယ်စား နိုင်ငံပြန်လည်ထူထောင်ရေး၊ ပြုပြင်ပြောင်းလဲရေး၊ ငြိမ်းချမ်းမှု တည်ဆောက်ရေး လုပ်ငန်းများကို နိုင်ငံတော်နှင့်ချီ တာဝန်ယူ၊ တာဝန်ခံထားရသည့် နေရာများတွင် ရောက်နေသူများ အနေနှင့် အတိတ်က အရိပ်မည်းများကို အကြောင်းပြုကာ လူပုဂ္ဂိုလ်များ၊ အဖွဲ့အစည်းများ၊ အကြောင်းကိစ္စရပ်များကို အရောင်ပါသော မျက်မှန်ဖြင့် ကြည့်ခြင်း၊ သူ့လူ၊ ငါ့လူ ခွဲခြားစေခြင်းတို့ဖြင့် တတ်ယောင်ကားဝါဒီနှင့် အတွေးအခေါ်များက အလွဲလမ်းပြ သွားနိုင်ကြောင်း သိစေလိုရင်းဖြစ်သည်။
 
အယ်ဒီတာ (၃-၁၀-၂၀၁၈)

(၆.၂.၂၀၁၇ နေ့ထုတ် The Voice Daily သတင်းစာတွင် ဖော်ပြပြီးသော အယ်ဒီတာ့အာဘော်ကို ပြန်လည်ဖော်ပြခြင်း ဖြစ်ပါသည်။)