News

POST TYPE

EDITORIAL

ဝေလေလေ (Daily, Vol-6/No-120)
28-Aug-2018 tagged as

မြန်မာလူမှုပတ်ဝန်းကျင်တွင် မည်သို့သော သတင်းအချက်အလက်ဖြစ်စေ သတင်းကို လုံးစေ့ပတ်စေ့မသိဘဲ တစ်ဆင့်စကားပြန်ကြားရခြင်း၊ အွန်လိုင်း လူမှုရေးကွန်ရက်ပေါ်တွင် တင်ထားသည့် အပေါ်ယံသုံးလေးကြောင်းခန့်သာ ဖတ်ရခြင်း၊ မိမိလေးစားအားကျသူတစ်ဦးဦးက လက်ခံခြင်း သို့မဟုတ် ဆန့်ကျင်ခြင်းစသော အကြောင်းများကြောင့် ပြင်းပြင်းထန်ထန် ထောက်ခံ၊ ဆန့်ကျင်တတ်ကြသူ များစွာတွေ့ရသည်။

ထိုသူတို့အနက် အချို့မှာ အဖွဲ့အစည်း၊ အင်အားစုတစ်ခုက တာဝန်ပေးထားသဖြင့် ရည်ရွယ်ချက်ရှိရှိ ဆန့်ကျင်၊ ထောက်ခံ၊ ဆဲဆို၊ မြှောက်ပင့်ပေးကြသူများ ဖြစ်သည်။ အချို့မှာ မိမိနှင့် အသွေးတူ၊ အရောင်တူ၊ အဖွဲ့အစည်းတူဘက်မှ မျက်စိစုံမှိတ် ထောက်ခံကာ ယင်းနှင့်မတူခြားနားအမြင်ရှိသူများကို မျက်စိမှိတ် ဆန့်ကျင်တတ်သူများဖြစ်သည်။ အချို့မှာမူ အဖျားအနားလောက်သာသိသော သတင်းအချက်အလက်မျှဖြင့် ဝေဖန်၊ ပြစ်တင်၊ ထောက်ခံ၊ ချီးကျူးတတ်သူများ ဖြစ်သည်။

ထိုအမျိုးအစား သုံးစုစလုံးတွင် တူညီသော အချက်တစ်ချက်မှာ ၎င်းတို့ ဖြတ်သန်းလာခဲ့သော ရုပ်နှင့် စိတ်ပတ်ဝန်းကျင်၊ ပညာရေးရေချိန်တို့ကြောင့် ပြဿနာ သို့မဟုတ်၊ အဖြစ်အပျက်နှင့် ပတ်သက်၍ ခြေခြေမြစ်မြစ်၊ တိတိကျကျ၊ ပိုင်းပိုင်းဆစ်ဆစ် သိမထားခြင်း တစ်နည်းအားဖြင့် လုံးစေ့ပတ်စေ့ နားမလည်ခြင်းဖြစ်သည်။ ထိုသို့ နားလည်နိုင်အောင်လည်း လေ့လာသင်ယူမှု မရှိသူ အသုံးချခံများလည်းဖြစ်သည်။

အဆိုပါ အသုံးချခံတို့သည် မည်သည့်နယ်ပယ်တွင်မှ ကျွမ်းကျင်ပိုင်နိုင်သော အသိပညာ၊ အတတ်ပညာ မရှိသောကြောင့် တစ်စုံတစ်ယောက် သို့မဟုတ် အဖွဲ့အစည်းတစ်ခုက ရည်ရွယ်ချက်ဖြင့် အရေးကိစ္စတစ်ခုကို ဖန်တီးသည့်အခါတိုင်း နောက်လိုက်အဖြစ် စေခိုင်းခံရသူ အရပ်စကားဖြင့် ဝေလေလေသမားများဟု ဆိုရမည်ဖြစ်သည်။

ဝေလေလေဆိုသည်မှာ “သူများယောင်လို့ လိုက်ယောင်၊ အမောင် တောင်မှန်း မြောက်မှန်းမသိ”ဆိုသကဲ့သို့ ပြဿနာတစ်ခု၊ အဖြစ်အပျက်တစ်ခု၊ အမှုကိစ္စတစ်ရပ်ကို လုံးစေ့ပတ်စေ့ နားမလည်၊ မသိရှိဘဲ အများက အမှန်ဆိုက အမှန်၊ အမှားဆိုက အမှား သံယောင်လိုက်တတ်သူများကို ကင်ပွန်းတပ်ထား ခြင်းဖြစ်သည်။

များသောအားဖြင့် မြန်မာနိုင်ငံတွင် ဖြစ်ပေါ်ခဲ့သော ဘာသာရေး၊ လူမျိုးရေး အရေခြုံအကြမ်းဖက်လှုံ့ဆော်မှုများ၊ ကောလာဟလများမှာ အဆိုပါ ဝေလေလေများကြောင့် ပိုကျယ်ပြန့်သွားခဲ့ခြင်းဖြစ်သည်။ 

ဒီမိုကရေစီ အသွင်ပြောင်းနိုင်ငံတိုင်းတွင် ဖြစ်ပေါ်နေကျ မဏ္ဍိုင် အချင်းချင်းအကြား ပွတ်တိုက်မှုများ၊ နိုင်ငံရေး၊ စီးပွားရေး၊ လူမှုရေး၊ ကျန်းမာရေး၊ ပညာရေး ပြဿနာများကို အလွဲပုံဖော်၊ ပုံကြီးချဲ့ကာ မြန်မာနိုင်ငံသည် ဒီမိုကရေစီနှင့် မထိုက်တန်သေးကြောင်း အောက်လမ်းနည်းဖြင့် နှောင့်ယှက်လိုသူများက ဝေလေလေများကို ခုတုံးလုပ်သွားတတ်သည်။

လက်ရှိ အရပ်သားအများစုပါဝင်သော အစိုးရနှင့် ခေါင်းဆောင်များ လုပ်ကိုင်ဆောင်ရွက်သမျှ မှားသည်ဖြစ်စေ၊ မှန်သည်ဖြစ်စေ အလွန်အကျွံ မြှောက်ပင့်ချီးပနေသူများ၊ အစိုးရနှင့် ဆန့်ကျင်ဘက်ရှိသူမှန်သမျှအပေါ် ပြင်းပြင်းထန်ထန် နှိမ်ချကန်ကျောက်နေသူများကိုလည်း သဘောတရား အသိမပါဘဲ ထောက်ခံ၊ ဆန့်ကျင်နေကြသည့် ဝေလေလေများရှိနေပေသည်။

ထို ဝေလေလေ အမျိုးအစားရှိသူတို့ကို အသုံးချကာ လက်ရှိ မြန်မာနိုင်ငံတွင် အကောင်အထည်ဖော်နေသော ဒီမိုကရေစီအသွင်ကူးပြောင်းရေး လုပ်ငန်းစဉ်များကို ဟန့်တားနှောင့်ယှက်နိုင်ပေရာ ခိုင်လုံ၊ တိကျမှုနှင့် လက်တွေ့မကျသော ကောလာဟလဆန်ဆန် သတင်းများကို အကြားဖြင့် သို့မဟုတ် အပေါ်ယံဆန်သော သတင်းစကားမျှဖြင့် တစ်ဆင့်ပြန်လည် မျှဝေဖြန့်ချိမိပါက မိမိကိုယ်တိုင် ဝေလေလေဖြစ်သွားကာ ဝေလေလေ လူ့အဖွဲ့အစည်းဖြစ်စေရန် အားကူပေးသူလည်း ဖြစ်သွားနိုင်ကြောင်း သတိပေးလိုရင်းဖြစ်သည်။ 

အယ်ဒီတာ (၂၈-၈-၂၀၁၈)

( ၅ - ၁ -၂၀၁၇ နေ့ထုတ် The Voice Daily သတင်းစာတွင် ဖော်ပြခဲ့ပြီးသော အယ်ဒီတာ့အာဘော်ကို ပြန်လည်ဖော်ပြခြင်းဖြစ်ပါသည်။)

  • TAGS