News

POST TYPE

EDITORIAL

ဆန့်ကျင်ဘက်များအကြား ညှိနှိုင်း ဆွေးနွေး အဖြေရှာချိန်တန် (Daily, Vol-6/No-102)
07-Aug-2018

ယနေ့ မြန်မာလူ့အဖွဲ့အစည်းကိုကြည့်လျှင် နိုင်ငံတော်ဖွံ့ ဖြိုးတိုးတက်ရေး၊ နိုင်ငံသားတို့၏ အသိပညာရေချိန်မြှင့်တင်ရေး၊ အမျိုးသားအကျိုးစီးပွား ဖြစ်ထွန်းရေးတို့ထက် အချင်းချင်း အပြန်အလှန် အကွက်ချောင်း အပြစ်ရှာ ရန်ဖြစ်နေကြခြင်းဖြင့် အဖိုးတန်သော အချိန်၊ ငွေ၊ စွမ်းအားများ ဖြုန်းတီးနေကြခြင်းမှာ များစွာ ဝမ်းနည်းစရာကောင်းလှသည်။

အွန်လိုင်းလူမှုကွန်ရက်တွင် အစိုးရ၏ ဆောင်ရွက်ချက်၊ ကြေညာချက်တစ်ခု သို့မဟုတ် ယင်းတို့နှင့်ပတ်သက်သောသတင်းများ တက်လာသည်နှင့် အစိုးရလုပ်ရပ်ကို အမြဲဆန့်ကျင်၊ အပုပ်ချ၊ ကန့်ကွက်၊ အပြစ်တင်နေသော အုပ်စု၏ သဘောမတူ၊ ရှုတ်ချသည့် မှတ်ချက်များ ချက်ချင်းဆိုသလို တက်လာသည်ကို တွေ့ရသည်။

ထို့အတူ ယခင်အစိုးရအဖြစ်မှ ယနေ့ အတိုက်အခံဘဝ ရောက်သွားသူများ၊ ၎င်းတို့နှင့် ရပ်တည်ချက်တူသူများဟု ယေဘုယျအားဖြင့် ပြောနိုင်သည့် တပ်မတော်တို့၏ ပြောဆို၊ လုပ်ကိုင်မှု၊ လက်ရှိအစိုးရအပေါ် ဝေဖန်မှုများ တက်လာလျှင်လည်း လက်ရှိအစိုးရလုပ်သမျှ အရာရာ ထောက်ခံသူအုပ်စု၏ ကန့်ကွက်၊ ဆန့်ကျင်၊ အပြစ်တင် မှတ်ချက်များဖြင့် တုံ့ပြန်ကြသည်ကို တွေ့ရသည်။

ပြောရလျှင် အဆိုပါ အုပ်စုနှစ်စုအကြား အပြန်အလှန်အပြစ်ဖို့၊ ရန်စောင်နေကြခြင်းကြောင့် အချို့ကိစ္စများ၊ ပြဿနာများ ငယ်ရာမှ ကြီး၊ ကြီးရာမှ လွန်ကဲကာ နောက်ဆုံး ပဋိပက္ခ၊ အကျပ်အတည်းအသွင်သို့ ဆိုက်ရောက်သွားခဲ့သည့် သာဓကများ၊ ဖြစ်စဉ်များ ရှိခဲ့ပြီးဖြစ်သည်။

အစိုးရနှင့် အတိုက်အခံ သို့မဟုတ် ဒီမိုနှင့် အာဏာရှင် ခေါင်းစဉ်အောက်မှ အုပ်စုနှစ်စုသည် မိမိတို့ ရပ်တည်သောဘက်ကိုအခြေခံ၍ အပြန်အလှန် ရန်စောင်၊ တိုက်ခိုက်ခြင်း၊ မိမိတို့ ရပ်တည်သောဘက်ကို ချီးပ၊ အမွှမ်းတင်၊ မြှောက်ပင့်ခြင်းတို့မှာ ရပ်တည်ချက်ချင်း မတူညီသည့် ဖြစ်လေ့ဖြစ်ထရှိသော လူ့သဘာဝဟု ဆိုနိုင်သည်။ 

ထို့အပြင် ဒီမိုကရေစီ ရေခံမြေခံ အားနည်းနေသော၊ ပညာရေးရေချိန် နိမ့်ကျနေသေးသော၊ အာဏာရှင်အရိပ်ဆိုး မကင်းတတ်သေးသော လူ့အဖွဲ့အစည်းတို့၏ စရိုက်လက္ခဏာဟုလည်း ပြောနိုင်သည်။

ဤနေရာတွင် များစွာ သတိထားရမည်မှာ သူ့လူကိုယ့်ဘက်သား အယောင်ဆောင်ကာ မိမိနှင့် ဆန့်ကျင်ဘက်အုပ်စုကို အများအမြင်တွင် အဆင့်အတန်းနိမ့်၊ သိက္ခာကျ၊ အရှက်ရသွားစေရန် သိမ်ဖျင်း၊ နုံနဲ့သော အပြောအဆို၊ အရေးအသား၊ မှတ်ချက်စကားများဖြင့် ပုံဖျက် ရန်တိုက်ပေးလေ့ရှိသည့် အချက်ဖြစ်သည်။

ယင်းသို့သော လုပ်ရပ်မျိုးကို လုပ်ရိုးလုပ်စဉ်ပမာ ကျွမ်းကျင်ပိုင်နိုင်နေသူအချို့က စီမံခန့်ခွဲနေလင့်ကစား မူလကပင် အခြေခံအသိပညာ နိမ့်ပါးသူ၊ တစ်ဖက်ပိတ် အယုံသွင်း ဦးနှောက်ဆေးထားသူ၊ အာဏာ၊ စည်းစိမ်၊ အခွင့်အရေး အလို့ငှာ ကျွံနစ်ဝင်နေသူများ၏ လွန်စွာအဆင့်အတန်းနိမ့်ကျသော လုပ်ငန်း လုပ်ဟန်များကြောင့် ကြာလာသည်နှင့်အမျှ မြန်မာပြည်သူများက ဘီလူးစည်း၊ လူ့စည်း ခွဲမြင်လာကြသည်။

သို့သော် ဒီမိုခေါင်းစဉ်အောက်တွင်ပင် သူ့လူကိုယ့်ဘက်သားအယောင်ဆောင်မဟုတ်သူများကိုယ်တိုင် ဒီမိုကရေစီနာမည်နှင့် မဆီမလျော် ကြံစည်၊ ပြောဆို၊ လုပ်ကိုင်မှုများ၊ တစ်ဖက်အုပ်စုနှင့် ပိန်မသာ လိမ်မသာ နိမ့်ကျမှုများ အတွေ့ရများလာခြင်းမှာမူ ဒီမိုကရေစီအတွက်ရော နိုင်ငံနှင့် နိုင်ငံသားများအတွက်ပါ ကောင်းသည့်လက္ခဏာ မဟုတ်ပေ။

အထူးသဖြင့် ဒီမိုကရေစီတောင်းဆိုတိုက်ပွဲဝင်ခဲ့သည့် ရှစ်လေးလုံး အရေးတော်ပုံ အနှစ်သုံးဆယ်ပြည့် ကျရောက်သော ယနေ့အချိန်အခါသမယတွင် ရှစ်လေးလုံးကာလမှ ယနေ့အချိန်အထိ မိမိတို့ ရပ်တည်နေသော အထိုင် အသီးသီး၊ ဘက်အသီးသီးအလိုက် ကြုံတွေ့ခဲ့ရသော အဆိုး၊ အကောင်း အခြေအနေများကို သင်ခန်းစာယူကာ လက်ရှိရင်ဆိုင်နေရသော အခက်အခဲ အတားအဆီးများကို မည်သို့အပြန်အလှန် အကူအညီပေး ရင်ဆိုင်ဖြေရှင်းနိုင်မည်ကို ညှိနှိုင်း၊ စဉ်းစား အဖြေထုတ်ရန် အချိန်တန်ပြီဖြစ်ကြောင်း အကြံပြု တိုက်တွန်းအပ်ပေသည်။

အယ်ဒီတာ (၇-၈-၂၀၁၈)