News

POST TYPE

EDITORIAL

မြန်မာ့လူမှုတန်ဖိုးများ ကျဆင်းသွားသလော (Daily, Vol-6/No-95)
30-Jul-2018 tagged as

မြန်မာလူမှုပတ်ဝန်းကျင်တွင် ယနေ့ ကြုံတွေ့နေရသော ပြဿနာပေါင်း များစွာအနက် အထင်ရှားဆုံးနှင့် အခြေခံအကျဆုံးမှာ မြန်မာ့လူမှုတန်ဖိုးများ ကျဆင်းလာသလောဆိုသည့် မေးခွန်းဖြစ်သည်။

ယနေ့ အွန်လိုင်းလူမှုရေး ကွန်ရက်ပေါ်တွင် ပြောဆိုဆွေးနွေးနေကြသော အကြောင်းအရာများအပေါ် အမြင်ရှုထောင့် အသီးသီးမှ ပေးနေကြသော မှတ်ချက်များကို ကြည့်လျှင် အတိတ်တစ်ချိန်က မြင့်မားစွာ ရှိခဲ့သော ယဉ်ကျေးမှု အဆင့်အတန်းများ လျော့ကျလာသလော ဆိုသည့် မေးခွန်းမေးစရာ ဖြစ်လာ ခဲ့သည်။

အထူးသဖြင့် ဘာသာရေး၊ လူမျိုးရေးနှင့် ပတ်သက်၍ အမုန်းစကားပါသော အစွန်းရောက် မှတ်ချက်များက ဘာသာတရားတို့၏ အစစ်အမှန် အဆုံးအမတို့နှင့် ညီပါ၏လောဟု ထပ်ဆင့် မေးခွန်းထုတ်စရာ ဖြစ်စေခဲ့သည်။

သို့သော် သဘာဝဘေးအန္တရာယ် ကျရောက်သည့်အခါ ဘေးဒဏ်သင့် ပြည်သူများကို နေရာ၊ ဒေသ၊ ဘာသာ၊ လူမျိုး မခွဲခြားဘဲ ကယ်ဆယ်ရေး၊ ကူညီထောက်ပံ့ရေး လုပ်ငန်းများကို အားကြိုးမာန်တက် ဆောင်ရွက်ပေးကြခြင်းမှာ မြန်မာလူ့အဖွဲ့အစည်း၏ မည်သည့် လူ့အဖွဲ့အစည်းနှင့်မျှ မတူသော မြင့်မားသည့် လူမှုတန်ဖိုးပြယုဂ်များ ဖြစ်နေပြန်သည်။

စင်စစ်အားဖြင့် ယနေ့ အွန်လိုင်းလူမှုရေးကွန်ရက်ကို အသုံးချ၍ လွန်ကဲသော ထောက်ခံ၊ ဆန့်ကျင် အစွန်းရောက် မှတ်ချက်များကို လေ့လာကြည့်သောအခါ နိုင်ငံရေး ခံယူချက် ကွဲပြားမှုကို အရင်းခံ အကြောင်းတရားအဖြစ် တွေ့မြင်ရသည်။

ယင်းအခြေအနေသည် မြန်မာနိုင်ငံတွင် သာမက ကမ္ဘာအရပ်ရပ်တွင်လည်း အမျိုးသားရေး အစွန်းရောက်နှင့် လက်ယာစွန်းဆန်သော အယူအဆများ ခေါင်းထောင်လာပြီး ရွှေ့ပြောင်းအခြေချ နေထိုင်သူများအပေါ် ဆိုးဆိုးရွားရွား ဆက်ဆံခြင်း၊ ခွဲခြားဆက်ဆံခြင်းကဲ့သို့ ပြဿနာများ နေရာအနှံ့ ပေါ်ပေါက်လျက် ရှိသည်။

အထင်ရှားဆုံးမှာ ကမ္ဘာလုံးဆိုင်ရာ အပြောင်းအလဲများအပေါ် အထူးဩဇာ သက်ရောက်သည့် အမေရိကန်ပြည်ထောင်စုတွင် လက်ယာစွန်းဝါဒီဆန်သော ဒေါ်နယ်ထရမ့် သမ္မတအဖြစ် ရွေးကောက်တင်မြှောက် ခံရခြင်းနှင့် ဥရောပနိုင်ငံအချို့၏ ရွေးကောက်ပွဲများတွင် လက်ယာစွန်း ခေါင်းဆောင်များက အနိုင်ရရှိလာခြင်း ဖြစ်သည်။

ယင်းသို့ လက်ယာစွန်းများ ခေါင်းထောင်လာခြင်းကို နိုင်ငံရေးသိပ္ပံလောကအတွင်း အထူးစိတ်ဝင်တစား လေ့လာသုံးသပ်ခဲ့ကြပြီး ရင်းမြစ်အကြောင်းတရားများကိုလည်း အမျိုးမျိုး တွေးဆဖော်ထုတ်လျက် ရှိကြသည်။ 

ပုံမှန်အားဖြင့် လက်ယာစွန်းဝါဒီများ ခေါင်းထောင်လာခြင်းမှာ ဘာသာရေး အစွန်းရောက် လှုပ်ရှားမှုများ၊ အကြမ်းဖက်မှုများကို အလိုအလျောက် တန်ပြန်သည့် သဘောဟု ဆိုနိုင်ပြီး အခြားတစ်ဖက်တွင်လည်း ယင်းလက်ယာစွန်းများကြောင့်ပင် အစွန်းရောက် အကြမ်းဖက်မှုများ မြင့်တက်လာသည်ဟု ဆိုကြပြန်သည့်အတွက်  ကြက်ဥနှင့် ကြက်မ ပြဿနာကဲ့သို့ ဖြစ်နေပေသည်။

စင်စစ်အားဖြင့် ကမ္ဘာ့လူ့အဖွဲ့အစည်း၏ အတိတ်ကာလ အပြောင်းအလဲများကို ပြန်စောင်းငဲ့ကြည့်လျှင် ဒေသဆိုင်ရာ လူ့အဖွဲ့အစည်း တစ်ခုချင်းစီအလိုက် တဖြည်းဖြည်း ဖွံ့ဖြိုးလာခဲ့သော လူမှုတန်ဖိုး အနိမ့်၊ အမြင့် အပေါ်တွင် မူတည်နေသည်ကို တွေ့နိုင်သည်။

အစွန်းရောက် အကြမ်းဖက်မှုများကြောင့် အမျိုးသားရေးဝါဒီ ခေါင်းထောင်သည်၊ အမျိုးသားရေး ဝါဒီများကြောင့် အစွန်းရောက် အကြမ်းဖက်မှု ဖြစ်စဉ်များ မြင့်မားလာသည် ဆိုသော အဆိုးကျော့ သံသရာမှ ရုန်းထွက်ရန်မှာ မြင့်မားသော လူမှုတန်ဖိုးများ ခံယူ၊ တည်ဆောက်၊ ကျင့်သုံးကြရန် လိုပေသည်။

အခြေခံအားဖြင့် ဂေါတမဗုဒ္ဓ ဟောကြားဆုံးမခဲ့သည့် မေတ္တာ၊ ကရုဏာ၊ မုဒိတာ၊ ဥပေက္ခာ ဆိုသော ဗြဟ္မစိုရ်တရား လေးပါးသည် ဗုဒ္ဓအဆုံးအမများကို စံနမူနာအဖြစ် ခံယူကျင့်သုံးလာခဲ့သော မြန်မာလူ့အဖွဲ့အစည်း၏ လူမှုတန်ဖိုးများဟု ဆိုနိုင်သည်။

မိမိတို့ ကိုးကွယ်ယုံကြည်သော ဘာသာတရားကို အခြားဘာသာများထက် ကြီးကျယ်မြင့်မြတ်သည်၊ ပို၍ စစ်မှန်သည်ဟု လက်ခံထားကြသူ အများစု ရှိနေသော လူ့အဖွဲ့အစည်းတစ်ရပ် အနေနှင့် လက်ရှိ နိုင်ငံတွင် ဖြစ်ပေါ်နေသော ပြဿနာများ၊ အခြေအနေများကို ဗုဒ္ဓ၏ အခြေခံအဆုံးအမ ဖြစ်သော ဗြဟ္မစိုရ်တရားလေးပါးနှင့် ယှဉ်၍ ရှုမြင်နိုင်လျှင်ပင် လူမှုတန်ဖိုးများ ကျဆင်းသွားစရာ အကြောင်းမရှိကြောင်း ပြောလိုရင်းဖြစ်သည်။

အယ်ဒီတာ (၃၀-၇-၂၀၁၇)
လက်ရှိဖြစ်ပေါ်နေသော အခြေအနေနှင့် ကိုက်ညီနေသောကြောင့် ၅-၂-၂၀၁၇ နေ့ထုတ် The Voice Daily သတင်းစာတွင် ဖော်ပြခဲ့ပြီးသော အယ်ဒီတာ့အာဘော်ကို ပြန်လည်ဖော်ပြခြင်း ဖြစ်ပါသည်။)

  • TAGS