News

POST TYPE

EDITORIAL

မြန်မာ့စီးပွားရေး စိုးရိမ်ရေမှတ် မကျော်စေလို (Daily, Vol-6/No-88)
22-Jul-2018 tagged as

လက်ရှိ မြန်မာနိုင်ငံ၏ စီးပွားရေး အခြေအနေနှင့်ပတ်သက်၍ မီဒီယာအသီးသီးမှနေ၍ ရှုထောင့်အမျိုမျိုးဖြင့် လတ်တလော ဝေဖန်ပြောဆိုမှုများ၊ သတင်းများကို ခြုံကြည့်လျှင် အခြေအနေမကောင်း ဟူသော အဖြေထွက်လာသည်။

အခြေခံ စားကုန်ဈေးနှုန်း အပါအဝင် အထွေထွေ ကုန်စည်ဈေးနှုန်းများ တရိပ်ရိပ် ကြီးမြင့်လာခြင်း၊ ဝန်ထမ်းများ၏လစာ၊ ရိက္ခာများ ကြီးမြင့်သော ကုန်ဈေးနှုန်းနှင့် လျော်ညီမှုမရှိခြင်း၊ မြန်မာကျပ်ငွေတန်ဖိုး အထူးကျဆင်းလာခြင်း သို့မဟုတ် ဒေါ်လာငွေလဲနှုန်း မြင့်မားလာခြင်း၊ ပြည်တွင်း၊ ပြည်ပ ရင်းနှီးမြှုပ်နှံမှုဖြင့် လည်ပတ်နေသော စက်ရုံ၊ အလုပ်ရုံအချို့နှင့် ဝန်ဆောင်မှု လုပ်ငန်းအချို့ ရပ်နား၊ ပိတ်သိမ်းခြင်း စသော မြင်သာထင်သာရှိသည့် အခြေအနေများကိုကြည့်ကာ မြန်မာ့စီးပွားရေး ကျဆင်းနေပြီဟု သုံးသပ်ကြခြင်းဖြစ်သည်။

ထို့အပြင် နိုင်ငံ၏ အဓိက ဝင်ငွေ၊ ထွက်ငွေ သို့မဟုတ် ပို့ကုန်နှင့် သွင်းကုန် တန်ဖိုးများ ခြားနားကြည့်လျှင်လည်း သွင်းကုန်တန်ဖိုးက အဆမတန် များပြားနေခြင်း အပါအဝင် လူတစ်ဦးချင်းဝင်ငွေ (PCI)၊ တစ်မျိုးသားလုံး၏ အသားတင် ထုတ်လုပ်နိုင်စွမ်း (GDP)၊ စုစုပေါင်း ပြည်တွင်း ထုတ်လုပ်မှုပမာဏ (GDP)၊ ဘဏ်စနစ်၊ ငွေကြေးမူဝါဒ၊ ဘဏ္ဍာရေးပေါ်လစီ စသည့် ဘောဂဗေဒဆိုင်ရာ အခြေခံအချက်အလက်များဖြင့် တိုင်းတာကြည့်လျှင် တစ်နည်းအားဖြင့် သီအိုရီအရလည်း စီးပွားရေးကျနေသည်ဟု ဆိုနိုင်သည်။

ထိုအခြေအနေတွင် အစိုးရအဖွဲ့မှ စီးပွားရေးနှင့်စပ်ဆိုင်သော ဝန်ကြီးဌာနအချို့၊ မြန်မာနိုင်ငံ ရင်းနှီးမြှုပ်နှံမှု ကော်မရှင်ဥက္ကဋ္ဌ အပါအဝင် ရန်ကုန်တိုင်းဒေသကြီး ဝန်ကြီးချုပ်ကဲ့သို့ စီးပွားရေးသီအိုရီများနှင့် ဘောဂဗေဒအခြေခံ သဘောသဘာဝများကို ခြေခြေမြစ်မြစ် နားမလည်သူတို့ပါ မြန်မာ့စီးပွားရေး ကျဆင်းနေခြင်းကို မသိရှိသည့်သဘော မှတ်ချက်စကားများ ပြောဆိုနေခြင်းမှာ ထူးခြားသည်။

သို့သော် ဘာ့ကြောင့် စီးပွားရေးကျနေသနည်း၊ ယင်းသို့ စီးပွားရေးကျနေခြင်းကို အစိုးရက ကောင်းစွာ သိရှိပါ၏လော၊ စီးပွားရေးကျနေခြင်းကို အပ်ကြောင်းထပ် အထူးပြု ပြောဆိုနေကြသလော သို့မဟုတ် တမင်ရည်ရွယ်ချက်ဖြင့် ပိုပိုသာသာ ချဲ့ကားပြောဆိုနေကြသလောဆိုသော မေးခွန်းများလည်း မေးကြည့် ဖြေကြည့်ရမည်ဖြစ်သည်။

မြန်မာနိုင်ငံသည် လွန်ခဲ့သော ဆယ်စုနှစ် နှစ်စုခန့်ကပင် စီးပွားရေးဖွံ့ဖြိုး တိုးတက်ခြင်းမရှိခဲ့ဘဲ ပြည်တွင်းရှိ မြေပေါ်၊ မြေအောက် သယံဇာတ ပစ္စည်းများ၊ အကြမ်းအဆင့် လယ်ယာထွက်ကုန်များ၊ ရေထွက်ပစ္စည်းများ ရောင်းချရခြင်းကဲ့သို့ ဝင်ငွေများကို အဓိက မှီတည်နေရပြီး အထည်ချုပ်၊ ဖိနပ်ချုပ်ကဲ့သို့ CMP လုပ်ငန်းများမှ မဆိုစလောက် ဝင်ငွေသာရှိခဲ့သည်။

ထိုစဉ်က မြန်မာ့စီးပွားရေးကို ငွေမည်း အများစုပိုက်ထားသည့် ခရိုနီစီးပွားရေး လုပ်ငန်းရှင်အချို့ အပါအဝင် မူးယစ်ဆေးဝါးက သွယ်ဝိုက်ရရှိသော ဝင်ငွေများနှင့် ပြည်ပချေးငွေများဖြင့်သာ ကျားကန်တည်ဆောက်ခဲ့ရသောကြောင့် နိုင်ငံတော်၏ ဓနဥစ္စာ အများစုသည် အာဏာရှင်အချို့နှင့် ချိတ်ဆက်ထားသည့် လူနည်းစုထံတွင်သာ ရှိနေခဲ့ကြောင်း နိုင်ငံတကာမှ မြန်မာ့စီးပွားရေး လေ့လာသုံးသပ်သူများက ထောက်ပြခဲ့ဖူးသည်။
 
၂၀၁၀ ရွေးကောက်ပွဲအပြီး အရပ်သားတစ်ပိုင်း အစိုးရလက်ထက်တွင် အာဏာရှင်စနစ်မှ ဒီမိုကရေစီစနစ် အသွင်ပြောင်းမည်ဖြစ်ကြောင်း နိုင်ငံတကာသို့ အသိပေးကာ ပြည်တွင်းတွင် ပြုပြင်ပြောင်းလဲရေး လုပ်ငန်းများ၊ ဖြေလျှော့မှုများကြောင့် ပြည်တွင်း၊ ပြည်ပ ရင်းနှီးမြှုပ်နှံသူများ အာရုံစိုက်လာပြီး ရုတ်တရက် စီးပွားရေး ဖွံ့ဖြိုးမည့်လမ်းစများ ထွက်ပေါ်လာခြင်းဖြစ်သည်။

သို့သော် ထိုအချိန်သည် တံခါးစဖွင့်သည့် ကာလဖြစ်သည့်အတွက် စီးပွားရေး ဖွံ့ဖြိုးမှုအတွက် အဆင်သင့်ဖြစ်စေမည့် ရေခံမြေခံ အခြေအနေများ ပြည့်စုံမှု မရှိသေးဘဲ အခြေခံ အဆောက်အဦအလို့ငှာ ဝယ်ယူဖြည့်တင်း၊ တည်ဆောက်မှုများ အားလုံးနီးပါးကို ပြည်ပချေးငွေနှင့် အရစ်ကျပေးငွေ အကူအညီများ ယူခဲ့ရသည်။ ချေးငွေအချို့ အထူးသဖြင့် တရုတ်ချေးငွေအများစုမှာ အတိုးနှုန်းကြီးမားသည့်အပြင် ဂျပန်အပါအဝင် အခြားဥရောပနိုင်ငံအချို့ကဲ့သို့ အတိုးမယူခြင်း၊ ချေးငွေလျော်ပစ်ခြင်းမျိုးမရှိဘဲ အတိုးနှုန်းကြီးမားသောကြောင့် အတိုးချည်းပင် သန်းချီ၍ ဆပ်ရမည်ဖြစ်သည်။

လက်ရှိအစိုးရလက်ထက်တွင် ယခင်အစိုးရလက်ထက်မှ ကြွေးမြီများ ပြန်ဆပ်ရမည့်ကာလဖြစ်နေခြင်း၊ လူမှန် နေရာမှန်မဖြစ်သော စီးပွားရေးဆိုင်ရာ ဝန်ကြီးတာဝန်များ ခန့်အပ်မှု၏ နောက်ဆက်တွဲ စီးပွားရေးမူဝါဒ ပြတ်သားရှင်းလင်းမှု မရှိခြင်း၊ အမေရိကန်ဒေါ်လာနှင့် စင်ကာပူဒေါ်လာဈေးများ သံသယဖြစ်ဖွယ် တစ်ဟုန်ထိုး မြင့်တက်နေခြင်းတို့ကြောင့် လုပ်ငန်းအများစု ချိန်ဆ၊ တုံ့ဆိုင်းသွားခြင်း၊ အချို့ ရပ်နား၊ ပိတ်သိမ်းသွားခဲ့ခြင်းဖြစ်သည်။

လက်ရှိ ဒေါ်လာဈေး မြင့်တက်နေခြင်းကို ယခင်တပ်မတော် အစိုးရလက်ထက် ကုန်သွယ်ရေးကောင်စီက ထိန်းညှိခဲ့သည့် နည်းလမ်းအတိုင်း သွင်းကုန်များကို အမျိုးအစား၊ တန်ဖိုးအလိုက် အရိုးအသားခွဲ၍ ကန့်သတ်ခြင်းမျိုးဖြင့် ဒေါ်လာဈေးကျသွားစေရန် ရေတိုကုစားခြင်းအပြင် အခြားသော ရေတို၊ ရေရှည် နည်းလမ်းများကို အလျင်အမြန် ကြံဆ၊ ချက်ချင်း တုံ့ပြန်ဆောင်ရွက်နိုင်ခြင်းမရှိပါက မြန်မာ့စီးပွားရေး စိုးရိမ်ရေမှတ် ကျော်လွန်ကာ ထိန်းမနိုင် သိမ်းမရ ဖြစ်သွားနိုင်ကြောင်း သတိပေး၊ အကြံပြု၊ တိုက်တွန်းအပ်ပေသည်။

အယ်ဒီတာ (၂၂-၇-၂၀၁၈)

  • TAGS