News

POST TYPE

EDITORIAL

အုံ့ပုန်း လူ့အဖွဲ့အစည်း၏ စရိုက်သဘော (Daily, Vol-6/No-80)
12-Jul-2018 tagged as

လူသားတို့၏ ဘဝနေထိုင်မှုပုံစံများ ပြောင်းလဲလာသည့်အပြင် တစ်နေ့တခြား ဟင်းလင်းပွင့်လာသော ကမ္ဘာကြီးတွင် မည်သည့်ကိစ္စကိုမျှ ကြာရှည်လေးမြင့်စွာ ဖုံးကွယ်ထား၍ မရတော့ပေ။

အထူးသဖြင့် အများပြည်သူနှင့်ဆိုင်သော၊ နိုင်ငံတော်နှင့် နိုင်ငံသား အားလုံးနှင့်ဆိုင်သော၊ လူ့အဖွဲ့အစည်း တစ်ရပ်လုံးနှင့်ဆိုင်သော အရေးကိစ္စများဖြစ်ပါက အချိန်အတိုင်းအတာ တစ်ခုအထိသာ ဖုံးကွယ်ထားနိုင်ပြီး တစ်ချိန်ချိန်တွင် မဖြစ်မနေ ဖော်ထုတ်ကြရစမြဲ သို့မဟုတ် တူးဆွ၊ ဖော်ထုတ်ခံရစမြဲဖြစ်သည်။

ကမ္ဘာပေါ်တွင် ကြုံတွေ့ ရင်ဆိုင်ခဲ့ရသမျှ အရေးကိစ္စ ကြီးငယ်များသည်လည်း အချိန်တန်လာသည်နှင့် အများပြည်သူ သိရှိစေရန် ဖော်ထုတ်တင်ပြလာကြခြင်းကို ကမ္ဘာ့သမိုင်းကို လေ့လာကြည့်လျှင် သိနိုင်ပေသည်။

ယနေ့ခေတ်သည် အတိတ်ကာလများထက် ကမ္ဘာကြီးက ပို၍ ပွင့်လင်း၊ လွတ်လပ်လာသည့်အပြင် ကမ္ဘာ့နေရာ အသီးသီးတွင် ဖြစ်ပျက် ပြောင်းလဲ နေသော အကောင်း၊ အဆိုးကိစ္စ ကြီးငယ်မှန်သမျှအချိန်မဆိုင်းဘဲ အများပြည်သူ သိရှိခွင့်ရလာကြသည်။

သို့သော် တံခါးပိတ်နေလာခဲ့သော လူ့အဖွဲ့အစည်း၊ အသိုင်းအဝိုင်းများ အနေနှင့်မူ သတင်းကို လိုသည့်အပိုင်း သို့မဟုတ် မိမိတို့အတွက် အပေါင်းလက္ခဏာဟုထင်သော သတင်းများကိုသာ အသိပေးခြင်း၊ မိမိတို့အတွက် အနုတ်လက္ခဏာဆောင်သည်ဟု ယူဆသော အကြောင်းအရာများကို ထိမ်ချန်ထားခြင်းစသည့် အလေ့အထမျိုး ရှိတတ်သည်။

သို့သော် ထိုအလေ့အထသည် မိမိတို့ လူ့အဖွဲ့အစည်း၊ အသိုင်းအဝိုင်းအတွက် လက်တွေ့အားဖြင့် အပေါင်းလက္ခဏာထက် အနုတ်လက္ခဏာ အကျိုးဆက်များကိုသာ ရင်ဆိုင်ရနိုင်သည် ဆိုသောအချက်ကိုမူ သတိမပြုမိတတ်ကြပေ။

ထိုအလေ့အထကြောင့် အုံ့ပုန်းလူ့အဖွဲ့အစည်း၊ အသိုင်းအဝိုင်းအဖြစ် အသားကျလာခဲ့ပြီး မည်သည့်အကြောင်းကိစ္စ၊ အရေးအရာမျိုးမဆို လူသိရှင်ကြား တာဝန်သိ၊ တာဝန်ယူ၊ တာဝန်ခံရဲသော အလေ့အထနှင့် တဖြည်းဖြည်း ဝေးကွာသွားတော့သည်။

အုံ့ပုန်း လူ့အဖွဲ့အစည်း၊ အဝန်းအဝိုင်း ဖြစ်လာသောကြောင့် လူသားမှန်သမျှ ဖြစ်ပေါ်လေ့ရှိသည့် မကျေနပ်မှု၊ မခံမရပ်နိုင်ဖြစ်မှု၊ အလိုမကျမှု စသည့် စိတ်ခံစားချက်များကို မျိုသိပ်၊ အောင့်အည်း၊ ကြိတ်မှိတ်၊ ထိန်းချုပ်ထားကြသည်။ 

ပုံမှန် ဖွင့်ထုတ်၊ ဖြေလျှော့ခွင့်မရသည့် ထိုသို့သော အုံ့ပုန်း စိတ်ခံစားချက်မျိုးသည် အခါအခွင့် သင့်လာသော အချိန်အခါမျိုးတွင် စိတ်ကို လွှတ်ပေးကာ အလွန်အကျူး ပေါက်ကွဲထွက်သွားတတ်သည်။ 

တာဖို့ထားသော တစ်ဖက်ပိတ်ဆည်ကို ဖွင့်ထုတ်လိုက်သကဲ့သို့ အရှိန်အဟုန်ပြင်းစွာ စီးထွက်လာတတ်သော ရေသည် ၎င်းရှေ့တွင်ရှိသော အရာမှန်သမျှကို အင်အားကြီးစွာ တိုက်ဖျက်ဝါးမျို ကျော်ဖြတ်သွားသည်။ အုံ့ပုန်းစိတ် ခံစားချက်များကို လွှတ်ပေးသည့်အခါတွင်လည်း ဝုန်းဒိုင်းကျဲ ထွက်သွားတတ်သည်။

မြန်မာလူ့အဖွဲ့အစည်းသည် စင်စစ်အားဖြင့် အနှစ်ခြောက်ဆယ်နီးပါး အိမ်တွင်းအောင်း၊ အုံ့ပုန်း လူသားတစ်ဦး၊ တစ်ဖက်ပိတ်ဆည်အတွင်း လှောင်ထားသော ရေနှင့် အလားသဏ္ဌာန်တူသည်။ မြန်မာလူ့အဖွဲ့အစည်းအတွင်းရှိ အဝန်းအဝိုင်း၊ အသိုက်အမြုံ၊ အင်အားစုများ အသီးသီးသည်လည်း ထို့အတူပင်။ 

တစ်လျှောက်လုံး မျိုသိပ်၊ အောင့်အည်းလာသော စိတ်ခံစားချက်များ၊ မိမိကို စက်ရုပ်သဖွယ် စေခိုင်း အမိန့်ပေးလာခဲ့ခြင်းများကို အခါအခွင့်သင့်သည့် နေရာတွင် ဖွင့်ထုတ်ကြသည့်အခါ အလွန်အကျွံများအဖြစ် အသွင်ပြောင်းသွားတော့သည်။

ထိုအချက်ကို သတိပြုမိပါက ယနေ့ အွန်လိုင်း လူမှုကွန်ရက်ပေါ်တွင် စကားလုံးများဖြင့် ပေါက်ကွဲနေခြင်းများ၊ နယ်စွန်နယ်ဖျားရှိ လက်လွန်ခြေလွန်ဖြစ်မှုများ၊ အမြဲလိုလို ဘုံရန်သူရှာ အပြစ်ဖို့နေခြင်းများ၊ ဘုံရန်သူရှာမရပါက အချင်းချင်း အိုးမဲသုတ်ခွပ်နေခြင်းများကို ကုစားနိုင်သည့် နည်းလမ်းများ ဝိုင်းဝန်း အဖြေရှာကြပါမည့်အကြောင်း တိုက်တွန်းလိုရင်းဖြစ်သည်။

အယ်ဒီတာ (၁၂-၇-၂၀၁၈)

(လက်ရှိဖြစ်ပေါ်နေသော အခြေအနေနှင့် ကိုက်ညီနေသောကြောင့် ၁၁-၂-၂၀၁၈ နေ့ထုတ် The Voice Daily သတင်းစာတွင် ဖော်ပြခဲ့ပြီးသော အယ်ဒီတာ့အာဘော်ကို ပြန်လည်ဖော်ပြခြင်း ဖြစ်ပါသည်။)

  • TAGS