News

POST TYPE

EDITORIAL

တန်ဖိုးဟူသည် (Daily,Vol-6/No-73)
04-Jul-2018

အရာဝတ္ထု ပစ္စည်းဖြစ်စေ၊ လူပုဂ္ဂိုလ်၊ အဖွဲ့အစည်းဖြစ်စေ၊ ဘာသာ အဆုံးအမတရားဖြစ်စေ လက်တွေ့ အသုံးတည့်မှု၊ လက်တွေ့အသုံးချနိုင်မှု၊ လုပ်ဆောင်မှု အောင်မြင်မှု အတိုင်းအတာနှင့် လောကလုံးဆိုင်ရာ အမှန်တရားဖြစ်ကြောင်း သက်သေပြနိုင်မှုတို့အပေါ် မူတည်ကာ တန်ဖိုးအသီးသီး ရှိနေ တတ်သည်။ 

ထိုသို့ တန်ဖိုးအသီးသီးရှိနေသော အရာများကို တစ်ခါတစ်ရံ ပကတိ တန်ဖိုးအတိုင်း ထားခြင်းသည်ပင်လျှင် အခြားသော မွမ်းမံခြယ်သမှုများ ပြုလုပ်ခြင်းထက် ယင်းအရာကို ပို၍ တန်ဖိုးထားခြင်းမည်သည်။

ဥပမာအားဖြင့် ဥရောပနိုင်ငံ အချို့ရှိ ရှေးဟောင်း လက်ရာမွန်၊ အဆောက်အအုံ၊ ရုပ်တုများကို ဆေးသုတ်ခြင်း၊ အသစ်ဖြင့် အစားထိုးခြင်း၊ အရောင်တင်ခြင်းကဲ့သို့ မွမ်းမံခြယ်သမှု မလုပ်ဘဲ မူလပကတိ အသွေးအရောင်၊ လက်ရာအတိုင်း မပျက်စီးစေရန်နှင့် ရေရှည် တည်တံ့စေရန် ထိန်းသိမ်းပေးခြင်းမျိုးဖြင့် မူလ လက်ရာရှင်နှင့် ရှေးဟောင်းပစ္စည်းများ၏ ပကတိ တန်ဖိုးကို အလေးထား လေးစားကြောင်း ပြသလေ့ ရှိသည်။

ဘာသာ၊ အယူဝါဒနှင့် ပတ်သက်လျှင်လည်း ထို့အတူပင်။ ဗုဒ္ဓ၏ကျင့်စဉ်နှင့် ဟောကြားခဲ့သော အစစ်အမှန် ဓမ္မ သို့မဟုတ် အဆုံးအမများသည် မူလကပင် သူ့တန်ဖိုး အစစ်အမှန်နှင့်သူ ရှိနေပြီးသား ဖြစ်သည်။ 

ထို့အတူ နိုင်ငံပြု ပုဂ္ဂိုလ်များ၊ အာဇာနည် ပုဂ္ဂိုလ်များ၊ စွန့်လွှတ်စွန့်စားသူ လူပုဂ္ဂိုလ်များကိုလည်း ၎င်းတို့၏ စိတ်ဓာတ်၊ ခံယူချက်၊ ဆောင်ရွက်ချက်များက ၎င်းတို့ ပကတိတန်ဖိုးကို ဖော်ပြလျက် ရှိသည်။

ဗုဒ္ဓဘုရားရှင်သည်လည်းကောင်း၊ အာဇာနည် လူပုဂ္ဂိုလ်သည်လည်းကောင်း ရုပ်ခန္ဓာ၊ အသွင်အပြင် လက္ခဏာကြောင့် ဂုဏ်သတင်းကျော်စော တန်ဖိုးရှိခြင်း မဟုတ်ဘဲ ၎င်းတို့၏ လက်တွေ့ကျင့်စဉ်၊ လောကသစ္စာတရားများကို ဖော်ထုတ် ဟောကြားခဲ့သော ဓမ္မနှင့် လူ့အဖွဲ့အစည်းတစ်ရပ်အတွက် ကိုယ်ကျိုးစွန့် ပေးဆပ်၊ အလုပ်လုပ်ပေးခဲ့သော ရလဒ်များကြောင့် လူအများ၏ ကိုးကွယ်ဆည်းကပ်ခြင်း၊ တန်ဖိုးထားခြင်းကို ရရှိခဲ့သည်။

စေတီပုထိုး၊ ရုပ်တုများသည် သက်ဆိုင်ရာ လူ့အဖွဲ့အစည်း၏ သဒ္ဓါတရားနှင့် အသိအမှတ်ပြုမှုကို ပြညွှန်ခြင်းသာဖြစ်ပြီး နောင်သက်တမ်း ကြာသွားသည့်အခါ ယဉ်ကျေးမှု အမွေအနှစ်နှင့် သမိုင်းမှတ်တမ်းအဖြစ် သတ်မှတ်ခံရမည့် ရုပ်ပစ္စည်းများသာ ဖြစ်သည်။

ဗုဒ္ဓဘုရားရှင် ကိုယ်တိုင် အားထုတ်ခဲ့သော ဝိပဿနာတရားနှင့် ဟောကြား ခဲ့သော အဆုံးအမများအတိုင်း လက်တွေ့ ကျင့်ကြံ၊ လိုက်နာခြင်း၊ အာဇာနည် ခေါင်းဆောင်များ၏ စိတ်ဓာတ်၊ ခံယူချက်များကို အတုယူကာ ငြိမ်းချမ်း သာယာဝပြောသော၊ မေတ္တာတရားကို အခြေခံသော လောကလူ့ဘောင်အဖြစ် လက်တွေ့ တည်ဆောက်ခြင်းကသာ စိတ်နှလုံးဖြင့် တန်ဖိုးထားခြင်းမည်ပေသည်။

တစ်ခါတစ်ရံတွင် ရုပ်ပစ္စည်းများကို တန်ဖိုးထားလိုသော ရည်ရွယ်ချက်ဖြင့် အရေအတွက် များစွာ ဖန်တီးတည်ဆောက်လိုက်ခြင်းဖြင့် သက်ဆိုင်ရာ ရုပ်ပစ္စည်း သို့မဟုတ် ယင်းကို ကိုယ်စားပြုနေသော လူပုဂ္ဂိုလ်၊ အဖွဲ့အစည်းကို တန်ဖိုး ကျသွားစေတတ်သည်။

ဆိုလိုသည်မှာ တွင်းထွက် ကျောက်မျက်ရတနာများကို တန်ဖိုးရှိကြောင်း သတ်မှတ်ချက်တွင် ရှားပါးခြင်းဆိုသော ဂုဏ်အင်္ဂါက ထိပ်ဆုံးတွင် ရှိနေသောကြောင့် ပေါများစွာ တူးဖော် ထုတ်လုပ်လိုက်ပါက တန်ဖိုးကျ သွားတတ်သည့် သဘောကို ဆိုလိုသည်။

တန်ဖိုးဟူသည် ကာယကံရှင် တစ်ဦးချင်းစီ၏ ရုပ်ပိုင်းဆိုင်ရာ အပေါ်တွင် မူတည်ခြင်း မဟုတ်ဘဲ ခံယူရမည့် စိတ်ထား၊ လက်တွေ့ ကျင့်စဉ်နှင့် ဆောင်ရွက်ချက်များက မိမိကိုယ်တိုင်နှင့် လူ့လောက၊ လူ့အဖွဲ့အစည်း ကောင်းကျိုးဖြစ်စေခြင်းတို့အပေါ် မူတည်ကြောင်း သိစေလိုရင်း ဖြစ်သည်။

အယ်ဒီတာ (၄-၇-၂၀၁၈)

(လက်ရှိဖြစ်ပေါ်နေသော အခြေအနေနှင့် ကိုက်ညီနေသောကြောင့် ၂၇-၂-၂၀၁၇ နေ့ထုတ် The Voice Daily သတင်းစာတွင် ဖော်ပြခဲ့ပြီးသော အယ်ဒီတာ့အာဘော်ကို ပြန်လည်ဖော်ပြခြင်း ဖြစ်ပါသည်။)