POST TYPE

EDITORIAL

အာဏာသိမ်း သတင်းမှား ဘာ့ကြောင့်ထွက် (Daily,Vol-6/No-68)
28-Jun-2018 tagged as

တပ်မတော်ကာကွယ်ရေးဦးစီးချုပ်က အာဏာသိမ်းမည်ဟု ခြိမ်းခြောက်ပြောဆိုခဲ့သည်ဟု ဘန်ကောက်ပို့စ်သတင်းစာတွင် လယ်ရီဂျေဂင်၏ ရေးသားချက် မှန်ကန်ခြင်းမရှိကြောင်း နိုင်ငံတော်သမ္မတရုံးပြောခွင့်ရပုဂ္ဂိုလ် ဦးဇော်ဌေး၏ ဖြေရှင်းချက် မှာ လတ်တလော လူအများစိတ်ဝင်စားမှု အများဆုံး အကြောင်းအရာ ဖြစ်ခဲ့သည်။

အင်္ဂလိပ်ဘာသာဖြင့် ရေးသားထားသော အဆိုပါ ဆောင်းပါး ဘန်ကောက်ပို့စ် သတင်းစာတွင် ဇွန်လ ၂၃ ရက်နေ့က ဖော်ပြပါရှိခဲ့ပြီးနောက် ပြည်တွင်းသတင်းမီဒီယာ အချို့က မြန်မာဘာသာသို့ ပြန်ဆိုဖော်ပြသည့်အခါတွင်မှ အစိုးရနှင့် သက်ဆိုင်ရာ တာဝန်ရှိသူများက သိရှိပြီးနောက် ယခုကဲ့သို့ တုံ့ပြန်ရှင်းလင်းခဲ့ခြင်းဖြစ်သည်။

ပြီးခဲ့သည့် ဇွန်လ ၈ ရက်နေ့က နေပြည်တော်တွင် သမ္မတ၊ နိုင်ငံတော် အတိုင်ပင်ခံ၊ ဒုတိယသမ္မတများ၊ လွှတ်တော်ဥက္ကဋ္ဌများ၊ တပ်မတော်ကာကွယ်ရေး ဦးစီးချုပ်နှင့် ဒုဦးစီးချုပ်များ၊ ပြည်ထဲရေး၊ ကာကွယ်ရေး၊ နယ်စပ်ရေးရာ ဝန်ကြီးဌာန ဝန်ကြီးတို့အပါအဝင် နိုင်ငံတော်ကာကွယ်ရေးနှင့် လုံခြုံရေးကောင်စီ အစည်းအဝေးဆန်ဆန် ကျင်းပသည့် ဆွေးနွေးပွဲတွင် အထက်ပါအတိုင်း တင်းမာမှု ဖြစ်ပေါ်ခဲ့သည်ဟု လယ်ရီဂျေဂင်က ပြည်တွင်းရှိ ၎င်း၏ သတင်းရင်းမြစ်များကို ကိုးကားရေးသားခဲ့သည်။

သို့သော် နိုင်ငံတော်သမ္မတရုံးက အဆိုပါသတင်းကို သီးသန့် ထုတ်ပြန်ရှင်းလင်းခြင်း မဟုတ်ဘဲ ဇွန်လ ၂၇ ရက်နေ့က နေပြည်တော်တွင် ၂၁ ရာစု ပင်လုံညီလာခံကျင်းပရေး ကော်မတီအစည်းအဝေး တက်ရောက်ရန် ရောက်ရှိလာသည့် ဦးဇော်ဌေးကို ပြည်တွင်း၊ ပြည်ပသတင်းထောက်များက မေးမြန်းခြင်းကို ပြန်လည် ဖြေကြားခဲ့ခြင်းသာဖြစ်သည်။

အဆိုပါ သတင်းအမှားထွက်ပေါ်ခဲ့ခြင်းနှင့်ပတ်သက်၍ သတင်းထောက်များ၏ မေးမြန်းချက်များကို ဖြေကြားခဲ့သော ဦးဇော်ဌေး၏ ပြောဆိုချက်များတွင် လက်ရှိ အရပ်သားအစိုးရနှင့် တပ်မတော်အကြား ရန်တိုက်ပေးလိုသော ရည်ရွယ်ချက်ဖြင့် ဤသတင်းမှားကို တမင်ထုတ်လွှင့်ခြင်းဖြစ်ကြောင်း ပြောဆိုသွားချက်မှာ ထူးခြားသည်။

လက်ရှိ အရပ်သားအစိုးရ စတင်တာဝန်ယူပြီးချိန်မှစကာ တပ်မတော်နှင့် အစိုးရအကြား ရန်ဘက်အသွင် ဆောင်သွားစေရန် နည်းလမ်း အမျိုးမျိုးဖြင့် ဘေးတီး၊ သပ်လျှို၊ သွေးခွဲ၊ အရောင်ဆိုး၊ အဆင်းဘီးတပ်ပေးသကဲ့သို့ ဖြစ်စေသည့် သတင်းစကားများ၊ မှတ်ချက်ပြု ပြောဆိုခြင်းများ အွန်လိုင်းလူမှုကွန်ရက်ပေါ်တွင် တွေ့မြင်နေရသည်။

အွန်လိုင်း လူမှုကွန်ရက်ပေါ်ရှိ ဒီမိုနာမည်ခံနှင့် တပ်မတော် ထောက်ခံသူ အမည်သုံး အညံ့စား၊ အပေါစား လော်ဘီများ၏ နိမ့်ကျဆင်းရဲလှစွာသော အတုံးလိုက် အတစ်လိုက် ကာကွယ်၊ မြှောက်ပင့်၊ ချီးပမှုများ၊ ဆဲဆို၊ တိုက်ခိုက်၊ အပုပ်ချ၊ ရန်စမှုများဖြင့် နှစ်ဖက်အကြား ရန် ငါစည်း ခြားသထက်ခြားစေရန် ပုံဖော်မှုများက သိသာထင်ရှားလှသဖြင့် အသိဉာဏ် ဆင်ခြင်တုံတရားရှိသူများက ထိုအုပ်စုနှစ်စု၏ လမ်းစဖော်မှုနောက်သို့ လိုက်ပါခြင်းမရှိပေ။

ယခင်စနစ်ဆိုး၏ ဒဏ်ရာဒဏ်ချက် များစွာကြောင့် စိတ်ဒဏ်ရာသင့်နေသူ၊ အာဏာရှင်အပေါ် အမုန်းစိတ်ကဲနေသူ၊ လူပုဂ္ဂိုလ်တစ်ဦး၊ တစ်ယောက်၊ တစ်ဖွဲ့အပေါ် ကိုးကွယ်မှုဆန်ဆန် လွန်ကဲစွာ ချစ်ခင်စိတ်ရှိနေသူ၊ စနစ်ဆိုးကြောင့် အခွင့်ထူး ရလာခဲ့သူ၊ အာဏာရှိသူများနှင့် ဆက်စပ်၍ အကျိုးများလာခဲ့သူ၊ ဦးနှောက်ဆေး၊ နားတစ်ဖက်ပိတ်ခံထားရသူ၊ အခွင့်အရေး မျှော်ကိုးဆဲ ရှိနေသူ၊ တာဝန်ပေး စေခိုင်း ချက်ကြောင့် သံတူကြောင်းကွဲ မှတ်ချက်များဖြင့် အွန်လိုင်းပေါ်တွင် တိုက်ပွဲ တစ်ခုအသွင် အုပ်စုလိုက် တာဝန်ထမ်းနေကြသူ အထက်ဆိုခဲ့ပါ အပေါစားလော်ဘီ နှစ်ဖွဲ့အကြားတွင်သာ အပြန်အလှန် တိုက်ခိုက်ကြရင်း အချိန်ကုန်နေကြသည်။

အချို့က အထက်ဆိုခဲ့ပါ အပေါစား၊ အညံ့စားလော်ဘီနှစ်ဖွဲ့၏ အဆင့်အတန်း နိမ့်ကျလှသော မှတ်ချက်စကားများ၊ ဆဲဆို၊ ပုတ်ခတ်မှုများကိုကြည့်ကာ ဒီမိုကရေစီနှင့် တပ်မတော် သို့မဟုတ် အရွေးကောက်ခံအစိုးရနှင့် စစ်အာဏာရှင်၏ ဆိုးမွေ၊ ကောင်းမွေခံ လက်ရှိတပ်မတော်အကြား ကြီးမားသည့် အက်ကြောင်းရှိနေပြီး အပြန်အလှန် ချေမှုန်း၊ တွန်းချ၊ ဖယ်ထုတ်ရန် ကြိုးစားနေကြသယောင် ထင်မြင်ယူဆထားတတ်ကြသည်။

ထိုအခြေအနေကို ဟုတ်သယောင် ပံ့ပိုးပေးနေသာ ဘာသာရေး၊ လူမျိုးရေး၊ စစ်ဝါဒအရေး ရှေ့တန်းတင် အုပ်စုအချို့၏ စည်းရုံး၊ လှုံ့ဆော်၊ လှုပ်ရှား၊ ထေ့ငေါ့၊ သရော်၊ လှောင်ပြောင်မှု၊ လက်ဝဲဝါဒီယောင်ယောင်၊ ဆိုရှယ်လစ်စွန်းဆန်ဆန် ပစ္စည်းမဲ့ ဒေါသသင့်နေသူများ၊ ခေတ်အဆက်ဆက် လွယ်အိတ်ကဲ့သို့ ဘေးတိုက်လိုက်နေသူ လက်တစ်ဆုပ်စာအချို့၏ ဆွမ်းကြီးလောင်း၊ ဘေးတီးပေးမှုများလည်း ရှိနေပေရာ မူလကပင် အခြေခံ သဘာဝချင်း မတူညီသော အုပ်စုနှစ်ခုအကြား ပို၍ နားလည်မှု လွဲစရာဖြစ်စေခဲ့သည်။

ယနေ့အချိန်အထိ အာဏာရှင် အစိုးရများ၏ ခေါက်ရိုးကျိုးပုံစံများအတိုင်း လိုအပ်သည့် သတင်းအချက်အလက်များကို အတိုင်းအတာတစ်ခုအထိ ပွင့်လင်းမြင်သာစွာ အချိန်မဆိုင်း ထုတ်ပြန်ပေးနိုင်မှု အားနည်းခြင်း၊ ကောလာဟလ သတင်းမှားများအပေါ် အချိန်မဆိုင်း တုံ့ပြန်ရှင်းလင်းနိုင်မှုမရှိဘဲ အချိန်နောက်ကျမှသာ ပိုင်နိုင်ကျွမ်းကျင်မှုမရှိစွာ ထုတ်ပြန်ရှင်းလင်းခြင်းတို့ကြောင့် အမှန်တရားက ဖိနပ်စီးနေသောအချိန်တွင် မုသားက ကမ္ဘာတစ်ပတ် ပတ်ပြီးသွားသည်ဟူသော စကားအတိုင်း အရာရာနောက်ကျခြင်း၏ ခါးသီးသော အကျိုးဆက်ကို ခံစားနေရခြင်းဖြစ်ကြောင်း ဤအဖြစ်အပျက်က ထပ်မံသတိပေးနေသည်ကို သတိပြုဆင်ခြင်စေလိုရင်း ဖြစ်သည်။

အယ်ဒီတာ (၂၈-၆-၂၀၁၈)

  • TAGS