News

POST TYPE

EDITORIAL

ပေးထားသော ခေါင်းစဉ်ကို ပြန်ကြည့်ပါ (Daily, Vol-6/No-65)
25-Jun-2018 tagged as

လက်ရှိအာဏာရပါတီ၏ ရွေးကောက်ပွဲဝင်ရခြင်း အဓိက ရည်ရွယ်ချက်မှာ ဒီမိုကရေစီနည်းကျ ရေးဆွဲထားခြင်း မဟုတ်သည့် လက်ရှိ ဖွဲ့စည်းပုံအခြေခံဥပဒေကို ပြင်ဆင်ရေးဟု ပြောဆိုခဲ့သည်။

အချစ်နှင့် အမုန်း ပေါင်းရုံးကာ တစ်ခဲတစ်နက် မဲပေးရွေးချယ်ပေးခဲ့သော ပြည်သူလူထုကြောင့် ရွေးကောက်ပွဲ အနိုင်ရရှိပြီးနောက် အမျိုးသား ပြန်လည် သင့်မြတ်ရေးကို အဓိက ဦးတည်ဆောင်ရွက်နေသည်ဟု တရားဝင် ထုတ်ဖော်ပြောဆိုခဲ့သည်။

အစိုးရ သက်တမ်း ၂ နှစ်ပြည့်သည့်အခါ ပြည်သူနှင့်အတူ ဆိုသောစကားဖြင့် မဲဆန္ဒရှင် ပြည်သူလူထုနှင့် လက်ရေတစ်ပြင်တည်း၊ တစ်သားတည်း၊ အတူတကွရှိကြောင်း၊ ဒီမိုကရေစီခရီးလမ်းနှင့် ဒီမိုကရေစီ ပြုပြင်ပြောင်းလဲရေး လုပ်ငန်းများကို ပြည်သူနှင့်အတူ လျှောက်လှမ်းတည်ဆောက်မည်ဖြစ်ကြောင်း အသိပေးထားသည်။

နိုင်ငံရေးပါတီနှင့် အစိုးရမှာ အခြေခံအားဖြင့် တူညီသော်ငြား သဘော သဘာဝနှင့် လက်တွေ့ အကောင်အထည်ဆောင်ရွက်မှု၊ ကိုယ်စားပြုမှု၊ တာဝန်သိ၊ တာဝန်ယူ၊ တာဝန်ခံမှုများတွင်မူ ကွာခြားချက် များစွာ ရှိနေသည်။

ရွေးကောက်ပွဲ အနိုင်မရရှိမီ နိုင်ငံရေးပါတီအဖြစ် ရှိနေစဉ်က တွေးခေါ် စဉ်းစားပုံ၊ ရှုမြင်သုံးသပ်ပုံ၊ လက်တွေ့ အကောင်အထည်ဖော်ပုံတို့မှာ ရွေးကောက်ပွဲ အနိုင်ရရှိကာ အာဏာရရှိပြီးနောက် အစိုးရဖြစ်သွားသည့်အခါ ပြောင်းလဲသွားတတ်သည့် သဘာဝရှိသည်။

NLD အစိုးရသည်လည်း အတိုက်အခံ နိုင်ငံရေးပါတီဘဝက ဆောင်ပုဒ်များ၊ တွေးခေါ်၊ ရှုမြင်၊ သုံးသပ်၊ ဆင်ခြင်မှုများ၊ ရပ်တည်၊ ရည်မှန်း၊ ဆောင်ရွက်မှုများနှင့် အစိုးရဖြစ်သွားသည့်အခါ မည်မျှပြောင်းလဲသွားကြောင်း ၎င်းတို့ကိုယ်တိုင်သာမက မဲဆန္ဒရှင်ပြည်သူများလည်း ကောင်းစွာ ရိပ်စားမိကြသည်။

အာဏာရှင်စနစ်က မွေးဖွားပေးလိုက်သာ အခွင့်ထူးခံပါတီနှင့် အာဏာ ဗဟိုပြု စဉ်းစား၊ တွေးခေါ်၊ ဆောင်ရွက်မှုများကို များစွာ ရွံမုန်း၊ စက်ဆုပ်နေသော ပြည်သူလူထုထံတွင် NLD ပါတီနှင့် ခေါင်းဆောင်အပေါ်တွင် များစွာ ကြီးမားသည့် မျှော်လင့်ချက်ဖြင့် မဲပေးရွေးချယ်လိုက်ကြခြင်းဖြစ်သည်။

အာဏာရပါတီ သို့မဟုတ် လက်ရှိ အရွေးကောက်ခံအစိုးရထံတွင် အရည်အချင်းနှင့် စွမ်းဆောင်ရည် လိုအပ်ချက်များ ရှိနေလင့်ကစား အနိမ့်ဆုံးအားဖြင့် ယခင်အာဏာရှင် အစိုးရများ၏ ခေါက်ရိုးကျိုးစဉ်းစားပုံ၊ ရှုမြင်၊ သုံးသပ် အကောင်အထည် ဖော်ပုံများနှင့် အာဏာရှင်ဆန်သော အပြုအမူ၊ အပြောအဆို၊ လုပ်ကိုင်ဆောင်ရွက်မှုများမှ ခွဲထွက်ပြနိုင်လိမ့်မည်ဟု ယုံကြည်မျှော်လင့်ထားကြသည်။

သို့သော် လက်တွေ့အားဖြင့်မူ ရွေးကောက်ပွဲ ဝင်ရောက်ယှဉ်ပြိုင်ရာတွင်လည်းကောင်း၊ ဥပဒေပြုရေး၊ အုပ်ချုပ်ရေး အာဏာခွဲဝေမှုတွင်လည်းကောင်း၊ အစိုးရအဖွဲ့ဝင်ဝန်ကြီးများ ခန့်အပ်တာဝန်ပေးရာတွင်လည်းကောင်း၊ ငြိမ်းချမ်းရေးလုပ်ငန်းစဉ်များ ဆောင်ရွက်ရာတွင်လည်းကောင်း ယုတ်စွအဆုံး ပါတီတွင်းရေးရာကိစ္စများအထိပါ ပါတီ၏အမည်နာမနှင့် ဆောင်ပုဒ်များနှင့် မဆီမလျော်မှုများ ရှိနေကြောင်း ဝေဖန်ပြောဆိုခံလာရသည်။

အထူးသဖြင့် ဒီမိုကရေစီ ခေါင်းစဉ်အောက်တွင် ဒီမိုကရေစီစနစ်နှင့် ဖီလာပြုနေသော ဗဟိုချုပ်ကိုင်မှုဆန်ဆန် ပြောဆို၊ ဆုံးဖြတ်၊ လုပ်ကိုင်မှုများ၊ ပုဂ္ဂိုလ်ရေး ကိုးကွယ်မှုဆန်ဆန် အလွန်အကျွံ ချီးပမြှောက်ပင့်မှုများ၊ အမျိုးသား ပြန်လည် သင့်မြတ်ရေး ခေါင်းစဉ်နှင့် ဆန့်ကျင်ဘက်ဖြစ်နေသော လက်တွေ့ ဆောင်ရွက်မှုများက အများပြည်သူ၏ မျှော်လင့်ချက်များကို ဝေ၀ါးသွားစေခဲ့သည်။

အချို့ ကိစ္စများတွင် ပြည်သူလူထုအနေနှင့် ဆန္ဒစောလွန်း၊ မျှော်လင့်ချက် ကြီးလွန်းနေခြင်းလော၊ NLD အစိုးရကိုယ်၌က စဉ်းစားတွေးခေါ်ပုံ ပြောင်း သွားခြင်းလော၊ အရည်အချင်း လိုအပ်ချက်ရှိနေ၍ပေလော၊ အခန့်ထားခံအများစု ကြီးစိုးထားသည့် အုပ်ချုပ်ရေးယန္တရားက တမင်ရည်ရွယ်ချက်ဖြင့် ကန့်လန့်တိုက်နေခြင်းလော ဝေခွဲရခက်စရာများ ရှိနေသည်။

သို့သော် ငြိမ်းချမ်းမှု တည်ဆောက်ရေးကဲ့သို့ နိုင်ငံသားအားလုံးနှင့် သက်ဆိုင်သည်ဟု တရားဝင် ထုတ်ဖော်ပြောဆိုထားသည့် အရေးမျိုးတွင် နိုင်ငံရေး အင်အားစုအချို့၊ တိုင်းရင်းသားအချို့၊ လူပုဂ္ဂိုလ်အချို့ကို ခွဲခြားဆက်ဆံခြင်း၊ တမင် ချန်ထားခဲ့ခြင်းများ ရှိခဲ့သည်ဟု ဝေဖန်သံများ ထွက်ပေါ်လာခြင်းမှာ ဒီမိုကရေစီ ခေါင်းစဉ်အောက်ရှိ အမျိုးသား ပြန်လည်သင့်မြတ်ရေး ဆောင်ပုဒ်နှင့် ချိန်ထိုးကြည့်လျှင် ဂုဏ်သိက္ခာပိုင်းတွင်ပါ ပြောစရာ ဖြစ်သွားနိုင်ကြောင်း မီးမောင်းထိုးပြလိုရင်းဖြစ်သည်။

အယ်ဒီတာ ( ၂၅ - ၆-၂၀၁၈)

  • TAGS