News

POST TYPE

EDITORIAL

ဆန်စဉ်ရာ ကျည်ပွေ့ မလိုက်စေလို (Daily,Vol-6/No-62)
21-Jun-2018

အစိုးရအဖွဲ့နှင့် ပူးပေါင်းလုပ်ကိုင် ဆောင်ရွက်ထားခြင်းမရှိသည့် ပြည်တွင်း၊ ပြည်ပ စီးပွားရေးလုပ်ငန်းများက ကျင်းပသော အခမ်းအနားများကို အစိုးရအဖွဲ့ဝင်များ မတက်ရောက်ရန် နိုင်ငံတော်သမ္မတရုံးက ညွှန်ကြားချက် ထုတ်ပြန်လိုက်ခြင်းနှင့်ပတ်သက်၍ အဆိုး၊ အကောင်း ထောက်ခံ၊ ဝေဖန်မှုများ ထွက်ပေါ်လာသည်။

နိုင်ငံတော်သမ္မတသစ်အဖြစ် ဦးဝင်းမြင့် လွှဲပြောင်းတာဝန်ယူပြီးချိန်မှစ၍ အဂတိလိုက်စားမှုများကို အရှိန်မြှင့် တိုက်ဖျက်မည်ဖြစ်ကြောင်း ၎င်း၏နိုင်ငံတော် အခြေပြမိန့်ခွန်းတွင် ထည့်သွင်းပြောကြားခဲ့ပြီးနောက် အစိုးရအဖွဲ့ဝင်များကို လက်တွေ့ ကြပ်မတ်သည့်သဘောဟု ဆိုနိုင်သည်။

အတိတ်ကာလများကလည်း အစိုးရအဖွဲ့ အကြီးအကဲအချို့ အခမ်းအနား တက်ရောက်ခဲ့သည့် အထောက်အထားများကိုအသုံးချကာ အများပြည်သူ၏ ယုံကြည်စိတ်ချမှုကိုရယူပြီး လိမ်လည်သွားခဲ့ခြင်းများ၊ တည်ဆဲဥပဒေနှင့် မလွတ်ကင်းသော လုပ်ငန်းဆောင်ရွက်မှုများ၊ တရားဝင် အခွန်ထမ်းဆောင်ရန် ရှောင်ရှားမှုများ ရှိခဲ့ပြီးဖြစ်သည်။

ထို့အပြင် အခမ်းအနား တက်ရောက်၊ ဖွင့်လှစ်ပေးသည့်အတွက် တန်ဖိုးကြီးမားသည့် လက်ဆောင်ပဏ္ဏာ ပေးအပ်သည့် အလေ့အထပင် ရှိခဲ့ခြင်းကြောင့် အခမ်းအနားတိုင်းလိုလိုတွင် တက်ရောက် ဖဲကြိုးဖြတ်ပေးခဲ့သည့် အစိုးရအကြီးအကဲအချို့ကို နိုင်ငံပိုင် အစိုးရအာဘော်မီဒီယာများမှတစ်ဆင့် ပြည်သူလူထုက မတွေ့ချင်၊ မမြင်ချင်အဆုံး ဖြစ်ခဲ့ရသည်။ 

လက်ရှိ NLD အစိုးရလက်ထက်တွင်ပင် အချို့သော တိုင်းဒေသကြီး အစိုးရအဖွဲ့ အကြီးအကဲအချို့ အခမ်းအနား ခုံမင်သည့်သဘော တွေ့မြင်လာရခြင်း၊ အခမ်းအနားများ တက်ရောက်ရာတွင်လည်း အဓိက၊ သာမည မခွဲခြားနိုင်သောကြောင့် ဝေဖန်ပြစ်တင်သံများ ဆူညံလာခဲ့ခြင်း၊ ထိုသို့ ဝေဖန်ခံရခြင်းသည် ဆက်စပ်နေသော အာဏာရပါတီ၏ ဂုဏ်သိက္ခာကိုပါ ထိခိုက်လာခြင်းတို့ကြောင့် ယခုကဲ့သို့ ပိတ်ပင်လိုက်ခြင်းမှာ ပါတီနှင့် အစိုးရအဖွဲ့ဝင်များအတွက် ကောင်းသည်ဟု ဆိုနိုင်သည်။

သို့သော် အချို့သော အခမ်းအနားများသည် စီးပွားရေးလုပ်ငန်းဟု ဆိုသော်ငြား အများအတွက် အကျိုးရှိစေသော ဝန်ဆောင်မှုလုပ်ငန်းများဖြစ်ခြင်း၊ အစဉ်အလာကောင်း၍ သိက္ခာသမာဓိရှိသော စီးပွားရေးလုပ်ငန်းဖြစ်ခြင်း၊ အစိုးရအဖွဲ့၏ လုပ်ငန်းစီမံကိန်းများကို တစ်နည်းတစ်ဖုံ အထောက်အကူပြုခြင်း၊ ပုဂ္ဂိုလ်ရေး များစွာ ရင်းနှီးခင်မင်ခြင်း စသည့် အကြောင်းများရှိနေသောကြောင့် ထိုသို့သော စီးပွားရေးလုပ်ငန်းများထံမှ အကူအညီ လိုအပ်လာချိန်မျိုးတွင် တောင်းခံရယူရန် အခက်အခဲ ရှိနိုင်ပေသည်။

စင်စစ်အားဖြင့် အကျင့်ပျက်ခြစားမှုသည် စီးပွားရေး လုပ်ငန်းများက ကျင်းပသော အခမ်းအနားများကို တက်ခြင်း၊ မတက်ခြင်းထက် သက်ဆိုင်ရာ အစိုးရအဖွဲ့ဝင်များ တစ်ဦးချင်း၏ ရိုးသားဖြောင့်မတ်မှု၊ ပရော်ဖက်ရှင်နယ်ပီသမှုဆိုင်ရာ အရည်အချင်းများအပေါ်တွင်သာ မူတည်သည်။

နိုင်ငံတော် သမ္မတရုံးအနေနှင့် မိမိ၏အစိုးရအဖွဲ့ဝင်များကို အသေးစိတ် လိုက်လံထိန်းကျောင်းနေမည့်အစား သက်ဆိုင်ရာ တာဝန်အသီးသီးကို မခန့်အပ်မီကပင် ပေးအပ်မည့်တာဝန်၊ လုပ်ပိုင်ခွင့်နှင့် ထိုက်တန်သူများဖြစ်စေရန် ကြိုတင်၍ အရည်အချင်း စစ်ဆေးခြင်း အတည်ပြုထားရန် တစ်နည်းအားဖြင့် လူမှန်၊ နေရာမှန် ခန့်ထားတာဝန်ပေးရန်နှင့် အကျင့်ပျက်ခြစားမှု ပေါ်ပေါက်ပါက ကျောသား၊ ရင်သား မခွဲခြားဘဲ တင်းကျပ်ထိရောက်စွာ အရေးယူ အပြစ်ပေးရန်လိုပေသည်။

အထူးသဖြင့် ပြဿနာတစ်ခုခု ပေါ်ပေါက်လာတိုင်း စည်းကမ်းချက်တစ်ခုစီ ထုတ်ပြန်ညွှန်ကြားနေရပါက ဆန်စဉ်ရာ ကျည်ပွေ့လိုက်သကဲ့သို့ ဖြစ်နေပြီး အရေးမကြီးလှသည့် အသေးအဖွဲ၊ သာမညကိစ္စလေးပေါင်း များစွာဖြင့် အချိန်ကုန်သွားကာ အရေးကြီးလှသည့် အဓိက ကြီးကြီးမားမား ပြဿနာများတွင် လစ်ဟာသွားနိုင်ကြောင်း အကြံပြု ထောက်ပြလိုပေသည်။

အယ်ဒီတာ (၂၁-၆-၂၀၁၈)