News

POST TYPE

EDITORIAL

လူ့အခွင့်အရေးကောင်စီမှ အမေရိကန် နုတ်ထွက်ခြင်းနှင့် အဆိုးထဲမှ အကောင်း (Daily, Vol-6/No-61)
20-Jun-2018

လူ့အခွင့်အရေးနှင့် ပတ်သက်လျှင် ကမ္ဘာပေါ်တွင် အသံအကျယ်ဆုံးဟုဆိုရမည့် အမေရိကန် ပြည်ထောင်စုအနေနှင့် ကုလသမဂ္ဂ လူ့အခွင့်အရေး ကောင်စီမှ နုတ်ထွက်သွားခဲ့သော သတင်းမှာ ယခုရက်ပိုင်းအတွင်း လူပြော အများဆုံး သတင်းတစ်ပုဒ်ဖြစ်ခဲ့သည်။

ယင်းသို့ နုတ်ထွက်မည်ဖြစ်ကြောင်း ယမန်နှစ်ကပင် စကားရိပ်သန်းထားပြီးဖြစ်သော်လည်း လတ်တလောအားဖြင့် ၎င်းတို့၏ အစဉ်အလာ မဟာမိတ် အစ္စရေးနိုင်ငံအပေါ် လူ့အခွင့်အရေး ကောင်စီက ဖိအားပေး ပြစ်တင်လာခြင်းနှင့် မက္ကဆီကိုနိုင်ငံမှ တရားမဝင် ရောက်ရှိလာသူများအပေါ် အမေရိကန် အစိုးရ၏ လျစ်လျူရှု ပစ်ပယ်ထားမှုနှင့်ပတ်သက်၍ လူ့အခွင့်အရေး ကောင်စီက ပြစ်တင်ဝေဖန်လိုက်ခြင်းက နုတ်ထွက်ရန် အဓိကတွန်းအား ဖြစ်သွားခဲ့သည်။

ကုလသမဂ္ဂသည် ယခုနောက်ပိုင်း ကမ္ဘာ့နိုင်ငံ အသီးသီး၏ လေးစားယုံကြည် အားကိုးထိုက်သော နိုင်ငံတကာ အဖွဲ့အစည်းအဖြစ်မှ စစ်အင်အားကြီး၊ ဓနအင်အားကြီး နိုင်ငံကြီးအချို့၏ ဩဇာလွှမ်းမိုးမှုအောက်တွင် ၎င်းတို့ကြိုးဆွဲရာကနေသော အဖွဲ့အဖြစ် ဝေဖန်မှုများဖြင့် ရင်ဆိုင်နေရပြီဖြစ်သည်။

အထူးသဖြင့် ကုလသမဂ္ဂကို ငွေကြေး အမြောက်အမြား လှူဒါန်းကာ ၎င်းတို့လိုလားသော ဦးတည်ချက်၊ ရည်ရွယ်ချက်များ ပုံဖော်ကာ ၎င်းတို့တွင် ရှိနေသော အားနည်းချက်များကို ဖုံးကွယ်ရန် သို့မဟုတ် ၎င်းတို့၏ အားနည်းချက်များကို အများက အာရုံစိုက်မလာစေရေးအတွက် လမ်းလွှဲရန် ဒီမိုကရေစီ မဟုတ်သော နိုင်ငံအချို့က ကြိုးစားနေကြောင်း ရှုမြင်သုံးသပ်မှုများ ရှိလာသည်။

ထို့ကြောင့်ပင် လူ့အခွင့်အရေး ကောင်စီဝင်နိုင်ငံတို့သည် ၎င်းတို့နိုင်ငံအတွင်းရှိ မိရိုးဖလာကဲ့သို့ ဖြစ်နေသော လူ့အခွင့်အရေး ချိုးဖောက်မှု ပြဿနာများထက် အခြားနိုင်ငံများတွင် ပြဿနာဖန်တီးခြင်း၊ ယင်းပြဿနာများကို ငွေကြေး အင်အားသုံးကာ ပိုကြီးသွားစေရန် လွန်ကဲစွာ ဝါဒဖြန့်ခြင်းတို့ လုပ်ဆောင်နေသည်ဟု ပြောဆိုရေးသားမှုများ ရှိလာခြင်းဖြစ်သည်။

ဆော်ဒီအာရေးဗီးယားနိုင်ငံသည် လူ့အခွင့်အရေး ကောင်စီတွင် ပါဝင်ခွင့်ရရှိစေရန် ဗြိတိန်အစိုးရနှင့် လျှို့ဝှက် ညှိနှိုင်းခဲ့ကြောင်း ကြေးနန်း သတင်းပေါက်ကြားမှုကို နာမည်ကျော် Financial Times သတင်းစာကြီးတွင် ဖော်ပြခဲ့ခြင်းက အဓိက သက်သေဖြစ်သည်။

ကုလသမဂ္ဂဆိုင်ရာ အမေရိကန် သံအမတ်ကြီး နစ်ကီဟာလေက တရားဝင် ထုတ်ဖော်ပြောဆိုသော နုတ်ထွက်ရသည့်အကြောင်း ရှင်းလင်းချက်တွင် “ကမ္ဘာ့ လူသားမဆန်ဆုံးသော အုပ်စိုးမှုပုံစံတွေဟာ စောင့်ကြည့် ထိန်းချုပ်မှုတွေအောက်ကနေ ဆက်ပြီး လွတ်ထွက်နေပါတယ်။ သူတို့ထဲမှာရှိနေတဲ့ လူ့အခွင့်အရေး ချိုးဖောက်သူတွေထံကနေ အာရုံလွှဲပြောင်းနိုင်ဖို့ ကောင်စီဝင်တွေဟာ နိုင်ငံရေးအရ ဘက်လိုက်မှုတွေ၊ လူ့အခွင့်အရေး အပေါင်းလက္ခဏာ ဆောင်တဲ့နိုင်ငံတွေကို သားကောင်အဖြစ် အသုံးပြုမှုတွေ ရှိနေပါတယ်”ဟု ထည့်သွင်းပြောဆိုသွားခဲ့သည်။

သို့သော် အမေရိကန် ပြည်ထောင်စုသည်ပင်လျှင် အစောပိုင်းကာလများက ၎င်းတို့ မလိုလားသောအုပ်စုနှင့် နိုင်ငံအချို့အပေါ် ကုလသမဂ္ဂခေါင်းစဉ်အောက်မှသော်လည်းကောင်း၊ ကုလသမဂ္ဂ ဆုံးဖြတ်ချက်ကို လျစ်လျူရှု၍သော်လည်းကောင်း ပြစ်တင်ရှုတ်ချခြင်း၊ ပိတ်ဆို့ အရေးယူခြင်း၊ စစ်အင်အားသုံး ဖြေရှင်းခြင်းတို့ ဆောင်ရွက်ခဲ့သော သာဓက ရှိခဲ့ပြီးဖြစ်သည်။

မြန်မာနိုင်ငံ ရခိုင်ပြည်နယ်တွင် ဖြစ်ပေါ်နေသော အရေးကိစ္စနှင့်ပတ်သက်၍လည်း ဘင်္ဂလားဒေ့ရှ် အပါအဝင် အိုအိုင်စီနိုင်ငံများ၏ အသံတစ်ခုတည်းကို အလေးထားခဲ့ပြီး မြန်မာအစိုးရ၊ တပ်မတော်နှင့် ရခိုင်ဒေသခံများက တစ်ဖက်သတ် အဆိုးဖြစ်သယောင် ၎င်းတို့၏ အားကောင်းသော မီဒီယာများမှတစ်ဆင့် ဖိအားပေးခဲ့သည်။

ယနေ့ ၎င်းတို့နိုင်ငံတွင်းမှ တရားမဝင် နယ်စပ်ဖြတ်ကျော် ဝင်ရောက်လာသူများ အရေးကိစ္စနှင့်ပတ်သက်၍သော်လည်းကောင်း၊ လူဖြူ၊ လူမည်း ခွဲခြားမှု အပါအဝင် အခြားသော လူ့အခွင့်အရေးဆိုင်ရာ ပြဿနာအချို့ကို မီးမောင်းထိုးလာသောအခါတွင် ဆတ်ဆတ်ထိမခံဖြစ်ကာ လူ့အခွင့်အရေးကောင်စီမှ နုတ်ထွက်သည့်အဆင့်အထိ ဖြစ်လာခဲ့ခြင်းမှာ တရားကျစရာ ကောင်းလှသည်။

မည်သို့ပင်ဖြစ်စေ အမေရိကန်တို့ လူ့အခွင့်အရေး ကောင်စီမှ နုတ်ထွက်လိုက်ခြင်းသည် လူ့အခွင့်အရေးဆိုင်ရာ ကိစ္စရပ်များအတွက် စိုးရိမ်စရာဟု ဆိုနိုင်လင့်ကစား လူ့အခွင့်အရေး ကောင်စီ၏ တရားမျှတမှုနှင့် မည်သည့်နိုင်ငံများက ကြီးစိုးနေရာယူထားကြောင်း တစ်နည်းတစ်ဖုံ ကမ္ဘာကို ပွင့်ပွင့်လင်းလင်း အသိပေးလိုက်သည့်သဘော ဖြစ်သည့်အတွက် ရခိုင်ပြည်နယ်နှင့်ပတ်သက်၍ လူ့အခွင့်အရေးကောင်စီ၏ သဘောထားများအပေါ်တွင်လည်း ကမ္ဘာ့အသိုင်းအဝိုင်းက သံသယ ဝင်လာစရာရှိခြင်းမှာ အဆိုးထဲမှ အကောင်းဟု ဆိုရမည်ဖြစ်ကြောင်း သတိပြုမိစေလိုရင်းဖြစ်သည်။

အယ်ဒီတာ (၂၀-၆-၂၀၁၈)