News

POST TYPE

EDITORIAL

လူလုပ်ချိန်ကိုက်ဗုံးများကို သတိထားပါ (Daily, Vol-6/No-49)
04-Jun-2018

ဧရာဝတီတိုင်း၊ အင်္ဂပူမြို့နယ်အတွင်းရှိ ရေတားတမံပြိုကျမှုကြောင့် ယင်းပတ်ဝန်းကျင်ကျေးရွာများ၊ စိုက်ခင်းများ ရေလွှမ်းမိုးမှုနှင့် ကြုံတွေ့နေရကြောင်း သတင်းများ ထွက်ပေါ်လာပြီးနောက် မြန်မာနိုင်ငံတစ်ဝန်းတွင် များမကြာမီ ကာလအတွင်း အဆိုပါဖြစ်ရပ်များ ဆင့်ကဲဖြစ်ပေါ်လာနိုင်ခြေရှိသဖြင့် အထူးသတိထားရန် လိုပေမည်။

ထို့အတူမကြာသေးခင်က ပြတ်ကျသွားသော မြောင်းမြကြိုးတံတားနှင့် တည်ဆောက်ထားသည့်သက်တမ်း ဆယ်စုနှစ် နှစ်ခုဝန်းကျင်သာ ရှိနေသေးသော ရန်ကုန်-သန်လျင် တံတား၏ ကြံ့ခိုင်ရေး အခြေအနေတို့မှာလည်း နိုင်ငံတစ်ဝန်းရှိ အလားတူတံတားပေါင်းများစွာ၏ ကြံ့ခိုင်ရေးကို ပြင်းပြင်းထန်ထန်အသံပေး လှုပ်နှိုးလိုက်သကဲ့သို့ ဖြစ်ခဲ့သည်။

ယခင့်ယခင် အစိုးရများလက်ထက်က ဒေသပတ်ဝန်းကျင်၊ ရေ၊ မြေ၊ ရာသီဥတု၊ စိုက်ဧက၊ စိုက်ပျိုးသီးနှံ၊ ရေလိုအပ်ချက်၊ ကူးသန်းသွားလာမှု၊ စီးပွားရေးအရ တွက်ခြေကိုက်မှု စသဖြင့် စနစ်တကျ ကွင်းဆင်း သုတေသန ပြုထားသော အချက်အလက်များကို အခြေပြု၍ တည်ဆောက်ထားခြင်း မဟုတ်သော လမ်း၊ တံတား၊ ဆည်၊ မြောင်း၊ တာ၊ တမံများ ရှိနေပေသည်။

ထို့အပြင် နိုင်ငံတကာ စံနှုန်းနှင့် ဒေသတွင်း စံနှုန်းများ မဆိုထားနှင့် နိုင်ငံတော်ရှိ ပရော်ဖက်ရှင်နယ်များ၊ ပညာရှင်များက ကျင့်ဝတ်အရ၊ သီအိုရီအရ သတ်မှတ်ထားသော စံနှုန်းများနှင့်ပင် မကိုက်ညီဘဲ အကျင့်ပျက်ခြစားမှု များစွာကြောင့် အရည်အသွေး ညံ့ဖျင်းလှသဖြင့် ၁၉၈၈ ခုနှစ်နောက်ပိုင်း တည်ဆောက်ထားခဲ့သော အခြေခံ အဆောက်အဦများ၏ နောက်ဆက်တွဲ ပြဿနာများမှာ တစ်နိုင်ငံလုံး အတိုင်းအတာနှင့်ပင် များစွာ စိုးရိမ်ဖွယ် ရှိပေသည်။

မည်သည့်နိုင်ငံတွင်မဆို သက်ဆိုင်ရာ နိုင်ငံအသီးသီး၏ အဆင့်အတန်းနှင့် လျော်ညီသော စံချိန်၊ စံညွှန်းများ သတ်မှတ်ထားပြီး မည်သည့်အခြေခံ အဆောက်အဦကိုမဆို ယင်းစံနှုန်းများဖြင့် တိုက်ဆိုင်စစ်ဆေးပြီး စံနှုန်းပြည့်မီမှသာ တည်ဆောက်ခွင့်ပြုကြသည်။ မြန်မာနိုင်ငံတွင်မူ စံချိန်၊ စံညွှန်းဆိုသော စကားလုံးကိုပင် ဆယ်စုနှစ်ပေါင်း များစွာ မေ့လျော့ထားခဲ့ပြီး စံနှုန်းမမီခြင်း၏ ဆိုးကျိုးများကို ပြည်သူများကသာ ခါးစည်းခံစားနေကြရသည်။

စံချိန်၊ စံညွှန်းကိုနားလည်ပြီး ပရော်ဖက်ရှင်နယ်သိက္ခာထိန်းသော အရပ်သားပညာရှင်များ ရှိနေလင့်ကစား သတ်မှတ်ရက်ထက်စောပြီးရေး၊ အထိမ်းအမှတ်နေ့များနှင့် တိုက်ဆိုင်၍ ဖွင့်လှစ်နိုင်ရေး၊ ကိုယ်ကျိုးစီးပွား ဖြည့်တင်းရေးတို့အတွက် အာဏာ၊ အမိန့်၊ ညွှန်ကြားချက်များဖြင့် ဖိနှိပ် ဖုံးလွှမ်းလိုက်သောအခါ အဆုံးတွင် အနာဂတ် မြန်မာနိုင်ငံသား မျိုးဆက်သစ်များနှင့် သက်ရှိ၊ သက်မဲ့ ပတ်ဝန်းကျင်တစ်ခုလုံးအတွက် ကြောက်စရာ ကောင်းသော လူလုပ်အချိန်ကိုက်ဗုံးများသဖွယ် ဖြစ်လာခဲ့သည်။

ကမ္ဘာကြီး ပူနွေးလာခြင်းသည် ကမ္ဘာပေါ်ရှိ လူသားများ၏ အတ္တ၊ လောဘတို့ကြောင့် သဘာဝ ပတ်ဝန်းကျင် ပျက်စီးယိုယွင်းမှု၏ နောက်ဆက်တွဲဟုဆိုလျှင် ကမ္ဘာပေါ်တွင်တည်ရှိသော မြန်မာနိုင်ငံ ပူနွေးလာခြင်းသည်လည်း မြန်မာနိုင်ငံသားတို့၏ ကိုယ်ကျိုးသက်သက်အတ္တ၊ အလိုကြီးကြီး လောဘ၊ မသိမှုမောဟတို့ကြောင့်ဟု ဆိုရမည်ဖြစ်သည်။

တစ်နည်းဆိုရသော် ပညာဉာဏ်၊ ဆင်ခြင်တုံတရားနည်းသော၊ အတ္တ ကိုယ်ကျိုး များသော၊ ပြည်သူကို မထောက်ညှာ၊ မငဲ့ကွက်သော အုပ်ချုပ်စီမံခန့်ခွဲသူများ၏ နိုင်ငံတစ်ဝန်း အရည်အသွေး နိမ့်ကျသော အခြေခံ အဆောက်အဦများ တည်ဆောက်ခဲ့ခြင်းသည် အကျိုးထက် အဆိုးသာ ဖြစ်နိုင်ခြေများသောကြောင့် အနာဂတ် လူ့အဖွဲ့အစည်းကို အချိန်ကိုက်ဗုံးများ ချထားခဲ့ခြင်းနှင့် အလားသဏ္ဌာန် တူပေသည်။

ယင်းအချက်ကို မကြာသေးခင်က ပြတ်ကျ၊ ကျိုးပေါက်သွားခဲ့သော မြောင်းမြကြိုးတံတား၊ မြန်အောင်နှင့် အင်္ဂပူမြို့နယ်တို့မှ ရေထိန်းတမံတို့က သတိပေး ခေါင်းလောင်း ထိုးလိုက်ခြင်းဖြစ်သည်။ ယင်းသတိပေးချက်ကို အလေးအနက် သတိပြုဆင်ခြင်ကာ နိုင်ငံတစ်ဝန်းရှိ အခြေခံအဆောက်အဦများ အားလုံးကို ပြည်တွင်း၊ ပြည်ပ ပညာရှင်များပါဝင်သော စံချိန်စံညွှန်း စစ်ဆေးရေးအဖွဲ့ဖြင့် လွတ်လွတ်လွတ်လပ်လပ်၊ အမှီအခိုကင်းကင်း တိုင်းတာစစ်ဆေးခြင်း၊ အချိန်မီ ပြင်ဆင်ထိန်းသိမ်းခြင်းတို့ဖြင့် အချိန်ကိုက်ဗုံးများ မပေါက်ကွဲစေရန် ကြိုတင်ကာကွယ်ပါမည့်အကြောင်း အထူးတိုက်တွန်း နှိုးဆော်အပ်ပေသည်။

အယ်ဒီတာ (၄-၆-၂၀၁၈)