News

POST TYPE

EDITORIAL

ပန်းတိုင်နှင့် လျော်ညီစွာ ပြုပြင်ပြောင်းလဲပါ (Daily, Vol-6/No-36)
22-May-2018

မြန်မာနိုင်ငံတွင် ယနေ့ ဖြစ်ပေါ်နေသော နိုင်ငံရေးပြဿနာများကို လေ့လာကြည့်လျှင် အဓိက တာဝန်ရှိ သက်ဆိုင်သူ Stakeholder များအကြား နားလည်မှု လွဲချော်ခြင်းနှင့် ပြဿနာများကို မတူညီသော ရှုထောင့်များမှ ချဉ်းကပ်ခြင်းဆိုသော အချက်နှစ်ချက်ကို တွေ့ရသည်။

ပြဿနာတစ်ခုကြုံတိုင်း ယင်းပြဿနာနှင့် ပတ်သက်၍ အဓိက တာဝန်ရှိ သက်ဆိုင်သူများ အချင်းချင်းအကြား တစ်ဦးအကြောင်းတစ်ဦး ကောင်းစွာ နားမလည်ခြင်းက အဓိကအချက်ဖြစ်သည်။ နားလည်စေရန်လည်း ကြိုတင်လေ့လာထားခြင်းမရှိပေ။ 

ထို့အပြင် စနစ်ဆိုးကို ဖြတ်သန်းလာခဲ့သော ကာလတစ်လျှောက် တစ်ဖက်နှင့်တစ်ဖက် ပုံသေကားကျဆန်သော အထိုင်တစ်ခုစီမှကြည့်ကာ စိတ်ခံစားချက်များဖြင့် မိမိတို့ဘာသာ အဓိပ္ပာယ် ကောက်ယူပုံဖော်ထားတတ်ကြသည်။

အကျိုးဆက်မှာ တစ်ဖက်က မည်သို့သော အပြုသဘော ပြောဆို၊ လုပ်ဆောင်မှု ဖြစ်စေကာမူ အခြားတစ်ဖက်က အပျက်သဘော၊ အနုတ်လက္ခဏာသဘော အဓိပ္ပာယ် ကောက်ယူတတ်ကြခြင်းဖြစ်သည်။

ပါဝါအမာကို အားပြုထားသူဖြစ်စေ၊ ပါဝါအပျော့ကို ကိုယ်စားပြုသူဖြစ်စေ မိမိတို့ အသိုင်းအဝိုင်း၏ အရိုးစွဲနေသော အမြင်များ၊ ရှုထောင့်များ၊ သင်ကြားမှုများဖြင့် ပြဿနာတိုင်းကို ချဉ်းကပ်လေ့ရှိခြင်းကြောင့် ပြေလည်မှုမရဘဲ ဖြစ်နေခြင်းမှာ ဒုတိယအချက်ဖြစ်သည်။

ဒီမိုကရေစီ အလေ့အထ၊ ဒီမိုကရေစီ ပတ်ဝန်းကျင်မျိုးနှင့် ရာစုနှစ်ဝက်ကျော် ကင်းကွာလာခဲ့သော မြန်မာလူ့အဖွဲ့အစည်းတွင် ပြဿနာများကို ဒီမိုကရေစီ သဘော သဘာဝများနှင့် ရှုမြင်၊ ချဉ်းကပ်၊ သုံးသပ်ခြင်း အားနည်းခဲ့သည်။ 

အာဏာရှင်စနစ်အောက်တွင် အနေကြာခဲ့သူများ ဖြစ်သောကြောင့် အာဏာရှင်စနစ်၏ စီမံခန့်ခွဲမှု အလွဲများ၊ အမိန့်ပေး၊ အမိန့်ခံ ဓလေ့စရိုက်များ၊ အလွန်အကျူး မြှောက်ပင့်ချီးပမှု၊ ရန် ငါ စည်းခွဲခြားမှုများ လူတိုင်းနီးပါး အပေါ်တွင် တစ်နည်းမဟုတ် တစ်နည်း ဩဇာသက်ရောက်မှု ရှိနေပေသည်။

မြန်မာလူ့အဖွဲ့အစည်းအတွက် အာဏာဆိုသည်မှာ ထိတွေ့ ကိုင်တွယ်လိုက်သည်နှင့် လောကဓံကို ခံနိုင်ရည်မရှိသော သွင်ပြင်လက္ခဏာများ တွေ့မြင်လာရတတ်သည်။ ထို့ကြောင့် အာဏာကို တစ်လျှောက်လုံးနီးပါး ကိုင်စွဲလာသူများ အာဏာ မစွန့်လွှတ်လိုခြင်းမှာ မထူးဆန်းပေ။

အခြားတစ်ဖက်တွင်လည်း မိမိတို့၏ အတ္တ၊ လိုဘ၊ အကျိုးစီးပွားနှင့် မိမိရပ်တည်နေသော အဖွဲ့အစည်း သို့မဟုတ် “ဘက်”၏ အကျိုး၊ ဂုဏ်သိက္ခာ ရောချကာ မိမိတို့နှင့်မတူသော အခြားအဖွဲ့အစည်းအပေါ် စွပ်စွဲ၊ ပြစ်တင်၊ အပြစ်ပုံချသူများ အဖွဲ့အစည်းတိုင်းတွင် ရှိနေတတ်သည်။

ထိုနည်းတူစွာ မိမိ၏ အရည်အချင်း၊ စွမ်းဆောင်ရည်၊ လေ့လာမှု၊ ကြိုတင် ပြင်ဆင်မှု အားနည်းချက်ကို တစ်ဖက်သားအပေါ် အပြစ်တင်၊ အဆိုးပြောခြင်းဖြင့် ဖုံးကွယ်ရန် ကြိုးစားတတ်သူများလည်း ရှိတတ်သည်။

အများအားဖြင့် ပြဿနာတွင် ပါဝင်ပတ်သက်နေသော တစ်ဖက်ဖက်ကို သို့မဟုတ် မိမိနှင့် ဘက်မတူသော အခြားတစ်ဖက်ကို အပြစ်တင်၊ အဆိုးပြော ကာ အရေးယူ၊ အပြစ်ပေးသော နည်းလမ်းမျိုးဖြင့်သာ ချဉ်းကပ်ဖြေရှင်းလေ့ ရှိတတ်ခြင်းဖြစ်သည်။

ထိုကဲ့သို့ စရိုက်လက္ခာဏာများ၊ ဓလေ့၊ လုပ်ထုံးများသည် စင်စစ်အားဖြင့် ယနေ့ မြန်မာပြည်သူ တစ်ရပ်လုံး သွားချင်၊ ရောက်ချင်သော ပန်းတိုင်နှင့် များစွာ ဆန့်ကျင်နေပေရာ ယင်းတို့ကို လက်တွေ့ကျကျ ပြုပြင်ပြောင်းလဲနိုင်မှသာ ပန်းတိုင်သို့ သွားရမည့် ခရီးအကွာအဝေး လျှော့ချနိုင်ကြောင်း ပြောလိုရင်းဖြစ်သည်။

အယ်ဒီတာ (၃၀-၁-၂၀၁၈)

(လက်ရှိဖြစ်ပေါ်နေသော အခြေအနေနှင့် ကိုက်ညီနေသောကြောင့် ၃၀-၁-၂၀၁၈ နေထုတ် The Voice Daily သတင်းစာတွင်ဖော်ပြခဲ့ပြီးသော အယ်ဒီတာ့အာဘော်ကို ပြန်လည် ဖော်ပြခြင်းဖြစ်ပါသည်။)