News

POST TYPE

EDITORIAL

ပြည်သူ့ဘဏ္ဍာငွေများ မဖြုန်းတီးစေလို (Daily, Vol-6/No-35)
21-May-2018 tagged as

အစိုးရသစ်အဖြစ် စတင် တာဝန်ယူပြီးနောက်ပိုင်း ရန်ကုန်တိုင်းဒေသကြီး အစိုးရအဖွဲ့နှင့် ရန်ကုန်မြို့တော် စည်ပင်သာယာရေး ကော်မတီတို့ သိသာစွာ အလုပ်ကြိုးစားလာခြင်းကို အသိအမှတ်ပြုရမည်ဖြစ်သည်။ သို့သော် ထိုသို့ အလုပ်ကြိုးစားလာခြင်းဖြင့် ရန်ကုန်တိုင်းဒေသကြီးနှင့် ရန်ကုန်မြို့တော်တစ်ဝန်း မည်မျှ တိုးတက်ဖွံ့ဖြိုးလာခဲ့သနည်းဆိုသော မေးခွန်းကိုမူ ရှင်းလင်းပြတ်သားစွာ ဖြေဆိုရန် ခက်ခဲပေလိမ့်မည်။

အကြောင်းမှာ ဆောင်ရွက်အကောင်အထည်ဖော်သော လုပ်ငန်းများ၏ အောင်မြင်တိုးတက်မှု၊ အဆင်မပြေ ညံ့ဖျင်းမှုတို့ကို စနစ်တကျ အကဲဖြတ်သုံးသပ် ပေးနိုင်သည့် လွတ်လပ်သော ပညာရှင်အဖွဲ့အစည်း မရှိသောကြောင့် ရူပဗေဒ သဘောအရ အလုပ်ပြီးမြောက်မှု၊ အောင်မြင်မှု ရှိ မရှိ ပြောရခက်လှသောကြောင့် ဖြစ်သည်။

တစ်ခါတစ်ရံ ရန်ကုန်တိုင်းဒေသကြီး အစိုးရအဖွဲ့ သို့မဟုတ် ဝန်ကြီးချုပ်၏တာဝန်၊ လုပ်ပိုင်ခွင့်များ၊ လက်တွေ့ ဆောင်ရွက်ချက်များနှင့် ရန်ကုန်မြို့တော် စည်ပင်သာယာရေး ကော်မတီ သို့မဟုတ် မြို့တော်ဝန်၏ တာဝန်၊ လုပ်ပိုင်ခွင့်များ၊ လက်တွေ့ဆောင်ရွက်မှုများ ဒွေးရောယှက်တင်ဖြစ်နေသောကြောင့် မည်သူက မည်သည့်တာဝန်ကို အဓိက ထမ်းဆောင်နေကြောင်း၊ မည်သည့်အပိုင်းတွင် တာဝန်ရှိကြောင်း မကွဲပြားတော့ပေ။ 

မြို့တော် စည်ပင်သာယာရေး ကော်မတီအောက်ရှိ ဌာနအသီးသီးအကြားတွင်လည်း သတင်းအချက်အလက် မျှဝေပေးခြင်း၊ လက်ရှိနှင့် ရှေ့ကာလတွင် အကောင်အထည်ဖော် ဆောင်ရွက်နေသည့်၊ ဆောင်ရွက်မည့်လုပ်ငန်းများ အပြန်အလှန် အသိပေး၊ ညှိနှိုင်းဆောင်ရွက်ခြင်းမရှိဘဲ စိတ်ထင်သလို၊ ကစဥ့်ကလျား ဆောင်ရွက်နေသည့်သဘော တွေ့မြင်ရသည်။

ရန်ကုန်မြို့တော်ဧရိယာအတွင်း ယခုတစ်လော တွေ့မြင်ရသည့်မြင်ကွင်းမှာ လမ်းမများ ဘေးတစ်ဖက်တစ်ချက်ရှိ မကြာမတင်ကာလက ကွန်ကရစ်ခင်းထားပြီးသား လမ်းပခုံးများနေရာများကို ပြန်ဖောက်ကာ ရေပိုက်လိုင်းအသစ်များ ချထားနေခြင်းဖြစ်သည်။

လမ်းအတော်များများတွင် နိုင်လွန်ကတ္တရာသားနှင့် ပလက်ဖောင်း-အကြား လွတ်နေသည့်နေရာများကို ကွန်ကရစ်ခင်းသည့် လုပ်ငန်းရော၊ ယင်းနေရာကို ပြန်ဖောက်ကာ ရေပိုက်ထည့်သွင်းခြင်း လုပ်ငန်းပါ စီစဉ်ဆောင်ရွက်နေသည်မှာ ရန်ကုန်မြို့တော် စည်ပင်သာယာရေး ကော်မတီဖြစ်သည်။ 

ရေပိုက်လိုင်းသစ် ချထားရန်အတွက် အသစ်စက်စက်နီးပါး ကွန်ကရစ်ခင်း လမ်းပခုံးများကိုဖောက်၍ မြောင်းတူးနေခြင်းသည် ကွန်ကရစ်ခင်းရာတွင် ကုန်ကျထားသော ငွေကြေး၊ အချိန်၊ လုပ်အားများ အချည်းနှီး ဖြစ်သွားစေခြင်းကို မြို့တော်စည်ပင်မှ ယင်းစီမံကိန်းနှင့် ပတ်သက်သည့် တာဝန်ရှိသူများ မသိရှိခြင်းမှာ များစွာ အံ့အားသင့်ဖွယ် ကောင်းလှသည်။

ပုံမှန်အတိုင်းဆိုပါက ရေပိုက်လိုင်းချထားမှုကို ကွန်ကရစ်မခင်းခင်ကပင် သို့မဟုတ် ကွန်ကရစ်ခင်းလုပ်ငန်းနှင့် အတူတွဲဖက်၍ လုပ်ကိုင်ရန် သက်ဆိုင်ရာ စည်ပင်ဌာန အချင်းချင်းအကြား ကြိုတင်အသိပေး၊ ညှိနှိုင်း စီစဉ်ဆောင်ရွက်ရမည်ဖြစ်သည်။ မြို့တော်စည်ပင်သာယာရေး ကော်မတီရှိ သက်ဆိုင်ရာ ဌာနမှူးများ၊ အင်ဂျင်နီယာများ၊ လုပ်ငန်းခွင် ကြီးကြပ်သူများ၏ ယခုကဲ့သို့ အစီအစဉ်မကျ၊ စည်းစနစ်မရှိ လုပ်ငန်းဆောင်ရွက်မှုသည် မြို့တော်စည်ပင်ကို စီမံခန့်ခွဲနေသူများ၏ အရည်အချင်း၊ အဆင့်အတန်းနှင့် တိုက်ရိုက် အချိုးကျသည်။

သာမန် စဉ်းစားကြည့်လျှင်ပင် များစွာရိုးစင်းပြီး များစွာ ရှင်းလင်းလှသည့် လုပ်ငန်းမျိုးကိုပင် ကုန်ကျစရိတ်ပိုများ၊ အချိန်ပိုကုန်၊ လူပိုပင်ပန်းကာ ပြီးစီးပြီးသား လုပ်ငန်းများ အချည်းနှီးဖြစ်သွားစေသည့် နည်းလမ်းဖြင့် အငြင်းပွားဖွယ် ဆောင်ရွက်နေခြင်းမှာ များစွာသံသယဖြစ်စရာ ကောင်းလှသည်။ 

မြို့တော် စည်ပင်သာယာရေး ကော်မတီက အကောင်အထည်ဖော် ဆောင်ရွက်နေသော မြို့တော်သာယာလှပရေး လုပ်ငန်းများ အားလုံး၏ ကုန်ကျစရိတ်မှာ မြို့တော်နေ ပြည်သူလူထုထံမှ ခေါင်းစဉ်မျိုးစုံဖြင့် ကောက်ခံထားသော အခွန်ငွေများ တစ်နည်းအားဖြင့် ပြည်သူ့ဘဏ္ဍာငွေများဖြင့် ကျခံသုံးစွဲနေခြင်းဖြစ်ရာ ထိုသို့ အချည်းနှီးဖြစ်စေသော လုပ်ငန်းဆောင်ရွက်မှုသည် တစ်နည်းအားဖြင့် ပြည်သူလူထုကို မထေမဲ့မြင် ပြုသည့်သဘော သက်ရောက်နေပေသည်။ 

စင်စစ်အားဖြင့် မြို့တော် စည်ပင်သာယာရေး ကော်မတီ၏ အရည်အချင်းနှင့် စွမ်းဆောင်ရည်သည် မြို့တော်ဝန်၏ အရည်အချင်းနှင့် တိုက်ရိုက် အချိုးကျသည့်အပြင် မြို့တော်ဝန်ကို အဆိုပြုတင်ပြသော တိုင်းဒေသကြီးအစိုးရအဖွဲ့ ဝန်ကြီးချုပ်၊ ယင်းအဆိုပြုတင်ပြသည်ကို လူမှန်၊ နေရာမှန် ဟုတ် မဟုတ် မစုံစမ်း၊ မမေးမြန်းဘဲ ခန့်ထားတာဝန်ပေးသော နိုင်ငံတော်သမ္မတ ဦးဆောင်သော အစိုးရအဖွဲ့၊ ဖွဲ့စည်းပုံ အခြေခံဥပဒေက ဒေသဆိုင်ရာ လွှတ်တော်ကို လုပ်ပိုင်ခွင့် ပေးထားသော်ငြား ဗဟိုချုပ်ကိုင်မှု ကဲနေသေးသော စည်ပင်သာယာဥပဒေကို ဒီမိုကရေစီစနစ်နှင့် လျော်ညီစေရန် မပြင်ဆင်နိုင်သော လွှတ်တော်တို့၏ အားနည်းချက်နှင့် ဒီမိုကရေစီမဆန်မှုတို့ကို မီးမောင်းထိုးပြသကဲ့သို့ ဖြစ်နေကြောင်း သိစေလိုရင်းဖြစ်သည်။

အယ်ဒီတာ (၂၁-၅-၂၀၁၈)

  • TAGS