News

POST TYPE

EDITORIAL

မြေစာပင် ပြည်သူများကို စာနာထောက်ထားပါ (Daily, Vol-6/No-32)
17-May-2018 tagged as

မည်သည့်စစ်ပွဲမဆို၊ မည်သည့်ဘက်က စတင်သည့် စစ်ပွဲမဆို နစ်နာကြသည်မှာ လက်တွေ့တိုက်ပွဲဝင်နေကြသည့် နှစ်ဖက်စစ်သည်များနှင့် မြေစာပင် ဒေသခံပြည်သူများ ဖြစ်သည်။

ကမ္ဘာပေါ်တွင် ဖြစ်ပွားသည့်စစ်ပွဲများကို ပြန်လေ့လာကြည့်ပါက လူမျိုးရေး၊ ဘာသာရေး စသည့် ခေါင်းစဉ်အမျိုးမျိုး တပ်ထားစေကာမူ များသောအားဖြင့် ထုတ်ဖော်ကြေညာလေ့မရှိသည့် အကျိုးစီးပွားကသာ အဓိက အကြောင်းအရင်းဖြစ်သည်။

အကျိုးစီးပွားဟု ဆိုရာတွင်လည်း သက်ဆိုင်ရာ နိုင်ငံနှင့်နိုင်ငံသားများ အကျိုးထက် စစ်ခေါင်းဆောင်များ၊ အာဏာရှင်များ၊ နိုင်ငံရေးကို လွှမ်းမိုးချုပ်ကိုင်ထားသော စီးပွားရေး လုပ်ငန်းကြီးများ၏ ကိုယ်ကျိုးစီးပွားကသာ အဓိကနေရာတွင် ရှိနေပေသည်။

ယနေ့ ကမ္ဘာ့နေရာအသီးသီးတွင် အကြောင်းပြချက် အမျိုးမျိုးဖြင့် ဖြစ်ပွားနေသော လက်နက်ကိုင် ပဋိပက္ခများ နောက်ကွယ်တွင် ကြီးစွာ အကျိုးဖြစ်ထွန်းနေသည်မှာ လက်နက်ကုန်သည်ကြီးများနှင့် စစ်လက်နက်ပစ္စည်း ထုတ်လုပ်သော ကုမ္ပဏီကြီးများသာဖြစ်သည်။

မည်သည့်နေရာတွင်မဆို ဖြစ်ပွားနေသော စစ်ပွဲများအတွင်း အသက်နှင့်ရင်း၍ တိုက်ပွဲဝင်နေကြသူများမှာ အစစ အရာရာ များစွာ ဆင်းရဲချို့တဲ့ လှသော စစ်သည်ရဲဘော်များ ဖြစ်သည်။ ထို့နောက် အိုးပစ်၊ အိမ်ပစ်အသက်လု ထွက်ပြေးတိမ်းရှောင်နေကြရသူ ဒုက္ခသည်ပြည်သူများက စစ်ပွဲများ၏ မြေစာပင်များဖြစ်ကြသည်။

စစ်ပွဲများအတွင်း အသုံးပြုလိုက်သော လက်နက်ကျည်ဆန်များကို နိုင်ငံတော်ပိုင် သို့မဟုတ် ပြည်သူ့ဘဏ္ဍာငွေများဖြင့် ဝယ်ယူရသည့်အတွက် ပြည်သူများ၏ဘဝမှာ မိမိတို့နှင့် သက်ဆိုင်သော ဘဏ္ဍာငွေဖြင့် ဝယ်ယူထားသော လက်နက်များကြောင့် ဒုက္ခရောက်နေရခြင်းများမှာ အလွန်ပင် တရားမျှတမှု မရှိသည့် အခြေအနေဖြစ်သည်။

နိုင်ငံကြီးအချို့အကြား မိမိတို့ ဩဇာအာဏာရပ်ဝန်း အပြိုင်ထူထောင်ရာတွင်လည်း နိုင်ငံငယ်များကို မိမိဘက်သား ဖြစ်လာစေရေး နည်းလမ်းမျိုးစုံသုံး၍ အပြိုင်ဆွဲဆောင်ကြသည့်အခါ သက်ဆိုင်ရာ နိုင်ငံနှင့် နိုင်ငံသားတို့က ကြားထဲက တန်ဆာခံဖြစ်ရသည့် သာဓကများလည်း ကမ္ဘာ့သမိုင်းကို ပြန်ကြည့်လျှင် သိနိုင်သည်။

ထိုနိုင်ငံကြီးများအကြား မည်သူ့ဩဇာခံမျှ မဖြစ်ဘဲ မိမိနိုင်ငံ ဂုဏ်သိက္ခာရှိရှိ ရှင်သန်ရပ်တည်ရေးမှာ သက်ဆိုင်ရာ နိုင်ငံတို့၏ အမြော်အမြင်၊ ဉာဏ်ပညာ၊ ဆင်ခြင်တုံတရား၊ လိမ္မာပါးနပ်မှု၊ ဦးနှောက်နှင့် နှလုံးသား အချိုးညီညီ အသုံးချနိုင်မှုစသည့် အရည်အချင်းများနှင့် ပြည့်စုံသော ခေါင်းဆောင်များအပေါ်တွင် မူတည်သည်။

မိမိနိုင်ငံ၏ ပြည်တွင်းရေး ပြဿနာတစ်ရပ် ပြေလည်စေရေး အလို့ငှာ ယင်းပြဿနာနှင့် ဆက်စပ်နေသည်ဟု ယူဆရသည့် နိုင်ငံကြီးတစ်ခုကို ပို၍ ဦးစားပေး အလေးထားသည့် အသွင်ပြလိုက်ပါက မူလကပင် ယင်းနိုင်ငံကြီးနှင့် အာဏာချိန်ခွင်လျှာ ပြိုင်နေသော နိုင်ငံကြီးတစ်ခု၏ ပုန်းကွယ်နေသော အဆိုးစိတ်ကို လှုံ့ဆော်ပေးလိုက် သကဲ့သို့ဖြစ်သွားပြီး ယင်းနိုင်ငံကြီး၏ ကျယ်ပြောလှသော လက်တံများစွာကြောင့် နိုင်ငံတကာအမြင်တွင် အဆိုးပုံရိပ် ဖြစ်သွားတတ်ပေသည်။

ဆိုလိုသည်မှာ နိုင်ငံကြီးများသည် ၎င်းတို့၏ အကျိုးစီးပွား၊ ဩဇာအာဏာအတွက်ဆိုလျှင် မည်သည့်နိုင်ငံငယ်ကိုမဆို ငါးစာအဖြစ် ချကျွေးကာ ၎င်းတို့ အနိုင်ရရှိရန် နည်းမျိုးစုံ သုံးလေ့ရှိခြင်းကြောင့် ထိုနိုင်ငံငယ်တို့ရှိ ပြည်သူများသာ နောက်ဆုံးတွင် ဓားစာခံ၊ မြေစာပင်ဖြစ်ကာ ကြီးစွာ နစ်နာကြရကြောင်းကို ဆိုလိုသည်။

စီးပွားရေးဖွံ့ ဖြိုးမှု နောက်ကျနေသော နိုင်ငံငယ်တို့အနေနှင့် ဩဇာကြီး နိုင်ငံကြီးအချို့ အပါအဝင် နိုင်ငံတကာ အသိုင်းအဝိုင်းနှင့်ရော၊ အိမ်နီးချင်း နိုင်ငံများနှင့်ပါ ကင်းကွာနေ၍ မရသဖြင့် မြေစာပင်ပြည်သူများ၏ မျက်နှာကို ထောက်ထားသောအားဖြင့် တစ်နည်းဆိုရသော် ထိုသို့ထောက်ထားခြင်းဖြင့် မိမိတို့ ကိုယ်ကျိုးစီးပွားပါ ပြေလည်လာနိုင်သဖြင့် လက်ရှိဖြစ်ပွားနေသော ပဋိပက္ခများကို လိမ္မာပါးနပ်စွာ ဖြေရှင်းကြစေလိုပေသည်။

အထူးသဖြင့် အဆင့်အတန်း မရှိသော အပေါစား လော်ဘီများ အသုံးပြု၍ သို့မဟုတ် အဆင့်နိမ့် တစ်ဖက်ပိတ် ထောက်ခံသူများ၏ အပေါစား ချီးပမြှောက်စားမှုများဖြင့် မိမိတို့ ဂုဏ်သိက္ခာကို မိမိတို့ဘာသာ ပြန်ချသကဲ့သို့ မဖြစ်စေချင်ကြောင်း သတိပေး ထောက်ပြလိုရင်းဖြစ်သည်။

အယ်ဒီတာ (၁၇-၅-၂၀၁၈)

  • TAGS