News

POST TYPE

EDITORIAL

ပြည်သူ့ဝန်ထမ်းများကို အရည်အချင်းမြှင့်ပေးပါ (Daily, Vol-6/No-31)
16-May-2018 tagged as

မြန်မာနိုင်ငံ၏ နယ်ပယ်အသီးသီးတွင် အကြောင်းကြောင်းကြောင့် လိုအပ်ချက်၊ အားနည်းချက်များစွာ ရှိနေသေးသည့်အနက် အတွေ့ရအများဆုံးမှာ မိမိတို့ ပရော်ဖက်ရှင်နယ် ကျွမ်းကျင်မှုကို အခြေခံမှသည် အဆင့်မြင့်မြင့်အထိ တည်ဆောက်မြှင့်တင်ထားမှု မရှိခြင်းဖြစ်သည်။

ပုဂ္ဂလိက လုပ်ငန်းနယ်ပယ်တွင် များသောအားဖြင့် ကျွမ်းကျင်မှု ရေချိန် အနိမ့်အမြင့်အလိုက် ရာထူး၊ ဝင်ငွေ၊ အောင်မြင်မှု ကြွယ်ဝမှုတို့ တိုက်ရိုက် အချိုးကျသောကြောင့် အရည်အချင်း နိမ့်ပါးသူများအတွက် နေရာသိပ်မရှိလှပေ။

သို့သော် လုပ်ပိုင်ခွင့်ရှိသူ၊ အုပ်ချုပ်ရေးနှင့် နီးစပ်သူများဆိုပါက အရည်အချင်း မရှိသော်ငြား အဆက်အသွယ် ချောမွေ့စေရေး အလို့ငှာ ရာထူးပေး၍ အလုပ်ခန့်ထားလေ့ ရှိသောကြောင့် ပုဂ္ဂလိက လုပ်ငန်းတိုင်း အရည်အချင်းအလိုက် အလုပ်ရရှိခြင်းဟု သတ်မှတ်၍မရပေ။

နိုင်ငံခြားရင်းနှီးမြှုပ်နှံမှု ကုမ္ပဏီများ၊ INGO ခေါ် နိုင်ငံတကာ အစိုးရမဟုတ်သော အဖွဲ့အစည်းများ၊ ကုလသမဂ္ဂလက်အောက်ခံ အဖွဲ့အစည်းများနှင့် သံရုံးများဆိုပါက လိုချင်သည့် အရည်အချင်းနှင့် ကိုက်ညီမှသာ ခန့်ထားလေ့ရှိသည်။

သို့သော် အစိုးရအုပ်ချုပ်ရေး ယန္တရားတွင်မူ ဘွဲ့လက်မှတ်နှင့် လုပ်သက်အပေါ် မူတည်ကာ ရာထူး၊ တာဝန်၊ လုပ်ပိုင်ခွင့်၊ ခံစားခွင့်၊ အဆောင်အယောင် ပေးအပ်သော အလေ့အထကြောင့် အရည်အချင်း မရှိသော်လည်း အလုပ်ရနိုင်သည့် အခွင့်အလမ်း ရှိနေသည့်သဘောဖြစ်သည်။

ဆိုလိုသည်မှာ မြန်မာနိုင်ငံတွင် လက်ရှိ နယ်ပယ် အသီးသီးတွင် တာဝန် ထမ်းဆောင်နေကြသူ အများစုသည် အုပ်ချုပ်ရေး ယန္တရားနှင့် နိုင်ငံသားပိုင် ပုဂ္ဂလိက လုပ်ငန်းများတွင် ရှိနေသော အရာထမ်း၊ ဝန်ထမ်းများသည် အရည်အချင်း၊ ကျွမ်းကျင်မှု၊ အတွေ့အကြုံကိုမူတည်ကာ ၎င်းတို့နှင့် တိုက်ရိုက်အပ်စပ်သော လုပ်ငန်းတာဝန်များ ထမ်းဆောင်နေခြင်း မဟုတ်ဟု ဆိုလိုသည်။

ပြည်တွင်းရှိ နိုင်ငံတကာနှင့် ဆက်စပ်နေသော လုပ်ငန်း၊ အဖွဲ့အစည်းများမှာမူ ယုတ်စွအဆုံး ယာဉ်မောင်းနှင့် လုံခြုံရေး၊ သန့်ရှင်းရေး ဝန်ထမ်းများကိုပင်လျှင် သက်ဆိုင်ရာ တာဝန်နှင့် ကိုက်ညီသည့် အရည်အချင်းနှင့် ပြည့်စုံမှသာ ခန့်ထားပေးခြင်းဖြစ်သည်။

ထို့အပြင် အုပ်ချုပ်ရေး ယန္တရား၊ ပြည်တွင်း ကုမ္ပဏီများနှင့် ပြည်ပ ကုမ္ပဏီ အများစုမှ ဝန်ထမ်းအများစု၏ အရည်အချင်းနှင့် စွမ်းဆောင်ရည်မှာ များစွာ နိမ့်ကျနေပြီး ၎င်းတို့ ရရှိသည့် လစာမှာလည်း နည်းပါးကြသည်။

အကျိုး၊ အကြောင်း သဘောအားဖြင့် အရည်အချင်း နိမ့်ကျပြီး လစာ၊ ရိက္ခာ၊ အဆောင်အယောင်၊ ခံစားခွင့်နည်းပါးသော ဝန်ထမ်းများဖြင့် လည်ပတ်သောကြောင့် စွမ်းဆောင်ရည်မြင့်သော အုပ်ချုပ်ရေး ယန္တရားအဖြစ် မတည်ဆောက်နိုင်ဘဲ အကျင့်ပျက်ခြစားမှု ဝဲဩဃမှ ရုန်းမထွက်နိုင်တော့ပေ။

ထိုအတွက် ဝန်ထမ်း ရွေးချယ်လေ့ကျင့်ရေးအဖွဲ့ သို့မဟုတ် ဗဟိုဝန်ထမ်း တက္ကသိုလ်ကဲ့သို့ အင်စတီကျူးရှင်းမျိုး၏ အခန်းကဏ္ဍက များစွာ အရေးကြီးလှသည်။ အဆိုပါနေရာများသည် အစိုးရအသီးသီး၏ နိုင်ငံရေးမူဝါဒများ သွတ်သွင်းရိုက်ထည့်ခြင်းထက် ပြည်သူ့ဝန်ထမ်းကောင်းများ တတ်အပ်သည့် အဋ္ဌာရသ ပညာရပ်များကို ကျွမ်းကျင်ပိုင်နိုင်စေရန် လေ့ကျင့်သင်ကြားပေးသော ကျောင်းတော်များ ဖြစ်သင့်သည်။

ထိုသို့ လေ့ကျင့်ပျိုးထောင်ပေးခြင်းမှ ထွက်ပေါ်လာသော လူသားအရင်းအမြစ်များကို ထိုက်တန်သော ရာထူး၊ ခံစားခွင့်၊ အဆောင်အယောင်များဖြင့် လုပ်ပိုင်ခွင့် အသီးသီး ပေးအပ်ခြင်းဖြင့် နိုင်ငံတော်၏ ပြည်သူ့ရေးရာ အုပ်ချုပ်စီမံခန့်ခွဲမှုနှင့် ပြည်သူ့ရေးရာ ဝန်ဆောင်မှုများ သဘာဝကျကျ အသက်ဝင်နိုင်မည်ဖြစ်သည်။

ယင်းအတွက် နိုင်ငံတော်၏ အရ၊ အသုံးမှန်းခြေ ငွေစာရင်းခေါ် ဘတ်ဂျက်တွင် ထည့်သွင်း တောင်းဆိုနိုင်ရန်အလို့ငှာ နိုင်ငံတော်၏ စီးပွားရေးနှင့် ဓနအင်အား ဖွံ့ ဖြိုးအားကောင်းလာစေရန် တစ်ချိန်တည်းမှာပင် စီမံခန့်ခွဲသွားရပေမည်။ 

အရည်အချင်း မြင့်မားသော လူ့စွမ်းအား အရင်းအမြစ်များ လိုချင်ပါက ယင်းနှင့် ထိုက်တန်သော တန်ဖိုးပြန်ပေးရမည်မှာ သဘာဝကျသော နိယာမသဘော ဖြစ်သည့်အတွက် စွမ်းရည်မြင့်မားသော အနာဂတ်နိုင်ငံတော်အတွက် ရည်မှန်းထားပါက ယနေ့စတင် အကောင်အထည် ဖော်သင့်ကြောင်း တိုက်တွန်းလိုရင်း ဖြစ်သည်။

အယ်ဒီတာ (၁၆-၅-၂၀၁၈)

(၂၅-၅-၂၀၁၇ နေ့ထုတ် The Voice Daily သတင်းစာတွင် ဖော်ပြခဲ့ပြီးသော အယ်ဒီတာ့အာဘော်ကို ပြန်လည်ဖော်ပြခြင်း ဖြစ်ပါသည်။)

  • TAGS