News

POST TYPE

EDITORIAL

ဒီမိုကရေစီကို အိုးမဲ မသုတ်စေလို (Daily, Vol-6/No-28)
13-May-2018

ယမန်နေ့ ရန်ကုန်မြို့တော်၊ တာမွေအဝိုင်းတွင် ငြိမ်းချမ်းရေးအလို့ငှာ စစ်ပွဲဆန့်ကျင်သူများကို ရဲတပ်ဖွဲ့က အင်အားသုံး တားဆီးနှိမ်နင်းခဲ့ခြင်းမှာ ဒီမိုကရေစီနည်းကျ ရွေးကောက်တင်မြှောက်ခံရသော အရပ်သားအများစု ပါဝင်သည့် အစိုးရလက်ထက် အရုပ်အဆိုးဆုံး မြင်ကွင်းတစ်ခုဟု ဆိုနိုင်သည်။

ထို့အတူ မန္တလေးမြို့တော်နှင့် မြစ်ကြီးနားမြို့တို့တွင်လည်း စစ်ပွဲဆန့်ကျင်ရေး ဆန္ဒပြသူများအား ပိတ်ပင်တားဆီးခြင်း၊ ဖမ်းဆီး၊ တရားစွဲဆိုခြင်းများရှိခဲ့ရာ တပ်မတော်နှင့် တိုင်းရင်းသား လက်နက်ကိုင်အဖွဲ့များအကြား ဖြစ်ပွားနေသော တိုက်ပွဲများအား ဆန့်ကျင်ခြင်းကို အစိုးရ သို့မဟုတ် တပ်မတော်က မလိုလားသည့်သဘောဟု ယူဆနိုင်သည်။

အခြေအနေကို ပိုရှုပ်ထွေးသွားစေသည်မှာ ဆန္ဒပြသူများက ရဲတပ်ဖွဲ့ဝင်များနှင့် တားမြစ်နယ်နိမိတ်အတွင်း ဝင်ခွင့်ရရှိရန် ဆွေးနွေးညှိနှိုင်းမှု အဆင်မပြေသဖြင့် လှည့်ပြန်ရန်စီစဉ်နေစဉ် အတားအဆီးများကို ချိုးဖျက်ဝင်ရောက်သည်ဟုဆိုကာ ရဲတပ်ဖွဲ့က ကြမ်းတမ်းစွာ ဖမ်းဆီးလိုက်ခြင်းဖြစ်သည်။

ဆိုလိုသည်မှာ ဆန္ဒပြသူများက ဥပဒေချိုးဖောက်ခြင်း ရှိ မရှိ သို့မဟုတ် ဆန္ဒပြသူ အစစ်အမှန်များက ဥပဒေချိုးဖောက်ခဲ့ခြင်း ဟုတ် မဟုတ် မသဲကွဲသေးခင် ယခုကဲ့သို့ ရုန်းရင်းဆန်ခတ် အတင်းအကျပ် ဖမ်းဆီးမှုများ ဖြစ်ပေါ်ခဲ့ခြင်းဟု ဆိုလိုသည်။ 

ဖွဲ့စည်းပုံ အခြေခံဥပဒေအရသော်လည်းကောင်း၊ တည်ဆဲ ငြိမ်းချမ်းစွာ စီတန်းလှည့်လည်ခွင့်ဆိုင်ရာ ဥပဒေအရသော်လည်းကောင်း ငြိမ်းချမ်းစွာ ဆန္ဒပြခြင်းကို ပိတ်ပင်ထားခြင်းမရှိဘဲ ရဲတပ်ဖွဲ့ဝင်များထံ ဆန္ဒပြမည့်နေရာကို ကြိုတင်အသိပေးရန်သာ လိုသည်။

စင်စစ်အားဖြင့် အဆိုပါ စစ်ပွဲဆန့်ကျင်ရေး ဆန္ဒပြသူများသည် သက်ဆိုင်ရာ မြို့နယ် အသီးသီးရှိ ရဲတပ်ဖွဲ့စခန်းများကို ဥပဒေအရ တရားဝင် အသိပေးပြီးမှ ဆန္ဒထုတ်ဖော်ခြင်းဖြစ်သော်လည်း ယခုကဲ့သို့ အတင်းအကျပ် တားမြစ်ဖမ်းဆီးရန် မည်သူက အမိန့်ပေးသနည်းဆိုသော မေးခွန်းထွက်ပေါ်လာသည်။

ဖွဲ့စည်းပုံ အခြေခံဥပဒေအရ နိုင်ငံတော်သမ္မတသည် အစိုးရအဖွဲ့၏ အကြီးအကဲဖြစ်သည့်အတွက် ပြည်ထဲရေးဝန်ကြီးဌာန လက်အောက်ရှိ မြန်မာနိုင်ငံ ရဲတပ်ဖွဲ့သည် ဥပဒေအရ အစိုးရအဖွဲ့၏ ကွပ်ကဲမှုအောက်တွင်သာရှိရာ လက်ရှိ နှိမ်နင်းမှုကို သမ္မတ၏အမိန့်ဖြင့် ပြည်ထဲရေးဝန်ကြီး သို့မဟုတ် ရဲချုပ်က အမိန့်ပေးစေခိုင်းခြင်း ဖြစ်နိုင်သည်။

သို့သော် နိုင်ငံတော်သမ္မတထံမှ ခွင့်ပြုချက် မတောင်းခံဘဲ ပြည်ထဲရေးဝန်ကြီး သို့မဟုတ် ရဲချုပ်က သီးခြားအမိန့်ဖြင့် ဆန္ဒပြသူများကို ယခုကဲ့သို့ ကြမ်းတမ်းစွာ တားမြစ်ဖမ်းဆီးခြင်းလည်း ဖြစ်နိုင်ကြောင်း သုံးသပ်ခန့်မှန်းမှုများလည်း ရှိသည်။

အငြင်းပွားဖွယ် ဆန္ဒပြပွဲများကို နေပြည်တော်ကဲ့သို့ နေရာမျိုးတွင်ပင် ခွင့်ပြုခဲ့သော ပြည်ထဲရေး ဝန်ကြီးဌာနသည် ငြိမ်းချမ်းရေးကို ဦးတည်သော စစ်ပွဲ ဆန့်ကျင်ရေး ဆန္ဒပြပွဲများကို ယခုကဲ့သို့ ပိတ်ပင်တားမြစ်နေခြင်းမှာ ပြည်ထဲရေး ဝန်ကြီးဌာနအပေါ် အမှန်တကယ် ဩဇာရှိသူအဖြစ် ပြောဆိုနေကြသည့် တပ်မတော်နှင့် သမ္မတသစ် ဦးဆောင်သော အစိုးရအကြား မမြင်ရသော အားပြိုင်မှု၊ အားစမ်းမှုများ၏ အကျိုးဆက်ဟု သုံးသပ်ခန့်မှန်းမှုများလည်း ရှိနေသည်။

နိုင်ငံ၏ အဓိက ပလေယာ သို့မဟုတ် အင်အားစုများအကြား အာဏာ နိုင်ငံရေးအလို့ငှာ ကြီးမားသော အားပြိုင်မှုများ ရှိနေစေကာမူ စစ်ပွဲဆန့်ကျင်ရေး ဆန္ဒပြသူများအား ရုန်းရင်းဆန်ခတ် ဖြစ်သွားသည်အထိ ကြမ်းတမ်းစွာ ဖမ်းဆီးခဲ့ခြင်းသည် လက်ရှိ တည်ဆောက်ဆဲ ဒီမိုကရေစီ အသွင်ကူးပြောင်းရေး လုပ်ငန်းစဉ်များကိုပါ အိုးမဲသုတ်သကဲ့သို့ ဖြစ်သွားခဲ့ပြီး ပြန်လည်ကြိုးစား တည်ဆောက်နေဆဲ အမျိုးသား ပြန်လည် သင့်မြတ်ရေးကိုပါ ထိခိုက်သွားနိုင်သဖြင့် စေတနာမှန်မှန် ဆင်ခြင်ဉာဏ်ဖြင့် ထိန်းသိမ်းကြပါမည့်အကြောင်း တိုက်တွန်းအကြံပြုအပ်ပေသည်။

အယ်ဒီတာ (၁၃-၅-၂၀၁၈)