News

POST TYPE

EDITORIAL

လစာ၊ လုပ်ခနှင့် အစိုးရ၏တာဝန် (Daily, Vol-6/No-18)
01-May-2018 tagged as

အနိမ့်ဆုံး လုပ်အားခကို ယခင် ၂၀၁၅ ခုနှစ်က သတ်မှတ်ထားခဲ့သော ၃၆၀၀ ကျပ်မှ ၄၈၀၀ ကျပ်သို့ မေလ တတိယအပတ်တွင် သတ်မှတ်မည်ဖြစ်ကြောင်း ကမ္ဘာ့အလုပ်သမားနေ့တွင် နိုင်ငံတော်သမ္မတက ပေးပို့သော သဝဏ်လွှာတွင်လည်းကောင်း၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီးကလည်းကောင်း ပြောဆိုခဲ့သည်။

ကမ္ဘာ့နိုင်ငံအသီးသီးတွင်လည်း အများအားဖြင့် ၎င်းတို့၏ ဂျီဒီပီခေါ် ပြည်တွင်း အသားတင် ထုတ်လုပ်မှုတန်ဖိုးနှင့် ချိန်ထိုးကာ အနိမ့်ဆုံးလုပ်ခ သတ်မှတ်ကြသည်။ အိုင်အယ်လ်အို ခေါ် ကမ္ဘာ့အလုပ်သမား အဖွဲ့ချုပ်ကလည်း အနိမ့်ဆုံးလုပ်ခ သတ်မှတ်ခြင်းဆိုင်ရာ လုပ်ထုံးလုပ်နည်းများကို သတ်မှတ်ပေးထားပြီးဖြစ်သည်။

မြန်မာနိုင်ငံအနေနှင့်လည်း အနိမ့်ဆုံးလုပ်ခကို ၂၀၁၅ခုနှစ်က စတင် သတ်မှတ်ခဲ့ပြီး ယခု ၂၀၁၈ ခုနှစ်တွင် ထပ်မံ တိုးမြှင့်သတ်မှတ်ခြင်းဖြစ်သော်လည်း အခြားနိုင်ငံများကဲ့သို့ နိုင်ငံ၏ ဂျီဒီပီအချိုးနှင့် နှိုင်းယှဉ်တွက်ချက် သတ်မှတ်ခဲ့ခြင်း ရှိ၊ မရှိကိုမူ အစိုးရ၏ ထုတ်ပြန်ကြေညာချက်တွင် ဖော်ပြထားခြင်း မရှိပေ။

မြန်မာနိုင်ငံရှိ အခြေခံ လုပ်သားများ၏ ခံစားခွင့်နှင့် လုပ်ခလစာမှာ အခြားနိုင်ငံများနှင့် နှိုင်းယှဉ်ပါက နိမ့်ကျနေသောကြောင့် အနိမ့်ဆုံး လုပ်ခလစာ သတ်မှတ်ပေးလိုက်ခြင်းဖြင့် လုပ်အားခ ခေါင်းပုံဖြတ်မှုများ၊ အလုပ်သမားများအပေါ် အနိုင်ကျင့်မှုများ ထိုက်သင့်သလောက် လျော့ကျကာ လုပ်အားခလည်း တိုးမြှင့်ရရှိသွားသောကြောင့် အပေါင်းလက္ခဏာ ဆောင်သည်ဟု ယေဘုယျအားဖြင့် ဆိုနိုင်သည်။

သို့သော် မကြာသေးခင်ကပင် နိုင်ငံ့ဝန်ထမ်းများ၏ လစာငွေ တိုးမြှင့်ပေးထားသည့်အတွက် အနိမ့်ဆုံး လုပ်အားခ ထပ်မံ တိုးမြှင့်ပေးလိုက်ခြင်းကြောင့် တိုးမြင့်သွားသည့် ကုန်ဈေးနှုန်းများ ပြန်ကျရန် အလားအလာ နည်းပါးသွားနိုင်ကြောင်း ပြည်သူအများစုက စိုးရိမ်ပူပန်မှု ရှိနေကြသည်။

အခြားတစ်ဖက်တွင်လည်း အာဆီယံနိုင်ငံများ အပါအဝင် ဒေသတွင်း နိုင်ငံများနှင့် နှိုင်းယှဉ်ပါက မြန်မာလုပ်သားများ၏ အရည်အချင်းနှင့် စွမ်းဆောင်ရည်မှာ နိမ့်ကျနေသောကြောင့် အနိမ့်ဆုံး လုပ်ခသတ်မှတ်ချက်သည် ထိုနိုင်ငံများနှင့် ဈေးကွက်တွင် ယှဉ်ပြိုင်နေရသော အလုပ်ရှင်များကို ဝန်ထုပ်ဝန်ပိုးဖြစ်စေသလောဟူသော မေးခွန်းထွက်ပေါ်လာသည်။

နိုင်ငံ့ဝန်ထမ်းများကို လစာတိုးမြှင့်ပေးလိုက်သော လက်ရှိအစိုးရသည် ယခင့်ယခင် အစိုးရများနှင့်မတူဘဲ လစာတိုးပေးရန် လုံလောက်သည့် ဘဏ္ဍာငွေကို အခွန်အရပ်ရပ် တိုးမြှင့်ကောက်ခံထားခြင်းဖြင့် အရန်သင့် ရှာဖွေထားပြီးဖြစ်သည့်အတွက် ငွေစက္ကူအသစ် ရိုက်နှိပ်ပေးခြင်း မဟုတ်သည့်အတွက် ကုန်ဈေးနှုန်းများ တိုးမြင့်သွားခြင်းမှာ ဈေးကွက်၏ ထိတ်လန့်မှု သို့မဟုတ် ယခင်အစိုးရ အဆက်ဆက်၏ မတည်ငြိမ်သော စီးပွားရေး မူဝါဒများအပေါ် ယုံကြည်မှု မရှိသည့် ကုန်သည်လောက၏ မိမိကိုယ်ကို ကာကွယ်မှုကြောင့်သာ ဖြစ်သည်။

သဘာဝအရ မိမိအကျိုးအမြတ် ရရှိရေးကိုသာ အဓိက ဦးတည်သည့် စီးပွားရေး လုပ်ငန်းရှင် သို့မဟုတ် ကုန်သည်များအဖို့မူ အနိမ့်ဆုံးလုပ်ခ သတ်မှတ်ခြင်းကြောင့် မိမိအကျိုးစီးပွား သို့မဟုတ် လုပ်ငန်း အဟန့်အတား ဖြစ်မည်ဆိုပါက လုပ်ငန်းပမာဏ လျှော့ချခြင်း၊ လုပ်သား အရေအတွက် လျှော့ချခြင်း၊ လုပ်ငန်း ပိတ်သိမ်းခြင်းတို့ဖြင့် တုံ့ပြန်လာဖွယ်ရှိသည်။

ဆိုလိုသည်မှာ အစိုးရက သတ်မှတ်လိုက်သော အနိမ့်ဆုံးလုပ်ခသည် ယင်းနှင့်ထိုက်တန်သည့် ကျွမ်းကျင်မှု အရည်အချင်း မပြည့်မီသော လုပ်သားများ၊ အလုပ်သမား သမဂ္ဂတို့၏ ဖိအားပေး အကျပ်ကိုင်မှုများ၊ သပိတ်မှောက် တောင်းဆိုမှုများကြောင့် မိမိအကျိုးစီးပွား ထိခိုက်လာမည်ဆိုပါက ဆိုခဲ့ပါနည်းလမ်းများဖြင့် တုံ့ပြန်လာနိုင်သည်ဟု ဆိုလိုသည်။

စင်စစ်အားဖြင့် အစိုးရ သို့မဟုတ် သက်ဆိုင်ရာ ဝန်ကြီးဌာနသည် အလုပ်ရှင် အလုပ်သမား ပြဿနာအကြား သာမန် ညှိနှိုင်းပေးခြင်း၊ အနိမ့်ဆုံး လုပ်ခလစာ သတ်မှတ်ပေးခြင်းကဲ့သို့ လက်ခုပ်သံရနိုင်သော အများကြိုက် လုပ်ရပ်များမျှဖြင့် မလုံလောက်ပေ။ 

ပြည်တွင်း၊ ပြည်ပ ရင်းနှီးမြှုပ်နှံသူများ လွယ်ကူ၊ ချောမွေ့၊ မြန်ဆန်စွာ လုပ်ငန်း လည်ပတ်နိုင်စေရေးအတွက် အခြားဆက်စပ်ဝန်ကြီးဌာနများနှင့် ပေါင်းစပ်ညှိနှိုင်း ဆောင်ရွက်ပေးခြင်း၊ မြန်မာနိုင်ငံတစ်ဝန်းရှိ အခြေခံ လုပ်သားများ၏ အရည်အချင်းနှင့် စွမ်းဆောင်ရည် ပေမီ ဒေါက်မီ မြင့်မားလာစေရေးအတွက်လည်း အနိမ့်ဆုံးအဆင့် အာဆီယံအသိအမှတ်ပြု ကျွမ်းကျင် အသက်မွေး ဝမ်းကျောင်းသင်တန်းများ ဖွင့်လှစ်ပေးခြင်းကဲ့သို့ လုပ်ငန်းများ စီမံဆောင်ရွက်ရန် တာဝန်ရှိကြောင်း မီးမောင်းထိုးဖော်ပြလိုရင်းဖြစ်သည်။ 

အယ်ဒီတာ (၁-၅-၂၀၁၈)

  • TAGS