News

POST TYPE

EDITORIAL

စီမံခန့်ခွဲမှု အနုပညာ(Daily, Vol-6/No-14)
26-Apr-2018 tagged as

သမိုင်းဦးဘုံမြေစနစ်၊ ဂူအောင်း လူသားခေတ်တွင် အလုပ်တာဝန်၊ နယ်မြေ၊ ပိုင်ဆိုင်မှု ခွဲဝေ လုပ်ကိုင်ခြင်းဖြင့် စတင်ခဲ့ပြီး ခေတ်အဆက်ဆက်မှ ပညာရှင်များက လက်တွေ့ ဖြစ်စဉ်များကို နမူနာယူပြီး သီအိုရီနှင့် နည်းနာများ ဖော်ထုတ်ကာ စီမံခန့်ခွဲမှု ဟူသော ခေါင်းစဉ်ဖြင့် ပါရဂူမြောက် သင်ကြားပို့ချ ပေးနေသည့် အတတ်ပညာသည် ယနေ့ မျက်မှောက် လူ့အဖွဲ့အစည်းအတွက် အရေးအကြီးဆုံး အစိတ်အပိုင်းဟု ဆိုနိုင်သည်။

စီမံခန့်ခွဲမှု သီအိုရီနှင့် စီမံခန့်ခွဲမှု အသွင်သဏ္ဌာန် များစွာ ရှိသော်လည်း စီမံခန့်ခွဲမှု ဆိုသည်မှာ ရည်မှန်းချက် တစ်ခု ပြီးမြောက်စေရန် လုပ်ကိုင် ဆောင်ရွက်ရာတွင် ပါဝင်သည့် လူ၊ ရုပ်ဝတ္ထု ပစ္စည်းများနှင့် ငွေကြေးတို့ကို လိုအပ်လျှင် လိုအပ်သလို ဆက်ဆံ ထိတွေ့၊ ကြီးကြပ်၊ ထိန်းချုပ်ကာ တာဝန်ခွဲဝေ စီစဉ်သော လုပ်ငန်းစဉ် တစ်ရပ်ဟု လွယ်လွယ် ပြောနိုင်သည်။

လူတစ်ဦးချင်း၏ နေ့စဉ်ဘဝ အပါအဝင် မိသားစု တစ်စုချင်းမှသည် စီးပွားရေး လုပ်ငန်း၊ အဖွဲ့အစည်း၊ အသင်းအပင်းနှင့် နိုင်ငံတော်အဆင့်အထိ လတ်တလော ရောက်ရှိနေသော အဆင့်အတန်းနှင့် အောင်မြင်၊ ကျရှုံးမှုတို့သည်လည်း စီမံခန့်ခွဲမှု၏ ရလဒ်များ ဖြစ်သည်။

ထို့အတူ ရန်ကုန်မြို့တော်တွင် ယနေ့ အကောင်အထည် ဖော်နေသည့် စီမံကိန်း၊ စီမံချက်များ  ရင်ဆိုင်ကြုံတွေ့နေရသော အဆိုး၊ အကောင်း၊ အောင်မြင်၊ ကျရှုံးမှု၊ မြန်ဆန်၊ နှောင့်နှေးမှု၊ ထောင့်စေ့၊ လစ်ဟာမှု အခြေအနေ အရပ်ရပ်သည်လည်း စင်စစ်အားဖြင့် စီမံခန့်ခွဲမှု ရလဒ်များသာ ဖြစ်သည်။

အကောင်အထည်ဖော်မည့် လုပ်ငန်းစဉ် တစ်ခုနှင့် ပတ်သက်သမျှ ကြိုတင် လေ့လာထားခြင်း၊ စစ်တမ်းကောက်၊ သုတေသန ပြုထားခြင်း၊ စနစ်တကျ ပြင်ဆင်ထားခြင်း၊ ဖြစ်လာနိုင်ခြေရှိသော ချို့ယွင်း၊ အားနည်းချက်၊ ယိုယွင်း လစ်ဟာချက်များကို ကြိုတင် တွေးဆထားခြင်း၊ မြေပြင် သို့မဟုတ် လုပ်ငန်းခွင်တွင် လက်တွေ့ အကောင်အထည်ဖော်မည့် လူ့စွမ်းအား အရင်းအမြစ်များကို လေ့ကျင့်ပျိုးထောင်ထားခြင်း စသည့်လုပ်ငန်း၊ ကဏ္ဍအလိုက် ဦးဆောင် ကြီးကြပ်မည့်သူများကို လူမှန်၊ နေရာမှန် ရွေးချယ် တာဝန်ပေးခြင်းမှာလည်း စီမံခန့်ခွဲခြင်းပင် ဖြစ်သည်။

ထို့အတူ လုပ်ငန်း အကောင်အထည် ဖော်နေသော နယ်ပယ်အတွင်းမှ သာမက ပြင်ပနယ်ပယ် အသီးသီးမှ လာသော အဆိုး၊ အကောင်း တုံ့ပြန်သံများ၊ ဝေဖန်၊ အကြံပြုချက်များကို စနစ်တကျ မှတ်တမ်းပြုစုကာ သင့်တော်သလို ကောက်ယူ သုံးစွဲခြင်း၊ ပြင်ဆင် ပြောင်းလဲခြင်းတို့သည်လည်း စီမံခန့်ခွဲခြင်း အတတ်ပညာ သဘောပင်ဖြစ်သည်။

စင်စစ်အားဖြင့် လုပ်ငန်းစဉ်တစ်ခု အကောင်အထည် ဖော်သည့်အခါ ကျွမ်းကျင်မှုအလိုက် တာဝန်ပေး စေခိုင်းချက်အရသော်လည်းကောင်း၊ စေတနာ့ဝန်ထမ်းအဖြစ် အခမဲ့ အကူအညီပေးခြင်းအရသော်လည်းကောင်း လုပ်ငန်းစဉ်အတွင်း လက်တွေ့ ဝင်ရောက် လုပ်ကိုင်နေသူများထက် ထိုလုပ်ငန်းစဉ်ကို စီမံခန့်ခွဲရခြင်းက ပို၍ ပညာရပ်ဆန်သလို ပို၍ သိမ်မွေ့ခက်ခဲသည်။ 

ထို့အတူ လုပ်ငန်းစဉ်အတွင်း အဆင်မပြေမှုများ၊ အခက်အခဲများ၊ ပြဿနာများ ကြုံရသည့်အခါတွင်လည်း ထိုကိစ္စများအတွက် တာဝန် အရှိဆုံးမှာလည်း စီမံခန့်ခွဲသူများသာ ဖြစ်သည့်အတွက် တာဝန်ကြီးသည့် လုပ်ငန်းမျိုးလည်း ဖြစ်သည်။

တစ်နည်းအားဖြင့်ဆိုရလျှင် စီမံခန့်ခွဲမှု အတတ်ပညာသည် မိမိ ကိုယ်ကိုယ်ပင် စီမံထိန်းကွပ်ရန် ခက်ခဲလွန်းလှသော လူများ၊ ရှုပ်ထွေးမြားမြောင်လှသော ရုပ်ဝတ္ထုပစ္စည်းများ၊ တန်ဖိုး အနည်းအများအပေါ် မူတည်ပြီး ခေါင်းရှုပ်ရသည့် ငွေကြေးများကို ရည်ရွယ်ထားသော ပန်းတိုင်တစ်ခုသို့ ရောက်ရှိစေရန် ပညာပါပါ၊ သိမ်သိမ်မွေ့မွေ့ ထိန်းသိမ်း မောင်းနှင်သွားရသည့် အတတ်ပညာတစ်ခု သို့မဟုတ် အနုပညာ တစ်ခုဖြစ်ကြောင်း မီးမောင်းထိုးပြလိုရင်း ဖြစ်သည်။

အယ်ဒီတာ (၂၆-၄-၂၀၁၈)

(လက်ရှိ ဖြစ်ပေါ်နေသော အခြေအနေနှင့် ကိုက်ညီနေသောကြောင့် ၁၈ - ၁ -၂၀၁၇ နေ့ထုတ် The Voice Daily သတင်းစာတွင် ဖော်ပြခဲ့ပြီးသော အယ်ဒီတာ့အာဘော်ကို ပြန်လည်ဖော်ပြခြင်း ဖြစ်ပါသည်။)

  • TAGS