News

POST TYPE

EDITORIAL

အမှိုက်ကစ ပြာသာဒ် မီးမလောင်စေချင် (Daily, Vol-6/No-13)
25-Apr-2018
ယခုရက်ပိုင်းအတွင်း ရန်ကုန်တိုင်းဒေသကြီး လှိုင်သာယာမြို့နယ်ရှိ ရန်ကုန်မြို့၏ အကြီးဆုံး အမှိုက်ပုံကြီး မီးလောင်ကျွမ်းပြီး တစ်မြို့လုံးနီးပါးကို မီးခိုးညှော်နံ့များ ဖုံးလွှမ်းခဲ့သည့်ကိစ္စသည် ရန်ကုန်မြို့နေ ပြည်သူများအကြား စိုးရိမ်တကြီး ပြောဆိုစရာ ဖြစ်သွားခဲ့ရုံမျှမက ရန်ကုန်မြို့ စည်ပင်သာယာရေး ကော်မတီ အပါအဝင် ရန်ကုန်တိုင်းဒေသကြီး အစိုးရအဖွဲ့မှ အာဏာပိုင်ပုဂ္ဂိုလ်များ၏ စီမံခန့်ခွဲမှုနှင့်ပတ်သက်၍ပါ မေးငေါ့စရာ အနေအထားသို့ ရောက်သွားခဲ့သည်မှာ စာဖတ်သူများ အသိပင်ဖြစ်ပါလိမ့်မည်။

လှိုင်သာယာ အမှိုက်ပုံ မီးလောင်မှုတွင် ပြည်သူများ စိုးရိမ်စရာကိစ္စ ဖြစ်သွားခဲ့ရခြင်းမှာ ပလတ်စတစ်နှင့် ဖော့ဘူး အပါအဝင် ဓာတုပစ္စည်းများ လောင်ကျွမ်းရာမှ ထွက်လာသော မီးခိုးများကြောင့် ပြည်သူများ၏ ကျန်းမာရေး ဆိုးရွားစွာ ထိခိုက်လာမည့်အရေးပင်ဖြစ်သည်။ လက်ရှိ ရာသီဥတုကလည်း အပူချိန် အလွန်မြင့်မားသည့် အနေအထားတွင် ရှိနေသည်ကတစ်ကြောင်း၊ မီးသတ်တပ်ဖွဲ့ဝင်များ၏ အင်အားဖြင့် ဧရာမ အမှိုက်ပုံကြီးကို ပြီးပြတ်အောင် ငြှိမ်းသတ်နိုင်ပါမည်လောဟု သံသယဝင်မိသည်ကတစ်ကြောင်း စသည့်အတွက်ကြောင့် ရန်ကုန်ပြည်သူများ စိုးရိမ်သောက ရောက်ခဲ့ကြခြင်းဖြစ်သည်။ သို့အတွက်ကြောင့် ကျန်းမာရေးနှင့် အားကစားဝန်ကြီးဌာနကမူ မီးခိုးငွေ့နှင့် ကာဗွန်မိုနောက်ဆိုဒ်အန္တရာယ် ကျန်းမာရေး သတိပေးနှိုးဆော်ချက် ထုတ်ပြန်ပေးခဲ့သည်ကို တွေ့ရပေသည်။

အမှိုက်သည် အမှိုက်သာပင်ဖြစ်ပြီး မည်သည့်ခေတ်တွင် လောင်ကျွမ်းသည်ဖြစ်စေ ကာဗွန်မိုနောက်ဆိုဒ်အပြည့် ပါဝင်သည့် အမှိုက်မီးရှို့နံ့သာရမည်ဖြစ်သော်လည်း နိုင်ငံရေး ဇာတ်သွင်းချင်သူများက လှိုင်သာယာအမှိုက်ပုံကို အကြောင်းပြုကာ လူမှုကွန်ရက်များပေါ်တွင် အစိုးရနှင့် အာဏာပိုင် အဖွဲ့အစည်းများကို ပြင်းထန်စွာ ဝေဖန်ကြသည်များ ရှိခဲ့သလို အချို့ကလည်း အားနည်းချက်များကို ယထာဘူတကျစွာ ဝေဖန်ထောက်ပြခဲ့ကြသည်။ မည်သို့ပင် ဝေဖန်မှု များရှိသည်ဖြစ်စေကာမူ အမှိုက်ပုံမီးငြိမ်းနိုင်ရေးအတွက် ကျန်းမာရေး ထိခိုက်နိုင်သည့်ကြားမှ မီးငြှိမ်းသတ်နေသည့် မီးသတ်တပ်ဖွဲ့ဝင်များ၊ တငွေ့ငွေ့ လောင်နေသည့် အမှိုက်ပုံထဲရှိ ပလတ်စတစ်နှင့် ဖော့ဘူးစသည်များကိုကြည့်လျှင် ရန်ကုန်မြို့သည် ကိုယ်ပစ်ခဲ့သည်ဒဏ် ကိုယ်ပြန်ခံလိုက်ရသည့်သဘောမျိုးနှင့် တွေ့ကြုံလိုက်ရခြင်းပင်ဖြစ်သည်။

ဤကိစ္စကို ပေါ့ပေါ့တန်တန် တွေး၍မရနိုင်တော့သည်မှာ လှိုင်သာယာ အမှိုက်ပုံ မီးလောင်မှုက အချက်ပေးလိုက်သကဲ့သို့ပင် ရှိပါသည်။ သဘာဝ ပတ်ဝန်းကျင် ထိန်းသိမ်းရေးနှင့် ပလတ်စတစ် သုံးစွဲမှုလျှော့ချရေးအတွက် မည်မျှပင် ဆော်ဩမှုများ ပြုလုပ်ခဲ့သော်လည်း များစွာ ခြေလွန်၊ လက်လွန်ဖြစ်သည့် အခြေအနေထဲသို့ ရောက်ရှိနေသည်မှာ မည်သူမျှငြင်း၍မရနိုင်ပေ။ လှိုင်သာယာ အမှိုက်ပုံ မီးလောင်သည့် ပြဿနာကိုကြည့်လျှင် ဖွံ့ဖြိုးပြီးနိုင်ငံများကဲ့သို့ ပလတ်စတစ်နှင့် ဖော့ဘူး အပါအဝင် အမှိုက်များကို ပြန်လည် Recycle လုပ်သည့်စနစ်များ ကောင်းစွာ မရှိခြင်း၊ ပြည်သူများ ကိုယ်တိုင်က ပလတ်စတစ် သုံးစွဲမှုကိုလျှော့ချနိုင်သည့် အနေအထား မရှိခြင်း သို့မဟုတ် လျှော့ချလိုစိတ် မရှိသေးခြင်းစသည်တို့ကို ရှင်းရှင်းလင်းလင်း တွေ့မြင်ရမည်သာ ပင်ဖြစ်သည်။

တစ်နည်းပြောရလျှင် ပလတ်စတစ်များက သဘာဝ ပတ်ဝန်းကျင် သာမက မိမိ၏ ကျန်းမာရေးကိုပါ တိုက်ရိုက်ထိခိုက်စေနိုင်သည် ဟူသောအချက်ကို ပြည်သူများသိအောင် အချက်ပေးလိုက်သကဲ့သို့လည်း ဖြစ်စေခဲ့ပေသည်။ ထို့အတူ မိမိနေထိုင်ရာ နိုင်ငံနှင့်မိမိနေထိုင်ရာ ပတ်ဝန်းကျင်ကို အမှန်တကယ် ချစ်မြတ်နိုးသည်ဆိုလျှင် နည်းသည်ဖြစ်စေ၊ များသည်ဖြစ်စေ ပလတ်စတစ် မှန်လျှင်အသိဉာဏ်ဖြင့် ဆင်ခြင်ကာ သုံးစွဲသည့်အလေ့အထကို နိုင်ငံသားတိုင်း လက်တွေ့ကျကျ လေ့ကျင့်ရတော့မည်ဖြစ်ကြောင်းနှင့် ရန်ကုန်မြို့တော် သာမက မြန်မာနိုင်ငံရှိ အခြားမြို့ကြီးမြို့ငယ် အသီးသီး၏ အမှိုက်ပြဿနာများကို သက်ဆိုင်ရာ ပညာရှင်များနှင့် တာဝန်ရှိသူများ ပူးပေါင်း ဖြေရှင်းကြရမည်ဖြစ်ကြောင်း ဖော်ပြလိုရင်းဖြစ်ပေသည်။

အယ်ဒီတာ (၂၅-၄-၂၀၁၈)