News

POST TYPE

EDITORIAL

ဘယ်သူ့အတွက်လဲ (Daily, Vol-6/No-11)
23-Apr-2018
လတ်တလောအားဖြင့်ဆွေးနွေးငြင်းခုံမှုများ လှိုင်းထနေသော ရိုက်တာသတင်းထောက်နှစ်ဦး ထောင်ချောက်ဆင် အဖမ်းခံရသည့်ကိစ္စနှင့်ဆက်စပ်၍ အွန်လိုင်းလူမှုကွန်ရက်ပေါ်တွင် ထုံးစံအတိုင်း အုပ်စုနှစ်စု ဆန့်ကျင်ဘက် ရပ်တည်ချက် သို့မဟုတ် ရှုထောင့်နှစ်မျိုးဖြင့် အပြန်အလှန် စွပ်စွဲတိုက်ခိုက်မှုများ မြင့်တက်လာခဲ့သည်။

မူလကပင် ရခိုင်ပြဿနာအပေါ်မူတည်ကာ ပရော်ဖက်ရှင်နယ် လုပ်ငန်းတစ်ရပ်ကို အမျိုးသားရေးရှုထောင့်မှကြည့်ကာ ငွေကြေးမက်မောသောကြောင့် နိုင်ငံတော်ကို သစ္စာဖောက်သူများ၊ အမျိုးသားရေးကိစ္စကို မျက်ကွယ်ပြုသူများအဖြစ် ကျယ်ကျယ်လောင်လောင် စွပ်စွဲမှု အင်အားကောင်းနေသော အဆိုပါ ပြဿနာကို ခြေခြေမြစ်မြစ် နားမလည်၊ မသိရှိသူကြောင့် မြန်မာနိုင်ငံသား ရိုက်တာသတင်းထောက်နှစ်ဦးအပေါ် သို့လော၊ သို့လော အမြင်များရှိကြသည်။

သတင်းမီဒီယာလောကအတွင်းတွင်ပင်ပရော်ဖက်ရှင်နယ်အမြင်နှင့် အမျိုးသားရေးအမြင် ရောယှက်ကာ ဝိဝါဒကွဲပြားမှုများ ဖြစ်ပေါ်လာသည်။

မူလကပင် ရခိုင်ပြဿနာအပေါ် တိမ်းစောင်းသော အမြင်ဖြင့် ချဉ်းကပ်ပုံဖော်နေသည့် ဝယ်သတင်း အများစုကို အသုံးပြုနေသော ရိုက်တာသတင်းဌာန အပါအဝင် ပြည်ပသတင်းဌာန၊ အေဂျင်စီ အများစုအပေါ် အစိုးရ အပါအဝင် နိုင်ငံရေး အင်အားစုများ၊ တပ်မတော်နှင့် ပြည်သူလူထုက အမြင်မကြည်မလင်ဖြစ်နေရာ မြန်မာနိုင်ငံသား သတင်းထောက်နှစ်ဦးမှာ ထိုအခြေအနေကြားတွင် ဓားစာခံသဖွယ် ဖြစ်သွားရသည်။

အင်းဒင်ရွာ လူသတ်မှုကို အခြေခံထားသော ရိုက်တာသတင်းထောက်နှစ်ဦး၏ကိစ္စသည် ရခိုင်ပြဿနာနှင့် ချိတ်ဆက်နေသည့်အပြင် ယင်းနောက်ကွယ်တွင် အမျိုးသားရေး အခြေခံဝါဒီများနှင့် ဒီမိုကရက်တစ်စံနှုန်း၊ အခြေခံ လူ့အခွင့်အရေး စံနှုန်းများအကြား ထိပ်တိုက်တွေ့မှုကြောင့် ဖြစ်ပေါ်လာသော ထုထည်ကြီးကြီး၊ ရည်ရွယ်ချက်ကြီးကြီး ပါဝါနိုင်ငံရေး ကစားကွက်ရွှေ့မှုတစ်ရပ် ရှိနေနိုင်သည်။

ထိုအခြေအနေတွင် ပြဿနာနှင့် ဆက်စပ်နေသော အစိုးရ၊ တပ်မတော်၊ ရဲတပ်ဖွဲ့တို့၏ စီမံခန့်ခွဲမှု အရည်အချင်းနှင့် နိုင်ငံတကာအမြင်နှင့် ပြည်တွင်း အခြေအနေကို ဆက်စပ်နားလည်နိုင်မှု၊ နိုင်ငံတော်၏ပုံရိပ်၊ ဂုဏ်သိက္ခာနှင့် ရခိုင်ပြဿနာ တွဲချိတ်နေခြင်းကို သိမြင်နားလည်နိုင်မှု အားနည်းချက်များနှင့် စနစ်ဆိုးနှင့် တွဲကပ်ပါလာသော ခေါက်ရိုးကျိုးဖြေရှင်းနည်းများကြောင့် ဓားစာခံ ရိုက်တာသတင်းထောက်နှစ်ဦးအပေါ် အရေးယူ ဆောင်ရွက်ပုံ နည်းလမ်းမကျ ဖြစ်သွားခဲ့ခြင်းဖြစ်သည်။

ထိုပြဿနာများအပေါ် အွန်လိုင်းလှုမှုကွန်ရက်မှတစ်ဆင့် တွန်းအားပေးနေသူများကို လေ့လာကြည့်လျှင် ပါဝါအမာကို အထိုင်ပြုထားသူများနှင့် ထဲထဲဝင်ဝင် ဆက်စပ်နေပြီး သည်းခြေကြိုက် သို့မဟုတ် ယနေ့ လူ့အဖွဲ့အစည်း အသီးသီးတွင် တစ်ကျော့ပြန် ခေါင်းထောင်လာသော အမျိုးသားရေးဝါဒီကို ခံတွင်းတွေ့နေကြသူ သို့မဟုတ် ရည်ရွယ်ချက်တစ်ခု၊ အမိန့်ပေးခိုင်းစေမှုတစ်ခုကြောင့် တာဝန်ထမ်းဆောင်နေသူ အများစုဖြစ်နေသည်ကို တွေ့ရမည်ဖြစ်သည်။

အခြားတစ်ဖက်တွင် လက်ရှိ တပ်မတော်ခေါင်းဆောင်အပေါ် ရခိုင်ပြဿနာကိုအခြေပြုကာ တမင်ဆင်ထားသော ထောင်ချောက်သဖွယ် အသုံးပြု၍ ICC ခေါ် နိုင်ငံတကာ ရာဇဝတ်ခုံရုံးသို့တင်ရန် OIC ခေါ် အစ္စလာမ်နိုင်ငံများအဖွဲ့၏ ဩဇာလွှမ်းမိုးမှုဖြင့် ကုလသမဂ္ဂ လုံခြုံရေးကောင်စီ၏ ခွင့်ပြုချက် ရယူရန်ကြိုးစားနေပေရာ အွန်လိုင်းလှုမှုကွန်ရက်ပေါ်မှ အမျိုးသားရေး အခြေခံဝါဒီများကြောင့် အခြေအနေ ပိုဆိုးသွားနိုင်စရာ ရှိပေသည်။

ဆိုလိုသည်မှာ ကုလသမဂ္ဂအပါအဝင်နိုင်ငံတကာဖိအားများစွာ ရှိနေချိန်မျိုးတွင် ပြည်တွင်း အင်အားစုများအကြား မတူညီသော နိုင်ငံရေးခံယူချက်များ ရှိနေလင့်ကစား အခိုက်အတန့်အားဖြင့် စည်းလုံးညီညွတ်စွာ ပြဿနာကို ဝိုင်းဝန်းဖြေရှင်းရန် မကြိုးစားဘဲ ဒုရဲမှူး မိုးရန်နိုင်နှင့် ရိုက်တာသတင်းထောက်နှစ်ဦးကဲ့သို့ မြန်မာနိုင်ငံသား ဓားစာခံများကို ရမယ်ရှာအခြေပြုကာ အချင်းချင်း ပြစ်တင်ရန်စောင်နေပါက နိုင်ငံတော်နှင့် ပြည်သူလူထုအပေါ် မရိုးသား၊ မလေးစားရာရောက်ကြောင်း သတိပေးထောက်ပြလိုရင်း ဖြစ်သည်။

အယ်ဒီတာ (၂၃-၄-၂၀၁၈)