News

POST TYPE

EDITORIAL

ဒုရဲမှူး မိုးရန်နိုင် ထိုးလိုက်သောခေါင်းလောင်း (Daily, Vol-6/No-10)
22-Apr-2018 tagged as

ရိုက်တာသတင်းထောက်နှစ်ဦးကို ထောင်ချောက်ဆင်ဖမ်းခဲ့ကြောင်း ဒုတိယရဲမှူး မိုးရန်နိုင်က တရားခွင်တွင် ထုတ်ဖော်ပြောဆိုခဲ့ပြီးနောက် ယင်းပြဿနာအပေါ် လူထုစိတ်ဝင်စားမှု အထူးမြင့်တက်သွားခဲ့ပြီး ဆက်စပ်နေသော သက်ဆိုင်ရာဌာနများနှင့်ပတ်သက်၍ မေးခွန်းများစွာ ထွက်ပေါ်လာခဲ့သည်။ 

ဤနေရာတွင် ဆက်စပ်ဌာနများထက် လက်ရှိပြဿနာနှင့် တိုက်ရိုက်ပတ်သက်နေသော ရဲတပ်ဖွဲ့ကိုသာ အထူးပြုသွားမည်ဖြစ်သည်။ 

ပထမဦးစွာ မြန်မာနိုင်ငံ ရဲတပ်ဖွဲ့၏ အရည်အချင်း၊ စွမ်းဆောင်ရည်နှင့် ဂုဏ်သိက္ခာ အဆင့်အတန်းကို ပြန်လည် ဆန်းစစ်သုံးသပ်ချိန်တန်ပြီလော၊ လက်တွေ့ကျကျ ပြုပြင်ပြောင်းလဲချိန် တန်ပြီလောဆိုသော မေးခွန်းဖြစ်သည်။ 

ယခင်က အစိုးရအဖွဲ့၏ စီမံခန့်ခွဲမှုအောက်တွင် ရှိနေခဲ့ပြီး မူလအခြေခံ သဘောသဘာဝအရပင် ပြည်သူ့ရေးရာ ဝန်ဆောင်မှုနှင့် မှုခင်းနှိမ်နင်း၊ ကာကွယ်ရေး တာဝန်များကို ပြည်သူနှင့် နီးကပ်စွာ ဆောင်ရွက်ရသည့် ရဲတပ်ဖွဲ့အား ၁၉၉၀ ခုနှစ်နောက်ပိုင်း တပ်မတော်၏ အရန်အင်အားအဖြစ် သတ်မှတ်လိုက်ခြင်းကို ပြန်လည် စဉ်းစားသုံးသပ်ရမည်ဖြစ်သည်။ 

များစွာ အရေးကြီးသည်မှာ ရဲတပ်ဖွဲ့၏ စီမံခန့်ခွဲမှု၊ ထိပ်ပိုင်းရာထူးမှသည် အောက်ခြေ အဆင့်ဆင့်အထိ ရဲလုပ်ငန်း၊ ရဲတာဝန်၊ ရဲကျင့်ဝတ်စသည့် ရဲတို့ တတ်အပ်သော အဋ္ဌာရသများကို အမှန်တကယ် တတ်ကျွမ်းနားလည်သူ၊ ရဲစစ်စစ်များထက် တပ်မတော်မှ ကူးပြောင်းရောက်ရှိလာသူများကို မူလ တပ်ရာထူးထက် တစ်ဆင့်မြှင့်၍ တိုက်ရိုက်ခန့်ထားသည့် ဓလေ့ဖြစ်သည်။ 

မိုးကျရွှေကိုယ်စနစ်ကို ချက်ချင်း ရပ်ဆိုင်း၍မဖြစ်နိုင်လျှင်ပင် ခန့်ထား မည့်ရာထူးနှင့် လျော်ညီသည့် အတတ်ပညာ၊ အတွေ့အကြုံရရှိစေရန် အလို့ငှာ ရဲသိပ္ပံနှင့် ရဲသင်တန်းကျောင်းများတွင် လုံလောက်သည့်ကာလ တစ်ခုအထိ တက်ရောက်သင်ကြားပြီးမှသာ အလုပ်သင်အဖြစ် စတင်တာဝန်ထမ်းဆောင် စေသည့်စနစ်မျိုး စဉ်းစားသင့်ပေသည်။
 
ထို့နောက် ရဲသိပ္ပံနှင့် သင်တန်းကျောင်းများ၏ သင်ရိုးညွှန်းတမ်း၊ အဆင့်အတန်းကို ခေတ်ကာလနှင့်လျော်ညီစွာ အဆင့်မြှင့်တင်ခြင်း၊ နိုင်ငံတကာ ရဲသိပ္ပံ၊ အကယ်ဒမီကျောင်းများနှင့် ချိတ်ဆက်ကာ အပြန်အလှန် ပူးပေါင်းဆောင်ရွက်ခြင်း၊ နိုင်ငံရပ်ခြားသို့ ပညာသင်စေလွှတ်ခြင်းကဲ့သို့ စွမ်းရည်မြင့် အစီအစဉ်များ ပြင်ဆင်ထားသင့်သည်။ 

လက်ရှိ အခြေအနေများအရ ရဲတပ်ဖွဲ့အင်အားနှင့် စောင့်ရှောက်ကာကွယ်ပေးရမည့် ပြည်သူအချိုးမမျှဘဲ ရဲတပ်ဖွဲ့ဝင်များ မနိုင်ဝန်ထမ်းနေရခြင်း၊ ထမ်းဆောင်ရသော တာဝန်နှင့်ယှဉ်ပါက ရရှိသော လစာ၊ အထောက်အပံ့၊ ခံစားခွင့်၊ အဆောင်အယောင်၊ လက်နက်ကိရိယာ များစွာ နိမ့်ပါး၊ ခေတ် နောက် ကျနေခြင်း၊ ရဲလုပ်ငန်းကို ခြေခြေမြစ်မြစ်၊ ထဲထဲဝင်ဝင်၊ ကျကျနန မသိသူများ၏ စီမံခန့်ခွဲမှုများကြောင့် ရဲတပ်ဖွဲ့ဝင်များ စိတ်ပျက်မှု၊ ရာထူးတိုး မျှော်လင့်ချက် နည်းပါးမှုတို့ကြောင့် ရဲတပ်ဖွဲ့၏ စွမ်းဆောင်ရည် ကျဆင်းလာခြင်းတို့မှာ ရဲတပ်ဖွဲ့ဝင်များ မဆိုထားနှင့် ပြင်ပမှ လေ့လာကြည့်သူများပင် သိရှိနိုင်သော အချက်များဖြစ်သည်။ 

စင်စစ်အားဖြင့် မြန်မာပြည်သူလူထုသည် ဒုရဲမှူးမိုးရန်နိုင်ကဲ့သို့ ရဲအရာရှိတစ်ဦးအပေါ် အားပေးထောက်ခံနေကြခြင်းသည် လူပုဂ္ဂိုလ်တစ်ဦးအပေါ် ချစ်စိတ်၊ မုန်းစိတ်ထက် အမှန်တရားကို ရဲဝံ့စွာ ထုတ်ဖော်ရဲသူတစ်ဦးကို အသိအမှတ်ပြု လေးစားသည့်သဘော ပိုကဲသည်။

တစ်နည်းအားဖြင့် ထိုအချက်သည် နှစ်များစွာ စီမံခန့်ခွဲမှုအလွဲကြောင့် ပြည်သူလူထု၏ အမြင်တိမ်းစောင်းမှု ခံနေရသော မြန်မာနိုင်ငံ ရဲတပ်ဖွဲ့ ပြုပြင်ပြောင်းလဲရေး ဆောင်ရွက်ရန် သတိပေးလိုက်သည့် ခေါင်းလောင်းသံဟု မှတ်ယူရမည်ဖြစ်ကြောင်း ပြောလိုရင်းဖြစ်သည်။ 

အယ်ဒီတာ (၂၂-၄-၂၀၁၈)

  • TAGS