News

POST TYPE

EDITORIAL

မြင့်မြင့်တက်၍ ဝေးဝေးကြည့်ပါ (Daily, Vol-6/No-5)
04-Apr-2018

မြန်မာနိုင်ငံတွင် ယနေ့ ရင်ဆိုင်ကြုံတွေ့နေရသော ပြဿနာများစွာကို လေ့လာကြည့်သည့်အခါ အများစုမှာ အခြားနိုင်ငံများတွင် မတွေ့ရသော ပြဿနာများစွာ ပါဝင်နေသည်ကို တွေ့ရသည်။

ပြဿနာအများစုမှာ ဥပဒေ အားနည်းချက် သို့မဟုတ် တရားဥပဒေ စိုးမိုးမှုမရှိခြင်းနှင့် နှစ်ပေါင်းများစွာ အရိုးစွဲလာခဲ့သော အုပ်စုအမြင်များမှ ရုန်းမထွက်နိုင်ခြင်းနှင့် နိုင်ငံ၏ စီးပွားရေး၊ ပညာရေး နိမ့်ကျမှုများကြောင့် ပေါ်ပေါက်နေရခြင်းဖြစ်သည်။ 

ဖော်ပြပါ အကြောင်းအရင်းများကြောင့် ပြဿနာ တစ်ခုခုကြုံတိုင်း ချဉ်းကပ်ပုံ၊ စဉ်းစားသုံးသပ်မှုနှင့် အကောင်အထည်ဖော် ဖြေရှင်းနည်းများမှာ နှစ်ပေါင်းများစွာ ခေါက်ရိုးကျိုးနေသော နည်းလမ်းများချည်း ဖြစ်နေပေသည်။ 

ထို့အပြင် ကျင့်သုံးခဲ့သော အုပ်ချုပ်ရေးစနစ်များ၏ ဩဇာသက်ရောက်မှုကလည်း ယင်းစနစ်ကို ကိုင်တွယ်သုံးစွဲခဲ့သူများရော စနစ်၏ အပြုခံများတွင်ပါ တစ်နည်းမဟုတ်တစ်နည်း စိတ်သန္နာန်တွင် စွဲထင်နေတတ်ခြင်းကလည်း အကြောင်းတစ်ချက်ဖြစ်သည်။

အမှတ်ပေါင်းကိုကြည့်၍ တက္ကသိုလ် တက်ရောက်ခွင့်ပြုသော ပညာရေးစနစ်အလွဲနှင့် အရာရာ တတ်သိနားလည်သူများသဖွယ်၊ တိုင်းပြည်အုပ်ချုပ် စီမံခန့်ခွဲရန် လေ့ကျင့်ပေးထားသူများသဖွယ် ထင်မြင်လာစေရန် ပုံစံသွင်းပေးထားသော သီးသန့် အလွှာတစ်ခု ရှိနေခြင်းတို့ကလည်း အုပ်စုအပြင် အုပ်စုခွဲစိတ်၊ အုပ်စုတွဲများ မတူခြားနားသူများအပေါ်၊ အရပ်သားခေါ် ပြည်သူလူထုအပေါ် အထင်အမြင်သေးစိတ်များ ကိန်းအောင်းသွားစေသည်။ 

ထို့ထက်ပို၍ ပြဿနာ တစ်ခုအပေါ် မိမိတို့နှင့် မတူခြားနားသော ရှုထောင့်မှ မြင်ကြည့်၊ အခြားနည်းလမ်းဖြင့် ပြဿနာကို ချဉ်းကပ်ဖြေရှင်း ကြည့်လိုသူများအား ရန် ငါ စည်း ခြား ရှုမြင်လာခြင်း၊ ပြဿနာကို အစွန်းရောက်သည့် နည်းလမ်းဖြင့် ဖြေရှင်းလိုလာခြင်း တစ်နည်းအားဖြင့် ပြိုင်ဘက် သို့မဟုတ် ရန်သူကို အပြီးတိုင် ချေမှုန်းတိုက်ခိုက်လိုသော စိတ်များလာခြင်းကဲ့သို့ ရယ်ဒီကယ်လမ်းကြောင်း ရှေ့ရောက်လာသည်ကို တွေ့လာရသည်။ 

အကျိုးဆက်မှာ ပြဿနာ၏ ရင်းမြစ် အကြောင်းအရာများကို စေ့ငုရှာဖွေဖော်ထုတ်မှုနှင့် ရှုထောင့်စုံမှ ဆန်းစစ်သုံးသပ်မှု အားနည်းကာ လက်တွေ့ကျ၍ ဖြစ်နိုင်ခြေရှိသော နည်းလမ်းများမှ ကင်းကွာလာခြင်းဖြစ်သည်။
 
ထို့ကြောင့် မိမိတို့နှင့် သက်ဆိုင်သော နယ်ပယ်၊ ရပ်ဝန်း၊ အုပ်စုတွင် ဖြစ်ပေါ်နေသော ပြဿနာနှင့် ပတ်သက်၍ ယထာဘူတကျကျ၊ ကျိုးကြောင်း ဆက်စပ်မှုရှိရှိ ဆန်းစစ်သုံးသပ်ဝေဖန် ထောက်ပြချက်များ လက်တွေ့ကျကျ၊ ဖြစ်နိုင်ခြေရှိရှိ ဖြေရှင်းနည်းများကို အပြင်းအထန် ဆန့်ကျင် တံဆိပ်ကပ်ကာ လက်တွေ့မကျသော ရယ်ဒီကယ်ဆန်ဆန် နည်းလမ်းများဖြင့် ဖြေရှင်းရန်သာ အားသန်နေကြခြင်းဖြစ်သည်။ 

လတ်တလောအားဖြင့် ရုပ်ရှင်လောကတွင် ဖြစ်ပေါ်နေသော ပြဿနာနှင့် အခြေခံကျန်းမာရေး နယ်ပယ်တွင် လိပ်ခဲတည်းလည်းရှိနေသော ရမ်းကု ပြဿနာအပေါ် ယင်းနယ်ပယ်အတွင်းမှ ရှေးရိုးစွဲနှင့် အုပ်စုသဘော ဆန်လွန်းသော အမြင်များက လက်တွေ့ မြေပြင်တွင်ရှိသော ပကတိ အခြေအနေများနှင့် ကင်းကွာနေပေသည်။

မြန်မာနိုင်ငံသည် အခြေအနေ အရပ်ရပ်အရ နယ်ပယ် အားလုံးနီးပါးသည် ဥခွံအတွင်း ရှိနေသည့်အတွက် ပြဿနာများကို အရိုးစွဲလာသော စံနှုန်း သို့မဟုတ် မိမိတို့ဘာသာ ဘောင်ခတ်ထားသော အဝန်းအဝိုင်းဥခွံအတွင်းမှ အမြင်တို့ဖြင့် ချဉ်းကပ်ဖြေရှင်းရန် ကြိုးစားနေပြီး ယင်းနည်းလမ်းနှင့်မတူ ခြားနားသူများအပေါ် ရယ်ဒီကယ်စိတ်ဖြင့် တုံ့ပြန်နေကြခြင်းသာ ဖြစ်သည်။

ရုပ်ရှင်နှင့် ကျန်းမာရေး လောကတွင်သာမက အခြားသော နိုင်ငံရေး၊ စီးပွားရေးနယ်ပယ်များသည်လည်း ထူးမခြားနားဖြစ်နေလျှင် မြန်မာလူ့အဖွဲ့ အစည်းယခုထက်ပို၍ နောက်တစ်ဆင့်တက် ဖွံ့ ဖြိုးတိုးတက်ရန် ခက်ခဲနိုင်သောကြောင့် မြင့်မြင့်တက်၍ ဝေးဝေးမြင်နိုင်သူများဖြစ်ရန် များစွာ အရေးကြီးကြောင်း သတိပေး ထောက်ပြလိုရင်းဖြစ်သည်။ 

အယ်ဒီတာ (၄-၄-၂၀၁၈)