News

POST TYPE

EDITORIAL

ရမ်းကုပြဿနာလက်တွေ့ကျကျ ဖြေရှင်းပါ (Daily, Vol-6/No-4)
03-Apr-2018

ကျေးလက်ဒေသများတွင် တရားဝင်ခွင့်ပြုထားသည့်လိုင်စင်မရှိဘဲ ဆေးကုနေသည့်ရမ်းကုများကို အရေးယူပေးရန်အဆိုကို မဲခွဲရာတွင် တစ်မဲအသာဖြင့် အဆိုတင်သူဘက်က ရှုံးနိမ့်ခဲ့ခြင်းအပေါ် ဝေဖန်ဆွေးနွေးမှုများ မြင့်တက်သွားခဲ့သည်။ မန္တလေးတိုင်းဒေသကြီးလွှတ်တော်တွင် အဆိုကိုထောက်ခံဆွေးနွေးသူများက ရမ်းကုများ၏ပေါ့ဆမှု၊ ရမ်းကားမှုကြောင့် ကျေးလက်ဒေသနေ ပြည်သူလူထု အသက်ဆုံးရှုံးမှုများနှင့် ကြုံတွေ့နေရခြင်းကိုထိရောက်စွာ အရေးယူ ခြင်းနည်းလမ်းဖြင့် ဖြေရှင်းပေးရန်လိုလားကြောင်း တင်ပြခဲ့ကြသော်လည်း ကန့်ကွက်သူများဘက်က တစ်မဲအသာဖြင့် ယင်းအဆိုကို ချေဖျက်သွားခဲ့သည်။

ရမ်းကုပြဿနာသည် အခြေခံကျန်းမာရေး စောင့်ရှောက်မှုနယ်ပယ်တွင် နှစ်ပေါင်းများစွာကပင် အမြစ်တွယ်သကဲ့သို့ ဖြစ်နေသော ပြဿနာဟု ဆိုနိုင်သည်။ ယင်းပြဿနာကို ဘာ့ကြောင့်ဖြစ်ရသနည်းဆိုသော မေးခွန်းမေး၍ အခြေခံ အကြောင်းအရင်းများကို ရှာဖွေဖော်ထုတ်ခြင်းမရှိဘဲ ရမ်းကုများကို အပြစ်ပေး အရေးယူခြင်းနည်းလမ်းဖြင့် ဖြေရှင်းရန် ကြိုးစားလာခဲ့သည်မှာလည်း နှစ်ပေါင်းများစွာ ကြာမြင့်နေသော်ငြား ယနေ့အထိ ဖြေရှင်းနိုင်ခြင်း မရှိသေးပေ။

ကျန်းမာရေးနယ်ပယ်ရှိ ရမ်းကုပြဿနာနည်းတူ အခြားနယ်ပယ်များရှိ အောက်ခြေအဆင့်ဆင့်တွင်လည်း အလားတူ ပြဿနာများရှိနေပြီး ယင်းပြဿနာများကိုလည်း ယနေ့အချိန်အထိ အစိုးရ အဆက်ဆက် အရေးယူအပြစ်ပေးခြင်း နည်းလမ်းဖြင့် ဖြေရှင်းရန်သာ ကြိုးစားလာခဲ့ရာ မည်သည့်နယ်ပယ်တွင်မျှ အောင်မြင်ခဲ့သည့် အထောက်အထား၊ မှတ်တမ်း မတွေ့ရသေးပေ။

ပြဿနာများ၏ ရင်းမြစ် အကြောင်းအရင်းများကို စနစ်တကျ အချိန်ယူ စုံစမ်းရှာဖွေ ဖော်ထုတ်ခြင်းမရှိဘဲ အပေါ်ယံတွင်မြင်ရသည့် ပြဿနာကို သမားရိုးကျ အပြစ်ပေး အရေးယူသည့်နည်းလမ်းဖြင့် ဖြေရှင်းနေသောကြောင့် ရေပေါ်တွင်ပေါ်နေသော ရေခဲတောင်၏ အစိတ်အပိုင်းကိုသာ ဖယ်ရှားရှင်းလင်းရန် ကြိုးစားနေခြင်းနှင့် အလားသဏ္ဌာန်တူပေသည်။

ဆင်းရဲသော နိုင်ငံများတွင် ရှိနေသည့်လမ်းပန်းဆက်သွယ်ရေး ခက်ခဲခြင်း၊ အသိပညာရေချိန်နိမ့်ကျခြင်း၊ သက်ဆိုင်ရာ ကျန်းမာရေးဝန်ကြီးဌာန၏ ထိရောက်၊ လုံလောက်သော စောင့်ရှောက်မှု မရရှိခြင်း၊ ဌာနဆိုင်ရာ အဆင့်ဆင့်တွင် အကျင့်ပျက်ခြစားမှုများ ရှိနေခြင်းကဲ့သို့ အခြေအနေများက ဝေးလံခေါင်းပါး၊ ကျေးလက်တောရွာများတွင် ရမ်းကုခေါ် လိုင်စင်မရှိဘဲ၊ စနစ်တကျ သင်တန်း တက်ထားခြင်းမရှိဘဲ ဆေးကုသပေးနေသူများကို မှီခိုအားကိုးရန် အဓိက စေ့ဆော်ပေးသော အကြောင်းအရင်းများဖြစ်သည်။

အထူးသဖြင့် ကျေးလက်ကျန်းမာရေးဌာန မဆိုထားနှင့် တိုက်နယ်အဆင့် ဆေးရုံများတွင်ပင် တိုက်နယ်ဆရာဝန်ရာထူး လစ်လပ်နေသော နေရာ အများအပြား ရှိနေသောနိုင်ငံမျိုးတွင် ရမ်းကုများကို အားကိုးနေရခြင်းမှာ မထူးဆန်းလှပေ။ ရမ်းကုများကြောင့် အခြေအနေ ပိုဆိုးသွားသူ၊ အသက် ဆုံးရှုံးသွားသူများ ရှိသည်မှာ မှန်သော်လည်း အခြားတစ်ဖက်တွင်မူ အသင့်အတင့် တတ်ကျွမ်းနားလည်သော ရမ်းကုများကြောင့် ရောဂါ သက်သာသွားသူ၊ အသက်မဆုံးရှုံးရသူများလည်း ရှိနေသည်ဆိုသောအချက်ကို မေ့မထားသင့်ပေ။

ထိုသို့ဆိုခြင်းဖြင့် ရမ်းကုများကို အားပေးထောက်ခံခြင်းမဟုတ်ဘဲ အခြေခံကျန်းမာရေးဝန်ထမ်းများ လက်လှမ်းမမီသော သို့မဟုတ် မသွားရောက်နိုင်သော နေရာဒေသ အများအပြားတွင် ရမ်းကုများက ထိုက်သင့်သလောက် ဒေသခံပြည်သူများအတွက် အထောက်အကူ ဖြစ်နေသည်ဆိုသော ပကတိ အခြေအနေမှန်ကို လက်သင့်ခံရမည်ဆိုသော အချက်ပင်ဖြစ်သည်။

ထိုအတွက် လက်တွေ့ အကျဆုံး ဖြေရှင်းနည်းမှာ ယူနီဆက်ဖ်ခေါ် ကုလသမဂ္ဂ ကလေးများဆိုင်ရာ ရန်ပုံငွေအဖွဲ့၏ အကူအညီဖြင့် အရပ်လက်သည်များကို မြို့နယ်အဆင့် ကျန်းမာရေးဦးစီးဌာနက ဆွဲဆောင်ခေါ်ယူ စုစည်းကာ ခေတ်မီသားဖွားနည်းသင်တန်းများ စနစ်တကျပေး၍ သားဖွား အထောက်အကူပြုပစ္စည်းများ ထောက်ပံ့ကူညီလိုက်သော နည်းလမ်းဖြစ်သည်။ ထိုနည်းလမ်းကြောင့် ကိုယ်ဝန်ဆောင်မိခင် သေဆုံးနှုန်း၊ မွေးဖွားပြီးစ ကလေးငယ် သေဆုံးနှုန်း များစွာ လျော့ကျသွားခဲ့သည်မှာ အကောင်းဆုံး သာဓကဖြစ်သည်။

ယနေ့အချိန်အထိ မုန့်လုံးစက္ကူကပ်ဖြစ်နေသော ရမ်းကုပြဿနာကိုလည်း ယင်းသာဓကကိုဆောင်ကာ ၎င်းတို့အား စနစ်တကျ ဆွဲဆောင်စည်းရုံး၍ အခြေခံ ရောဂါကုသနည်းများ၊ ကျန်းမာရေး အသိပညာပေး နည်းလမ်းများ၊ ရောဂါ အဆင့်အလိုက် ၎င်းတို့အနေနှင့် ကုသပျောက်ကင်းနိုင်ခြေ ရှိ မရှိ ခွဲခြားသည့် နည်းလမ်း၊ ၎င်းတို့ ကုသနိုင်ခြေမရှိပါက အဆင့်အလိုက် သက်ဆိုင်ရာ ကျန်းမာရေးမှူး သို့မဟုတ်အနီးဆုံး ဆေးခန်း၊ ဆေးရုံသို့လွှဲပို့စေခြင်းများ စသည်တို့ကိုလေ့ကျင့် သင်ကြားပေးသင့်ပေသည်။

အခြေအနေ အရပ်ရပ်အရ ကျေးလက်ဒေသများထက် အသိပညာ ပို၍ မြင့်မားသည်ဟု ယူဆစရာရှိသည့် ရန်ကုန်မြို့တော်ကဲ့သို့ နေရာမျိုးတွင်ပင် ယာဉ်စည်းကမ်း၊ လမ်းစည်းကမ်း ချိုးဖောက်မှုများကို အရေးယူအပြစ်ပေးခြင်း နည်းလမ်းဖြင့် ယနေ့အထိ ထိထိရောက်ရောက် ဖြေရှင်းမပေးနိုင်သေးချိန်တွင် ကျေးလက်ဒေသ ပြည်သူအချို့ အခြေအနေအရ အားကိုးအားထားပြုနေရသူ ရမ်းကုများကို အရေးယူ အပြစ်ပေးခြင်းထက် စနစ်တကျ လေ့ကျင့်သင်ကြားပေးကာ တရားဝင် အသိအမှတ်ပြုပေးခြင်းအားဖြင့် အခြေခံကျန်းမာရေး စောင့်ရှောက်မှု နယ်ပယ်ကို အတိုင်းအတာတစ်ခုအထိ အထောက်အကူဖြစ်စေနိုင်ကြောင်း အကြံပြုထောက်ပြလိုရင်း ဖြစ်သည်။

အယ်ဒီတာ (၃-၄-၂၀၁၈)