News

POST TYPE

EDITORIAL

အနုတ်လက္ခဏာမှ အပေါင်းလက္ခဏာသို့ (Daily, Vol-5/No-298)
25-Mar-2018 tagged as

ယခုရက်ပိုင်းအတွင်း မုဒိတာတရား အားနည်းချည့်နဲ့သော လူ့အဖွဲ့အစည်းအဖြစ် လျော့ကျလာသော အဖြစ်အပျက် အခြေအနေများ မြန်မာလူမှုအသိုင်းအဝိုင်းတွင် တွေ့ မြင်ကြားသိနေရပေသည်။ 

နှစ်ပေါင်းများစွာ တံခါးပိတ်နေလာခဲ့သည့်အပြင် အာဏာရှင်စနစ် ကျင့်သုံးခဲ့ချိန် ကြာမြင့်ခဲ့သောကြောင့် ယင်းစနစ်၏ အဆိုးသက်ရောက်မှုများ အတွေ့ရများလာသည်။ 

အခွင့်အရေး၊ ဂုဏ်သတင်းကျော်စောရေး၊ လူသိများထင်ရှားရေး၊ ချမ်းသာကြွယ်ဝရေး၊ အာဏာနိုင်ငံရေးအလို့ငှာ ခွဲခြားဆက်ဆံမှု၊ အုပ်စုဖွဲ့မှုနှင့် အုပ်စုဖွဲ့ အနိုင်ကျင့်မှုများက စနစ်ဆိုး၏ ဖွားဖက်တော်များသဖွယ် ဖြစ်လာခဲ့သည်။

အချိန်ကြာလာသည်နှင့်အမျှ အခွင့်အရေးရသူနှင့် အခွင့်အရေး မရသူများအကြား၊ အာဏာရှိသူနှင့် အဖိနှိပ်ခံရသူအကြား၊ ပညာတတ်သူနှင့် ပညာမဲ့သူများအကြား၊ တံခါးပိတ်ထားသူနှင့် တံခါးဖွင့်ထားသူအကြား ပဋိပက္ခအသွင် ဆောင်လာတော့သည်။ 

ပိုဆိုးသွားသည်မှာ ဗြဟ္မစိုရ်တရားများနှင့် တဖြည်းဖြည်း ကင်းကွာကာ ယင်းနှင့် ဆန့်ကျင်ဘက် အကျိုးသက်ရောက်မှုများပါ တိုးပွားလာခြင်းဖြစ်သည်။

ယနေ့ ရုပ်ရှင်အနုပညာလောကတွင် ဖြစ်ပေါ်နေသော ပြဿနာမှာ ယင်းဗြဟ္မစိုရ်တရား ခေါင်းပါးလာခြင်းမှ ထွက်ပေါ်လာသော အဆိုးသက်ရောက်မှု တစ်ခုပင်ဖြစ်သည်။

စနစ်ဆိုးအောက်တွင် ကန့်သတ်၊ ပိတ်ပင်၊ တားဆီးမှုများစွာဖြင့် ဖြတ်သန်းလာသော မြန်မာ့လူ့အဖွဲ့အစည်းတွင် အများစုမှာ မိမိတို့ကိုယ်ကို ဥခွံအတွင်း ရောက်နေမှန်း သတိမပြုမိတတ်ကြပေ။

အထူးသဖြင့် မိမိတို့အစုအဖွဲ့၊ အဝန်းအဝိုင်း၊ အအုပ်အစုကို တံတိုင်းခတ်ကာ မိမိတို့ဘာသာ ကျေနပ်အားရနေလေ့ရှိပြီး ပြင်ပမှ မိမိတို့ထက် ပိုတော်၊ ပိုကျယ်ပြန့်၊ ပိုခေတ်မီသော အယူအဆ၊ ဝါဒ၊ လူပုဂ္ဂိုလ်များ ဝင်ရောက်လာပါက မလိုလားစိတ်အားကြီးစွာ ဆန့်ကျင်တတ်ကြသည်။ 

ရုပ်ရှင်အနုပညာ လောကတွင်သာမက အခြားသော နယ်ပယ်များစွာလည်း များစွာ ကွာခြားမှု မရှိပေ။

အထူးသဖြင့် မေတ္တာ၊ ကရုဏာ၊ မုဒိတာ၊ ဥပေက္ခာဆိုသော ဗြဟ္မစိုရ်တရား လေးပါးအနက် မုဒိတာစိတ်များစွာ ချို့တဲ့လာခြင်းမှာ ကောင်းသည့်လက္ခဏာ မဟုတ်ပေ။

မုဒိတာစိတ်ခေါ် တစ်ပါးသူ ချမ်းသာ၊ အောင်မြင်ခြင်းကို ဝမ်းသာကြည်နူးစိတ် လျော့ပါးလာသည်နှင့်အမျှ ဣဿာမစ္ဆရိယခေါ် မနာလိုဝန်တိုစိတ် အားကြီးလာတတ်သည်။ 

ယနေ့ ရုပ်ရှင်လောကတွင် တွေ့မြင်ရသည့် ပြဿနာမှာ မုဒိတာစိတ် ခေါင်းပါးခြင်းနှင့် မနာလိုဝန်တိုမှု အားကြီးခြင်းတို့ကြောင့် ပေါ်ထွက်လာသော ဆိုးကျိုးသက်ရောက်မှုဖြစ်သည်။

ယင်းဆိုးကျိုးသက်ရောက်မှုသည် အနုတ်လက္ခဏာသဘောဟု ဆိုနိုင်သော်လည်း ယင်းနှင့်ပတ်သက်၍ မြန်မာပရိသတ်၏ သဘောထား၊ ရပ်တည်ချက်၊ မေတ္တာ၊ ကရုဏာ၊ မုဒိတာ၊ ဥပေက္ခာစိတ်တို့ကို တွေ့မြင်ရခြင်းမှာ အပေါင်းလက္ခဏာအကျိုးရလဒ်ဟု ဆိုနိုင်ပေသည်။

ယင်းရလဒ်ကို အခြေပြုကာ မနာလိုဝန်တိုမှု အားကြီးနေသော ကျန်နယ်ပယ်များကိုလည်း အနုတ်လက္ခဏာမှ အပေါင်းလက္ခဏာသို့ အားယူပြောင်းလဲနိုင်လိမ့်မည်ဟု ယုံကြည်မျှော်လင့်အပ်ပေသည်။ 

အယ်ဒီတာ (၂၅-၃-၂၀၁၈)

  • TAGS