News

POST TYPE

EDITORIAL

ဒီမိုကရေစီကို တန်ဖိုးမချစေလို (Daily, Vol-5/No-281)
05-Mar-2018 tagged as

အစစ်အမှန် ဆန္ဒမဲများဖြင့် ဒီမိုကရေစီနည်းကျ ရွေးကောက်တင်မြှောက်ခံထားရသည့် အစိုးရလက်ထက်တွင် ဒီမိုကရေစီ စံနှုန်းများ ဖောက်လွဲဖောက်ပြန် ဖြစ်လာသလောဟု သံသယ ရှိလာကြခြင်းမှာ ကောင်းသည့် လက္ခဏာမဟုတ်ပေ။

အထူးသဖြင့် ပြည်သူအများစု၏ လွတ်လပ်စွာ ရေးသား၊ ဖော်ထုတ်၊ ပြောဆို၊ ထုတ်ဝေ၊ ဖြန့်ချိခွင့်၊ ငြိမ်းချမ်းစွာ စီတန်းလှည့်လည်၊ စုဝေး၊ ဆန္ဒပြခွင့်တို့ကို ကန့်သတ် ပိတ်ပင်လာသည့် အရိပ်အယောင်များ တဖြည်းဖြည်း ပိုတိုးလာခြင်းမှာ များစွာ ထင်ရှားလှသည်။

အများပြည်သူနှင့် သက်ဆိုင်သော ဥပဒေဆိုသည်မှာ လူတစ်ဦး၊ တစ်ယောက်၊ တစ်ဖွဲ့ကို ဦးတည် ရေးဆွဲရခြင်းမျိုး မဟုတ်ဘဲ အချုပ်အခြာပိုင်နိုင်ငံတစ်ခုအတွင်း မှီတင်းနေထိုင်ကြသည့် နိုင်ငံသား အားလုံးအတွက် ရည်ညွှန်းပြဋ္ဌာန်းထားခြင်းဖြစ်သည်။

သို့သော် ယခုနောက်ပိုင်း ထိုသို့ တစ်သီးပုဂ္ဂလဆန်သော ရည်ရွယ်ချက်မျိုးဖြင့် ဥပဒေအချို့ကို ပြင်ဆင်ရန်နှင့် အငြင်းပွားဖွယ် အဓိပ္ပာယ် ဖွင့်ဆိုချက်များ မီးမောင်းထိုး ဖော်ပြလာသည်ကို တွေ့ရသည်။

လက်ရှိအစိုးရက ယခုရက်ပိုင်းအတွင်း ပြင်ဆင်ပြဋ္ဌာန်းရန် ကြိုစားလာသော ငြိမ်း၊ စု၊ စီ ခေါ် ငြိမ်းချမ်းစွာ စီတန်းလှည့်လည်ခြင်းနှင့် စုဝေးခြင်း ဆိုင်ရာဥပဒေနှင့် ရာဇသတ်ကြီးဥပဒေပါ ပုဒ်မ ၁၂၄ (က) နိုင်ငံတော် အကြည်ညိုပျက်အောင်ပြုမူမှု အဓိပ္ပာယ် ဖွင့်ဆိုချက်များမှာ လူတစ်စု၊ တစ်ဖွဲ့အတွက် ရည်ရွယ်သည်ဆိုငြား နိုင်ငံသားအားလုံးအပေါ် သက်ရောက်မှု ရှိနေပေသည်။

စင်စစ်အားဖြင့် လက်ရှိအစိုးရက ပြင်ဆင်ပြောင်းလဲရန်၊ ကျယ်ပြော ရှုပ်ထွေးသော အငြင်းပွားဖွယ် အဓိပ္ပာယ်များ သက်ရောက်နိုင်ဖွယ် ဖွင့်ဆိုချက်များ ချဲ့ထွင်ရန် ကြိုးစားလာခြင်းသည် မူလရည်ရွယ်ချက် မည်သို့ပင် ရှိစေကာမူ တင်းပြည့် ကျပ်ပြည့် မရရှိသေးသည့် နုနုနယ်နယ် ဒီမိုကရေစီကို ဘောင်ခတ်ခြင်းမည်ပေသည်။

အစိုးရနှင့် လွှတ်တော်နှစ်ခုစလုံးကို လက်ရှိ အာဏာရပါတီက ကြီးစိုးထားသောကြောင့် အစိုးရက ပြင်ဆင်ရန်၊ အဓိပ္ပာယ် ထပ်မံ ဖွင့်ဆိုရန် ကြိုးစားလာခြင်းမှာ လွယ်လွယ်ကူကူ အထမြောက်သွားမည်ဖြစ်သည်။

မိမိကို ရွေးချယ် တင်မြှောက်ထားသည့် မဲဆန္ဒနယ်မြေရှိ ပြည်သူလူထုမျက်နှာကို စာနာထောက်ထားသော တစ်နည်းအားဖြင့် မိမိကိုယ်ကိုယ် တစ်သက်တာ လိပ်ပြာသန့်စေလိုသော လွှတ်တော်ကိုယ်စားလှယ်အချို့ ရှိနေလင့်ကစား နည်းပါးလွန်းသော အရေအတွက်ဖြစ်နေခြင်းကြောင့် ဒီမိုကရေစီ မဆန်လွန်းသော ကိစ္စများကို လွှတ်တော်တွင် ဟန့်တားကန့်ကွက်ရန် မလွယ်ကူပေ။

အာဏာနိုင်ငံရေးတို့မည်သည် ကစားပွဲနှင့် အလားသဏ္ဌာန် တူသည်။ သူမနိုင် ကိုယ်မရှုံးဆိုသော မျှတသည့် ကစားပွဲများ ရှိတတ်သော်လည်း လက်ယာအစွန်းရောက်များ ခေါင်းထောင်မှုနှင့် ဘာသာရေး အစွန်းရောက်နှင့် အမျိုးသားရေးဝါဒီတို့ အင်အားကောင်းသော ယနေ့ကာလမျိုးတွင် ပြိုင်ဘက်ကို အလဲထိုးဖြင့် အနိုင်ရရှိရန်သာ ကြိုးစားလာကြသည်။

အာဏာနှင့် စည်းစိမ်ဥစ္စာကို မည်သည့်နည်းနှင့်မဆို လက်မရွံ့တမ်း ကာကွယ်မည့်အုပ်စုနှင့် လက်ဝဲသူငယ်နာ မစင်လှသည့်အပြင် သူရဲကောင်းမျှော်၊ လူပုဂ္ဂိုလ် ကိုးကွယ်မှု ဆန်လွန်းသော အုပ်စုနှစ်စုတို့အကြား စေးကပ်မှု မရှိလှသော နိုင်ငံမျိုးတွင် ဒီမိုကရေစီ ရေခံမြေခံများ ပေါက်ဖွားရှင်သန်ရန် ခက်ခဲလှသည်။

ထို့အပြင် နိုင်ငံတော်အတွက် အရေးကြီးသော အင်စတီကျူးရှင်းအချို့ကို မိမိကိုယ်ကျိုး စီးပွားအလို့ငှာ အသုံးချနေခြင်းကြောင့် မလိုလားအပ်သော နောက်ဆက်တွဲ အကျိုးဆက်များ ဆိုးဆိုးရွားရွား ဖြစ်ပေါ်လာခြင်းမှာ ဒီမိုကရေစီ သောကပွေနေသော နိုင်ငံနှင့် ပြည်သူလူထုအား တစ်ပူပေါ် နှစ်ပူဆင့်စေခဲ့သည်။

ထိုအခြေအနေကြားက နိုင်ငံသား အချင်းချင်းအကြားတွင်ပင် ငြိုးသူ ရန်ဘက်များပမာ အသေအကျေ တိုက်ခိုက်ချေမှုန်းရန် ကြိုးစားနေကြသည့်အပြင် ရဟန်း၊ ရှင်၊ လူ ပြည်သူတစ်ရပ်လုံး တန်ဖိုးကြီးကြီး ပေးဆပ်တိုက်ပွဲဝင် ရယူခဲ့ရသော သက်တမ်းနုနု ဒီမိုကရေစီကို တန်ဖိုးကျစေမည့် ပြောဆို၊ ပြုမူ၊ ကြံစည်၊ လုပ်ဆောင်မှုများ ဆင်ခြင်ကြစေလိုကြောင်း သတိပေး ထောက်ပြလိုရင်းဖြစ်သည်။

အယ်ဒီတာ (၅-၃-၂၀၁၈)

  • TAGS