News

POST TYPE

EDITORIAL

ခဲတစ်လုံးဖြင့် ငှက်နှစ်ကောင်မက ရလိုသူများ (Daily, Vol-5/No-276)
27-Feb-2018 tagged as

ဘင်္ဂါလီလူမျိုးများအရေးနှင့် ပတ်သက်၍ မြန်မာတပ်မတော် အရာရှိကြီးများကို ဒဏ်ခတ်အရေးယူမှု ပြုလုပ်ရန် ဥရောပသမဂ္ဂ (အီးယူ) နိုင်ငံခြားရေးဝန်ကြီးများ ယမန်နေ့က သဘောတူညီခဲ့ကြသည်ဟူသည့် သတင်းနှင့် အိုင်ယာလန်၊ ယီမင်နှင့် အီရန်နိုင်ငံတို့မှ နိုဘယ်လ်ငြိမ်းချမ်းရေးဆုရှင်သုံးဦးက ဘင်္ဂလားဒေ့ရ်ှနိုင်ငံထဲရှိ ဘင်္ဂါလီဒုက္ခသည်စခန်းများသို့ သွားရောက်ပြီးနောက် ဒေါ်အောင်ဆန်းစုကြည်အနေနှင့် ဘင်္ဂါလီများအပေါ် အကြမ်းဖက်မှုများကို ပြစ်တင်ရှုတ်ချမှု ပြုလျှင်ပြု သို့မဟုတ် လူမျိုးဖြုတ် ရှင်းလင်းမှုများအတွက် တရားစီရင်မှုနှင့် ရင်ဆိုင်လျှင် ရင်ဆိုင်ဟူ၍ ပြင်းပြင်းထန်ထန် မှတ်ချက်ပေး ပြောဆိုသွားသည်ဟု သိရပါသည်။ 

ဒုတိယသတင်းဖြစ်သည့် နိုဘယ်လ်ငြိမ်းချမ်းရေးဆုရှင်သုံးဦး နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို သတိပေးသည့်ကိစ္စမှာ ၎င်းတို့၏ ထင်မြင်ယူဆချက် သဘောထားနှင့်သာ သက်ဆိုင်သော်လည်း အီးယူက ဒဏ်ခတ်အရေးယူမှု ပြုမည့်သတင်းမှာမူ သတင်းကြီးတစ်ပုဒ်ဟုဆို၍ ရနိုင်ပေသည်။ အကြောင်းမှာ အီးယူသည် မြန်မာ့အရေးကိစ္စများနှင့် ပတ်သက်လာလျှင် အမေရိကန်ပြည်ထောင်စုနှင့် ဗြိတိန်တို့ကဲ့သို့ စွက်ဖက်မှုများစွာ လုပ်လေ့မရှိသလို အာဏာရှင်စနစ်မှ ဒီမိုကရေစီ အသွင်ကူးပြောင်းရေးဖြစ်စဉ်၌ တွေ့ကြုံရသည့် အခက်အခဲများကို ယင်းနိုင်ငံ နှစ်နိုင်ငံထက် ပိုမိုနားလည်သည့်သဘောမျိုးကို အစဉ်အမြဲ ပြသခဲ့သောကြောင့် ဖြစ်ပေသည်။ 

ယခု အီးယူက ဒဏ်ခတ် အရေးယူမည့်ကိစ္စမှာ ရခိုင်အရေးကိစ္စကို ကိုင်တွယ်ခဲ့သည့် တပ်မတော် အရာရှိကြီးအချို့ကိုသာ ပစ်မှတ်ထားမည်ဖြစ်ရာ နိုင်ငံစီးပွားရေးနှင့် ကုန်သွယ်ရေး အခန်းကဏ္ဍများအား ဆိုးဆိုးရွားရွား ထိခိုက်နစ်နာစေမည် မဟုတ်ပေ။ သို့သော် ယခုလအစောပိုင်း လုံခြုံရေးကောင်စီ အစည်းအဝေးပွဲတွင် ဗီတိုအာဏာ အသုံးပြုခွင့်ရှိသည့် တရုတ်နှင့် ရုရှားတို့က ရခိုင်ပြည်နယ်၏ အခြေအနေမှာ ယခုအခါ တည်ငြိမ်မှု ရှိနေပြီး ကောင်းစွာ ထိန်းချုပ်နိုင်သည့် အနေအထားတွင်ရှိသည်ဟု ယုံကြည်ကြောင်း ပြောဆိုထားသည့်ကြားမှ အီးယူက ဒဏ်ခတ် အရေးယူမည့်ကိစ္စကို စဉ်းစားခြင်းသည် ဥရောပသမဂ္ဂ အနေနှင့် ရခိုင်အရေးတွင် မြန်မာနိုင်ငံအပေါ် သံသယများ ရှိနေသည်ဟူသောအချက်ကို ဖော်ပြလိုက်ရာ ရောက်ပေသည်။ 

တိုက်ဆိုင်သည်ဟုပင် ဆိုရမည်။ အီးယူက ဒဏ်ခတ် အရေးယူရန် သဘောတူညီထားပြီဖြစ်ကြောင်း သတင်းထုတ်ပြန်သည့်နေ့တွင်ပင် ကမ္ဘာ့အကြီးဆုံး လူမှုကွန်ရက်ဖြစ်သည့် Facebook က မြန်မာနိုင်ငံတွင်း အမျိုးသားရေး အစွန်းရောက်သည့် သဘောတရားနှင့် စကားများ ပြောဆိုလေ့ရှိသလို နိုင်ငံတကာ အသိုင်းအဝိုင်းတွင် “Buddhist Bin Laden”ဟု သတ်မှတ်ခေါ်ဆိုခံနေရသည့် ဘုန်းကြီးတစ်ပါး အသုံးပြုနေသော Page ကို ဖယ်ရှားလိုက်ပြီဖြစ်ကြောင်း သတင်းထုတ်ပြန်သည်။ အကြောင်းမှာ ယင်းလူမှုကွန်ရက်၏ စည်းမျဉ်းအရ လူ့အဖွဲ့အစည်းအတွင်းရှိ အခြားသူများအပေါ် ရန်ငြိုးသိုပြီး အကြမ်းဖက်မှုများ ပြုလုပ်ရန် ရည်ရွယ်ချက်ရှိရှိ လုပ်ဆောင်သူ အဖွဲ့အစည်းများနှင့် လူပုဂ္ဂိုလ်များကို ကန့်သတ်ပိတ်ပင်မည်ဖြစ်ကြောင်း Facebook ၏ ပြောရေးဆိုခွင့်ရှိသူက ရှင်းပြသည်ကို တွေ့ရပါသည်။ 

ဗုဒ္ဓဘာသာအများစုနေထိုင်ရာ နိုင်ငံတွင် ဘာသာနှင့် လူမျိုးမတူသူများအကြား ကာလကြာရှည်စွာ အေးအေးချမ်းချမ်း ခင်ခင်မင်မင် နေထိုင်ခဲ့သည်ကို မြန်မာနိုင်ငံသားများ အသိပင်ဖြစ်သော်လည်း နိုင်ငံတကာ အသိုင်းအဝိုင်း၏ အတွေးအမြင်ထဲတွင် အစွန်းရောက် အမျိုးသားရေး အင်အားစုများ အထူးပင် အားကောင်းနေပြီး ၎င်းတို့က လူမျိုးဘာသာခြားများအပေါ် နိုင်ထက်စီးနင်းပြုရန် အစွမ်းကုန် သွေးထိုးလှုံ့ဆော်လျက်ရှိသည်ဟု ရှုမြင်နေသည်မှာ သေချာသလောက် ရှိနေပေသည်။ 

မြန်မာတို့၏ အယူအဆအရ ကိုယ်ကောင်းလျှင် ခေါင်းမရွေ့၊ ကိုယ်မှန်နေရင် မည်သူကိုမျှ ဂရုစိုက်စရာ မလိုဟူသည်မှာ မှန်သော်လည်း နိုင်ငံတကာ အသိုင်းအဝိုင်း၊ အထူးသဖြင့် အီးယူကဲ့သို့ မြန်မာအပေါ် နိုင်ငံရေး စွက်ဖက်မှုနှင့် အခြားလော်ဘီများ လုပ်လေ့လုပ်ထ မရှိသော အဖွဲ့အစည်းမျိုးနှင့် ရင်ဆိုင်လာရသော ကိစ္စတွင်မူ မိမိဘက်က မှန်ကန်စွာ ပြုမူနေထိုင်လျက်ရှိကြောင်း သက်သေထူပြရန် လိုအပ်မည် ထင်ပါသည်။ လက်ရှိ အစိုးရခေါင်းဆောင်များ နိုင်ငံတကာ အသိုင်းအဝိုင်းတွင် နာမည်ပျက်စေရုံ သာမက ပြည်တွင်း၌လည်း နိုင်ငံရေးဩဇာ ကျဆင်းရန်အလို့ငှာ အစွန်းရောက်သည့် အမျိုးသားရေး သဘောတရားများကို အသုံးချကာ ခဲတစ်လုံးတည်းဖြင့် ငှက်နှစ်ကောင်မက ပစ်မည်ဟူသော ရည်မှန်းချက်မျိုး ထားမိပါက မိမိရော မိမိချစ်မြတ်နိုးသည့် လူ့အဖွဲ့အစည်းပါ ဂုဏ်သိက္ခာ ညှိုးနွမ်းရမည်ကို အထူး သတိပြုသင့်ပေသည်။ 

ဆိုလိုသည်မှာ မိမိနိုင်ငံ၊ မိမိဘာသာနှင့် မိမိလူ့အဖွဲ့အစည်းကို အမှန်တကယ် ချစ်သည်ဆိုပါက ဆင်ခြင်တုံတရား ကင်းမဲ့သည့် အပြုအမူ၊ အပြောအဆိုတို့ကို အထူး သတိထားရှောင်ကြဉ်ရန် လိုအပ်သလို ဘင်္ဂါလီကိစ္စကြောင့် နိုင်ငံတကာ အသိုင်းအဝိုင်း အလယ်တွင် နိုင်ငံဂုဏ်သိက္ခာ မကျဆင်းအောင် ကြိုးပမ်းလုပ်ဆောင်နေသူများကို စစ်မှန်သည့် နိုင်ငံချစ်စိတ်ဖြင့် ပံ့ပိုးကူညီကြရမည်သာ ဖြစ်ကြောင်း ဖော်ပြလိုရင်းဖြစ်ပေသည်။ 

အယ်ဒီတာ (၂၇-၂-၂၀၁၈)

  • TAGS