News

POST TYPE

EDITORIAL

အားကြီးသည့် နိုင်ငံ့ခေါင်းဆောင်များ (Daily, Vol-5.No-274)
26-Feb-2018

မြန်မာနိုင်ငံ၏ အိမ်နီးချင်း နိုင်ငံများအနက် သံတမန်ဆက်ဆံရေး အရသာမက မဟာဗျူဟာ ဆက်ဆံရေးအတွက်ပါ အထူးအရေးပါလှသည့် တရုတ်ပြည်သူ့ သမ္မတနိုင်ငံကို အဓိက ပဲ့ကိုင်နေသော တရုတ်ကွန်မြူနစ်ပါတီက ဖွဲ့စည်းပုံအခြေခံ ဥပဒေပါ နိုင်ငံတော်သမ္မတအဖြစ် တာဝန်ထမ်းဆောင်ခွင့်ပြုသည့် သက်တမ်းကန့်သတ်ချက်ကို ဖယ်ရှားပစ်ရန် ဖေဖော်ဝါရီ ၂၅ ရက်နေ့က အဆိုပြုလိုက်သည့်သတင်းမှာ အိမ်နီးချင်းအာရှနိုင်ငံများသာမက ကမ္ဘာ့နိုင်ငံ အတော်များများ၏ စိတ်ဝင်စားခြင်း ခံခဲ့ရပေသည်။ ကွန်မြူနစ်ပါတီ၏ ယင်းအဆိုပြုချက်ကြောင့် ပြီးခဲ့သည့် ၂၀၁၃ ခုနှစ်ကစတင်ကာ နိုင်ငံတော်သမ္မတ ဖြစ်လာခဲ့သူ ရှီကျင့်ဖျင်အနေနှင့် လာမည့် ၂၀၂၃ ခုနှစ်ကျော်လွန်သွားသော်လည်း သမ္မတရာထူးကို ဆက်လက် ရယူထားနိုင်တော့မည် ဖြစ်ပေသည်။

အခြေခံဥပဒေပါ ယခင် ကန့်သတ်ချက်အရ တရုတ်သမ္မတတို့၏သက်တမ်းမှာ ငါးနှစ်ဖြစ်ပြီး နှစ်ကြိမ်သာ တာဝန်ထမ်းဆောင်ခွင့်ရှိရာ ရှီကျင့်ဖျင်အနေနှင့် ၂၀၂၃ ခုနှစ်တွင် မဖြစ်မနေ ရာထူးကဖယ်ရှားပေးရမည် ဖြစ်သည်။ ငါးနှစ်တစ်ကြိမ် ကျင်းပသည့် ကွန်မြူနစ်ပါတီကွန်ဂရက်တွင် နောင်တက်မည့် မျိုးဆက်သစ်သမ္မတ တစ်ဦးဦးကို လက်ဆွဲခေါ်ယူကာ လူလုံးထုတ်ပြသည့် အစဉ်အလာ ရှိခဲ့သော်လည်း ယမန်နှစ်က ကျင်းပပြုလုပ်ခဲ့သည့် ပါတီကွန်ဂရက်တွင်မူ ယခင်ဟူကျင်တောင်လက်ထက်က ရှီကျင့်ဖျင်ကို ဆွဲထုတ်ပြခဲ့သည့်ပုံစံမျိုး တစ်စုံတစ်ယောက်ကိုမျှ ထုတ်ပြနိုင်ခြင်းမရှိခဲ့ပေ။

သို့အတွက်ကြောင့် ယမန်နှစ်က ပါတီကွန်ဂရက်အပြီးတွင် တရုတ်ပြည်တွင်းရေးကို လေ့လာစောင့်ကြည့်သူများက ရှီကျင့်ဖျင်အနေနှင့် ကွန်မြူနစ်ပါတီ၏ အဓိကကျသော ခေါင်းဆောင်ပိုင်းနေရာတွင် ဆက်လက် တာဝန်ယူမည်ဖြစ်သော်လည်း ၂၀၂၃ ခုနှစ်တွင် တရုတ်သမ္မတ မည်သူမည်ဝါ ဖြစ်လာမည်ကို ခန့်မှန်း၍ မရနိုင်ဘဲ ဖြစ်ခဲ့ကြပေသည်။ သို့သော်လည်း ရှီကျင့်ဖျင်ကို တရုတ်ပြည်သူ့သမ္မတနိုင်ငံ၏ နိုင်ငံပြုပုဂ္ဂိုလ်များ စာရင်းတွင် မော်စီတုံးတို့နှင့် တစ်တန်းတည်းထားကာ ဖော်ပြခဲ့သလို ရှီကျင့်ဖျင်လက်ထက် ပြုပြင်ပြောင်းလဲရေး ခြေလှမ်းများကို တရုတ်အစိုးရနှင့် ပါတီက အစွမ်းကုန် ချီးမွမ်းခန်းထုတ်ပြခဲ့ရာ ရှီကျင့်ဖျင်သည် တရုတ်နိုင်ငံရေးအတွက် နှယ်နှယ်ရရ ပုဂ္ဂိုလ်မဟုတ်မှန်းတော့ သိခဲ့ရပါသည်။

ဒေါ်အောင်ဆန်းစုကြည် နိုင်ငံတော် အတိုင်ပင်ခံပုဂ္ဂိုလ်မဖြစ်ခင်၊ တစ်နည်း အားဖြင့် နိုင်ငံရေးအာဏာမရခင်ကတည်းက သူမကို ဘေဂျင်းသို့ဖိတ်ခေါ်ကာ ကော်ဇောနီဖြင့် ဧည့်ခံကြိုဆိုခဲ့ဖူးသည့် ရှီကျင့်ဖျင်သည် ယခုအခါ တရုတ်နိုင်ငံရေး လောကတွင်သာမက မျက်မှောက်ခေတ် ကမ္ဘာ့နိုင်ငံရေးတွင်ပါ ဩဇာကြီးမားသည့်ပုဂ္ဂိုလ်တစ်ဦးဖြစ်လာသလို ၎င်းဦးဆောင်သည့် ဘေဂျင်းအစိုးရ၏ မူဝါဒများနှင့် ခြေလှမ်းများကိုလည်း ကမ္ဘာ့နိုင်ငံကြီးများကပင် အနီးကပ် စောင့်ကြည့်နေကြရပေသည်။ ထို့ပြင် ၎င်း၏အစိုးရသည် ရခိုင်အရေးကိစ္စကြောင့် နိုင်ငံတကာ အသိုင်းအဝိုင်းတွင် မြန်မာအစိုးရ ဘေးကျပ်နံကျပ်ဖြစ်ရသည့် အခြေအနေ အတော်များများမှ လွတ်မြောက်အောင်လည်း ကူညီပေးခဲ့သလို ဒီမိုကရေစီ အသွင်ကူးပြောင်းရေး၊ ပြည်တွင်းငြိမ်းချမ်းရေး စသည်တို့ကိုလည်း ထောက်ခံမည့်အပြင် ကူညီပံ့ပိုးမည်ဖြစ်ကြောင်း မကြာခဏဆိုသလို အသိပေး ပြောဆိုလေ့ ရှိခဲ့ပေသည်။

မြန်မာနှင့် အိမ်နီးချင်း တရုတ်တို့သည် လက်ရှိကျင့်သုံးနေသော နိုင်ငံရေးစနစ်အရ လုံးလုံးလျားလျား တူညီမှုမရှိသော်လည်း နှစ်နိုင်ငံအကြား ဘုံတူညီသည့်အကျိုးစီးပွားမှာ တစ်ဦး၏ အပြုအမူကြောင့် ကျန်တစ်ဦးပြဿနာ မဖြစ်ရေးနှင့် တည်ငြိမ်အေးချမ်းမှု၊ တရားဥပဒေ စိုးမိုးမှုပြည့်ဝသည့် နယ်စပ်ဒေသများ ဖန်တီးနိုင်ရေးပင်ဖြစ်ရာ၂၀၂၃ နောက်ပိုင်း ရှီကျင့်ဖျင်သမ္မတရာထူး ဆက်လက် ရယူနိုင်ရေးအတွက် ကွန်မြူနစ်ပါတီ၏ကြိုးပမ်းချက်ကို ဒီမိုကရေစီမဆန်သော၊ အာဏာရှင်မွေးလိုသောလုပ်ရပ်ဟု ဝေဖန်နေလျှင် အချည်းအနှီးသာပင် ဖြစ်ပေ လိမ့်မည်။

တစ်ဖက်တွင် ယနေ့ကမ္ဘာ့အင်အားကြီးနိုင်ငံကြီးအချို့၏ ခေါင်းဆောင် များဖြစ်ကြသည့် ဗလာဒီမာပူတင်နှင့် အင်ဂလာမာကဲတို့လို ပုဂ္ဂိုလ်မျိုးနိုင်ငံရေး အာဏာ ဆက်လက်မြဲမြံနေသည့်ကိစ္စမျိုးကို ကြည့်မည်ဆိုလျှင်လည်း နိုင်ငံရေး ဩဇာပြင်းထန်သည့်ခေါင်းဆောင် (Strong Leader) များကို ပြည်သူအများစုက လိုလိုလားလားရှိနေကြသည်ကို တွေ့နိုင်ပေသည်။ ဆိုလိုသည်မှာ နိုင်ငံရေးစံ နှုန်းများနှင့်ကိုက်ညီသည်ဖြစ်စေ၊ မကိုက်ညီသည်ဖြစ်စေ ပြည်သူလူထုနှင့် လူ့အဖွဲ့အစည်းများ ကမောက်ကမ မဖြစ်အောင် ထိန်းသိမ်းပဲ့ကိုင်ပေးနိုင်သည့် ခေါင်းဆောင်မျိုး ဖြစ်လာသည်နှင့်အမျှ ပြည်သူသာမက ပြည်သူကိုကိုယ်စားပြု သည့်နိုင်ငံရေးသမားများကပါ သူ့အလိုလို လိုလိုလားလား ထောက်ခံလာတတ်ကြောင်းနှင့် နိုင်ငံရေး ဩဇာကြီးမားသည့် Strong Leader များဟူသည် နိုင်ငံနှင့် ပြည်သူ အကျိုးတစ်ခုတည်း သာမက ၎င်းတို့နှင့် ဆက်စပ် ပတ်သက်နေသော နိုင်ငံများ၏အကျိုးကိုပါ ဆောင်ကြဉ်းပေးနိုင်သူများဖြစ်ကြောင်း ဖော်ပြလိုရင်း ဖြစ်ပေသည်။

အယ်ဒီတာ (၂၅-၂-၂၀၁၈)