News

POST TYPE

EDITORIAL

ဗီလိန်ကြီးစိုးသော လူ့အဖွဲ့အစည်းလော (Daily, Vol-5/No-270)
21-Feb-2018
ဗီလိန်ဟု နှုတ်ကျိုးနေကြသည့် လူဆိုး သို့မဟုတ် လူကြမ်းကို အင်္ဂလိပ်ဘာသာဖြင့် Villain ဟုခေါ်သည်။ အင်္ဂလိပ်- မြန်မာ အဘိဓာန်တွင် “လူဆိုး၊ လူသွမ်း၊ ကြေးစား ရာဇဝတ်ကောင်၊ ပြဇာတ်၊ ဝတ္ထု၊ ရုပ်ရှင်များတွင် အဓိက လူကြမ်းသရုပ်ဆောင်၊ ယုတ်မာသောသူ”ဟု အနက်ဖွင့်ဆိုထားသည်။

ဗီလိန်တို့မည်သည် မည်သည့်အခါမျှ စိတ်ကောင်း၊ နှလုံးကောင်း ရှိသူများမဟုတ်ဘဲ တစ်ပါးသူ အကျိုးစီးပွား ပျက်စီးရာ ပျက်စီးကြောင်း အမြဲ ကြံစည်အားထုတ်ကာ လက်တွေ့လည်း လုပ်ဆောင်နေတတ်သူများဟု အများ နားလည်ထားကြသည်။

မည်သည့်နယ်ပယ်၊ မည်သည့် လူ့အဖွဲ့အစည်းတွင်မဆို ဗီလိန်များ ရှိနေတတ်ပြီး ထိုဗီလိန်များကြောင့်ပင် သက်ဆိုင်ရာ နယ်ပယ်၊ လူ့အဖွဲ့အစည်း အသီးသီး တိုးတက်ဖွံ့ဖြိုးသင့်သလောက် မဖွံ့ဖြိုးဘဲ ပြဿနာများဖြင့် နပန်းလုံးနေတတ်သည်။

ဗီလိန်များသည် ဖွံ့ဖြိုးပြီးသော နိုင်ငံများရော၊ မဖွံ့ဖြိုးသေးသော နိုင်ငံများတွင်ပါ ရှိတတ်သော်လည်း များသောအားဖြင့် ဖွံ့ဖြိုးမှုနောက်ကျနေသော နိုင်ငံများတွင် အတွေ့ရများတတ်သည်။ 

အထူးသဖြင့် ပုံစံအမျိုးမျိုးဖြင့် အာဏာရှင်စနစ် ကျင့်သုံးသော နိုင်ငံများတွင် ဗီလိန်များက ပုံစံအမျိုးမျိုးဖြင့် ရှိနေတတ်သည်။ နိုင်ငံရေး၊ စီးပွားရေး၊ လူမှုရေး လောက အသီးသီးတွင် အာဏာရလိုမှု၊ ကြွယ်ဝချမ်းသာရေး လောဘတို့ မောင်းနှင်မှုကြောင့် စာရိတ္တ၊ ကျင့်ဝတ်နှင့် အသိပညာရေချိန်များ နိမ့်ကျကာ ဗီလိန်များ မွေးဖွားလာတတ်သည်။

အခြေခံအားဖြင့် နိုင်ငံတစ်ခု၏ ဓနဥစ္စာ ခွဲဝေမှု အချိုးမညီမျှမှု သို့မဟုတ် လူတိုင်း ကိုယ်စွမ်းဉာဏ်စွမ်းရှိသရွေ့ တိုးတက်ကြီးပွားခွင့်ကို ဖန်တီးပေးမည့် မူဝါဒနှင့် ဥပဒေစည်းမျဉ်းများ အားနည်းချည့်နဲ့မှုတို့က ဗီလိန်များ မွေးဖွားလာစေရန် အဓိကပံ့ပိုးပေးသည်။

မူမမှန်သောနည်းလမ်း သို့မဟုတ် မမျှတသော နည်းလမ်းဖြင့် လုပ်ပိုင်ခွင့် ရရှိထားသူ၊ စီးပွားလမ်းဖြောင့် ချမ်းသာကြွယ်ဝထားသူများသည် ပုံစံတကျ၊ စည်းကမ်းတကျ မှန်ကန်သော နည်းလမ်းများဖြင့် အများနှင့် တန်းတူရည်တူ ပြိုင်ဆိုင်ရပါက လက်ရှိ လုပ်ပိုင်ခွင့်နှင့် လက်ရှိစည်းစိမ်မျိုး ရရှိရန် လမ်းမမြင်ပေ။

ထို့ကြောင့် မိမိတို့၏ လက်ရှိအခြေအနေ မယိမ်းယိုင်သွားစေရေးအတွက် မူမမှန်သော၊ မမျှတသော နည်းလမ်းအမျိုးမျိုးဖြင့်ပင် ၎င်းတို့၏ လုပ်ပိုင်ခွင့်နှင့် စည်းစိမ်ကို ကာကွယ်လာကြသည့်အခါ ဗီလိန်များအဖြစ် ရောက်ရှိသွားတော့သည်။

ထို့ကြောင့် အာဏာရှင်စနစ်၊ အခွင့်အရေး သာတူညီမျှမရှိခြင်း၊ ဆင်းရဲတွင်းနက်ခြင်း၊ အကျင့်ပျက်ခြစားခြင်း၊ တရားဥပဒေ မစိုးမိုးခြင်းတို့သည် လူ့အဖွဲ့အစည်း တစ်ရပ်အတွင်း ဗီလိန်များကိုသာ တိုးပွားလာစေသော အဓိက အကြောင်းအရင်းများဖြစ်ကြသည်။

လူ့အဖွဲ့အစည်းတိုင်းတွင် ကိုးကွယ်ယုံကြည်မှုဆိုင်ရာ ဘာသာရေး ခေါင်းဆောင်များ၏ အခန်းကဏ္ဍက များစွာ အရေးကြီးသည်။ သက်ဆိုင်ရာ ဘာသာအသီးသီး၏ အမွန်အမြတ်တရား သို့မဟုတ် တော်တည့် မှန်ကန်သည့် အဆုံးအမများကို လူအများအား ပြန်လည် ဆုံးမသွန်သင်ပေးရမည့် တာဝန်ကို ထမ်းဆောင်နေကြခြင်းကြောင့် အရေးကြီးခြင်းဖြစ်သည်။

ထိုတာဝန်ယူထားသည့် နယ်ပယ်မှ ပုဂ္ဂိုလ်အချို့ ကိုယ်တိုင် အစစ်အမှန် အဆုံးအမများနှင့် သွေဖည်ဆန့်ကျင်သော အပြုအမူ၊ အပြောအဆိုများ အတင့်ရဲရဲ ဖြစ်ပေါ်လာခြင်း၊ ယင်းအခြေအနေကိုလည်း လျစ်လျူရှုထားခြင်း၊ အာဏာနိုင်ငံရေးနှင့် ဆက်စပ်နေဖွယ်ရှိကြောင်း သံသယဖြင့် ဝေဖန်မှုများ မြင့်တက်လာခြင်းတို့သည် ဗီလိန်များကို အားပေး၊ အားမြှောက်ပြုသကဲ့သို့ ဖြစ်နေသည်။

ပွင့်လင်းမျှတသော လူ့အဖွဲ့အစည်းသို့ သွားရာလမ်းတွင် ဗီလိန်များက သက်ဆိုင်ရာ နယ်ပယ်အသီးသီး၌ မထိရဲ၊ မတို့ရဲ ရှိနေပါလျှင် ဗီလိန် အားပေး လူ့အဖွဲ့အစည်းအဖြစ် ယဉ်ကျေးသော လူ့ဘောင်၊ လူ့အသိုင်းအဝိုင်းက ဖယ်ကြဉ်၊ ရှောင်ရှားခြင်းကိုခံရပြီး ဗီလိန်မဟုတ်သော မြေစာပင်များသာ ဒုက္ခပင်လယ် ဝေရမည်ဖြစ်ကြောင်း သိစေအပ်ပေသည်။

အယ်ဒီတာ (၂၀-၂-၂၀၁၈)