News

POST TYPE

EDITORIAL

ဆွမ်းဆန်ထဲက ကြွက်ချေးများ (Daily, Vol-5/No-269)
20-Feb-2018

ယခုရက်ပိုင်းအတွင်း ရဟန်းပုဂ္ဂိုလ်တစ်ဦး၏ ဗုဒ္ဓ၏အဆုံးအမနှင့် မလျော်ညီသော ပြောဆို၊ ကြုံးဝါးမှုနှင့်ပတ်သက်၍ အွန်လိုင်း လူမှုကွန်ရက်ပေါ်တွင် သာမက ပြင်ပ လူမှုပတ်ဝန်းကျင်တွင်ပါ ဝေဖန်ပြောဆိုမှုများဖြင့် ပွဲဆူလျက်ရှိသည်။

အမျိုးသားဒီမိုကရေစီအဖွဲ့ချုပ် (NLD) ပါတီ၏ ဥပဒေအကြံပေး ဦးကိုနီကို လူမြင်ကွင်းတွင် သေနတ်ဖြင့် ပစ်ခတ်လုပ်ကြံခဲ့သော ကြည်လင်းက တရားခွင်တွင် တရားလိုရှေ့နေများနှင့် သတင်းလာယူသော သတင်းသမားများကို ကြိမ်းဝါးခဲ့သည်ဟုဆိုသော “မင်းတို့ ထမင်းဝအောင် စားထား”ဟူသော စကားကို အဆိုပါရဟန်းပုဂ္ဂိုလ်က အများပြည်သူ သိရှိအောင် ဒုတိယမ္ပိ ပြောဆိုခြင်းဖြစ်သည်။

ယင်းသို့ ကြုံးဝါးသည့်စကားကို မကြာသေးခင် ရက်ပိုင်းက ကြည်လင်းကိုရုံးထုတ်စဉ် လူအချို့က “မင်းတို့ ထမင်းဝအောင် စားထား”ဆိုသော စကားလုံးများ ရိုက်နှိပ်ထားသည့် တီရှပ်များဝတ်ဆင်၍လည်းကောင်း၊ အနက်ရောင်ဝတ်စုံများ၊ လက်ပတ်များဖြင့်လည်းကောင်း ကြည်လင်းအား ထောက်ခံဝန်းရံကြောင်း ပြသခဲ့ကြသည်။

ယင်းဖြစ်စဉ်များကိုကြည့်လျှင် အကြမ်းဖက်၊ လူသတ်ခြင်းကို လူပုဂ္ဂိုလ်အချို့ သာမက ရဟန်းပုဂ္ဂိုလ်အချို့ကပါ ထောက်ခံကြောင်း လူသိရှင်ကြား ပြသလာပြီး မြန်မာလူ့အဖွဲ့အစည်းကို အကြီးအကျယ် စိန်ခေါ်လိုက်ခြင်းဖြစ်သည်။

လူလယ်ကောင်တွင် လူသတ်ရာဇဝတ်မှု ကျူးလွန်ထားသူတစ်ဦးကို တရားရုံးကဲ့သို့ နေရာမျိုးတွင် ပေါ်ပေါ်တင်တင် ထောက်ခံဝန်းရံခဲ့ကြသူများကို သက်ဆိုင်ရာ ရဲတပ်ဖွဲ့နှင့် တရားရုံးတို့မှ တာဝန်ရှိသူ ရဲအရာရှိနှင့် တရားသူကြီးတို့က ဥပဒေကြောင်းအရ အရေးယူခြင်း မရှိခဲ့ပေ။

အများပြည်သူနှင့် သက်ဆိုင်သော တရားရုံးတွင် လူသတ်သမားကို အားပေးထောက်ခံခြင်း ဖြစ်သော်လည်း အစိုးရမဟုတ်သော မြန်မာနိုင်ငံ ရှေ့နေများအသင်း၏ တိုင်တန်းချက်ရမှသာ ဝရမ်းထုတ်ဖမ်းဆီးရန် ပြင်ဆင်ခြင်းမှာ များစွာ နားလည်ရ ခက်သွားစေခဲ့သည်။

ယခုတစ်ဖန် အမျိုးသားရေးဝါဒကို ဘာသာတရားနှင့် ရောစွက် ဟောပြောလေ့ရှိသူ ရဟန်းပုဂ္ဂိုလ်တစ်ဦးက တစ်ပါးတည်း၏ ဗီဒီယိုဖိုင်ကို အွန်လိုင်းပေါ်တွင် လွှင့်တင်ခြင်း၊ အခြားသော ရဟန်းသံဃာများ ပါဝင်သည့် အခမ်းအနားတစ်ခုတွင် ယင်းကြုံးဝါးသံကိုပင် ဟစ်ကြွေးသံအဖြစ် တိုင်ပေးခြင်းတို့မှာ သံဃာလောကနှင့် ဘာသာတရားအတွက်ပင် များစွာ ရင်လေးဖွယ် ဖြစ်သွားစေခဲ့သည်။

ယခင့်ယခင်ကာလများကလည်း အဆိုပါ ရဟန်းပုဂ္ဂိုလ်နှင့်အတူ ၎င်းကို တစ်စုံတစ်ရာ ရည်ရွယ်ချက်ဖြင့် ရှေ့တန်းတင်ထားသူ သို့မဟုတ် ၎င်းအား ကိုးကွယ်ဆည်းကပ်သူ နောက်လိုက်များက ဘာသာရေး ရောယှက် အမျိုးသားရေး ဟောပြောပွဲများ၊ လှုပ်ရှားတောင်းဆို၊ ဆန္ဒပြမှုများဖြင့် အင်အားပြခဲ့ကြပြီးဖြစ်သည်။

အဆိုပါ ရဟန်းပုဂ္ဂိုလ်၏ မယဉ်မကျေး ဖရုသဝါစာ ပြောဆိုမှုများ၊ အစွန်းရောက်ဆန်ဆန် မှတ်ချက်ပေး၊ လှုပ်ရှားမှုများ မည်သို့ပင် ဗုဒ္ဓအဆုံးအမများနှင့် သွေဖည်၊ ရဟန်းဝိနည်းတော်များနှင့် ဆန့်ကျင်နေစေကာမူ သံဃာ့အဖွဲ့အစည်းကသော်လည်းကောင်း၊ ပြည်ထဲရေးဝန်ကြီးဌာနကသော်လည်းကောင်း ယနေ့အချိန်အထိ အသံတိတ်၊ နှုတ်ဆိတ်နေခြင်းမှာ များစွာ နားလည်ရခက်လှသည်။

စင်စစ်အားဖြင့် မြတ်ဗုဒ္ဓ၏ အစစ်အမှန် အဆုံးအမများမှာ လောက နိယာမများ၊ စကြဝဋ္ဌာလုံးဆိုင်ရာ အမှန်တရားများအပေါ် အခြေခံထား၍ လောက လူ့ဘောင်အတွက် အငြင်းပွားဖွယ်ရာမရှိ တန်ဖိုးရှိ၊ အကျိုးရှိလှသော အမြိုက်တရားများဖြစ်သည်။

အေးချမ်းမှု၊ ခွင့်လွှတ်သည်းခံမှု၊ ကိုယ်ချင်းစာနာမှု၊ မေတ္တာတရားများအပေါ် အခြေခံထားသော တန်ဖိုးရှိလှသည့် မြတ်ဗုဒ္ဓ၏ အဆုံးအမများကို လူအများအား ပြန်လည် ဟောပြောသွန်သင် ဆုံးမရမည့် သံဃာ့ဂိုဏ်းဝင် ရဟန်းတစ်ပါးက အမုန်းမီးတောက်များဖြင့် ပူပူလောင်လောင် ကြုံးဝါးနေခြင်းမှာ သံဃာ့အဖွဲ့အစည်းနှင့် သာသနာတော်ကို အများအမြင် အထင်အမြင်သေးစေရန် နှိမ်ချစော်ကားခြင်းနှင့် အလားသဏ္ဌာန် တူပေသည်။

ယင်းကဲ့သို့ စော်ကားနှိမ်ချမှုမျိုး နောင်တွင် ထပ်မံ မဖြစ်ပေါ်စေရန် အချိန်မီ မထိန်းသိမ်းနိုင်ပါက သံဃာ့အဖွဲ့အစည်း သာမက သာသနာတော်တစ်ခုလုံးနှင့် ယဉ်ကျေးသော မြန်မာလူ့အဖွဲ့အစည်းတစ်ခုလုံး ကမ္ဘာ့အသိုင်းအဝိုင်းတွင် ယခုထက် ပို၍အကြီးအကျယ် အရှက်ရသိက္ခာကျသွားမည်ဖြစ်ကြောင်း သတိပေး ထောက်ပြလိုရင်းဖြစ်သည်။

အယ်ဒီတာ (၁၉ -၂ -၂၀၁၈)